Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

'Lu Nen ken Dooshima U Aôndo'

 NGEREN U SEER

De Ieren i Ngirigh Ilyeegh You Ki Yavaor La

De Ieren i Ngirigh Ilyeegh You Ki Yavaor La

Ieren i ngirigh ilyeegh ki yavaor la ka ieren i vihin Aôndo ishima; ka i na or nan hingir u wan iyol i nan ikyo tseegh shi ka i hôngor ishima i or kpaa. Ashighe agen yô, or u ngirigh ilyeegh ki nan ki yavaor la ka nan hingir u nengen mbagenev ér ka mba nana fatyô u yaven a ve zuan a mkom tseegh tsô. Nan kera nengen myav u yaven a kwase shin nomsoor ér ka u tesen dooshima ga, kpa ka u zuan di a mngirigh u una na nan msaanyol sha anshighe kpuaa shi ka gbenda u been a isharen i nan i yaven a kwase shin nomsoor la tseegh tsô. Kpa ka nana bee a isharen la je kpa i lu hen shighe la tseegh. Nahan er man nan woo alegh a nan sha kwagh u “idya man hôngor [kua] isharen i bo” la yô, nan gema nan nder a nder a.—Mbakolose 3:5.

Apostoli Paulu nger ér: “Ne mbadoon mo ishima . . . se wanger nen ayol a ase sha hanma kwagh u hôngorough u ken iyol kua ken jijingi cii, se sôr nen mtsegh wase, a̱ hingir vough sha mcie u cian Ter la.” (2 Mbakorinte 7:1) Aluer u ngu nôngon tsung wer u dondo mkaanem man yô, de haan iyol inya wer kwagh hemba u ga. Yehova “kegh iyol u den kwaghbo” shi wasen se hanma shighe cii. (Pasalmi 86:5; Luka 11:9-13) Sha kpôô yô, ishima you i í lu nan we ibo kua iniôngon you i u lu nôngon wer u de ieren ne la tese ér u ngu a inja i dedoo, shin er ashighe agen ka i hemba  u u er hôngor ne nahan kpaa. Shi fa kpaa wer, “Aôndo hemba ishima yase man A fa akaa cii kpaa.” (1 Yohane 3:20) Ka asorabo ase tseegh Aôndo a nengen a mi ga; nengen a or u se lu jimin cii. Er a fe se vindi vindi yô, ngu a kegh ato a ungwa se zum u se lu zamber a na ser a̱ zungwe se yô, shi mhôônom ma ker un a vese kpaa. Nahan yô, za hemen u eren msen hen Aôndo a iyol hiden a mi ijime man sha mimi, er wan u kiriki u nan vaa nan za te sha ter u nan shighe u kwagh a tser nan nahan. U er nahan yô, Yehova una na u imoshima i wang. (Pasalmi 51:1-12, 17; Yesaia 1:18) Nahan cii kpa, gba u ú er kwagh u a zough sha msen wou la vough. U tesen ikyav yô, nôngo kpoghuloo palegh ufoto mba ijimbagh mba nengen cica cii kua azende a bo kpaa. *

Aluer ka taver we u den ieren i ngirigh ilyeegh you ki yavaor la yô, lam a ormaren wou u nan lu Orkristu yô shin ma huror wou u nan taver ken jijingi shi nan we u ikyo kpishi yô. *Anzaakaa 1:8, 9; 1 Mbatesalonika 5:14; Titu 2:3-5.

^ par. 2 Icombor igen ver kômputa u ve eren akaa a mi hen ya la, hen ijiir i hanma or nana fatyô u nengen kwagh a lu zan hemen yô, sha er ma or nana hôngor iyol i nan ga yô. Icombor igen di, yam anar u ka a wa sha kômputa ve a dugh nyityô foto shin ngeren u dedoo ga cii a ta kera la. Nahan kpa, anar môm tsô ngu u se fatyô u haren sha mi tôôn ishima kera ga.

^ par. 1 Wea soo u zuan a mbamhen mba vea wase u u den ieren ne yô, ôr ngeren u a lu a itinekwagh ér Young People Ask . . . How Can I Conquer This Habit?” la ken Awake! u Novemba 2006 la, kua takerada u i yer ér Questions Young People Ask—Answers That Work, Tihi u sha 1 la sha peeji 205-211.