Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 LU A IEREN I ORKRISTU

Eren Tom a Uvidio u Tesen Mba u Henen Bibilo a Ve La

Eren Tom a Uvidio u Tesen Mba u Henen Bibilo a Ve La

Akaa a i nengen a mi sha ashe, a wasen or u henen kwagh la, nga a kôr ior ken ishima, shi a wase ve u kaven shi umbur kwagh u ve hen la. Yehova Ortesen wase u Hemban Cii la yange er tom a akaa ne u tesen akaa a hange hange. (Ge 15:5; Yer 18:1-6) Yesu Ortesen u Hemban la kpa, er tom a mi. (Mt 18:2-6; 22:19-21) Môm ken akaa a i nengen a mi sha ashe, a wasen or u henen kwagh, u a wase kpishi ken anyom a karen ne yô, ka vidio. U ngu eren tom a uvidio sha inja, u tesen mba u henen Bibilo a ve la kpa?

I er uvidio pue mba vea wase se u tesen ior sha hanma iaven i ken antakerada u Loho u Dedoo U Ú Dugh hen Aôndo La! yô. Hanma vidio yô, ngi a itinekwagh i i zough sha môm ken mbampin mba i nger ve lu il dion dion ken antakerada ne la. Kôpi u antakerada ne u a lu sha jw.org la, ngu a mbaadereshi mba ka ve umbur se shighe u i gbe u se tese uvidio mban yô. Shi i er uvidio mbagen kpaa, u wasen se u seer kaven kwagh u i nger ken ityakerada kposo kposo, i i lu ken Akaa a Se Eren Tom a Mi u Tesen Ior Bibilo Yô la.

U ngu lamen a or u u henen Bibilo a nan la sha itinekwagh i ken Bibilo i alaghga ia taver nan u kaven yôô? Shin or u u henen Bibilo a nan la nan ngu tagher a ma mtavera? Ker ken uvidio mba ve lu sha jw.org/tiv man mba ve lu sha Ityôgh ki Televishen ki Mbashiada mba Yehova la tsô u zua ma vidio i ia fatyô u wasen nan yô. U fatyô u nengen môm ken uvidio mba shon vea or u u henen Bibilo a nan la shi lamen sha mi.

Hanma uwer yô, ka i due a uvidio mba hev. Er u lu nengen ve la, henen sha gbenda u u fatyô u eren tom a mi shighe u u lu tesen mbagenev yô.