Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 LU A IEREN I ORKRISTU

Er Se Seer Fan Igbenda i Pasen Kwagh Yô—Gbenda u Ngeren Uwashika Mba Injaav

Er Se Seer Fan Igbenda i Pasen Kwagh Yô—Gbenda u Ngeren Uwashika Mba Injaav

ER I HII VE I LU HANGE HANGE YÔ: Takerada u 1 Mbakorinte ngu môm ken uwashika 14 mba apostoli Paulu nger u taver mba ve lu Mbakristu a na imôngo la ishima yô. Or ka nana ngeren washika yô, nan lu a shighe kpishi u tsuan asember a nan sha inja, shi or u i nger nan washika shon la, nana fatyô u ôron un kwa kimbir kimbir. Uwashika mba ngeren ka gbenda u injaa u pasen mba hen tsombor wase kwagh kua ahuraior a ase. Shi ka gbenda ugen u injaa u pasen mba se fetyô u zuan ishigh a ve ga la kpa kwagh. Ikyav i tesen yô, alaghga orgen nana tese isharen, kpa a gema taver u zuan a nan hen ya. Alaghga a taver se u aren a ior mbagen hen haregh wase sha ci u mba sha uya mba i kor ve kpoghuloo, i lu ican u nyôron her yô, shin mba sha uya mba lun a gyeeti, gayô mba sha ajiir a icaa. Ka akaa a nyi nahan i gbe u se umbur, hemban je yô shighe u se lu ngeren washika hen or u se fe nan ga laa?

ER SE ER KWAGH NE YÔ:

  • Ôr kwagh u luun er wea nenge a or shon ishigh a ishigh kpa ma u ôr la. Pase iyol you ken mhii u washika la, shi pase er i hii ve u lu ngeren un la kpa wang. Maa u fatyô u pinen mpin u or shon nana henen sha mi yô, shi tese nan ijiir yase i sha Intanet la. Ôr nan kwagh u Online Bible Study Lessons (ngu a lu ken zwa Tiv ga), shin pase nan gbenda u se henen Bibilo a ior hen uya vev la, shi ter atineakaa a a lu ken ma takerada u u wasen se u henen Bibilo a ior yô. U fatyô u wan ityakerada ker, er kaade u jw.org shin ma kwatakerada u lôhôn or ma mkombo shin trak nahan

  • De ngeren kwagh kpishi ga. Washika wou a de lihen kpishi ga, sha er or u u nger nan washika shon la, nana vôr a mi u ôron ga yô.—Nenge ikyav i tesen gbenda u u fatyô u ngeren washika ne yô, sha peeji u sha 8 la

  • Hide ôr washika shon sha er u dugh akaa a a nzughul sha mi la kera yô, shi a lu wang shi a de taver u ôron ga shi lam ker kundu kundu man sha kwaghfan shi ôr loho u injaa. Var stamp sha imbyurugh i kuma vough