Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITYOUGH PUE

Zum u Or u hen Tsombor Nan Lu Dedoo ga Yô

Zum u Or u hen Tsombor Nan Lu Dedoo ga Yô

1, 2. Ka nena Satan yange yar tom a aahe man angev sha u nôngon er una hembe perapera u Yobu?

OR U yange i yilan er Yobu la mimi je a fatyô u kaan er ngu môm ken mba yange ve ember uma u msaanyol ken tsombor yô. Bibilo yila un er a “hemba ior mba ken ityoughkitaregh cii.” Yange lu a ônov mba nomso utaankaruhar man mba kasev utar, kohol cii yô lu ônov pue. Shi yange lu a kwagh ave u una nenge sha tsombor na dedoo yô. U hemban cii yô, yange hemen gbenda sha akaa a ken jijingi shi kwagh gba un sha mtile u ônov nav sha ishigh ki Yehova. Akaa ne cii yange na tsombor na lu biishii shi lu saan saan kpaa.—Yobu 1:1-5.

2 Yange Satan, orihom u Yehova Aôndo u hemban la, nenge a mzehemen u Yobu la kpee je. Satan, u hanma shighe ka a keren igbenda i una vihi perapera u mbatomov mba Aôndo la, yange ta num sha Yobu sha u timin tsombor na u saan saan la. Tsô, a “va haa Yobu avav a nyoon, hii shin akevangahar a na je, ar sha ihaghtyou na.” Sha nahan yô Satan lu a ishimaveren er una yar tom a aahe man angev u hemben perapera u Yobu.—Yobu 2:6, 7.

3. Angev mbu Yobu yange mbu lu nena?

3 Bibilo pase inja uange i Yobu la er mba iyouci vea yila la ga. Nahan kpa, i̱ ôr se er yange mbu lu yô. Azôô cir un iyol, shi kwavyolough nagh gba akembe hôô kera. Iôôn i Yobu huma vihi kpishi, man iyol na kpaa huma ndôhôrshima. A lu ken mnyoon tsung. (Yobu 7:5; 19:17;  30:17, 30) Ken mtoghor u mnyoon la Yobu shar hen mtwe gba aan iyol na sha agbatsenger. (Yobu 2:8) Mimi je kunya kôr u nengen!

4. Kanyi kwagh ka i er hanma tsombor ashighe ashighe?

4 We ú er nena aluer imba zege uange la ta sha awe yôô? Nyian yô, Satan kera haan mbatomov mba Aôndo angev imba i yange haa Yobu la ga. Nahan kpa, sha ci u myen u uumace yô, atsan a ken uma use use, man igbekera i ikyasen u se lu ker la ve na yô, ka u a kav tsô er sha ashighe ashighe, mba ken tsombor vea gba angev. Shin er ka se wa iko u yangen mbu nahan kpaa, se cii angev mbua fatyô u kôron se, shin er i lu ior kpeghee tseegh vea ya ican imba i Yobu ngise ya la nahan kpaa. Zum u angev mbu nyer hen ya wase yô, mimi je a fatyô u lun kwagh u ican. Sha ci u nahan yô de se nenge er Bibilo ia wase se u nôngon a orihom u a lu a uumace hanma shighe ne.—Orpasenkwagh 9:11; 2 Timoteu 3:16.

WE Ú NENGE NENA SHAMI?

5. Ieren i mba hen tsombor sha kwagh u angev mbu anshighe kpeghee la ka i̱ lu nena?

5 Myange u akaa a eren a hanma sev la, shin a lu ka nyityô kwagh i̱ ne je kpaa, ka i lu kwagh u taver, man hemba kan mimi nahan aluer myange la va sha ci u angev mbu tsan gbem yô. Angev mbu anshighe kpeghee tseegh je kpaa ka i gba u a sôr mlu u akaa, a sôr aan agenegh, shi a er uiwua sha igbenda igenegh kpaa. Alaghga a gba u mba ken tsombor mba ve lu gbong gbong la vea lu ving sha u or uange la nana̱ mem yô. Alaghga a gba u vea de u eren akaa agenegh. Nahan kpa, ken icombor kpishi mbayev mbakiriki je kpaa ka ve lu a mhôônom ma zungwen sha wan shin ormaren u nan lu uange la, shin er alaghga aaven agenegh a gba u a umbur ve er ve̱ lu a shin-shima nahan kpaa.  (Mbakolose 3:12) Ka a̱ lu angev mbu sha anshighe kpeghee yô, ashighe kpishi tsombor ka u wa iyol u eren kwagh u i gbe u a er la cii. Heela tseegh ga, hanma or u hen tsombor nana lu a ishimaveren er ma i tese nan mkav nahan aluer nan gba angev yô.—Mateu 7:12.

6. Ka aeren a nyi ka i nenge a mi ashighe agenegh aluer icôron uange, i lun gbem i kôr or u hen tsombor yôô?

6 Nahan kpa, a er nena, aluer angev mbu shon ka mbu vesen kpishi man myange u akaa la ngee shi ka u tsan gbem yô? U tesen ikyav yô, aluer or ken tsombor nan kpe alegh kpoo, shin nan gba iwan sha angev mbu i yer er Alzheimer la, shin ma angev mbu genegh caver a nan ye? Shin aluer angev mbu ken ityou kôr or u ken tsombor, inja er ihundugh nahan di ye? Kwagh u ior kpishi ka ve hii eren yô ka u zungwen nan kunya—u ulen sha ci u or u doonshima nan ngu yan ican. Nahan cii kpaa, alaghga mbamlu mba ken ishima mbagenev vea dondo sha mhôônom ma zungwen. Er mba ken tsombor vea nenge er angev mbu or u nan lu dedoo ga la mbu bende a ve shi mbu pande ian ve i eren akaa yô, alaghga ishima a vihi ve. Alaghga vea hen er: “Er nan i gbe u kwagh ne una ereme?”

7. Kwase u Yobu yange er nena sha angev nava, man kanyi yange kera umbur ga?

 7 Ka inja er imba kwagh ne yange i nyôr ken mhen u kwase u Yobu yô. Umbur, yange vande zuan a mnyoon u msaa u ônov nav. Er akaa a kpilighyol la gba eren yô, akperan nga ga yange hemba zuan a ishimanyian seer a seer cii. Ken masejime yô, er a nenge nom na u ngise lu tseva tseva shi lu a gbong gbong iyol kpaa la cinge a angev mbu vihin tsung mbu nyoon kpaa yô, ka inja er yange hungur a kwagh u vesen u a hemba akaa a kpilighyol la cii yô—mlu u un kua nom na ve lu a mi vea Aôndo la. Bibilo kaa er: “Tsô kwase [u Yobu] kaa a na er: Nahan kpaa shi u kusu mimi wou hereghe? Venda Aôndo, yô, kpe kera.”—Yobu 2:9.

8. Zum u or u hen tsombor nan lu dedoo ga tsung yô, ka hanma ivur ia wase mbagenev hen tsombor u lun a mnenge u voughlo?

8 Ior kpishi ka i lan ve ishima, ishima i nyoon ve je kpaa, zum u uma ve ka una gema vindi vindi sha ci u angev mbu orgen yô. Nahan kpa, Orkristu u nan time sha kwagh la yô nana̱ mase kaven er kwagh la na nan ian i tesen mimi u dooshima u nan. Dooshima u mimi “we ishima, lu sar sar . . . [shi] keren kwagh na iyol na tsô ga . . . Dooshima we ishima a akaa cii; un ne jighjigh sha akaa cii, luun a ishimaverenkeghen sha akaa cii, taver ishima sha akaa cii.” (1 Mbakorinte 13:4-7) Sha ci ne yô, u den mbamlu mba gban a gba la er ve̱ dumbur yô, ka hange hange u se nôngo sha afatyô wase cii sha u lun a iyol kôron tsaha sha ve.—Anzaakaa 3:21.

9. Ka akaa a nyi a nan ishimataver aa fatyô u wasen tsombor ken jijingi kua sha mlu u ken ishima zum u or u hen tsombor nan gbe zege uange yôô?

9 Kanyi a fatyô u eren sha u kuran mkpeyol u ken ishima man u ken jijingi zum u môm hen tsombor nan lu uange tsung yôô? Ka mimi, hanma inja uange ngi a gbenda u a wa iko a mi shi a sôr mbu yô, man a lu vough u nan imba gbenda u a sôr twer shin a nenge sha or  hen ya la ken ngeren ne ga. Er i lu nahan kpaa, sha gbaa u ken jijingi yô, Yehova “kenden a mba ve lu ngugh ngugh la sha.” (Pasalmi 145:14) Tor Davidi yange nger er: “Saan or u nan we mbaatsanev iko la, iyol, TER Una yima nan sha iyange i bo. TER Una kura nan, Una koso uma u nan . . . TER Una suwe nan sha gambe u nan u uange.” (Pasalmi 41:1-3) Yehova koson uma u mbatomov nav ken jijingi, shin shighe u ve zou a imeen ken ishima je i gande tahav vev kpaa. (2 Mbakorinte 4:7) Icombor kpishi i i tagher ishigh a angev mbu vesen hen ya ve yô i kimbir mkaanem ma orpasalmi man: “Ican erem tsung je doo ga; taver uma wan TERE, sha mkaanem Ou.”—Pasalmi 119:107.

JIJINGI U NAN MKPEYOL

10, 11. (a) Kanyi i lu keng aluer ka u tsombor ua nôngo aa angev vough yô? (b) Ka nena kwase ugen yange nôngo aa angev mbu nom na?

10 “Jijingi u or una taver nan ken angev mbu nan,” kape injakwagh i ken Bibilo i kaa la, “kpa jijingi u uren yô, ka an nana taver une?” (Anzaakaa 18:14) Kunda iyol una fatyô u benden aa jijingi u tsombor kua “jijingi u or” kpaa. Nahan kpa, “ishima i bem bem ka uma u iyolough je.” (Anzaakaa 14:30) Aluer ka u tsombor ua nôngo a angev mbu vesen sha inja vough shin vea er vough ga kpa har sha ieren, shin jijingi, u mba kimi la.—Kar Anzaakaa 17:22.

11 Kwase Kristu ugen yange gba u una wa ishima una nenge er angev mbu kpen alegh ta sha nom na er ve er ivese anyom kar di ataratar tseegh yô. “Kwagh la yange bende a iliam i nomom tsembelee je, man hingir kwagh u taver kpishi u ôron kwagh a na,” a umbur nahan. “Ican i yan i ken ityou u nôngon sha u me ungwa kwagh u yange a soo u ôron la i vese kpishi.” Shi, hen ase kpaa, mnyoon man lanshima u nom la yange una lu a mi la.  Nom man kwase ne yange ve er nyi? Shin er yange ve lu ica a tiônnongo u Kristu nahan kpaa, anmgbian u kwase la nôngo sha afatyô na u lun dông ken jijingi sha u lun tsevaa sha abaver a i lu nan ken nongo ne kua u ngohol kwaghyan u ken jijingi ken magazin mba Watchtower man Awake! la vough vough. Kwagh ne yange na un agee a ken jijingi a wan iko sha nom na u doon un ishima la zan zan ku na anyom anyiin ken hemen.

12. Er a nenge sha kwagh u Yobu nahan, kanyi iwasen or uange la ka nan na ashighe ageneghe?

12 Hen Yobu yô yange lu un, u lu uange la, za hemen u lun dông ye. “Sé ngohol kwagh u dedoo hen Aôndo, man kwaghbo yô, sé kera ngohol gaa?” kape a pine kwase na la. (Yobu 2:10) Kape i lu ve orhenen Yakobu yange va ter iti i Yobu ken hemen er ngu ikyav i tseer tseer i ishimawan man iyol kôron tsaha la! Ken Yakobu 5:11 se ôr er: “Ne ungwa er Yobu a taver ishima yô, man shi ne nenge mkur u Ter kure kwagh na yô, mhôônom ma ker Ter man shi zungu mhôônom kpaa.” Sha gbenda shon môm nahan nyian, ashighe kpishi ieren i sha ishimataver i or uange la ka i wase mbagenev hen ya u lun a mnenge u maan a maa.

13. Ka nyi mkar i doo u tsombor ua kar ga zum u ve lu nengen sha angev mbu vesen yôô?

13 Ior kpishi mba i gbe u vea nôngo a angev hen tsombor yô ve lumun er sha hiihii la ka kwagh u he ga u taver mba ken tsombor u lumun er kwagh la ngu nahan jim. Shi ve kaa kpaa er gbenda u or nan nenge kwagh shon la ka kwagh u hange hange. Mbamgem kua mbamser mba ve ve sha ityom i hen ya la alaghga sha hiihii yô a lu kwagh u taver. Kpa aluer mimi je or nan nôngo yô, nana fatyô u hoghol a mlu u he la. Sha u eren nahan yô, mayange doo u se kar mbamlu asev sha mbamlu mba ior mbagenev mba ve lu gbong gbong hen tsombor la ga, se lu henen ser uma ve ngu guda shi ‘ka shami ga  cii!’ je ga. Sha mimi yô, ma or tsô kpaa nan fa ikyav mbi i gbe u mbagenev vea tôô la ga. Mbakristu cii ka ve zua a msurshima ken mkaanem ma Yesu kaa la er: “Va nen her a Mo, ne mba i ver ne iyol cii, ikav mbi yoho ne kpaa, Mo Me na ne mmem.”—Mateu 11:28.

U TSUAN AKAA A A HEMBE LUN HANGE HANGE LA

14. Ka nena a tsua kwagh u a hembe lun hange hange la?

14 Iaven i angev mbu vesen mbu ve yô, a lu a iwasen hen tsombor u umbur icighan mkaanem man: “Sha iwasen i mbawasenmhen imôngo la, ka ve lu taveraa.” (Anzaakaa 15:22) Mba hen tsombor vea fatyô u teman imôngo lamen sha mbamlu mba angev mbula mbu ve a mi la kpa? A lu vough u eren nahan ken msen shi geman ishigh hen Mkaanem ma Aôndo sha u ma tese gbenda yô. (Pasalmi 25:4) Kanyi a time shami hen imba mtem laa? Ka shami, a gba u a hen sha kwagh u a er sha twer u sôron, inyaregh ki a vihi, kua akaa agenegh hen tsombor. Ka an nana lu ityough sha u wan iko jighilii? Ka nena tsombor ua zua ave sha u nan ishuene? Ka nena mser u akaaeren la una bende a hanma or hen tsomboro? Ka nena a nenge sha mbamgbe mba sha akaa a ken jijingi man akaa agenegh a or u nan lu wan iko sha oruange jim la?

15. Kanyi ishuen Yehova ka a na hen icombor i i lu nôngon a angev mbu vesene?

15 U sônon Yehova ken msen taveraa sha u pinen mkôôm, u timen sha Mkaanem nam, man u dondon gbenda u Bibilo i tese la a ishimataver ashighe kpishi ka a va a averen a a hembe mhen wase yô. Ka hanma shighe angev mbu or u hen tsombor la mbua hide jime ga. Kpa u haren sha Yehova la hanma shighe ka a va a akaa a hemban doon hen hanma ian cii. (Pasalmi 55:22) Orpasalmi yange nger er: “Erdoo Wou kô rom sha, TERE. Zum u mbamhen ve ngeem ken ishima yô, mbamsurshima Ou nam ishima i saan saan.”—Pasalmi 94:18, 19; shi nenge Pasalmi 63:6-8.

U WASEN ÔNOV

Zum u tsombor u er tom imôngo yô, a fatyô u nôngon a mbamzeiyol

16, 17. Ka atôakaa a nyi a fatyô u ôron zum u i lu lamen a mbayev mbakiriki sha angev mbu wanye yôô?

16 Angev mbu vesen mbua fatyô u van a mbamzeiyol hen mbayev hen tsombor. Ka hange hange u mbamaren ve̱ wase ônov u kaven mbamgbe mba ve ve la man kwagh u vea fatyô u eren sha u wasen yô. Aluer u nan gbe angev la ka wanye yô, i̱ wase mbayev ve kav er iko i i lu hemban wan sha u nan gbe angev la tese er i hemba soon nan a ônov mbagen mbara ga. Kpa u den er iyugh shin gesa a vese yô, mbamaren vea fatyô u wasen mbayev mbagenev mbara u maan mlu u biishii ayolave man lun a ishoon i mimi er vea zua ave sha u nengen kwagh u a dugh ken angev mbula la.

17 Mbayev mbakiriki vea hemba lumun fefa aluer mbamaren ôr kwagh u una bende a asema ave yô a u geman pasen ve akaa a tweregh a kperegh kperegh la. Nahan a fatyô u nan ve mkav sha er i lu or uange la iyol yô. Aluer mbayev mba ve lu gbong gbong la ve nenge er angev mbula mbu yange or uange la u eren akaa kpishi a a lu kwagh u cuku hen ave yô, a hemba lun ve zange u lun “mbazungwenmhôônom” shi lun “mba mhôônom ma ker ve” yô.—1 Peteru 3:8.

18. Ka nena a fatyô u wasen mbayev mba ve kav ishigh la u fan mbamzeiyol mba angev mbu ve a mi la, man ka nena kwagh ne una wase ve?

18 I̱ wase mbayev mba ve kav ishigh la u fan er kwagh u ican va hen tsombor nahan gba u hanma or hen tsombor nana na iwasen. Er a gba u a kimbi injar i ortwer kua inyaregh ki tweregh kpaa yô, alaghga a taver mbamaren u wan iko sha ônov mbagenev mbara er ve soo er ma ve er la. Ônov mbagenev mbara vea yue sha  kwagh ne shi vea hen er i gbihi vee? Shin vea kav man vea soo u nyôôso iyol sha akaa agenegh er i gbe laa? Kwagh ne har sha er i time sha kwagh shon la kua jijingi u i ve a mi hen tsombor la. Jim yô, ken icombor kpishi angev mbu kôron or u hen tsombor la wase u tesen mbayev u dondon kwaghwan u Paulu la: “De eren nen kwagh sha u wan ayol a en iko tseegh shin sha u keren icivir i gbilinigh kpaa ga, kpa hide nen ayol a en ijime; hanma or nana̱ nengen er orgen hemba nan yô. Hanma or nana̱ de kera waan akaa a nan iyol i nan iko tseegh ga, kpa nana̱ wa akaa a mbagenev iko kpaa.”—Mbafilipi 2:3, 4.

ER A NENGE TWER SÔRON LA

19, 20. (a) Ka ityom i nyi mba ve lu ityou hen icombor la ka ve lu a mi zum u or u hen tsombor nan lu uange yôô? (b) Shin er u lu takerada u tweregh ga nahan kpa, ka sha nyi gbenda Bibilo i tese sha er a nôngo aa angeve?

19 Mbakristu mba eren akaa akuma akuma mba vende twer sôron ga aluer ú per tindi u Aôndo ga yô. Zum or u hen tsombor ve ka nana̱ gba angev yô, ka i sase ve iyol u keren iwasen sha u nan mpever hen u nan lu uange la. Nahan kpa, alaghga akperan aa lu sha mbamnenge mba twer sôron mba a time shami vie vie yô. U seer yô, ken anyom a a sember karen ne iangev mbi hev man akaa a zaniyol agenegh nga gbe van kpoo tsô, man kpishi ken ave, ma gbenda u sôron ve u i lumun a mi wuee ngu ga. M-time u timen fan mbu vough tsô kpaa ashighe agenegh yô ka i taver u zuan a mi. Tsô, sha imba ne yô kanyi Orkristu nana ere?

20 Shin er orngeren Bibilo ugen yange lu ortwer shi apostoli Paulu kpaa yange na kwaghwan u wasen hen huror na Timoteu sha twer sôron nahan kpaa, Icighanruamabera i tesen gbenda sha aeren man akaa a ken jijingi, ka takerada u i nger sha twer sôron ga. (Mbakolo se 4:14; 1 Timoteu 5:23) Sha nahan yô, sha akaa a twer sôron yô, mba ve lu ityouv hen icombor i Orkristu la a gba u vea tsua kwagh u vea er la sha mnenge u vough. Alaghga a lu ve pe zuan a kwaghwan hen mba ve lu a mkav la ajiir kposo kposo. (Kar Anzaakaa 18:17.) Vea soo u zuan a iwasen i i hembe la sha ci u or ve u nan lu uange hen tsombor la kpee je, man kpishi ka ve ker iwasen ne hen atô u mba twerev mba sôron twer u ayange ayange la. Mbagenev yô ka i hemba kpen ve iyol u keren twer sôron kposo a u i zou a mi ayange ayange la. Ngun kpaa ka kwagh u hanma or nana tsua iyol i nan yô. Nahan kpa, zum u i lu nengen sha mbamzeiyol mba mkpeyol yô, Mbakristu mba hôron u lumun er ‘mkaanem ma Aôndo ma lu imenger i angahar a ve man iwanger i gbenda ve kpaa’ ga. (Pasalmi 119:105) Ka ve za hemen u dondon atindi a tesen gbenda a i nger ken Bibilo la.  (Yesaia 55:8, 9) Sha nahan yô, ka ve palegh igbenda i keren itine i mnyoon i i lu sha inja i mcivir u ujijingi la, shi ve nyagh anza a tweregh a peren atindi a Bibilo kpaa.—Pasalmi 36:9; Aerenakaa 15:28, 29; Mpase 21:8.

21, 22. Ka nena kwase u ken Asia hen sha kwaghwan u ken Bibilo, man ka nena kwagh u yange tsua u eren la lu u vough sha mlu na la?

21 Nenge kwagh u gumkwase ugen ken Asia la. Shighe kpeghee er a hii Bibilo i henen zum u môm ken Mbashiada mba Yehova hii kwaghhenen a na yô, a mar wan u kwase kôugh u lu di myohom aseva atar man vegher tseegh yô. Yange ishima war tôndon kwase ne zum u ortwer ôr un er wanikundan la una lu humee shi mayange una fatyô u zenden kpaa ga yô. A wa kwase ne kwagh er a̱ na wanikundan la sha ikev i mba nengen sha anikyundanev. Nom na kpaa lu a akperan ken ishima sha kwagh ne. Ka her ana una gema ishighi?

22 A kaa er: “M umbur mer i tesem ken Bibilo er ‘ônov mba nomso ka dyako u Yehova a ne yô, man kwagh u a dugh ken sagh kpaa ka injar i A ne yô.’” (Pasalmi 127:3) A kaa ken ishima na er una tôô “dyako” ne una yem a mi ken ya una za nenge shami. Akaa yange lu kposo sha hiihii la, kpa sha iwasen i azende a a lu Mbakristu ken tiônnongo u Mbashiada mba Yehova yô, kwase la nôngo wa wan la iko tsung er doo u una er la. Anyom nga karen 12 ken hemen yô, wan la hingir u zan mbamkombo ken Iyou i Tartor man numben hen atô u mbayev ikaior mba her la. Ngô na kaa er: “M ngu a iwuese kpishi er akaawan a Bibilo a mgbegham u eren kwagh u shami nahan. Bibilo wasem u lun a imoshima i waeng hen Yehova Aôndo man kera vaan afanyô a ma a lu a mo ken uma wam cii la ga.”

23. Ka msurshima u nyi Bibilo i̱ ne sha mbauange man mba ve lu nengen sha ave laa?

23 Angev mbua lu a vese gbem sha won ga. Profeti  Yesaia yange tese uwegh ken hemen sha shighe u “ma or u nan tem ker kpaa nana kera kaa er: Kwagh nyoon mo, ga” yô. (Yesaia 33:24) Ityendezwa la ia iv ken tar u he u u lu van ayem ayem ne. Nahan cii kpa, er shighe la a lu a va ga yô, gba u se nôngo aa kwaghnyoon man ku. Kwagh u saan iyol yô, Mkaanem ma Aôndo tese gbenda shi na iwasen. Atindi a kiriki a sha aeren a ken Bibilo la nga gbekeke, man a tav kar mbamhen mba uumace mba ve yen ne ica je. Sha nahan yô, or u kaven kwagh nana lumun a orpasalmi u nger la er: “Atindi a TER nga vough je, nga hir, nga taver uma her; mpase u TER ka u jighjigh, ka a na orlanenkwagh nan hingir orfankwagh. . . . Akaaôron a jirigh a TER ka a mimi je, ka a perapera cii . . . U wan a iko yô, ka zegeinjar.”—Pasalmi 19:7, 9, 11.