Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITYOUGH 13

“Atindi a TER Nga Vough Je”

“Atindi a TER Nga Vough Je”

1, 2. Hii nan ve ior kpishi ve kera kor tindi ga, nahan kpa atindi a Aôndo aa hingir u doon se nena?

“IJIR ka iv nor, ngi . . . í mena hanma kwagh cii.” I gber mkaanem man ken takerada ugen ken inyom i 1712. Orngeren ma la toor iyol sha mtse u ijir ka i tsa ken mbaatejir anyom anyom, kpa i kuren sha won ga, nahan mba ve yer ijir la ve gema ve kungu a kungun ican la. Ken ityar igen kpishi, kwagh u tindi man kwagh u jirigh cimin je gande, shi ijir i ôron sha ifer kpa dumbur kua ihyom man kwagh u nzughul, je yô, tindi kera ngu ior ityôkyaa ga.

2 Tôô ase kwagh u se ôr sha heen ne kar sha mkaanem ma ngise i nger je anyom a kar hegen í kom 2,700 ne, ma kaa ér: “Atindiakaa a Ou, doom ishima zee!” (Pasalmi 119:97) Hii nan ve atindiakaa ne doo orpasalmi ishima yum nahana? Ityôkyaa yô, atindiakaa a á lu wuese la due hen ma gomoti u tar ne ga, kpa gema due hen Yehova Aôndo. Er u lu henen atindiakaa a Yehova nahan, we kpa kape a lu lun we ken ishima er orpasalmi kpa ngise lu un nahan je la. Imba kwaghhenen la una na u ú lu a mkav sha kwagh u orjir u hemban sha won cii la.

Orwanatindi u Hemban Cii

3, 4. Yehova tese ér un ngu Orwantindi nena?

3 Bibilo kaa ér: “Un u A we atindi, man shi Un u A lu Orjir ngu môm tsô.” (Yakobu 4:12) Sha mimi yô, Yehova ngu Orwanatindi u mimi tswen je. Akaa a sha kwavaôndo je kpaa nga a “atindi a Sha” a a hemen á yô. (Yobu 38:33) Akum a uicighan mbatyomov mba Yehova kpaa mba a tindi u hemen ve, gadia i ver ve sha adondo adondo man mba eren tom sha hemen u Yehova.—Pasalmi 104:4; Mbaheberu 1:7, 14.

4 Orumace kpa Yehova na nan atindi. Se cii se mba a imoshima, man í tese mnenge u Yehova a nengen kwagh u ijirôron i  sha mimi yô. Imoshima ngi er ka tindi nahan, ia fatyô u wasen se u kaven kwagh u a lu u shami man u a lu u shami ga yô. (Mbaromanu 2:14) Mbamaren asev mba hiihii mbara ve lu a imoshima i vough, nahan ityôkyaa lu i a na ve atindi kpishi ga. (Genese 2:15-17) Nahan kpa, er uumace ve yen yum yô, gba u a wa ve atindi kpishi a aa kôôm ve sha u eren ishima i Aôndo yô. Yehova Aôndo yange wa uter asev mbatsev er Noa man Aberaham man Yakob nahan cii atindi, ve di kpa ve gema á ve wa icombor ve. (Genese 6:22; 9:3-6; 18:19; 26:4, 5) Yehova hingir Orwantindi sha gbenda u kpilighyol shighe u á na ikyurior i Iserael Tindi sha ikyev i Mose la. Tindi ne wase se u kaven mnenge u Yehova a nengen kwagh u ijirôron i sha mimi la vighe vighe.

U Savenôron Tindi u Mose La

5. Tindi u Mose lu atindi a yuhwan man á wan kperegh kpereghe, man er nan ve u ne mlumun nahana?

5 Ior kpishi hen ér Tindi u Mose yange lu di ikpela atindi u wan kperegh kperegh tsô. Imba mhen la ka i mimi ga cii. Atindi nga je hemba 600 ken tindi u yange i na Mose la jimin cii. Alaghga a lu inja er á ngee kpishi nahan, kpa hen ase yôô: Ken mkur u derianyom u sha 20 la, atindi a gomoti u shin tine u tar u United States iv upeeji mba ityakerada i atindigh 150,000. Anyom ahar nga a karen je i seer atindi a kuman 600! Nahan aluer se mba ôron kwagh u atindi a ngeen yô, Tindi u Mose za ikyua a atindi a uumace cuku kpaa ga. Nahan kpa, ngise Tindi u Aôndo hemen Mbaiserael sha igbenda kposo kposo i atindi a hegen ne a lu a ar her ga yô. Se sav ase ôron nen kwagh u Tindi ne.

6, 7. (a) Kanyi i pav Tindi u Mose la i ver kposo a ma tindi ugene, man ken Tindi la cii, ka tindi u hana a lu u hembana? (b) Lu u Mbaiserael vea tese ér ve lumun a hemen u Yehova nena?

6 Tindi la kende a hemen u Yehova sha. U fatyô u karen Tindi u Mose sha ma tindi ugen ga. Tindi u hemban ken atindi ne cii kaa ér: “Ver ato Iserael: TER, Aôndo wase, ka TER tswen, je! Nahan yô, TER Aôndo A̱ doo u ishima a ishima you cii man a  uma wou cii man a agee ou cii.” Lu u ior mba Aôndo vea tese ér á doo ve ishima nena? Lu u vea eren un tom shi vea wa ayol a ve sha ikyev i hemen na.—Duteronomi 6:4, 5; 11:13.

7 Hanma or u Iserael yange nan tese ér nan lumun hemen u Yehova sha u ungwan imo i mba á tsough ér ve hemen nan la. Hii sha mbamaren man utyombaiorov man mbaajiriv man upristi zan zan utor kpaa cii. Gadia ve cii ve tile sha ityough ki tahav mbu Aôndo. Yehova nenge nyityô mhendan u hendan a mba ve lu hemen la ér ka un jighilii í lu hendan a na ye. Gema sha vegher ugen yô, Yehova yange á tsaha mba ve lu hemen mbara shighe u ve nzughul a ior nav yô. (Ekesodu 20:12; 22:28; Duteronomi 1:16, 17; 17:8-20; 19:16, 17) Nahan yô, mbahemenev man mba i lu hemen ve la cii lu a tom u kenden a hemen u Aôndo sha.

8. Tindi yange sue mnenge u Yehova a nengen icighankwagh la nena?

8 Tindi sue mnenge u Yehova a nengen icighankwagh la. Yange i yar tom a ishember i “icighan” man “icighankwagh” la ken Tindi u Mose la je hemba kwa 280. Tindi la wase ior mba Aôndo u fan mkposo u kwagh u wang man u wang ga, á tese akaa kposo kposo, a aa fatyô u hôngor Oriserael je kuma er 70 nahan. Atindi ne ôr kwagh u tsembelee u eren man akaayan man gbenda u zan akôngo kpaa. Yange wase sha kwagh u mkpeyol kpen kpen. * Kpa awashima u hemban heela yô—lu sha u veren Mbaiserael ken mlu u dedoo vea Yehova, shi paven ve veren kposo a aeren a ifer a ityar í i kase ve la. Time ase sha ikyav ne.

9, 10. Ikuryan i Tindi la lu a atindi a nyi sha kwagh u yavaor man mara, man atindi la wase Mbaiserael sha nyi gbenda?

9 Atindi a ken ikyuryan i Tindi u Mose la tese ér myav u nomsoor yaven a kwase la ka a na ve kera lu wang hen shighe  la ga—ka a lu nom vea kwase u nan je kpaa, shi mar kpa ka u na kwase a kera lu wang ga. (Levitiku 12:2-4; 15:16-18) Atindi ne yange vihi uiyua mba wang mba Aôndo a ne se ne ga. (Genese 1:28; 2:18-25) Kpa, a gema a kende a mlu u wang u Yehova sha, nahan a kura mbacivir un sha er vea hôngor ayol a ve ga yô. Doo u se fa ser, akuraior a yange kase Iserael la nungwan mcivir sha idya man akombo a sôron ér iyiagh mbi doo. Kwaghaôndo u Mbakanaan wa gbaga u nomso man kasev cii eren la ker. Sha nahan yô, akaa a ndôhôrshima a vihin tsung hii ken kwaghaôndo ve ne shi samber wuee. Kpa Tindi u Mose la yô lu kposo, yange na mcivir u civir Yehova tile paleghaa, zua kwaghmôm a kwagh u yavaor ga. * Mbamtsera mbagen kpa ve lu.

10 Atindi ne cii lu sha ci u tesen mimi u hange hange ugen. * Jighilii yô, ka sha nyi gbenda isholibo i Adam la i̱ tsar ior sha ikyov ikyovo? Kera ka sha m-yav u yaven á or man mar ga zee? (Mbaromanu 5:12) Een, Tindi u Aôndo yange umbur ior nav hanma shighe er ve lu mbaasorabo yô. Man ka kwagh u a lu vough je la, gadia se cii i mar se ken isholibo. (Pasalmi 51:5) Gba u a de se asorabo shi a paa se ve se fatyô u kporom a icighan Aôndo wase ye.

11, 12. (a) Tindi yange sue nyi i hange hange sha kwagh u ijirôron i mimi? (b) Ka igbenda i nyi Tindi lu a mi i yangen or u nzughul a ijirôron i mimi?

11 Tindi la yange kende a ijirôron i Yehova i vough la sha. Tindi u Mose yange sue tindi u a kaa ér or a er ú kwagh yô we kpa u er a nan vough er nan er a we la, ér ka ngula i lu ijirôron i sha mimi ye. Nahan Tindi shon kaa ér: “Uma sha uma, ishe sha ishe, inyigh sha inyi, uwegh sha uwe, nguhar sha nguhar.”  (Duteronomi 19:21) Nahan yange or a er ifer yô, i gba u a tsaha nan sha indi i ifer i nan er la. Tindi u Mose la ôr kwagh u tindi u uma sha uma, u a lu vegher u ijirôron i Aôndo la var var, man er Ityough 14 ki tese nahan, zan zan nyian je kpa tindi ne ngu hange hange sha u wasen se u kaven kwagh u a lu nagh ku ipaa ku Kristu Yesu la yô.—1 Timoteu 2:5, 6.

12 Tindi shi lu a igbenda igen i yangen ior u nzughul a ijirôron i mimi. Ikyav i tesen yô, tindi yange kaa ér a hemba kpa iorov uhar ve er shiada sha u tesen ér mimi je or er kwaghbo. Yange or nana bum sha aie yô, i na nan mtsaha kehelee je. (Duteronomi 19:18, 19) Ingyatu man ishô-yamen kpa i tswer. (Ekesodu 23:8; Duteronomi 27:25) Ken kasua u eren je kpa, yange gba u ior mba Aôndo vea tese ér kwagh u mimi doo Yehova ishima. (Levitiku 19:35, 36; Duteronomi 23:19, 20) Tindi u doon tsung man u sangen a sange ga ne lu a iveren hen Iserael kpishi!

Atindi A A Tese M-er u Ôron Ijir sha Mhôôn man u Sangen a Sange ga La

13, 14. Tindi u Mose la tese ér i̱ er a ormbaiv man or u í ii nan kwagh la vough nena?

13 Yange i kange Tindi u Mose dông lu kwagh u zungwen or mhôônom cuku tsô kpaa gaa? Mayange ga! I na Tor Davidi mkaanem man nger wener: “Atindi a TER nga vough je.” (Pasalmi 19:7) Er un kpa vande fan nahan, Tindi kaa ér i zungwe mhôônom shi i de sangen a sange sha dooshima ga. Tindi yange kaa ér i er kwagh shon nena?

14 Ken ityar igen ainge, ka inja er tindi ngu hemban tan ikyaa a aferaior shi ngu hemban eren a ve doo doo a ior mba i eren ve afer la nahan. Ikyav i tesen yô, alaghga a wuhe mbaiv vea lu ken purusu shighe gôgônan. Kpa alaghga á hide mba i ii ve ikyav la a ikyav vev ga, shi vea gema a lu tan a ta kpandegh ku koson ormbaiv a mi. Ngise purusu lu ken Iserael er ve lu ainge nahan ga. Yange i ver ikighir sha mtsaha u a na or sha nyityô kwaghbo u nan er cii. (Duteronomi 25:1-3) Yange i gba u ormbaiv nana kimbi ikyav mbi nan ii mbira. Heela tseegh  ga, ormbaiv la shi nan seer kimbin kwagh. I kuma nena? Ka kwaghbo u nan er la yange a tese ye. Ikyav tese ér yange i na mbaajiriv tahav u nengen sha igbenda akaa wue wue, er mgemshima u orifer la nahan. Kwagh ne pase ityôkyaa i i ne ve injar i yange i gba u ormbaiv nana kimbi i í nger ken Levitiku 6:1-7 la i̱ yina sha i í nger ken Ekesodu 22:7 la yô.

15. Tindi yange pase ér i zungwe or u nan woo or aburabur mhôônom shi i ôr nan ijir sha mimi nena?

15 Tindi u Mose la yange tese sha mhôôn ér, ka akaabo cii í eren á sha apera ga. Ikyav i tesen yô, yange or nana wua or sha aikyôr man nana nyôngoso nana yem ken agar a waren a i maa sha ajiir kposo kposo ken Iserael la yô, nan kera kimbi uma sha uma ga. Mbaajiriv mba ken gar la yange vea time sha mzeyol la vea been yô, i gba u nana lu ken gar la zan zan pristi u tamen una kar kpen. Hen shighe la nan lu a ian i za lun hanma ijiir i nan soo cii. Nahan or la nan zua a mtsera sha mhôônom ma Aôndo. Shi kwagh ugen yô, tindi ne yange tese wanger wanger ér uma u or ngu a inja kpen kpen.—Numeri 15:30, 31; 35:12-25.

16. Tindi yange kuran ior sha akaa agenegh nena?

16 Tindi u Mose la kuran ian i or lu a mi la kpaa. Nenge ase igbenda i yange í kuran mba ve gbe anzô la. Tindi wa nda ér or a de za nyer ken iyou i orinjô u nan nana tôôn nan kwagh sha apera ér ka ityungu ga. Kpa, yange i gba u or u nan ne injô la nana kegh ken won nahan orinjô la nana va na nan kwagh u a̱ lu ityungu la ken won. Nahan kwagh ne na yô, í nyôron or a num hen ya ga. Yange or u nan ne injô lanana ngohol orinjô u nan ikyondo i cirin wuhe a mi yô, nan hide a mi cii man tugh mbu ile ye, sha ci u alaghga a gba orinjô la u cirin wuhe a mi tugh.—Duteronomi 24:10-14.

17, 18. Yange Mbaiserael kaha kposo a akuraior agen sha kwagh u uitya nena, man lu sha ci u nyi?

17 Ityav je kpa yange i nôngon sha er Tindi á tese la. Ior mba Aôndo yange ve nôngon ityav sha u keren tahav shin ngohol inya ga, kpa ve lu ityumugh ki Aôndo ken “Ityav mbi TER.” (Numeri 21:14) Ashighe kpishi Mbaiserael yange vea za hen  ma gar sha u nôngon ityav a na yô, ve vande ôron kwagh a gar la ér a̱ haa ikyav mbi utyav inya. Aluer gar la venda yô, Mbaiserael ve kase un—kpa ve er kwagh ne sha atindi a Aôndo. Ikyumutya i Iserael yange i eren kwagh er ushoja kpishi ve eren nyian nahan ga, ve yaven a kasev sha apera ga shi ve gbaa wuan ior dang dang kpaa ga. Yange i lu kwagh u vea vihi ikyasen i hen ijiir i ve ze ityav la ga, shi vea gber ikyôn i mbaihyomov vev kpaa ga. * Akumautya a akuraior agen yange lu a imba nda ne ga.—Duteronomi 20:10-15, 19, 20; 21:10-13.

18 Kpiligh we iyol u ungwan wer í gema mbayev mba kiriki hingir ushoja ken ityar igenee? Ngise or nyôr anyom 20 cii ve nan kuma u nyôron shoja ken tar u Iserael ye. (Numeri 1:2, 3) Igyanden or je kpa yange nana cian kwagh yum yô, i dugh nan ken uitya kera. Yange i ver orkwasehe ken ya inyom jimin ér nana ver tse cii ve nana hii u zan ityav ye. Er Tindi a pase nahan, gumor ne yange nan zua a ian i nan kwase u nan u he ne “iember ken ishima.”—Duteronomi 20:5, 6, 8; 24:5.

19. Tindi er nyi sha u kuran kasev man mbayev man icombor man kasev mba côgholov man ancôgholovo?

19 Shi Tindi yange kura kasev man mbayev man icombor shi nengen sha a ve kpaa. Yange kaa ér mbamaren ve nengen sha mbayev vev hanma shighe shi ve tesen ve akaa a̱ ken jijingi kpaa. (Duteronomi 6:6, 7) Tindi kaa ér i̱ wua or u nan bugh idyelegh u anngô u nan u kwase shin u nomso la cii. (Levitiku, ityough 18) Shi Tindi venda idya i eren, gadia ashighe kpishi idya ka i pav icombor shi i vihi ulum u í kpaa. Tindi waan kwasecôghol ikyo man ancôgholov shi yange gbang gbang ér i de nzughul a ve kpaa ga.—Ekesodu 20:14; 22:22-24.

20, 21. (a) Tindi u Mose la na ian i eren kasev imôngo ken Iserael sha ci u nyi? (b) Hii nan atindiakaa a Yesu hide a mi ken masejime sha kwagh u ivaa paven la á dugh kposo a Tindi u Mose laa?

20 Kpa, alaghga a lan ior mbagen ishima vea pine ér, ‘Tsô  Tindi yange na ian i lun a kasev imôngo ér nena?’ (Duteronomi 21:15-17) Doo u se nenge sha atindi angara sha shighe u yange i na á la. Ior mba ve tee Tindi u Mose ve karen sha mlu u tar u ainge man aeren a ú cii Tindi ne una tsume ve kpee. (Anzaakaa 18:13) Tindi u Aôndo wa ken Eden la yange na ivese lu mzough u kwase vea nom u gbekeke. (Genese 2:18, 20-24) Shighe u Yehova na Iserael Tindi la nahan aeren amba er u eren kasev imôngo la ya tor ken ior kuma uderimbaanyomov imôngo. Yehova yange fa doo doo ér atindi a a hembe lun hange hange amba er atindi a yangen ior nav akombo a civir la je kpa, ior nav mba ve lu “ior i taver ityough kpe kpe” ne vea peren a hanma shighe. (Ekesodu 32:9) Nahan yô, Yehova yange er kwagh sha kwaghfan, a kera sendegh ér saa una sôr aeren a ve sha kwagh u ivesegh hen shighe la keng ga. Fa dedoo nahan wer ka Yehova yange va a ieren i vôson kasev imôngo la ga. Nahan kpa, á yar tom a Tindi u Mose la sha u panden kwagh u kasev mba vôson imôngo la, man sha u yangen ior u nzughul a ieren la kpaa.

21 Shi Tindi u Mose la na ian ér or a pav ivaa a kwase u nan sha igbenda kpishi kpaa. (Duteronomi 24:1-4) Yesu yila kwagh ne ér ka mlumun u Aôndo lumun a Mbayuda “sha ci u mcighir u asema a [ve]” la. Nahan kpa, imba mbamlumun mbara lu di sha anshighe kpeghee di tsô. Gadia Yesu hide ver tindi u hiihii u Yehova wa sha kwagh u ivesegh la sha ci u mbadondon nav.—Mateu 19:8.

Tindi Kende a Dooshima Sha

22. Ka sha nyi gbenda Tindi u Mose la yange kende a dooshima sha, man lu sha unô?

22 Ma atindi nga ken tar u ainge ne a á taver ior asema ér ve doo ayol a ve yôô? Tindi u Mose kende a dooshima sha hemba hanma atindi agen cii.Nenge ase yô, ken takerada u Duteronomi tseegh kpa, í ter ishember i “dooshima” la sha igbenda wue wue hemba kwa 20. Tindi u sha uhar u hemban ken Tindi u Mose cii la kaa ér “or u nan we ndor a we nana̱ doo u ishima er we iyol you nahan.” (Levitiku 19:18; Mateu 22:37-40) Lu u  ior mba Aôndo vea tese imba dooshima la ayol a ve tseegh ga kpa lu u vea tese or u nan lu shiror ken atô ve la kpaa, kwagh ne lu sha u umbur Mbaiserael ér ve kpa yange ve lu ushirmbaiorov. Lu u mbaatsanev man mbauangev vea doo ve ishima shi vea wasen ve sha inyar shi vea nzughul a ve sha ci u mlu ve la kpaa ga. Yange i kaa a ve kpaa ér ve eren a ujaki man ibua doo doo man sha kwaghfan kpaa.—Ekesodu 23:6; Levitiku 19:14, 33, 34; Duteronomi 22:4, 10; 24:17, 18.

23. Ishima yange i mgbegha orngeren u Pasalmi 119 la u eren nyi, man kanyi se kange ishima u erene?

23 Ka hanma tar ugen u lu a imba atindi laa? Kape i lu je ve orpasalmi yange nger, ér: “Atindiakaa a Ou, doom ishima zee!” ne. Dooshima na la yange lu mhen u ken ishima na tseegh tsô ga. Yange mgbegha un u eren kwagh, gadia á nôngo tsughun u kuran atindi la shi eren sha kwagh u á tese la. Tsô shi á za hemen á kaa ér: “Kam kwagh u shin henen sha [atindi a ou] didi.” (Pasalmi 119:11, 97) Sha mimi yô, yange henen atindi a Yehova hanma shighe. Se fa keng ser, er lu ôron á la, á lu doon un ishima seer a seer. Heela tseegh ga, mdoo u Orwanatindi, Yehova Aôndo doo un ishima la kpa lu seer a seer. Er ú za hemen u henen atindi a Aôndo la, we kpa hemba kporom a kporom hen Yehova, Orwanatindi u Hemban, un u á lu Aôndo u ôron ijir sha mimi kpaa la.

^ par. 8 Ikyav i tesen yô, atindi a yange i wa sha kwagh u iin akôngo a or man sha kwagh u paven oruange veren nan kposo a ior mbagenev man sha kwagh u or ôôn iyol shighe u nan bende a ikyom i or shin kwagh u kpen la cii, i wa a uderimbaanyomov kar ken hemen cii ve ityar igen kpa va hii u nengen a mtsera u atindi ne ye.—Levitiku 13:4-8; Numeri 19:11-13, 17-19; Duteronomi 23:13, 14.

^ par. 9 Yange Mbakanaan ver ajiir agen kposo ken utempel vev sha ci u yaven a ior, kpa Tindi u Mose kaa ér ior mba ve hôngor ayol a ve cii ve de nyer ken tempel ga. Nahan, er m-yav u yaven a or shin kwase yange a na or kera lu wang ga yô, lu u or môm kpa nana ver tindi ér u yaven a or i lu kwagh u civir Yehova sha mi ken iyou na ga.

^ par. 10 Awashima u Tindi la jim jim yô, lu sha ci u ityesen. Sha kpôô yô, takerada u i yer ér Encyclopædia Judaica la kaa ér ishemberti i ken zwa Heberu i i yer ér “tindi” la ka toh·rah, man inja i i̱ yô ér “ityesen.”

^ par. 17 Tindi yange pine wang nahan ér: “Ikon i ken akôngo ka or shin u nenge ityav a i?” (Duteronomi 20:19) Philo, Oryuda u fantakerada u ken derianyom u hiihii la ôr kwagh ter tindi ne, á kaa wener Aôndo nenge ér “ka a inja u vihin ishima a ior kuan akaa a a er kwagh môm u bo ga la ga.”