Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

'Lu Nen ken Dooshima U Aôndo'

 ITYOUGH 6

Er Ú Tsua Iemberyolough i Dedoo Yô

Er Ú Tsua Iemberyolough i Dedoo Yô

“Eren nen akaa cii sha ci u icivir i Aôndo”—1 MBAKORINTE 10:31.

1, 2. Ka iemberyolough i nyi i gbe u se tsuaa?

TÔÔ ase wer, u soo u yan ityamegh ki kon u nyohon; u kenden wer u nyima yô u mase nengen wer ki hôô vegher ugen. Nahan ú er nena? Wea soo yô, ú ya ki cica cii, kua vegher u a hee la kpaa; gayô ú ta ki kera jimin cii; shin ú tôndo vegher u a hee la ú ta kera, ú ya vegher u dedoo la tseegh. Kanyi ú eree?

2 Iemberyolough ngi er ityamegh ki kon la nahan. Ashighe agen ka ú soo u eren ma kwagh u nan we msaanyol kpa ú mase kaven er akaa kpishi a nan ior msaanyol a i eren nyian ne a hôngor kpishi shin a hee er ityamegh ki konough kira nahan yô. Nahan, ú er nena? Alaghga mbagenev vea nenge ér iemberyolough i tar ne ia doo ga kpa vea gba nôngon a mi tsô. Mbagenev di, vea venda hanma iemberyolough cii sha ci u ve soo ér vea hôngor ayol a ve sha ma kwagh ga. Kpa mbagenev yô, alaghga vea ver ishima vea palegh iemberyolough i bo vea gema a eren iemberyolough i i we doon yô sha ashighe ashighe. Nahan ka iemberyolough i nyi i doo u u tsua sha er u lu ken dooshima u Aôndo here?

3. Kanyi se time sha mini?

3 Se mbagenev kpishi se tsua kwagh u sha utar la. Se nenge ser iemberyolough ka kwagh u dedoo kpa se soo u eren iemberyolough i ia hôngor se ga la tseegh. Sha nahan yô, se tôv se fa nen kwagh u a lu u dedoo sha ci wase man u a lu u dedoo ga la. Kpa hiihii yô, se time se nenge nen er iemberyolough  i se tsough u eren la ia fatyô u benden a mcivir wase yô.

“EREN NEN AKAA CII SHA CI U ICIVIR I AÔNDO”

4. Doo u iyoltseghan yase ia bende a iemberyolough i se eren la nena?

4 Anyom a karen ken ijime la, Orshiada u beenyol ugen, u yange er batisema ken inyom i 1946 yô kaa wener: “Hanma shighe u i lu nan kwaghôron u batisema yô ka m nôngo u lun her shi keghen ato zulee inja er m ngu eren batisema nahan.” Yange ôr nahan ver ishigh ér nyi? A pase ér, “Ka mea umbur er yange m tsegha iyol yam sha ci u Aôndo nahan, ishima i taver mo u kôron jighjigh wam her gbang.” Se fa ser we kpa u lumun a kwagh u orbeenyol ne a er ne. Aluer u ngu umbur hanma shighe wer yange u tôndo zwa a Yehova wer u civir un a uma wou cii yô, u za hemen u wan ishima. (Orpasenkwagh 5:4; Mbaheberu 10:7) Sha kpôô yô, aluer u ngu henen kwagh u iyoltseghan you ken ishima yô, kwagh ne una bende a gbenda u ú eren tom u Mbakristu u pasen kwagh la man akaa agen a u eren ken uma wou la kua iemberyolough kpaa. Kwagh u apostoli Paulu nger Mbakristu mba sha ayange a na la tese ér kwagh ne ka mimi. A nger ve ér: ‘Aluer nea yaan kwagh, shin nea maan kwagh shin nea eren nyityô kwagh kpaa, eren nen akaa cii sha ci u icivir i Aôndo.’—1 Mbakorinte 10:31.

5. Kwagh u i er ken Levitiku 22:18-20 la wase se u nengen mkaanem ma ken Mbaromanu 12:1 la ser ka icintan nena?

 5 Hanma kwagh u ú eren ken uma wou cii yô bende a gbenda u ú civir Yehova la. Paulu yange nger Mbaromanu washika ôr kwagh a mbananjighjigh a na imôngo sha gbenda u vea fa er akaa a ve eren ken uma ve la a bende a mcivir ve yô. A wa ve kwagh ér: “Gema nen ayol a en na nen nagh ku uma a mi, icighannagh ku doon Aôndo, ka mciviraôndo wen u ken jijingi je la.” (Mbaromanu 12:1) Iyol you wa mhen wou man ishima you man gbong gbong u iyolough wou kpa ker cii. Gba u ú civir Aôndo a akaa ne cii. (Marku 12:30) Paulu kaa ér u̱ civir Aôndo a uma wase cii nahan ne ka u̱ nan un nagh. Aluer u hen sha ishember i “nagh” ne dedoo yô, u nenge wer ngi a icintan sha ci wase. Sha shighe u Tindi u Mose la yô, or nana na Aôndo nagh ku ku lu a ihyogholough iyol yô á venda ku. (Levitiku 22:18-20) Orkristu kpa aluer tom u nan eren Aôndo la hôngor sha ma gbenda yô, una lumun a mcivir u nan la ga. Kpa mcivir wase una hôngor nena?

6, 7. Orkristu nana hôngor iyol i nan nena, man kanyi ia fatyô u duen ken ieren i nan nee?

6 Paulu wa Mbakristu mba ken Roma kwagh wener: “De ne nen alegh a en sha ikyev i isholibo . . . ga.” Paulu shi kaa a ve ér ve “wua aeren a iyolough” kera. (Mbaromanu 6:12-14; 8:13) Paulu yange vande tesen ve ikyav sha kwagh u a lu “aeren a iyolough” ken washika u nger ve ne. A ôr kwagh u mlu u uumace mba ve eren asorabo la ér: ‘Zwa ve iv a ityuhwanev.’ ‘Angahar a ve nga zan ayem sha u za haan awambe inya.’ “Mba cie Aôndo je ga.” * (Mbaromanu 3:13-18) Aluer Orkristu ngu yaren tom a “alegh” a iyolough a nan sha u eren akaabo a i ter sha heen ne yô, nana hôngor iyol i nan. U tesen ikyav yô, Orkristu u nan nengen akaa a dang sha televishen er ufoto mba ijimbagh shin ipila i vihin mbagenev iyol sha apera nahan cii yô, nan na “[ishe i nan] sha ikyev i  isholibo,” nahan yô nan hôngor iyol i nan jimin cii. Nahan aluer nan civir Aôndo nan nan kpa, nagh ku nanegh kura cii kera ku wang ga, nahan Aôndo una lumun ku ga. (Duteronomi 15:21; 1 Peteru 1:14-16; 2 Peteru 3:11) Nenge imba kwagh u vihin u a tser nan ne sha wono!

7 Sha mimi yô, nyityô iemberyolough i Orkristu nan tsough u eren cii kwagh a due ker u dedoo shin u bo. Nahan yô, se soo ser se eren akaa a nan ior msaanyol a aa hôngor nagh ku se ne Aôndo la ga, kpa i̱ lu akaa a aa na ve Aôndo una lumun nagh ku se ne un la yô. Se time ase nen se fa kwagh u a lu iemberyolough i dedoo man u a lu i bo la.

“NYAGH NEN KWAGH U A LU U IFER” YÔ

8, 9. (a) Ka avegher ahar a nyi se fatyô u paven iemberyolough kere? (b) Ka akaa a nan ior msaanyol a nyi nahan se nyaghena, man ka sha ci u nyi?

8 Se fatyô u paven iemberyolough ker avegher ahar. Vegher u hiihii la ka iemberyolough i Mbakristu ve nyaghen kuaa yô; vegher u sha uhar la di ka iemberyolough i Orkristu nana soo yô nana er shin nana er ga yô. Se hii tôvon nen sha vegher u hiihii la—ka iemberyolough i Mbakristu ve nyaghen i kuaa je la.

9 Er se vande ôron ken Ityough 1 nahan, akaa a nan ior msaanyol agen ka a Bibilo i vende wanger wanger yô. U tesen ikyav yô, hen ase sha kwagh u ajiir a sha Intanet man ityogholough man akaa a i tesen sha televishen kua ufiim mba tesen ior ipila i eren shin akombo shin ufoto mba ijimbagh shin ifer gayô aeren a dang agenegh la. Er akaa a nan ior msaanyol a bo ne nga a na ior ve lumun akaa a Bibilo i vende la yô, gba u Mbakristu mba mimi vea nyagh imba iemberyolough ne kuaa je. (Aerenakaa 15:28, 29; 1 Mbakorinte 6:9, 10; Mpase 21:8) Aluer u venda u eren iemberyolough i bo yô, u ngu tesen Yehova wer sha mimi je ú “nyagh . . . kwagh u a lu u ifer” yô, shi ú “de ifer” kpaa. Sha nahan yô, u ngu a “jighjigh u lun a imanger ga” la.—Mbaromanu 12:9; Pasalmi 34:14; 1 Timoteu 1:5.

10. Ka mhen u sha kwagh u iemberyolough u nyi a lu u bo, man ka sha ci u nyi?

 10 Kpa alaghga mbagenev vea hen ér u nengen ufoto mba ve tese idya i eren gbar gbar la ka kwaghbo ga. Vea kaa ér, ‘A lu m nenge akaa ne ken icer i vidio shin sha televishen kpa, mayange je me er imba kwagh la iyol yam ga.’ U nan hen nahan cii yô nan ngu tsughun iyol i nan; mhen ne ka u bo. (Yeremia 17:9) Aluer se mba nengen akaa a Yehova a vende la a ahan zwa yô, se fatyô u kaan ser mimi je se mba ‘nyaghen kwagh u a lu u ifer’ je kpa? Aluer se mba nengen akaa a ifer shi ôron kwagh u a ken ityakerada shin ungwan a hanma shighe yô, aa hôngor mhen wase. (Pasalmi 119:70; 1 Timoteu 4:1, 2) Ieren ne ia bende a gbenda u se eren kwagh shin se nengen isholibo i mbagenev la.

11. Ka a va sha kwagh iemberyolough nahan kwagh u i er ken Mbagalatia 6:7 la á lu mimi nena?

11 Kwagh ne er mbagenev kpôô kpôô. Mbakristu mbagenev er idya sha ci u akaa a ve nengen sha televishen shin ken icer i vidio hanma shighe la. Kwagh u a er ve ne na yô ve mase kaven ér ka ‘kwagh u or nan lee la shi nana sunda ye.’ (Mbagalatia 6:7) Kpa se fatyô u palegh injar i bo ne. Aluer u ver ishima ú lôô akaa a dedoo ken ishima you yô, u sunda akaa a dedoo saan saan.—Ôr ngeren u a lu a itinekwagh ér “Ka Iemberyolough i Nyi Nahan i Doo u Me Tsua u Erene?” la, ngu sha peeji 67.

AKAAWAN A BIBILO A̱ WASE U TSUA KWAGH U Ú ER YÔ

12. Kwagh u i nger ken Mbagalatia 6:5 la bende sha kwagh u iemberyolough nena, man kanyi ia wase se u tsuan kwagh u se eree?

12 Se time ase nen sha vegher u sha uhar la—ka iemberyolough i í lu a akaa ker a Mkaanem ma Aôndo ma vende a jighilii ga shi ma er kwagh u tesen wang ér ma lumun a mi keng ga yô. Aluer Orkristu nan soo u eren iemberyolough ingin yô, gba u nana tsua kwagh u nan nenge ér ka u dedoo la a ishima i nan. (Mbagalatia 6:5) Nahan kpa, akaawan  nga a aa wase se u fan kwagh u se er jighilii yô. Bibilo ngi a akaawan shin akaaôron a mimi a wasen se u fan mhen u Yehova. Aluer se tôv sha akaawan ne vighe vighe yô, se kôr cio u fan “er ishima i Ter i lu” sha akaa cii yô, kua sha kwagh u iemberyolough kpaa.—Mbaefese 5:17.

13. Kanyi ia mgbegha se u palegh iemberyolough i alaghga ia lu sha ishima i Yehova ga laa?

13 Sha mimi yô, mkav u hanma Orkristu sha kwagh u aeren a dedoo ngu kwaghmôm ga. (Mbafilipi 1:9) Heela  tseegh ga, Mbakristu fa er hanma or nan lu a iemberyolough i í hembe doon nan ishima yô. Nahan yô, doo u se ver ishima ser hanma Orkristu nana̱ eren iemberyolough i Mbakristu mbagenev ve eren la vough ga. Bee kera yô, aluer se mba dondon akaawan a Aôndo seer a seer yô, a hemba hangen se u palegh nyityô iemberyolough i se hen ser alaghga ia vihi Yehova ishima la cii.—Pasalmi 119:11, 129; 1 Peteru 2:16.

14. (a) Kanyi i doo u se hen sha mi zum u se soo u eren ma iemberyolougho? (b) Kanyi se er ve akaa a mcivir u Aôndo aa hemba lun se a inja?

14 Shi kwagh ugen kpa ngu u i doo u se hen sha mi zum u se lu tsuan ma iemberyolough i se er yô: ka shighe wase je la. Iemberyolough i ú eren la ngi i tese kwagh u á lu u vough sha ishigh you yô, kpa shighe u ú tee u eren i la di ngu a gema a tese kwagh u a hembe lun we a inja yô. Mbakristu yô, ka akaa a a zough sha kwagh u mcivir u Aôndo a hembe lun ve a inja ye. (Mateu 6:33) Nahan yô, ú er nan ve akaa a mcivir u Aôndo aa hemba lun we a inja? Apostoli Paulu kaa ér: “Nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan. Man waan nen ian yen ikyo.” (Mbaefese 5:15, 16) Sha kpôô yô, aluer u wa ikyo sha shighe u ú vihin u eren akaa a nan we msaanyol yô, kwagh ne una wase u u lu a shighe u eren “akaa a a hembe lun a inja yô,” ka akaa a aa wase u u seer kporom ikyua a Aôndo je la.—Mbafilipi 1:10.

15. Zum u se lu tsuan ma iemberyolough i se er yô er nan i doo u se ver ishima tsung-nu?

15 Shi doo u se ver ian gbangelaa zum u se soo u eren ma iemberyolough yô. Kanyi jim se lu ôronoo? Hide hen ase sha injakwagh i ityamegh ki kon la. Aluer u soo wer u ya vegher u hôôn la ga yô, u tôndo ape ki hee la u ta kera, kpa u tôndo her zengee ga, ú tôndo gbangelaa. Sha gbaa u iemberyolough kpa, hemba doon u se wa ikyo tsung sha er se gba bo ga yô. Orkristu u fankwagh nan palegh akaa a nan ior msaanyol a Bibilo i vende wanger wanger la, kpa ka angela  tseegh ga, akaa a waren shin iyol kua akaa á lun a ankaam ker mba vea fatyô u vihin mlu wase vea Yehova la kpa ka nan palegh. (Anzaakaa 4:25-27) Aluer ú ngu dondon kwaghwan u ken Mkaanem ma Aôndo kpoghuloo yô u fatyô u eren kwagh ne.

“HANMA KWAGH U WANG”

Ka sea dondon akaawan a Aôndo zum u se soo u tsuan iemberyolough i se er yô kwagh ne a wase se u yan ikyar vea Aôndo heregh

16. (a) Se tese ser se mba a mnenge u Yehova sha kwagh u aeren a dedoo man a bo nena? (b) U er nan ve a hingir ikye you u dondon kwaghwan u Bibilo hanma shighee?

16 Mbakristu mba mimi ka vea tsuan iemberyolough i vea er yô, ishima i hemba lun ve sha kwagh u a lu mnenge u Aôndo yô. Bibilo pase se mhen u Yehova man akaawan a na. U tesen ikyav yô, Tor Solomon ter akaa kpishi a Yehova a ker a ihyom yô, er “nombor u aiegh, ave a haan awambe a or u lun a ibo ga, ishima i henen mbamhen mba bov, angahar a zan ayem sha u za eren ifer” nahan. (Anzaakaa 6:16-19) Doo u mnenge u Yehova una bende a vese nena? Orpasalmi wa se kwagh ér, “ne mba TER A doo ne ishima yô, kôr nen kwaghbo ihyom.” (Pasalmi 97:10) Gba u akaa a u eren sha u zuan a msaanyol la aa tese ér mimi je u kôr akaa a Yehova a ker a ihyom la ihyom. (Mbagalatia 5:19-21) Shi fa kpaa wer, akaa a ú eren ken iuv la nga hembe tesen or u ú lu jim yô a akaa a u eren ken igbar ior ve nengen la. (Pasalmi 11:4; 16:8) Sha nahan yô, aluer hemba gban we ishima u lun a mnenge u Yehova sha kwagh u aeren a dedoo man a bo sha akaa  a u eren ken uma wou cii yô, tsuan ase akaa a a zough sha kwaghwan u Bibilo yô. Nahan a hingir ikye you u eren nahan hanma shighe cii.—2 Mbakorinte 3:18.

17. Cii man se tsua ma iemberyolough i se er yô, ka mbampin mba nyi i doo u se pine ayol a ase?

17 Kanyi kwagh igen kpa u er ve ú kôr cio u dondon mhen u Yehova zum u ú soo u eren ma iemberyolougho? Hen sha mpin ne, ‘Kwagh u m soo u eren ne una bende a mlu wam vea Aôndo nena?’ U tesen ikyav yô, zum u ú soo u nengen ma fiim yô, pine iyol you wer, ‘Kwagh u i tese ken tser ne una bende a imoshima yam nena?’ Se hen ase nen sha akaawan a se fatyô u yaren tom a mi sha kwagh ne yô.

18, 19. (a) Kwaghwan u a lu ken Mbafilipi 4:8 la una wase se se fa ser se mba eren iemberyolough i dedoo nena? (b) Ka akaawan agen a nyi nahan aa wase u ú tsua iemberyolough i dedoo? (Nenge ngeren u shin kpe la.)

18 Takerada u Mbafilipi 4:8 ngu a kwaghwan u injaa ugen sha ci wase, ijiir ne kaa ér: ‘Ver nen ishima sha hanma kwagh u mimi, man hanma kwagh u a kom icivir, man hanma kwagh u perapera man hanma kwagh u wang, man hanma kwagh u doon ishima, man hanma kwagh u a doo u ungwan kpaa. Aluer kwagh u hemban lun a inja una lu man kwagh una kuma iwuese yô, ver nen ishima sha akaa ne.’ Jighilii yô, Paulu yange lu ôron kwagh u iemberyolough heen ga, kpa lu kwagh u akaa a se henen ken asema a ase, a i doo u á lu akaa a sha ishima i Aôndo la. (Pasalmi 19:14) Nahan kpa, se fatyô u yaren tom a mkaanem ma Paulu man sha kwagh u iemberyolough kpaa. Nena yô?

19 Pine iyol wer, ‘Ufiim mba m nengen kua anumbe a vidio a m eren man ityogholough mbi m ongo shin akaa agen a nan mo msaanyol a m eren la nga ivin ishima yam a “hanma kwagh u wang” kpa?’ U tesen ikyav yô, ka wea nenge fiim wea bee nahan, ka akaa a nyi nahan ka u henen ken ishima? Aluer ka akaa a dedoo man a wang man a nan we msaanyol u mimi yô, fa wer iemberyolough shon ka i  dedoo. Kpa aluer fiim i ú nenge la na u ú ngu henen akaa a hôngorough ken ishima you yô, fa wer iemberyolough la ka i dedoo ga, shin ka i bo jighilii je. (Mateu 12:33; Marku 7:20-23) Sha ci u nyi? Sha ci u zum u ú lu henen akaa a hôngorough ken ishima yô, ú lu a bemshima ga shi ú vihi imoshima you i Bibilo i̱ tsaase i la shi alaghga ú vihi mlu wou vea Aôndo je kpaa. (Mbaefese 5:5; 1 Timoteu 1:5, 19) Er iemberyolough ne i bende a we sha gbenda u dedoo ga yô, kange ishima wer palegh i. * (Mbaromanu 12:2) Lu er orpasalmi u yange er msen hen Yehova wener: “Gemam ashe kera sha u kenger gbilinkwagh” la.—Pasalmi 119:37.

KER KWAGH U DOON MBAGENEV

20, 21. Kwagh u i nger ken 1 Mbakorinte 10:23, 24 la zua sha kwagh u iemberyolough i dedoo nena?

20 Paulu yange ter kwaghwan u injaa ugen ken Bibilo u i doo u se ver ishima sha mi zum u se lu tsuan kwagh u i gbe u ka se iyol yase se tsua yô. A kaa wener: “I na ian sha akaa cii kpa ka akaa cii a lu mmaa ga. Ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa.” (1 Mbakorinte 10:23, 24) Kwaghwan ne bende a m-er u eren iemberyolough i dedoo nena? Pine iyol you wer, ‘Iemberyolough i m tsough u eren ne ia bende a mbagenev nena?’

21 Alaghga imoshima you ia lumun ér u er kwagh u nan we msaanyol u ú hen wer “i na ian” sha mi shin ngu vough yô. Nahan kpa, aluer u nenge wer mbananjighjigh mbagenev imoshima ve nenge a kwagh u shin sha iemberyolough i u soo u eren la yô, u fatyô u gban den i tsô. Sha ci u nyi? Sha ci u ú soo u ‘eren anmgbianev ou kwaghbo’ ga—shin Paulu una kera kaa ga yô, u soo u “eren [Kristu] kwaghbo” sha u eren ma kwagh u una na a lu mbananjighjigh mbagenev ican u civir  Aôndo sha mimi ga. Nahan u ngu dondon kwaghwan u a kaa ér: “De ne nen . . . anzughul ga” la. (1 Mbakorinte 8:12; 10:32) Mbakristu mba mimi mba sha ayange ase ne dondo kwaghwan u Paulu u dedoo man u sha mkav ne, nahan mayange mba eren iemberyolough i í lu sha tindi, kpa í gem í lu “mmaa” ga la ga.—Mbaromanu 14:1; 15:1.

22. Er nan ve Mbakristu ve hanger ikyaa a mbagenev sha kwagh u ve tsough u eren la ga?

22 Kwagh ugen kpa ngu u i doo u se hen sha mi sha kwagh u eren akaa a doon orgen kpaa la. Orkristu u imoshima i nan i hembe yangen nan u eren akaa a nan ior msaanyol la nana de hanger ér saa mbagenev ken nongo u Kristu kpa ve lu a mnenge u nan u heren akaa kpishi a nan ior msaanyol la ga. Aluer nan er nahan yô, nana lu er ordelaba u nan sendegh ér udelaba mbagenev mba ve lu nahan mato sha gbenda u vesen u nan kpa nan lu nahan mato sha mi la ve yevese sha ayem a nan lu yevese sha mi la vough nahan. Imba kwagh ngila nahan a lu shami ga. Nahan doo u dooshima u a lu hen atô u Mbakristu la una mgbegha or u nan heren akaa a dedoo a nan ior msaanyol a mbananjighjigh mbagenev ve eren la, nahan naná eren kwagh a ve sha icivir. Sha nahan yô, “ior cii [vea] fa ishimawan [shin kwaghfan u nan la] doo doo.”—Mbafilipi 4:5; Orpasenkwagh 7:16.

23. U er nan ve u tsua iemberyolough i dedoo?

23 Kohol cii yô, u er nan ve u tsua iemberyolough i dedoo? Palegh nyityôkwagh i nan ior msaanyol i i kough aeren a hôngorough, a vihin tsung a Mkaanem ma Aôndo ma vende la. Dondo akaawan a Bibilo zum u ú soo u eren ma kwagh u nan ior msaanyol u Bibilo i ôr kwagh sha mi jighilii ga yô. Palegh nyityô iemberyolough i ia za imoshima you iyol cii, shi de hanger wer saa u er iemberyolough i mbagenev, hemban cii je yô mbananjighjigh a we imôngo, ve nenge ér ngi shami ga la ze. Yô, kange ase ishima u eren akaa a se er kwagh sha mi ne cii, nahan ishimakangen you la i̱ na Aôndo icivir shi i̱ wase u lu ken dooshima u Aôndo vea tsombor wou imôngo.

^ par. 6 I gema ishember ne ken zwa Grika jighilii ér: “Ashe ve nga cie Aôndo ga.”

^ par. 19 Se zua a akaawan agen ken Anzaakaa 3:31; 13:20 man Mbaefese 5:3, 4 man Mbakolose 3:5, 8, 20, a aa wase se sha kwagh u iemberyolough yô.