Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 LU A IEREN I ORKRISTU

Kuran Atindi A Yehova a sha Kwagh u Aeren a Wang La

Kuran Atindi A Yehova a sha Kwagh u Aeren a Wang La

Yehova Aôndo tese uumace gbenda u i doo u vea eren kwagh sha gbaa u aeren a wang la yô. Ikyav i tesen yô, a kaa ér ivese i lu mzough u gbekeke hen atô u nomsoor man kwase. (Mt 19:4-6, 9) A venda idya man hanma hôngor cii. (1Kor 6:9, 10) Shi a wa se akaa kposo kposo sha kwagh u iyol wuhan man hwe, man kwagh ne na ior nav mba kposo.—Dut 22:5; 1Ti 2:9, 10.

Nyian ne, ior kpishi venda atindi a Yehova. (Ro 1:18-32) Ka ve gema ve dondo mnenge u ior kpishi ve lu a mi sha kwagh u iyol wuhan kua hwe u eren la shi ve dondo aeren a ve. Ior kpishi ka ve ta ave vanger a akaabo a vihin tsung a ve eren la, shi ve lam dang sha mba ve vende u eren ambaakaa shon la.—1Pe 4:3, 4.

Er se lu Mbashiada mba Yehova yô, gba keng u se kuran atindi a Yehova a we sha kwagh u aeren a wang la. (Ro 12:9) Se er kwagh ne nena? Se er kwagh ne sha u tesen mbagenev kwagh u Yehova a lumun a mi la sha kwaghfan. Shi gba u se ayol ase kpa se kuran atindi a Yehova a we la dike dike. Ikyav i tesen yô, shighe u se lu tsuan ikyondo i se hua yô, se fatyô u pinen iyol yase ser: ‘Ikyondo i m tsough u huan ne zua sha atindi a Yehova shin tese ieren i tareghe? Ikyondo i m hoo ne tese ér m ngu Orkristu u cian Aôndo kpa?’ Shi shighe u se lu tsuan kwagh u se nenge sha televishen shin fiim i se nenge yô, se fatyô u pinen iyol yase ser: ‘Kwagh u m soo u nengen ne una doo Yehova kpa? Kwagh u i tese ker la ka u Yehova a lumun a mi shin ka ieren i tareghe? Kwagh u m tsough u nengen la ka u una na me kera lu a agee a hendan a imeen i eren isholibo gaa? (Ps 101:3) Kwagh shon una fatyô u nan mba hen tsombor wam shin mbagenev gbeev mbu nôngono?’—1Kor 10:31-33.

Er nan ve i lu hange hange u se kuran atindi a Yehova a we sha kwagh u aeren a wang laa? Ica a gba ga tsô Kristu Yesu una tim tar kua hanma inja ifer cii. (Esek 9:4-7) Ka mba ve eren ishima i Aôndo la tseegh a tim ve ga ye. (1Yoh 2:15-17) Sha nahan yô, se za nen hemen u kuran atindi a Yehova a sha kwagh u ieren i wang la a ishima i môm, sha er mbagenev vea nenge ieren yase i dedoo la man vea icivir Aôndo yô.—1Pe 2:11, 12.

Akondo a m tsough u huan la kua hwe wam tese nyi sha kwagh u ieren yama?

NENGE VIDEO I HINGIR IJENDE I YEHOVA—NOMSOOR MÔM MAN KWASE MÔM LA, MAA LAM NEN SHA MBAMPIN MBA VE DONDO NE:

  • Er nan ve i doo u se kuran atindi a Yehova ken uma wase?

  • Er nan ve i doo u mbamaren vea hii u tesen mbayev vev atindi a Yehova a we sha kwagh u aeren a wang la shighe u ve lu iyev la je?

  • Agumaior kua mba beenyol cii vea wase ior u zuan a mtsera sha erdoo u Aôndo nena?