Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITYOUGH ATARATAR

Wase Wan Wou u Anyom Pue Kar la a̱ Vese

Wase Wan Wou u Anyom Pue Kar la a̱ Vese

1, 2. Ka atsan man iember i nyi anyom a pue kar la ka a va a mi?

ULUN a wanye u nan hembe anyom pue hen ya la ka kposo a u lun a wanye u anyom ataan shin u anyom pue tseegh je kpaa. Anyom a pue kar a kar la nga ve a atsan a á kua mbamzeiyol mba á, kpa shi aa fatyô u van aa iember man mbamtsera. Akav anza er Yosev, Davidi, Yoshia, man Timoteu tese er agumaior aa fatyô u eren kwagh sha inja shi lun a mlu u dedoo a Yehova. (Genese 37:2-11; 1 Samuel 16:11-13; 2 Utor 22:3-7; Aerenakaa 16:1, 2) Mbayev kpishi mba lun anyom pue kar nyian kpaa mba eren nahan. Alaghga yô, we kpaa ú fa mbagenev.

2 Nahan kpa, hen mbagenev yô anyom a pue kar la ka a zan iyol. Agumaior ka a lu a ashighe a i saan ve iyol man a ve lu ulen yô. Alaghga mbayevnomso man mbayevkasev mba ve lu anyom pue kar la vea soo u lun sha tseeneke ve, man alaghga vea soo atindi a mbamaren vev ve we er ve̱ kuran la ga. Nahan kpa, amba agumaior la nga iyev her a mkav shio man gba u a na ve iwasen i sha dooshima, a ishimawan i mbamaren vev. Een, anyom a pue kar la aa fatyô u genger iyol, kpa shi aa fatyô u cimin—hen mbamaren kua mbayevikaior kpaa. Ka nena a fatyô u wasen agumaior ken anyom nee?

3. Ka sha nyi gbenda mbamaren vea fatyô u nan ônov vev mba kaven ishigh ian i injaa ken uma?

3 Mbamaren mba dondon kwaghwan u Bibilo ka ve  na ônov vev mba kaven ishigh ian i hemban cii i sôron gbenda ve sha u zan vough vough ken aaven a ican la zan zan aren ken ganden. Ken hanma tar cii kua sha hanma iaven kpaa, mbamaren man agumaior a a yar tom sha akaawan a Bibilo imôngo yô ve zua a iveren man mzehemen kpaa.—Pasalmi 119:1.

KWAGHÔRON U SHA MIMI MAN U KEN IGBAR

4. Er nan idyu i teman i lu hange hange hemban je yô ken anyom a pue kar laa?

4 Bibilo kaa er: “Mbaawashima ka ve bunde henpe idyu i teman i lu ga yô.” (Anzaakaa 15:22) Aluer yange idyu i teman ia lu hange hange zum u ônov ve lu iyev her la yô, i̱ hemba ngin hange hange hen shighe u ve lu anyom pue kar ne cii—zum u agumaior ka a vihi shighe ken makeranta shin vea ahuraior ave agen i hemba shighe u ve lu hen ya la. Aluer idyu i teman ngi ga—kwaghôron u mimi man u ken igbar hen atô u ônov man mbamaren kpaa ngu ga yô—agumaior aa fatyô u hingir mbavannya hen ya. Nahan ka nena a ver aan a kwaghôron ivegherle?

5. I taver ikaior asema er ve nenge kwaghôron a mbamaren vev nena?

5 Agumaior man mbamaren cii gba u vea yar tom ve ken kwagh ne. Ka mimi, alaghga a hemba taver mbayev mba kaven ishigh u lamen a mbamaren vev a er ngise ve eren zum u ve lu iyev her la. Nahan cii kpaa, umbur wer “henpe mhen u mimi ka una lu ga yô, ikurior i gba kera; aluer mbawasenmhen vea lu imôngo yô, mwar ngu.” (Anzaakaa 11:14) Mkaanem mara ma sha ci u hanma or cii, mba kiriki man mba beenyol kpaa. Agumaior a lun anyom pue kar a a kav kwagh ne yô aa fa er gba u a na ve mhen u mimi, sha er ve lu tagher ishigh a akaa a hemban cimin a ngise ve fa la yô. Doo u vea kav er mbamaren vev mba nan jighjigh mbara  ka mbawasen mhen mba ve kav kwagh tsema tsema yô sha ci u ve hemba mban a mkav ken uma shi ve vande tesen iko i wan ve i sha dooshima la anyom kpishi ken jime. Sha ci u nahan yô, ken iaven i uma ve ne, agumaior a lun anyom pue kar a lun a kwaghfan aa gema ashe kera hen mbamaren vev ga.

6. Ka ieren i nyi mbamaren mba kaven kwagh vea lu a mi sha u ôron kwagh a mbayev veve?

6 Kwaghôron u ken igbar la inja na yô ka u ormaren nana nôngo u lun her zum u i sar gumor u anyom pue kar la pe lamen yô. Aluer ú ngu ormaren yô, nôngo sha er a̱ bunde kera kera kpa kwaghôron u ken igbar a̱ lu ken vegher wou yô. Alaghga kwagh ne una lu heghema ga. Bibilo kaa er shighe ngu “u huan ving, man shighe u lamen.” (Orpasenkwagh 3:7) Shighe u wan wou u anyom pue kar la a soo er una lam yô, alaghga a lu shighe wou u huan ving je la. Alaghga ú sôr shighe la ú ver sha ci u kwaghhenen wou, mmem, shin tom ken akôngo a ya. Nahan cii kpa, aluer wanye wou soo u lamen a we yô, nôngo sôr ian you nahan kegh ato her a nan. Aluer ú er nahan ga yô, alaghga nana kera nôngo kwa ugenegh ga. Umbur ikyav i Yesu la. Sha ian igenegh la, yange ver shighe u una mem yô. Kpa ior mba gbe va kasen sha u keghen ato her a na yô, a de u memen tsô a hii u tesen ve. (Marku 6:30-34) Agumaior a lun anyom pue kar kav er mbamaren vev mba aa tom kpishi, kpa gba u a na sha u ve̱ fa er mbamaren vev vea lu her zum u kwagh a gbe ve a ve la. Sha nahan yô, lu imôngo a ve shi tese wer ú kav kpaa.

7. Kanyi i gbe u mbamaren vea palegha?

7 Nôngo u umbur er yange i lugh zum u ú lu wanye u anyom pue kar la, man de banen a kwaghhômon ga! Gba u a kpe mbamaren iyol u lun vea ônov vev. Zum u shighe u gbilinigh a lu yô, mbamaren ka ve vihi un nena? Aluer hanma shighe ve soo u yaren tom a shighe  u ve lu gbilin la u eren akaa a a kou tsombor ve ker ga yô, mbayev vev mba anyom pue kar la vea fa fese. Aluer ikaior va kav er azende ave a ken makeranta nga hembe henen kwagh ve a mbamaren vev yô, ka keng vea lu a mbamzeiyol.

KWAGH U A ÔR YÔ

8. Ka nena a tese mbayev u lun a iwuese sha mimi, tom u eren taveraa, man ieren i dedolo?

8 Aluer mbamaren vande tesen ônov vev u soon mimi man tom u eren taveraa ga yô, ve̱ nôngo tsung ve̱ tese ve ken anyom ve a pue kar la. (1 Mbatesalonika 4:11; 2 Mbatesalonika 3:10) Shi ka hange hange u ve̱ wa iko er mimi je ônov vev na jighjigh er ka hange hange u lun a ieren i vough kua uma u waeng kpaa. (Anzaakaa 20:11) Ormaren ka nan ôr kwagh kpishi ken avegher ne sha ikyav i tesen. Di vough er noov mba ve lu mba nan jighjigh ga je kpaa “á urugh ve sha mlu u kasev vev la, á kera lu sha kwaghôron kpee ga” nahan, kape ikaior ia fatyô u henen akaa a vough la sha ieren i mbamaren vev je la. (1 Peteru 3:1) Nahan cii kpaa, ikyav i tesen tseegh kuma ga, sha ci u mbayev mba nengen a akav a bo shi ikpela akaa agen kpa mgbough ken won u ya. Sha ci u nahan yô, gba u mbamaren mba lun a iko i wan vea fa mnenge u ônov vev sha akaa a ve nenge a  mi shi ve ongo la, man kwagh ne gba u a lam sha mimi kpee je.—Anzaakaa 20:5.

9, 10. Er nan i gbe u mbamaren vea wa iko u tesen ônov vev kwagh u yavaor, man vea er kwagh ne nena?

9 Kwagh ne hemba kan mimi nahan zum u i ve sha kwagh u yavaor yô. Mbamaren, kunya ngu ker ne u lamen sha kwagh u yavaor aa ônov enevee? Aluer kunya kôr ou je kpaa, nôngo u ôron kwagh shami, sha ci u mbayev ou mba kiriki vea hen kwagh la hen orgen kpee je. Aluer ve hen her awe ga yô, se fa ga shin a lu kwaghcimin u nyi vea zua a mio? Ken Bibilo, Yehova cia ashe u ôron akaa a a gbe a zough sha yavaor ga, man mbamaren kpaa ve̱ de cian ashe ga.—Anzaakaa 4:1-4; 5:1-21.

10 Se mba a ishughun, sha ci u Bibilo ngi a ityesen sha kwagh u ieren i yavaor la, shi Watchtower Society kpaa nger akaa kpishi a wasen sha u tesen er ityesen ne ngi vough ken tar u ainge ne kpaa. Er nan ú yar tom a iwasen ne ga? U tesen ikav yô, er nan ú kimbir ôron a wan wou u nomso shin u kwase vegher u i kaa er “U Yaven a or man Aeren” ken takerada u i yer er Questions Young People Ask—Answers That Work la ga? A kpiligh we iyol shi a saan we iyol kpaa sha kwagh u una due ker la.

11. Kanyi i lu gbenda u hembancii u mbamaren vea tesen ônov vev u eren Yehova tomo?

11 Ka itinekwagh i nyi i hembe lun hange hange u mbamaren man ônov vea lam shami? Apostoli Paulu yange ôr kwagh shami zum u a nger la er: “Yese nen [ônov enev] sha mkôôm man kwaghwan u Ter.” (Mbaefese 6:4) Gba u ônov vea za hemen u henen kwagh u Yehova. Jim yô, gba u vea hen u lun a dooshima sha a na, shi doo u vea soon u eren un tom kpaa. Heen kpaa, a fatyô u tesen kwagh kpishi sha ikyav. Aluer mbayev mba kaven ishigh nenge er Aôndo doo mbamaren vev ishima ‘a ishima ve cii man a uma ve cii man a mfe ve cii’ shi ve nenge er kwagh ne ume atam a dedoo ken uma u mbamaren vev yô, alaghga ve kpaa kwagh la una mgbegha ve u eren nahan. (Mateu 22:37) Sha gbenda shon môm, aluer agumaior nenge er mbamaren vev mba a mnenge u vough sha ugurgur mbaakaav, mba vanden veren Tartor u Aôndo hiihii yô, ve kpaa a wase ve u maan imba mhen la.—Orpasenkwagh 7:12; Mateu 6:31-33.

Bibilo i henen hanma shighe la ngi kpee hen tsombor

12, 13. Ka nyi atôakaa i gbe u a lu a mi ken ishima aluer ka u kwaghhenen u hen tsombor una za vough yôô?

12 Bibilo i henen hen ya hanma sati la ka iwasen i vesen i ôron akaa a ken jijingi a agumaior. (Pasalmi 119:33, 34; Anzaakaa 4:20-23) U lun a imba kwaghhenen la hanma shighe ka kwagh u vesen. (Pasalmi 1:1-3) Mbamaren man ônov vev ve̱ kav er ka u a ver akaa a genegh ken ijime i kwaghhenen u hen tsombor, ka u a ver á ken hemen ga. U seer yô, ka kpee u a lu a ieren i dedoo aluer ka u kwaghhenen u hen tsombor la una wase yô. Ter ugen kaa er: “Kwaghmyer u a lu yô ka u ortesen la nana  maa mlu u icivirigh hen iaven i kwaghhenen u hen tsombor la—a lu mlu u gigh-gigh ga kpa shi a lu u inumbe kpaa ga. Alaghga a lu heghema u aren sha mlu u vough la hanma shighe ga, man a gba u a kôôm ieren i mbakiriki hanma shighe. Aluer akaa za vough ga kwa môm shin kwa har kpa, tavershima man ver ashe sha shighe ugen.” Ter shon ne shi kaa er ken msen u ka un er cii man mhii u hanma kwaghhenen yô, ka un sôn jighilii er Yehova ma a wase hanma or u nana nyôr iyol ken kwaghhenen shon cii u lun a mnenge u vough.—Pasalmi 119:66.

13 U hemen kwaghhenen u hen tsombor la ka tom u mbamaren mba nan jighjigh. Ka mimi, alaghga mbamaren mbagen vea lu mba fan ityesen tsema tsema ga, man alaghga a taver ve u keren igbenda i vea na kwaghhenen u hen tsombor la una kundu iyol yô. Nahan cii kpaa, aluer ônov ou doou ishima “sha ieren man sha mimi kpaa” yô, a sar ú u wasen ve sha iyol i hiden a mi jime man sha mimi u zan hemen ken jijingi. (1 Yohane 3:18) Alaghga vea gba ahon ashighe ashighe, kpa ka keng vea kav ishimaveren you i tsung sha mzehemen ve la.

14. Ka nena a fatyô u yaren tom a Duteronomi 11:18, 19 zum u i lu ôron akaa a ken jijingi a ikaior yôô?

14 Ka kwaghhenen u hen tsombor la tseegh a lu ihon go i a ôr akaa a hange hange a ken jijingi ga. Ú umbur tindi u Yehova hen mbamaren la kpa? Yange kaa er: “Koso nen akaaôron am ne ken ishima yen ken uma wen kpaa; zer nen a sha uwe, a̱ lu ne ikav, shi a̱ lu ne kwagh u zeren sha icul senen hen kungwa. Man tesen ônov ou a, ôron kwagh u a, zum u wea tema hen ya wou, man zum u wea zenden sha gbenda, man zum u wea yav inya man zum u wea moughon sha kpaa.” (Duteronomi 11:18, 19; shi nenge Duteronomi 6:6, 7.) Ngun ka u kaan er saa mbamaren vea pasen ônov vev kwaghaôndo hanma shighe ga. Kpa ityough ki tsombor ki lun a dooshima la kia lu tsevaa sha u nengen hanma ian i ia due u maan mlu u ken jijingi u tsombor u nan cii.

TSAHA MAN IKO I WAN

15, 16. (a) Tsaha kanyi? (b) Kan an i lu tom u nan u nan tsaha, man ka an i lu tom u nan u nengen er i er shamini?

15 Tsaha ka myese u a kôôm yô, shi tsaha kua kwaghôron shami. Tsaha hemba ngun a mhen u mkôôm a ican i nan a na la—ka mimi alaghga a lu kpee u nan gbidiv kpaa. Yange gba u a na ônov ou tsaha zum u ve lu iyev la, man hegen er ve kav ishigh nahan je kpaa, gba u a na ve ú kpeghee, alaghga je yô hemba kan hange hange hegen cii. Agumaior a fan kwagh kav er kwagh ne ka mimi.

16 Bibilo kaa er: “Ibumeor ka nan lahan mkôôm u ter u nan, kpa u nan we iko sha myange yô, ka nan hingir u fan kwagh.” (Anzaakaa 15:5) Se hen kwagh vese ken ivur ne. Inja na yô gba u a na tsaha. Gumor nana fatyô u ‘lahan mkôôm’ ga aluer i na ga yô. Yehova na tom u nan tsaha la hen mbamaren, jim je yô hen ter. Nahan cii kpaa, tom u ungwan tsaha la ka u gumor la. Nana hemba henen kwagh shi nana er akaa a zan kpe kpeghee tseegh aluer nan dondo tsaha u sha kwaghfan u  ter man ngô u nan yô. (Anzaakaa 1:8) Bibilo kaa er: “Ibanave man iheen ngi hen or u vendan mkôôm, kpa u nan we iko sha myange yô, á civir nan.”—Anzaakaa 13:18.

17. Ka mver u vough u nyi i gbe u mbamaren vea ver ishima shami zum u ve lu nan tsaha yôô?

17 Zum u ve lu tsahan agumaior yô, doo u mbamaren vea eren akuma akuma. Ve̱ de kighir yum je u ônov vev vea ule, shin vea kera lu a jighjigh u nan ken ayolave kpaa ga ze. (Mbakolose 3:21) Nahan kpa shi ka u mbamaren vea hide a uwegh ijime je u ityesen i vesen ia kar ônov vev ga. Imba uwegh ku hiden a mi ijime nahan la kua fatyô u van a aahe. Anzaakaa 29:17 kaa er: “Tsaha wan wou, tsô nana na u mmem ken ishima, een, nana na u iember ken ishima.” Nahan cii kpaa, ivur i sha 21 (NW ) la i kaa er: “Or u nan yese kpan u nan sha ue er a lu iyev la je yô, una hingir or u banen aa ishughun ken masetyô.” Shin er ivur ne i̱ lu ôron kwagh u kpan nahan kpaa, ngi vough sha hanma gumor hen ya cii.

18. Kanyi i lu ikyav i tsaha, man kanyi a yange zum u mbamaren ve lu nan tsaha u kpesee laa?

18 Sha mimi yô, tsaha u vough la ka ikyav i tesen er mbamaren mba a dooshima sha wan ve. (Mbaheberu 12:6, 11) Aluer ú ngu ormaren yô, ú fa je wer taver u nan tsaha tsusee, sha inja. Sha u keren bem yô, alaghga a lu inja er ka guda u den wanye kwaor u taver ityough la sha u nana er kwagh u nan soo yô. Nahan cii kpaa, ken hemen yô, ormaren u nan dondo imba mhen ne nana kimbi injar i lun a ya u a gande ave yô.—Anzaakaa 29:15; Mbagalatia 6:9.

TOM MAN INUMBE

19, 20. Ka nena mbamaren vea er a mbayev vev sha kwaghfan sha kwagh u msaanyolo?

19 Sha ayange a tsuaa la yô i lu a ishimaveren er mbayev ve̱ wasen hen ya shin ken ityev. Nyian yô ikaior  kpishi ka i lu a zege shighe u inumbe a mkor shio. U ivin shighe la yô, tar kpenga va a mzehemen kpishi sha ci u nan msaanyol. Seer mban sha er kwagh a gbe tar sha ityesen i Bibilo sha aeren cuku tseegh yô, tsô ú kav kwaghbo u a lu van la.

20 Sha nahan yô, ormaren u a lu tsevaa la ka a wa tindi sha imba msaanyol u a zua a mi la. Nahan kpa, i̱ de hungur we u kaven wer wanye kwaor la nan ngu vesen ga. Hanma inyom, wanye nomso shin wanye kwase la nana ver ishima er i̱ er a nan er organden nahan. Sha nahan yô, ka ieren i kwaghfan u ormaren nana na wanye kwaor ian u tsuan imba msaanyol u nan er nan lu vesen seer la—aluer akaa a nan tsough la nga tesen ivesen i lun a mkav u ken jijingi yô. Ashighe agen yô, alaghga wanye kwaor nana tsua ityogholough, azende, shin akaa agenegh sha mlan. Zum u kwagh ne a er yô, i̱ lam a wanye la sha er ken hemen nana tsua sha mkav yô.

21. Ka nena u lun a iyol kôron tsaha sha shighe u wanye kwaor nan vihi sha msaanyol la una kura nana?

21 Ka shighe nena a ver sha ci u msaanyolo? Ken ityar igen yô i na ikaior hen er vea fatyô u zuan a gurgur zan zan gbem. Sha ci ne yô, gumor nana fatyô u wan ago sha u nana mough hen “inumbe” môm tsô nana yem sha igen. Mase shin u mbamaren vea tese nan er gba u a vihi shighe sha akaa agen kpaa, anza er tsombor, kwaghhenen, tem-imôngo vea ior mba tsoghur ken jijingi, mbamkombo mba Mbakristu, man ityom i hen ya. Kwagh ne una yange “ugurgurmbaakaav mba uma ne” u imbishi Mkaanem ma Aôndo kera.—Luka 8:11-15.

22. Kanyi a ver akuma akuma a msaanyol ken uma u wanye kwaoro?

22 Tor Solomon yange kaa er: “M fa ma kwagh u hemban doon ve ngu ga, saa u ember man u eren akaa a  dedoo sha ayange a ve lu uma la cii. Man shi er hanma or nana̱ ya kwagh, nana̱ ma kwagh, i̱ doo nan iyol ken tom u nan ye ican sha mi la cii; kwagh ne ka iwua i Aôndo je.” (Orpasenkwagh 3:12, 13) Een, u ember ka vegher u uma u vough. Kpa kape u eren tom taveraa kpaa i lu la. Ikaior kpishi nyian mba henen mkom u ka a va ken tom u eren taveraa shin ken icivir i or ka nan zua a mi sha u nôngon a mzeiyol u taver man been a mi la ga. Mbagen yô i na ve ian i henen tomavee shin kpenga u vea sue ayolave a mi ken hemen u uma ve ga. Ngun ka kwagh u vesen hen ormaren. Ú wa iko u nengen wer wanye wou zua a imba ian ne kpa? Aluer ú fatyô u tesen wanye wou u soon shi zuan a msaanyol ken tom u eren taveraa yô, wan u nomso shin u kwase la nana maa mnenge u dedoo u una va a averen ken uma u nan cii yô.

MOUGH HEN KWAOR YEM KEN GANDEN

Tese dooshima man iwuese hen ônov ou

23. Ka nena mbamaren vea taver mbayev veve?

23 Shin zum u ú lu a mbamzeiyol a wanye wou je kpaa, ruamabera ngu mimi her tsô: “Dooshima been mayange ga.” (1 Mbakorinte 13:8) Mayange de deen u tesen dooshima u ú lu a mi la ga. Pine iyol you wer, ‘Ka m wuese wanye zum u ka nana̱ sôr mzeiyol tsembelee shin nana̱ hemba kwagh u taver kpa? M yaren tom a aan a dugh la sha u pasen dooshima man ishughun hen ônov av, cii man aan la aa kar kpa?’ Shin er ashighe agenegh akaa a zan iyol ka a va nahan kpaa, aluer ikaior na jighjigh er ú ngu a dooshima sha a ve yô, ve kpaa vea tese dooshima kpee.

24. Ka tindi u ken Icighanruamabera u nyi a dugh mimi wuee sha myese u ônovo, kpa kanyi i doo u a fa ken ishima?

24 Ka mimi, er mbayev ve lu vesen yô, a gba u vea tsua kwagh u ve soo la ken hemen ayolave. Ashighe agenegh yô mbamaren vea soo kwagh u ve tsough la  ga. Aluer wan ve la tsua a ishima na er una kera er Yehova Aôndo tom ga ye? Kwagh a fatyô u eren nahan. Mbagen ken ônov mba Yehova mba ken jijingi je kpaa yange ve venda kwaghwan na man ve hembaato. (Genese 6:2; Yuda 6) Mbayev ka ukômputa ga, a fatyô u eren ve veren er ve̱ yar tom er se soo la vough ga. I gba ve a ian i eren kwagh u ve soo yô, mba aa tom u ôron Yehova kwagh u ve tsough la. Er i lu nahan kpaa, Anzaakaa 22:6 ka tindi u a lu mimi wuee yô: “Tese wanye gbenda u nana za yô, nahan shighe u nana bee iyol je kpaa, nana pav a u ga.”

25. Kanyi i lu gbenda u hembancii u mbamaren vea tese ishughun hen Yehova sha ian i lun mbamaren?

25 Nahan yô, tese ônov ou dooshima kpishi. Nôngo sha er ú fetyô cii u dondon atindi a Bibilo sha u yesen ve. Tese ikyav i dedoo sha ieren i cian Aôndo. Sha nahan ú na ônov ou ian i hemban cii u vesen hingir mbaganden mba kaven kwagh, mba cian Aôndo. Ngun ka gbenda u hemban cii u mbamaren vea tese ishughun hen Yehova sha ian i lun mbamaren je ne.