Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITYOUGH PUETARATAR

Kura mlu u ken Hemen u Tsan Gbem sha ci u Tsombor Wou

Kura mlu u ken Hemen u Tsan Gbem sha ci u Tsombor Wou

1. Kanyi yange i̱ lu awashima u Yehova sha mser u ivese?

ZUM u Yehova yange zua Adam man Ifa ken ivese la, Adam tese iember na sha u ôron icam i hiihii i i nger ken zwa Heberu la. (Genese 2:22, 23) Nahan cii kpaa, Orgban la yange lu a kwagh ken ishima hemba di u van a msaanyol hen ônov nav mba uumace la. Yange soo er akar a ivesegh man icombor ve̱ er ishima na. Yange kaa a mba hiihii mbara er: “Mar nen kpishi, seer nen ngeen, iv nen tar, gema nen u, u̱ lu sha ikev yen; ishu i shin zegemnger man inyon i purugh sha kwavaôndo man hanma kwagh u uma u a zenden sha tar cii, ve̱ lu sha ikev yen.” (Genese 1:28) Nenge imba zege tom, u van a mtsera sha wono! Nenge imba msaanyol u yange ve kua ônov mba ma ve mar ken hemen la yange ma ve zua a mi aluer yange Adam man Ifa vea er ishima i Yehova vough yô!

2, 3. Ka nena icombor ia zua a msaanyol u hemban nyiana?

2 Nyian kpaa, icombor ka i hemba zuan a msaanyol zum u ve cii ve nôngo sha u eren ishima i Aôndo yô. Apostoli Paulu yange nger er: “U civir Aôndo yô, ngu a inja sha akaa cii gadia ngu a ityendezwa sha uma u hegen ne kua uma u a lu van la kpaa.” (1 Timoteu 4:8) Tsombor u u civir Aôndo shi u dondo gbenda u Yehova a tese er i nger ken Bibilo la yô ua zua a msaanyol ken “uma u hegen ne.” (Pasalmi 1:1-3; 119:105; 2 Timoteu 3:16) Shin aluer ka or môm tseegh hen tsombor nan lu yaren tom sha akaawan a Bibilo kpaa, akaa aa hemba zan dedoo a u or môm tsô kpaa ma nan lu dondon á ga la.

 3 Takerada ne time sha akaawan a Bibilo kpishi a ka a seer u van a msaanyol hen tsombor yô. Ka keng ú nenge akaa agenegh due kwa kimbir kimbir ken takerada shon cii yô. Sha ci u nyi? Sha ci u a tile sha mimi mba taveraa mba ka ve yar tom sha mdoo u avegher kposo kposo a uma u hen tsombor yô. Tsombor u u nôngo sha u yaren tom a akaawan a Bibilo ne yô ua kav er mimi je mciviraôndo “ngu a ityendezwa sha uma u hegen ne.” De shi se nenge sha akaawan a vesen anyiin.

INJAR I IYOL KÔRON TSAHA

4. Er nan iyol kôron tsaha i lu kwagh u vesen ken ivese?

4 Tor Solomon yange kaa er: “Er gar u i hembe un man a lu a gir ga nahan, kape or u nan ker iyol i nan tsaha ga nan lu la.” Anzaakaa 25:28; 29:11) ‘U kôron iyol tsaha,’ u lun a iyol kôron tsaha la, ka kwagh u hange hange sha ci u mba ve soo ivese i lun a msaanyol yô. U nan iyol sha ishima i van a mtim, inja er ishimanyoon shin ijimba i eren la, una va a mvihi u a tôô anyom u sôron yô—aluer ka u a fatyô u sôron je kpaa.

5. Ka nena or u nan yen la nana fatyô u kôron iyol tsaha, man ka mbamtsera mba nyi vea va?

5 Ka mimi, or môm ken vor u Adam nana fatyô u kôron iyol i nan i inyam i yinan la tsaha vough ga. (Mbaromanu 7:21, 22) Er i lu nahan kpaa, iyol kôron tsaha ka ityamegh ki jijingi. (Mbagalatia 5:22, 23) Sha nahan yô, jijingi u Aôndo una ume iyol kôron tsaha ken a vese aluer se sôn ieren ne yô, aluer se yar tom sha kwaghwan u vough u ken Icighanruamabera la, man aluer se nyôr nongo imôngo a mbagenev mba ve lu a mi shi se nyagh mba ve lu a mi ga la yô. (Pasalmi 119:100, 101, 130; Anzaakaa 13:20; 1 Peteru 4:7) Imba ieren la ia wase se u ‘yevese idya,’ shin zum u i mee se je kpaa. (1 Mbakorinte 6:18) Se nyagh ipila i eren shi se palegh shin se hemba angev mbu msôrov. Shi se er teghelee sha shighe u i vihi se ishima shi zum u akaa a taver yô. Hanma or cii—kua  ônov kpaa—ve̱ lu a ityamegh ki hange hange ki jijingi ne.—Pasalmi 119:1, 2.

MNENGE U VOUGH SHA MLU U ITYOUGH

6. (a) Kanyi i lu icighan mver u ityougho? (b) Ka nyi i gbe u nomsoor nana umbur keng aluer ityough ki nan lu la ka u kia va a msaanyol hen tsombor u nan yô?

6 Kwaghwan u vesen u sha uhar yô ka mkav u ityough. Paulu yange pase mver u i ver akaa vough vough la zum u a kaa nahan la er: “Sarem ka fa nen, ityough ki hanma nomsoor yô, ka Kristu, man ityough ki kwase yô, gema ka nom, man ityough ki Kristu yô, ka Aôndo je.” (1 Mbakorinte 11:3) Inja na yô or ka nan hemen hen tsombor, kwase u nan a tese ishoon sha u suen nan, man ônov ve ungwa mbamaren vev. (Mbaefese 5:22-25, 28-33; 6:1-4) Nahan kpa, ver ikyav wer hemen ngu ve a msaanyol zum u i ne u sha gbenda u injaa la tseegh. Noov mba ve lu a mciviraôndo yô ve fa er hemen ka nom-or ga. Ka ve kav Yesu, u a lu Ityough vev la. Shin er Yesu yange lu “ityough sha akaa cii” nahan kpaa, yange ‘va, lu sha u i̱ er Un tom ga, kpa sha u Un Una er mbagenev tom.’ (Mbaefese 1:22; Mateu 20:28) Sha gbenda shon môm, Orkristu ka nan hemen, i lu sha u i̱ wase nan ga, kpa i lu u wan iko sha mkpeyol u kwase u nan man ônov mba nan.—1 Mbakorinte 13:4, 5.

7. Ka akaawan a nyi ken Icighanruamabera aa wase kwase u ivin tom u Aôndo a we nan hen tsombor laa?

7 Ken vegher u nan yô, kwase u nan eren sha mciviraôndo la nan te hwande shin nan keren er nana kar a hemen nom u nan ga. Ka i saan nan iyol u suen shi eren tom imôngo a nan. Bibilo ka i̱ ôr kwagh u kwase ashighe agenegh er “ka u” nom u nan, nahan tese gbar gbar je er nan ngu ityough sha a nan. (Genese 20:3) Ken ivese ka nan hingir sha ikev i “tindi u nom.” (Mbaromanu 7:2) Sha shighe shon môm, Bibilo yila nan er “or u wasen” shi or “u lun er un.” (Genese 2:20) Ka nan va a aeren man  kwaghfan u a ban ken nom la, shi nan na nan ishuen i i gbe u a na la. (Anzaakaa 31:10-31) Shi Bibilo kaa er kwase ka “ijende,” or u nan zenden ikooso ikooso a ikar u nan yô. (Malaki 2:14) Akaawan a ken Icighanruamabera ne ka a wase nom man kwase u kaven ian i hanma or man u eren a nan sha iko i wan vough man sha icivir kpaa.

“LU TSEV TSEV SHA U UNGWAN KWAGH”

8, 9. Pase atindi a aa wase hanma or hen tsombor u sôron kwaghôron ve seer yô.

8 Ken takerada ne i ôr er i doo u a luun a kwaghôron la kwa kimbir kimbir. Sha ci u nyi? Sha ci u akaa ka a hemba zan doon zum u ior ka vea lamen shi vea keghen ato hen mbagenev yô. I vande ôron taver taver kwa imôngo er kwaghôron ka godobi u lun ihiange ihiar. Orhenen Yakobu yange pase kwagh ne ken mkaanem man er: “Hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron.”—Yakobu 1:19.

9 Shi ka hange hange u se wa iko sha er se lam la. Mkaanem ma nyaeng, sha ayongo, shin ma ôron sha sende ityou la ka kwaghôron u vough ga. (Anzaakaa 15:1; 21:9; 29:11, 20) Shin zum u kwagh u se ôr kwagh shami la a lu u shami je kpaa, aluer se ôr un sha gbenda u ifer, u sha imanger, shi a iko i wan shio yô, ka keng una vihi a vihi ikyaa una va a mdoo ga. Kwaghôron wase a̱ doo ungwan, a̱ lu “u i we bar sha mi yô.” (Mbakolose 4:6) Mkaanem asev ma̱ lu vough er “atam a ikon a zenaria a i we a shin agbande a azurfa nahan.” (Anzaakaa 25:11) Icombor i i hen u ôron kwagh sha inja yô i zua a zege mzehemen u van a msaanyol.

TOM U VESEN U DOOSHIMA

10. Kanyi inja dooshima i̱ lu kpee ken ivese?

10 Ishemberti i “dooshima” la i̱ due kwa imôngo ken takerada ne. Ú umbur imba dooshima u vesen u i er  kwagh shami la kpa? Ka mimi dooshima u eren hen atô u nomsoor man kwase (zwa Grika, eʹros) la ka kwagh u vesen ken ivese, man ken ivese i i zough a mzehemen yô, ishoon i zan shimi hiinii man ijende i taveraa la (zwa Grika, phi·liʹa) ka i vese hen atô u nom man kwase. Kpa u hemban cii yô ka dooshima u a til sha ishemberti i ken zwa Grika i a·gaʹpe la. Ka dooshima u ka se lu a mi sha Yehova, sha Yesu, man hen huror wase je ne. (Mateu 22:37-39) Ka dooshima u Yehova ka a tese hen uumace la. (Yohane 3:16) Ka kwagh u dedoo tsô er se kpaa se fatyô u tesen imba dooshima ne hen or u se vese la man ônov kpaa yô!—1 Yohane 4:19.

11. Ka nena dooshima ka a yar tom sha mdoo u ivese?

11 Ken ivese yô dooshima u a kende sha ne mimi je “ka kwagh u maghen mlu u vough je la.” (Mbakolose 3:14) Ka a magh mba ken ivese man a na ve soo u eren kwagh u a hembe doon sha ci u or ve la man sha ci u ônov. Zum u kwagh u taver ka una tser icombor yô, dooshima ka a wase ve u nôngon a kwagh la ken mzough. Er mba ken ivese ka vea gba beenyol yô, dooshima ka a wase ve u suen shi zan hemen u lun a isharen sha ayolave. “Dooshima . . . keren kwagh na iyol na tsô ga . . . we ishima a akaa cii; un ne jighjigh sha akaa cii, luun a ishimaverenkeghen sha akaa cii, taver ishima sha akaa cii. Dooshima been mayange ga.”—1 Mbakorinte 13:4-8.

12. Er nena dooshima u mba ken ivese ve lu a mi hen Aôndo la ka a taver ivese ve?

12 Mzough u ivesegh ka a hemba taver zum u ka a̱ kange un sha dooshima u hen atô u mba ken ivese la tseegh ga kpa jim je yô a̱ lu sha dooshima hen Yehova la. (Orpasenkwagh 4:9-12) Sha ci u nyi? Ka shami, apostoli Yohane yange nger er: “Ka dooshima u Aôndo ne, ka u se̱ kuran atindi a Na.” (1 Yohane 5:3) Nahan yô, mba ken ivese ve̱ yese ônov vev sha mcivir u civir Aôndo i̱ de lu sha ci u ônov mbara doo ve ishima tsung tsô ga kpa  i̱ lu sha ci u ka tindi u Yehova. (Duteronomi 6:6, 7) Ve̱ nyagh idya i̱ de lu sha ci u mba a dooshima hen ayolave tseegh ga kpa i̱ lu sha ci u Yehova doo ve ishima, un u ‘Una ôr mbaerenijimba man mbavihin ivaa sha idya ijir la.’ (Mbaheberu 13:4) Shin aluer mô ken ave va a mbamzeiyol mba vesen hen ivese je kpaa, dooshima hen Yehova una na ugenegh la nana za hemen u dondon akaawan a Bibilo. Mimi je icombor i i kange dooshima u hen ayolave la sha dooshima u hen Yehova yô, saan ve iyol tsô!

TSOMBOR U EREN ISHIMA I AÔNDO

13. Ka nena u veren ishima er a er ishima i Aôndo la una wase ior u veren ashe sha akaa a a hembe lun a injaa laa?

13 Uma u Orkristu cii har sha u nana er ishima i Aôndo. (Pasalmi 143:10) Ka inja i mciviraôndo jim je ne. U eren ishima i Aôndo la ka a wase icombor u veren ashe sha akaa a a lu a hemban sha mimi la. (Mbafilipi 1:9, 10) U tesen ikyav yô, Yesu yange ta icin er: “M va sha u nan mpav her atô u or a ter u nan, man wankwase kpaa a  ngô u nan, wankem di a ngôkem u nan. Man mba ken ya u or vea gema vea lu mbaihomov mba nan je.” (Mateu 10:35, 36) Mimi vough er Yesu ta icin nahan, i tôv mbadondon nav kpishi a ican sha ikev i mba ken tsombor ve. Nenge kwagh u vihin, nyoon tsung nu! Nahan kpa, ishoon i sha tsombor i̱ de hemban dooshima wase hen Yehova Aôndo man hen Yesu Kristu ga. (Mateu 10:37-39) Aluer or taver ishima shin er tsombor u nan u hendan a nan nahan je kpaa yô, alaghga mba hendan mbara vea gema zum u vea nenge akaa a dedoo a mciviraôndo la yô. (1 Mbakorinte 7:12-16; 1 Peteru 3:1, 2) Shin aluer kwagh er nahan ga je kpaa, ma kwagh u dedoo u naleghaa ngu sha u den u eren Aôndo tom sha ci u ahendan ga.

14. Ka nena isharen i eren ishima i Aôndo la ia wase mbamaren u eren kwagh u una hemba wasen ônov veve?

14 U eren ishima i Aôndo la ka a wase mbamaren u tsuan kwagh u vea er la vough. Ikyav i tesen yô, ken ajiir agenegh mbamaren ka ve nenge er ônov ka kpenga u wan ajia, man ka ve har ishima er ônov vev ve̱ nenge sha ave ken iyolbeen ve. Er i lu shami shi i lu vough u ônov mbaganden vea nenge sha mbamaren vev mba beenyol nahan kpaa, kwagh la a̱ de naan mbamaren u tesen ônov vev er ve̱ dondo gbenda u keren uyôghyôgh ga. Mbamaren vea lu nan ônov vev iwasen ga aluer ve yese ve u hemban lun a gbashima sha akaa a inyar a akaa a ken jijingi yô.—1 Timoteu 6:9.

15. Ka nena yange ngô u Timoteu, Unise, lu ikyav i vough i ormaren u nan er ishima i Aôndo?

15 Ikyav i dedoo i tesen sha kwagh ne yô ka Unise, ngô u Timoteu ijende i uye i Paulu la. (2 Timoteu 1:5) Shin er yange vôso or u nan jighjigh ga nahan, Unise, imôngo vea Loisi ngô u tamen u Timoteu, yange ve yese Timoteu vough u dondon mcivir u Aôndo. (2 Timoteu 3:14, 15) Zum u Timoteu vese kuma yô, Unise de un er a̱ undu ya  a̱ tôô tom u pasen kwagh u Tartor man a̱ hingir ikyar u Paulu ken tom mishen. (Aerenakaa 16:1-5) Yange a saan un iyol tsô zum u wan na u nomso hingir icôr or mishen yô! Mciviraôndo na u ken ganden la yange tese ikyav i ityesen i tsuaa la. Mimi je, Unise yange zua a mkom man iember sha u ungwan abaver a dedoo sha tom u Timoteu u sha jighjigh u nan la, shin er alaghga yange sar un pe ma a lu vea na her nahan kpaa.—Mbafilipi 2:19, 20.

TSOMBOR MAN MLU WOU U KEN HEMEN

16. Er lu wanye la, ka iko i wan i vough i nyi yange Yesu tese, kpa kanyi yange i lu ishimaveren na i hiihii?

16 Yange i yese Yesu hen tsombor u civir Aôndo man, er a hingir organden yô, a tese iko i wan i vough i wannomso sha ngô na. (Luka 2:51, 52; Yohane 19:26) Nahan cii kpaa, kwagh u hemba lun u vesen hen Yesu yô lu u ivin ishima i Aôndo, man hen a na yô kwagh ne kua u bughun gbenda sha er uumace vea ember uma u tsôron yô. Yange er kwagh ne zum u a na uma na u or u vough la hingir ipaan sha ci u uumace mba isholibo la yô.—Marku 10:45; Yohane 5:28, 29.

17. Ka ishimaveren i iengemegh i nyi yange ieren i Yesu i sha jighjigh u nan la i bugh sha ci u mba ve er ishima i Aôndo la?

17 Er Yesu kpe kera yô, Yehova nder un yem a na sha za na un zege utaha, ken hemen yô a ver un er a̱ lu Tor u Tartor u sha. (Mateu 28:18; Mbaromanu 14:9; Mpase 11:15) Nagh ku Yesu la yange ku na hingir u a fatyô u tsuan uumace mbagenev er ve̱ za tema tor a na imôngo ken Tartor la. Shi kwagh la bugh gbenda sha ci u uumace mbagenev mba ve lu a ishima i dondon tindi yô u ember uma u vough ken tar u a hide a mbamlu mba paradiso la. (Mpase 5:9, 10; 14:1, 4; 21:3-5; 22:1-4) Môm ken ian i hemban vesen cii i se lu a mi nyian yô ka u ôron mba wan ndor a vese loho u dedoo u iengem ne.—Mateu 24:14.

18. Ka m-umbur shi ka ishimataver i nyi i ne hen icombor man hen hanma oro?

 18 Er apostoli Paulu yange tese nahan, u lun uma sha mciviraôndo la ngu a ityendezwa er ior vea fatyô u zuan a averen ken uma “u a lu van la kpaa.” Mimi je, ngun ka gbenda u hemban cii u zuan a msaanyol je ne! Umbur, “tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.” (1 Yohane 2:17) Nahan yô, wea lu wanye shin ormaren, nom shin kwase, wea lu organden u lun kwav shin wea lu aa ônov kpaa, nôngo u eren ishima i Aôndo. Shin zum u ú lu ken mkighir shin akaa a taver a tser ou je kpaa, mayange i̱ de hungur we er ú lu ortom u Aôndo u uma la ga. Nahan yô, akaaeren a ou a̱ va a iember hen Yehova. (Anzaakaa 27:11) Man ieren you kpa i̱ va a msaanyol hen awe hegen man uma u tsôron ken tar u he u ua va la!