Aver yem sha atineakaa

Mbashiada mba Yehova

Tsua Zwa Tiv

Akaawan a sha Ci u Mkombo u Uma Wase u Mbakristu Man Tom Wase

Akaawan a sha Ci u Mkombo u Uma Wase u Mbakristu Man Tom Wase

Atineakaa

 

Akumaihiange

Mkaanem ma Hiin Mkombo

2

Akaa a Injaa a ken Mkaanem ma Aôndo

3

Pasen Kwagh sha Gbashima

4

Lu a Ieren i Orkristu

5

Mkaanem ma Kuren Mkombo

6

Ver Ishima Seer Fan Takerada u Ôron man Ityesen

7

Kwaghwan

8

Shighe

9

Mve u Ortamen u Sôron Atôônanongo

10

Kasua u I Lu Zan Mkohol u Kiriki Shin U Vesen Yô

11

Kasua u Ku-Umbur u Yesu

12

Ortamen u Nengen sha Mkombo u Uma Wase man Tom Wase

13

Orhemen Mkombo u Uma Wase Man Tom Wase

14

Ortamen u Wasen Mzough u Mbatamen Tom

15

Ortamen u Wan Ior Kwagh

16

Uklase Mbagen

17

Uvidio

18

1. A eren Mkombo u Uma Wase man Tom Wase la er i tese ken Uma Wase u Mbakristu man Tom Wase—Antakerada u Mkombo la, man er akaawan ne a tese nahan. I na mbapasenkwagh cii ian i eren mbaasaimenti mba mbayevmakeranta la. Ior mbagen mba ve lu kohol a tiônnongo sha gbashima la kpa, a fatyô u nan ve mbaasaimenti aluer ve lumun atesen a Bibilo shi uma ve zua sha akaawan a Mbakristu yô.—be-E peeji u sha 282.

2. Mkaanem ma Hiin Mkombo: Miniti 3 shin i̱ yina nahan. Hanma kasua yô, a waan icam shi a eren msen u hiin mkombo yô, orhemen Mkombo u Uma Wase man Tom Wase la a kende isharen i mba ve ve mkombo la sha akaa a a lu eren la, shi a pine mpin u a lu ken Kwatakerada u Nan Mbamlumun ken Mkombo u Uma Wase man Tom Wase la.

3. Akaa a Injaa a ken Mkaanem ma Aôndo:

  • Kwaghôron: Miniti 10. A na itinekwagh man ngeren u lun a atôakaa ahar shin atar ken Antakerada u Mkombo u Uma Wase man Tom Wase la. Ka ortamen shin diakon u nan kom yô i na nan asaimenti ne ye. Hanma kwa u i gbe u a hii ma takerada u Bibilo i ôron i ken hanma kasua la yô, a tese vidio sha u hiin takerada u Bibilo shon. Nahan ornankwaghôron la nana fatyô u teren akaa a i er ken vidio i a tese la, a a zough sha itinekwagh la yô. Nahan kpa, nana nenge ér nan lam sha atôakaa a i nger ken antakerada u mkombo la. Shi aluer shighe ngu yô, nana ta iwanger sha ufoto man atôakaa a ken Ruamabera, a i dugh a mi u suen kwagh u i gbe u a lam sha mi la.

  •   Ker Akaainjaa a ken Bibilo: Miniti 8. Vegher ne una lu u pinen mbampin nan mbamlumun, a mkaanem ma hiin man ma kuren shio. I lu ortamen, shin diakon u nan kom yô, nana er asaimenti ne ye. Ornankwaghôron nana fatyô u paven shighe u i ne ér i ta iwanger sha atôakaa a anyiin la ker, nahan hemban nan shighe sha atôakaa a a hembe benden a tiônnongo u nan la. Nahan kpa, nana pine mba ve ve mkombo la mbampin mbara cii. Shi nana fatyô u tsuan ér i ôr avur a i nger hen mpin u hiihii man u sha uhar la cii shin i de ôron a cii ga. Mba a na ve ian i nan mlumun la ve na un ken atô u sekônd 30 shin i̱ yina nahan.

  • Bibilo i Ôron: Miniti 4 shin i̱ yina nahan. I lu anmgbian u nomso i na nan asaimenti ne ye. Wanyemakeranta la nana̱ ôr ijiir i i ne nan la, kpa nana de er mkaanem ma hiin iliam shin ma kuren kwaghôron ga. Kwagh a hemba gban orhemen mkombo u wasen mbayevmakeranta ve fa u ôron takerada sha mkav shi ôron kwagh u i nger la jighilii, shi ve fa u ôron u luenee, shi ve fa u yilan asember a a hembe lun a inja la wang, shi ikyenge ve i zuan sha kwagh u ve lu ôron la vough vough, shi ve ôron kwagh ve memen sha inja sha inja kua sha marami ve kpaa.

 4. Pasen Kwagh sha Gbashima: Miniti 15 shin i̱ yina nahan. I sôr vegher u mkombo ne sha gbenda u á wase hanmaor nana fa u wan agoyol sha tom u pasen kwagh shi seer fan u pasen shi tesen ior. Mbayevmakeranta mba i ne ve mbaasaimenti mba zum u u hii zuan a or yô la man mba zum u u hidi u za sôron or yô la, ve dondo ikyav i tesen er a lam a ior yô la, er ka i tese sha peeji u sha 1, ken Antakerada u Mkombo u Uma Wase man Tom Wase la nahan. Mbapasenkwagh vea fatyô u tsuan u tesen or ma takerada shin vidio i i lu ken Akaa a Se Eren Tom a Mi u Tesen Ior Bibilo Yô la shin tesen ga. Antakerada u Mkombo u Uma Wase man Tom Wase la tese shighe u wanyemakeranta nana er hanma asaimenti yô, man ashighe agen yô, ua na akaawan agen kpaa. Mbayevmakeranta ve de gbe van a akaa agen sha asaimenti ve tsô ér vea nôngo a bee shighe u i ne la cii ga. Aluer i wa agoyol sha akav a tesen agen tsembelee yô, a fatyô u been a, shighe a shi her miniti môm shin a hemba nahan je kpaa. A fatyô u nan mbatamen mbaasaimenti mba mbayevmakeranta, aluer hingir hange hange yô.

  • Uvidio mba Tesen Er A Lam a Ior Yô La: A waan uvidio mba tesen er a lam a ior yô la, shi a lamen sha mi ken ukasua mba ken hanma uwer sha adondo adondo. Uvidio mban vea tese er orpasenkwagh nana lam, zum u nan hii zuan a or man zum u nan hidi u za sôron or sha kwa hiihii kua zum u nan hidi u za sôron or sha kwa har la kpaa. I lu orhemen Mkombo u Uma Wase Man Tom Wase la a hemen vegher u mkombo ne ye.

  • Zum u U Hii Zuan a Or Yô: A fatyô u nan anmgbian u nomso shin u kwase asaimenti ne. Aluer ka nomsoor i ne nan asaimenti ne yô, orwasen u nan kpa, i lu nomsoor; aluer ka kwase i ne nan yô, orwasen u nan kpa i lu kwase, shin orwasen la nana lu or u hen tsombor u nan. Wanyemakeranta man orwasen nan la vea fatyô u tilen sha shin teman inya. Wanyemakeranta la nana sugh orya la sha gbenda u i sughun ior hen ijiir yen la. Dondo ikyav i tesen er a lam a or yô la u eren asaimenti ne.

  • Zum u U Hidi u Za Sôron Or sha Kwa Hiihii Yô: A fatyô u nan anmgbian u nomso shin u kwase asaimenti ne. Aluer ka nomsoor i ne nan asaimenti ne yô, orwasen u nan kpa, i lu nomsoor; aluer ka kwase i ne nan yô, orwasen u nan kpa i lu kwase. (km-E 5/97 peeji u sha 2) Wanyemakeranta man orwasen nan la vea fatyô u tilen sha shin teman inya. Wanyemakeranta la nana tese ikyav i kwagh u se ôr shighe u se hidi u za sôron or u yange nan tese isharen zum u se hii zuan a nan la. Dondo ikyav i tesen er a lam a or yô la, u eren asaimenti ne, er i tese ken Antakerada u Mkombo u Uma Wase man Tom Wase la nahan.

  •   Zum u U Hidi u Za Sôron Or sha Kwa Har Yô: A fatyô u nan anmgbian u nomso shin u kwase asaimenti ne. Aluer ka nomsoor i ne nan asaimenti ne yô, orwasen u nan kpa, i lu nomsoor; aluer ka kwase i ne nan yô, orwasen u nan kpa i lu kwase. (km-E 5/97 peeji u sha 2) Wanyemakeranta man orwasen nan la vea fatyô u tilen sha shin teman inya. Wanyemakeranta la nana tese ikyav i kwagh u se ôr shighe u se hidi u za sôron or u yange nan tese isharen zum u se hide se za sôr nan sha kwa hiihii la. Dondo ikyav i tesen er a lam a or yô la u eren asaimenti ne.

  • Bibilo i Henen a Or: A fatyô u nan anmgbian u nomso shin u kwase asaimenti ne. Aluer ka nomsoor i ne nan asaimenti ne yô, orwasen u nan kpa, i lu nomsoor; aluer ka kwase i ne nan yô, orwasen u nan kpa i lu kwase. (km-E 5/97 peeji u sha 2) Wanyemakeranta man orwasen nan la vea fatyô u tilen sha shin teman inya. Asaimenti ne ka u tesen ikyav i vegher u Bibilo i i lu vanden henen a or, zan a mi ave yô. Ityôkyaa ngi i ôron mkaanem ma hiin iliam shin ma kuren kwaghôron ga, saa di wanyemakeranta la nan ngu eren tom sha môm ken asember a kwaghhenen ne di je. Gba u saa a ôr ijiir i asaimenti shon a dugh la cica cii ga, shin er a fatyô u eren nahan kpaa. Hemba veren ishima u duen a igbenda i injaa i tesen ior.

  • Kwaghôron: I na anmgbian u nomso asaimenti ne, maa nana er un er ka i na kwaghôron ken tiônnongo nahan.

 5. Lu a Ieren i Orkristu: A waan icam a been yô, a er mkombo u una lu ker vegher môm shin avegher ahar ne ken miniti 15, sha gbenda u una wase mba i lu lamen a ve la u dondon Mkaanem ma Aôndo yô. Saa a tese kposo, ga yô i lu ortamen shin diakon u nan kom yô i na nan asaimenti ne ye, kpa aluer ka vegher u ugbayol mba tiônnongo yô, i lu ortamen tseegh i na nan ye.

  • Bibilo i Henen ken Tiônnongo: Miniti 30. I lu ortamen u nan kom yô i na nan asaimenti ne ye. (Ape mbatamen ve lu kpishi ga yô, a fatyô u nan udiakon mba ve kom la asaimenti ne, aluer gba sha mi yô.) Mzough u mbatamen a tema a tsua mba a nenge ér ve kuma u hemen Bibilo i Henen ken Tiônnongo la. Gba u mba i tsough ve la vea fatyô u hemen vegher ne sha inja, sha er a bee kwaghhenen sha shighe shi a ta iwanger sha avur a Bibilo a a hembe duen a semakwagh la, shi a wase hanmaor nana kav er atôakaa a i tim sha mi la a lu a inja yô. Vea zua a akaawan a aa wase ve la, sha u timen sha ngeren u nongo wase u gber sha kwagh u gbenda u a hemen Iyoukura la. Aluer gba sha mi yô, i naan mbahemen mkombo man mbaôron takerada u Bibilo i Henen ken Tiônnongo la kposo kposo hanma kasua. Aluer orhemen Mkombo u Uma Wase man Tom Wase la kaa ér i sav kwaghhenen yô, orhemen Bibilo i Henen ken Tiônnongo la nana tsua gbenda u nana sav kwaghhenen shon yô. Nana fatyô u tsuan ér i de er akumahiange agen ga.

 6. Mkaanem ma Kuren Mkombo: Miniti 3 shin i̱ yina nahan. Orhemen Mkombo u Uma Wase man Tom Wase la a̱ sav atôakaa a ken mkombo, a a hembe lun a iwasen la, kua mpin man mlumun u a lu ken Kwatakerada u Nan Mbamlumun ken Mkombo u Uma Wase man Tom Wase la. Shi a sav kwagh u a hen kasua u sha la, alaghga je yô, teren ma mpin u a na mlumun sha mi yô. Una fatyô u yilan ati a mbayevmakeranta mba i ne ve asaimenti kasua u sha la, aluer shighe ngu yô. Saa a tese kposo, ga yô i lu orhemen mkombo a yôô akaa a hange hange shi a ôr uwashika mba hange hange mba i gbe u a ôr ken tiônnongo, shighe u una lu ôron mkaanem ma kuren mkombo la ye. Akaa a i yôôn hanma shighe, er a sha kwagh u duen kwaghpasen man u esen  shi kiren Iyou i Tartor la nahan, i de yôôn a sha tsembe ga, kpa i var a sha kpande u akaayôôn. Aluer ka u a fatyô u yôôn akaa shin ôron uwashika ken atô u shighe u i ver u ôron mkaanem ma kuren mkombo la ga yô, orhemen mkombo la a kaa a anmgbianev mba vea lu eren mbaasaimenti ken vegher u mkombo u Lu a Ieren i Orkristu la ve pande shighe ve. ( Nenge ikyumhiange i sha 5 man  9 la.) A kure mkombo ne sha icam man msen.

7. Ver Ishima Seer Fan Takerada u Ôron man Ityesen: A kôron kasua u Janawari 7, inyom i 2019 yô, orhemen Mkombo u Uma Wase man Tom Wase la a gema eren tom a antakerada u Ityesen la u wuese shi wan ior kwagh. Hanma wanyemakeranta yô, nana er tom sha namba u kwaghhenen u i we ken ikyav i kangen, a lu ikyua a asaimenti u i ne nan la, ken Antakerada u Mkombo u Uma Wase man Tom Wase la. Kasua u hiihii ken hanma uwer, orhemen Mkombo u Uma Wase man Tom Wase la una time sha kwaghhenen môm vea mba a lu lamen a ve la, ken antakerada u Ityesen la. Vegher u ken antakerada ne, u i nger her ér “Nger Mzehemen Wou” la, ngu sha ci u wanyemakeranta nana eren tom a mi, nahan orhemen mkombo a de ngeren kwagh her ga.

 8. Kwaghwan: Zum u hanmaor ken mbayevmakeranta mbara nan er asaimenti u nan nan bee yô, orhemen Mkombo u Uma Wase man Tom Wase la ngu a miniti môm tseegh u wuese shi wan nan kwagh ken antakerada u Ityesen la. Shighe u orhemen mkombo a yer wanyemakeranta ér nana va er asaimenti u nan yô, a de ôron ishember i kwaghhenen i nan lu eren tom sha mi la ga. Nahan kpa, shighe u wanyemakeranta nan er asaimenti i bee shi i wuese nan cii yô, orhemen mkombo la una fatyô u ôron ishember i kwaghhenen i wanyemakeranta la nan er tom sha mi la, shi a̱ pase er i hii ve wanyemakeranta la nan er tom sha ishember shon tsembelee yô, gayô orhemen mkombo la a̱ pase er i hii ve i doo u wanyemakeranta la nana seer eren tom sha ishember shon yô. Shi orhemen mkombo una fatyô u zan zwa sha akaa agen ken asaimenti shon, aluer a nenge ér aa lu wanyemakeranta la shin mba a lu lamen a ve la a iwasen yô. A fatyô u seer wan wanyemakeranta kwagh sha ishember i kwaghhenen i nan er tom sha mi la, shin sha ma ishember i kwaghhenen igen, i ia lu nan a iwasen la ken hua ken antakerada u Ityesen shin ken takerada u Ministry School la shighe u mkombo a bee la, shin sha ian igen.​—⁠Wea soo u seer zuan a iwanger sha kwagh u tom u ortamen u nengen sha Mkombo u Uma Wase man Tom Wase man ortamen u wan ior kwagh ve lu a mi la yô, nenge ikyumhiange i sha 13 man 16 la.

   9. Shighe: Kwaghôron môm a̱ de aver shighe na ken inya ga, kua mkaanem ma orhemen Mkombo u Uma Wase man Tom Wase la kpaa. Zum u wanyemakeranta nan lu yan shighe yô, tôndo nan kwaghôron sha zwa sha kwaghfan. Aluer orgen nan ya shighe ken ma vegher ugen ken mkombo ne yô, ortamen u wan ior kwagh a wa nan kwagh ken hua. I er mkombo jimin cii ken atô u ihwa i môm man miniti 45, kua icam man msen kpa ker.

10. Mve u Ortamen u Sôron Atôônanongo: Shighe u ortamen u sôron atôônanongo a ve tiônnongo inya yô, i̱ dondo aaven a ken Antakerada u Mkombo u Uma Wase man Tom Wase la, kpa ka akaa a a gem sha aaven shon je i tese heen ne: Ortamen u sôron atôônanongo a na kwaghôron u taver anmgbianev asema miniti 30 sha ityough ki Bibilo i Henen ken Tiônnongo, ken vegher u mkombo u a lu a itinekwagh ér Lu a Ieren i Orkristu la. Orhemen Mkombo u Uma Wase man Tom Wase la a̱ sav atôakaa a ken mkombo u i sember eren la, kua kwagh u a hen kasua u sha la kpaa, shi a̱ yôô akaa a i gbe hange hange u a yôô la, maa a yila ortamen u sôron atôônango a za na kwaghôron u taver anmgbianev asema. Ortamen u sôron atôônanongo una been kwaghôron yô, a̱ tsua icam i a soo cii, a̱ kure mkombo a mi. Shighe u ortamen u sôron atôônanongo a ve inya yô, i de bughun uklase mbagen ken zwa u tiônnongo a eren mbamkombo  ker la ga. Aluer annongo ngu, u a eren mbamkombo ken zwa ugen yô, annongo shon una fatyô u eren mkombo na, aluer ortamen u sôron atôônanongo va tiônnongo u a nengen sha a na la inya je kpaa. Nahan kpa, annongo la a hide a va kohol imôngo a tiônnongo u a nengen sha a na la, shighe u ortamen u sôron atôônanongo una lu nan kwaghôron u taver anmgbianev asema la.

11. Kasua u I Lu Zan Mkohol u Kiriki Shin U Vesen Yô: Kasua u i lu zan mkohol u kiriki shin u vesen yô, i de nyer mbamkombo mba tiônnongo ga. Nahan hanma or shin hanma tsombor cii u time sha kwagh u i gbe u a hen ken mkombo ken ukasua mba shon la.

12. Kasua u Ku-Umbur u Yesu: Aluer Ku-Umbur u Yesu gba sha iyange i Hiitom shin Tomahar shin Tomatar shin Tomanyiin gayô Tomataan ken ma kasua yô, i de kera eren Mkombo u Uma Wase man Tom Wase ken kasua la ga. Nahan cii kpa, i er mbamkombo mba duen kwaghpasen sha iyange i Ku-Umbur u Yesu la, i due kwaghpasen.

13. Ortamen u Nengen sha Mkombo u Uma Wase man Tom Wase: Mzough u mbatamen a tsua ortamen nana lu ortamen u nengen sha Mkombo u Uma Wase man Tom Wase. Tom u nan yô, ka u nengen ér i er mkombo ne sha inja shi i dondo akaawan a i tese heen ne vough. A lamen vea ortamen u wan ior kwagh la tsembelee. Ortamen u nengen sha Mkombo u Uma Wase man Tom Wase la una ngohol a ngohol Antakerada u Mkombo u Uma Wase man Tom Wase u sha hanma uwer la nahan maa, a̱ na mbayevmakeranta mbasaimenti ken uwer shon. ( Nenge ikyumhiange i sha 4.) A bunde kpa, i na hanma wanyemakeranta asaimenti kasua utar cii ve iyange i asaimenti u nan ye, er i tese ken Ankwatakerada u Nan Ior Mbaasaimenti ken Mkombo u Uma Wase u Mbakristu man Tom Wase (S-89) la nahan.

14. Orhemen Mkombo u Uma Wase Man Tom Wase: Hanma kasua yô, ortamen nana er tom u orhemen Mkombo u Uma Wase Man Tom Wase la. (Ape mbatamen ve lu kpishi ga yô, a fatyô u nan udiakon mba ve kom la asaimenti ne, aluer gba sha mi yô.) Tom na yô, ka u wan iyol sha mkaanem ma hiin mkombo man ma kuren la, shi hemen u lamen sha uvidio mba tesen er a lam a ior yô la, kua uvidio mba ve sav pasen ma ishember i kwaghhenen i he, i ken antakerada u Ityesen la. Shi ka un una yilan hanma or u nan lu hiin hanma vegher u mkombo ye, shi aluer mbatamen ngee ga yô, nana fatyô u eren avegher a mkombo ne agen je kpaa. Mkaanem nam ma yilan or ér nana va er asaimenti shin ma kuren shighe u nan er asaimenti i bee la, ma luun tiônôô tiônôô. Ka mzough u mbatamen una tsua mbatamen mba ve kom u eren tom ne la ye. A naan mbatamen mban tom u lun orhemen mkombo la sha ashighe ashighe. A hemban nan ortamen u nengen sha Mkombo u Uma Wase man Tom Wase la tom u lun orhemen mkombo la a mbatamen mbagenev cii, er mlu u hen ijiir yen a lu la. Aluer ortamen nan kuma u hemen Bibilo i Henen ken Tiônnongo yô, tese ér nan kuma u eren tom u orhemen mkombo la kpaa. Nahan kpa, umbur wer ka ortamen u a lu eren tom u orhemen mkombo la, i gbe u nana wuese shi nana wa mbayevmakeranta mba ve er asaimenti la kwagh sha dooshima man sha gbenda u a wase ve ye. Shi ka orhemen mkombo la i lu tom na u nengen ér í er mkombo i bee sha shighe ye. ( Nenge ikyumhiange i sha 6 man  9.) Aluer orhemen mkombo la soo, shi ian ngi sha tsembe yô, a fatyô u veren maikrofon sha tsembe, a tile sha, sha er shighe u orhemen mkombo la a lu yilan or ér nana va er asaimenti u nan la, or shon nana fatyô u va tilen ape tilen nan kwaghôron la keghen a kegh u nan kwaghôron yô. Shi aluer orhemen mkombo soo yô, una fatyô u veren tebul sha tsembe, teman inya shighe u i gbe u wanyemakeranta nana ôr Bibilo la, kua sha shighe u vegher u mkombo u Pasen Kwagh sha Gbashima la kpaa. Kwagh ne una fatyô u panden shighe u yan.

 15. Ortamen u Wasen Mzough u Mbatamen Tom: Ka tom u ortamen u wasen mzough u mbatamen u nan ior mbaasaimenti ken hanma vegher u mkombo cii, saa di mbaasaimenti mba mbayevmakeranta la tseegh. Tom ne wa u un nan mbatamen mba mzough u mbatamen a tsough ve ér ve lu mbahemen mkombo la asaimenti u lun orhemen mkombo ken hanma kasua la kpa ker. Ortamen u wasen mzough u mbatamen tom a er tom ken mzough vea ortamen u nengen sha Mkombo u Uma Wase man Tom Wase la, maa a nenge ér i var ati a ior mba i ne ve asaimenti la jimin cii sha kpande u akaayôôn.

16. Ortamen u Wan Ior Kwagh: Aluer gba sha mi yô, i lu ortamen u nan fe u nan kwaghôron tsema tsema la nana er tom ne ye. Tom u ortamen u wan ior kwagh yô, a lu u wan mbatamen man udiakon kwagh ken hua sha nyityô asaimenti u ve er cii, kua mbaasaimenti mba ve er ken Mkombo u Uma Wase man Tom Wase la, man kwaghôron u ken igbar man u hemen shin ôron takerada ken mkombo u Iyoukura i Henen gayô Bibilo i Henen ken Tiônnongo, aluer ka hange hange yô. ( Nenge ikyumhiange i sha 9.) Aluer mbatamen mba ve fe u nan kwaghôron man ityesen tsembelee mba ken tiônnongo wen imôngo yô, a fatyô u tsuan ortamen ugen kposo u nan kom yô, sha hanma inyom ér nana̱ er tom ne. Gba kpee u ortamen u wan ior kwagh una waan mbatamen shin udiakon kwagh hanma kwa u ve er asaimenti ga.

17. Uklase Mbagen: Atôônanongo a a lu a mbayevmakeranta kpishi yô, aa fatyô u bughun uklase mbagen sha er mbayevmakeranta vea eren mbaasaimenti ker yô. Hanma klase yô, a lu a ortamen shin diakon u wan ior kwagh u nan kom yô, kpa i hemba soon ér i lu ortamen. Aluer ortamen u nan kom nan ngu ga yô, a fatyô u tsuan diakon u nan kom yô ér nana er tom ne. Ka mzough u mbatamen una tsua mba vea er tom ne ye, shi ka un kpa una tsua ér i na or môm tseegh asaimenti ne, shin i naan ior kposo kposo i ningir ye. Anmgbian u wan ior kwagh la a dondo kwaghwan u sha  ikyumhiange i sha 8 la. Aluer ne mba nyôron klase ugen shin uklase mbagen yô, á been vegher u Ker Akaainjaa a ken Bibilo, u a lu ken mkombo u Akaainjaa a ken Mkaanem ma Aôndo la yô, i kaa mbayevmakeranta ve yem ken klase ugen la, shin uklase mbagen mbara. A eren vegher u mkombo u Pasen Kwagh sha Gbashima la a been yô, ve hide ken Iyou i Tartor i tiônnongo cii a nyer mkombo la. Shighe u i lu lamen sha ma vidio yô, mba ve yem ken klase ugen la ve lu ker, nahan ve nengen shin ve keghen ato er i lu lamen sha kwagh u vidio shon la, aluer gba sha mi yô. Kpa aluer gba sha mi nahan ga yô, anmgbian u wan ior kwagh la, a tese vidio la sha ma anar u kôron sha uwe shi a lam sha mi vea mba ve lu ken klase ugen la.

18. Uvidio: A tesen uvidio mbagenev ken mkombo ne. A veren uvidio mba a lu nengen ken ma kasua la sha JW Library app, nahan a fatyô u eren tom a mbaanar kposo kposo u kuran uvidio mba shon. Ashighe agen yô, a fatyô u tesen uvidio mba tesen er a lam a ior yô la ken mkombo u duen kwaghpasen, kpa i lu mba i vande tesen ken Mkombo u Uma Wase man Tom Wase mbara i tese ken mkombo ne ye.

© 2018 Watch Tower Bible and Tract Society of Pennsylvania

S-38-TV 9/18