Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

'Lu Nen ken Dooshima U Aôndo'

 NGEREN U SEER

Aveghemakaa a ken Awambe man Igbenda i Paven Ior

Aveghemakaa a ken Awambe man Igbenda i Paven Ior

Aveghemakaa a ken awambe. Aveghemakaa a ken awambe ka mzeram ma awambem ma kiriki ma ka i dugh ken mzeram ma awambem ma vesen, er mzeram ma awambem ma nyian man ma pupuu man ma i yer ér platelets la kua ma i yer ér plasma la nahan. U tesen ikyav yô, mzeram ma awambem ma nyian mara ma a mzeram ma kiriki ma i yer ér hemoglobin la. Awambe ka aa yina oruange iyol kpishi shin or ka nana gba awambe yô, i na nan mcimbim ma gen ma i er sha hemoglobin u i dugh ken awambe a orumace shin zendenya yô.

Mzeram ma awambem ma vesen ma i yer ér plasma, ma ma lu a mngerem ker i kom pesent 90 la ma a zar u i yer ér hormones la kpaa, shi ma a bar man ahôm a i yer ér enzymes la man akaa agen a wasen ken iyol er shoga nahan. Plasma shi ngu a akaa a tôndon awambe man akaa a nôngon ityav a angev kua ahôm a i yer ér albumin la. Iangev mbigen ka mbia kôr or yô, mbatwerev ve kuma nan icigh ki i yer ér gamma globulin la; i dugh icigh kin ken plasma u ior mba iangev mbin mbi ker ve ga yô. Mzeram ma awambem ma pupuu mara ma a ahôm a i yer ér interferons man interleukins la; mba yaren tom a interferons man interleukins u sôron iangev mbigen mbi anyigôr u bo a ne ior yô kua kyansa kpaa.

Doo u Mbakristu vea lumun ér i er ve twer a aveghemakaa a i dugh ken awambe laa? Bibilo na mlumun sha mpin ne jighilii ga, nahan gba u hanma Orkristu yô nana tsua kwagh u imoshima i nan i tese nan ér nana er la sha ishigh ki Aôndo. Mbagenev vea venda aveghemakaa a ken awambe cica cii sha ci  u Aôndo yange wa Mbaiserael Tindi ér ve de ye awambe a zendenya ga, kpa ve “haa a inya.” (Duteronomi 12:22-24) Mbagenev di, alaghga vea lumun ér i sôr ve twer a aveghemakaa a i dugh ken awambe yô, kpa mayange i de te ve awambe shin mzeram ma awambem ma vesen ga. Sha mnenge ve yô, aveghemakaa a i dugh ken awambe la kera tile sha ityough ki uma u zendenya u i dugh aveghemakaa shon ker la ga.

Zum u u lu tsuan kwagh u ú er sha kwagh u aveghemakaa a ken awambe yô, vande pinen iyol you mbampin mban: Aluer m venda aveghemakaa a ken awambe yô, m fa er a gba u me lumun u man mcimbim magenem ma ka i er ér ma nôngo num a angev ken iyol shin ma tôndo awambe shighe u or vihi iyol la ga kpa? Me fatyô u pasen ortwer er i hii ve m vende shin m lumun aveghemakaa agen a i dugh ken awambe la je kpa?

Igbenda i paven ior. Igbenda ne yô ka u i yer ér hemodilution kua cell salvage la. Ka a yaren tom a gbenda u paven or u hemodilution la yô, i goom a awambe a ken iyol i or i due a mi hua ugen, i gema i haa nan icigh ki seer awambe, nahan a paven nan a been cii yô i hide a awambe shon her. Ka a lu cell salvage yô i kohol awambe a i lu paven or ve a lu duen la cica cii i hide i nyôr a mi ken iyol i nan. Ka i kohol awambe ne cica cii i kire a wang shin i kase a, i hide i nyôr a mi ken iyol i oruange la. Mbatwerev mba eren twer a igbenda ne kwagh môm ga, nahan doo u Orkristu nana vande lamen a ortwer u nan sha er nana fa kwagh u nan soo u eren la jighilii yô.

Shighe u ú soo u tsuan ma gbenda u a pav u yô, vande pinen  iyol you mbampin mban: ‘Aluer mba eren mo twer man gba u awambe am aa due ken iyol yam aa zende ken ikyekye igen, alaghga je yô aa timbir ker cii ve aa hide aa nyôrom ken iyol yô, imoshima yam ia lumun ér awambe ne ka a ken iyol yam nahan i de ‘hee a inya’ gaa? (Duteronomi 12:23, 24) Aluer mba eren mo twer man i kura awambe am i sôr kwagh ker i hide shi i nyôr a mi ken iyol yam nahan, kwagh ne una za imoshima yam i Bibilo i  tsaase i la iyolo? Aluer m venda igbenda i sôron twer a awambe am cica cii yô, m fa er kwagh ne una tese ér, u mo lumun mer i karem awambe kpa me lumun ga, shin m venda gbenda u sôron twer u i yer ér hemodialysis la kpa? Shi m fa er kwagh ne una tese ér m venda mer i de wem ikyekye i wasen u samber a awambe man ahumbe ken iyol yam ga kpa?’

Hanma Orkristu yô, gba u nana tsua gbenda u nan soo ér i yar tom a awambe a nan shighe u i lu paven nan la iyol i nan. Sha kwagh u igbenda i karen akaa ken iyouci man igbenda i sôron twer u ka i kura awambe ken iyol i or kpuaa i sôr akaa sha mi shi i hide i kuma nan ken iyol la kpa, gba u hanma Orkristu nana tsua kwagh u nana er la iyol i nan.