Aver yem sha atineakaa

Aver yem sha mver u atineakaa

 ITINEKWAGH I TAMEN | U FATYÔ U LUN IKYUA A AÔNDO

U Fa Iti i Aôndo shi U Yer Un sha I Kpa?

U Fa Iti i Aôndo shi U Yer Un sha I Kpa?

U ngu a ma ijende i ishima ishima i u fe iti i nan ga yôô? Taver tsô. Kwase u ken tar u Bulgaria, u i yer un ér Irina yô, ôr kwagh u mimi jighilii ér, “Aluer u fa iti i Aôndo ga yô, u fatyô u yan ijende a na ga.” Kwagh er doo yô, er i kaa ken ngeren u ken ijime la nahan, Aôndo soo ér se kporom hen a na. Sha nahan yô, Aôndo pase iyol na hen a vese ken Bibilo, kaa ér: “Ka Mo [Yehova], ka iti yam je ne.”Yesaia 42:8.

Aôndo pase iyol na hen a we ken Bibilo, kaa ér: “Ka Mo [Yehova], ka iti yam je ne.”Yesaia 42:8

Wea fa iti Yehova shi wea yilan un sha i, shin a lu nahan ga kpa kwagh gba un sha mi ga shinii? Hen ase sha kwagh ne: Iti i Aôndo i i nger sha asangaabaacaa a ken zwa Heberu a i yer ér Tetragrammaton la ngi ken Ruamabera u ken zwa Heberu, u yange i nger sha ave la nôngo u kuman kwa 7,000. Inja na yô, Bibilo hemba teren iti i Yehova a hanma orgen u i er kwagh u nan ker cii. Kwagh ne tese ér Yehova soo ér se fa iti na shi se yilan un sha i. *

Iorov uhar ka vea soo u yan ijende yô, ve hii fan ati a ve. U fa iti i Aôndo kpa?

Nahan kpa, mbagenev nenge ér er Aôndo a lu u wang shi a hembe agee cii yô, u yilan un sha iti na la ka ilyahan. Ka mimi, aluer se mba teren iti i Aôndo sha gbenda u vough ga yô, a lu sha mi ga, vough er ijende you kpa ú teren nan iti dang dang ve a lu sha mi ga nahan. Nahan kpa, Yehova soo ér mba un doo ve ishima la ve naan iti na icivir shi ve pasen ior i. (Pasalmi 69:30, 31; 96:2, 8) Umbur wer Yesu tese mbadondon un u erem msen ér: “Ter wase u Sha, i̱ tsegha iti You.” Se fatyô u tseghan iti i Aôndo sha u pasen ior i. Aluer se mba eren nahan yô, se seer kporom hen a na.Mateu 6:9.

Bibilo tese ér Aôndo veren ato a “mba ve civir iti Na” la. (Malaki 3:16) Yehova tôndo zwa a imbaor la ér: “Me kende un sha, sha ci u a fe iti Yam yô. Zum u una yilam yô, Mo kpaa Me ungwa imo na; ken ican Mo Me lu a na.” (Pasalmi 91:14, 15) Aluer se soo ser se ya ikyar a Yehova kôôsôô yô, a gba u se fa iti na shi se yilan sha i kpaa.

^ par. 4 Kwagh er vihi yô, er i ter iti i Aôndo ajiir kpishi ken Ruamabera u ken Zwa Heberu, u ior kpishi ve yer ér Ikyuryan i Tse la nahan kpa, mbageman Bibilo mbagenev kpishi nger iti ne ken Ubibilo mba ve gem la ga. Sha ajiir a ma i nger iti i Aôndo la, ve de ve nger ati a tom sha asange a vesen ér “TER” shin “AÔNDO.” Wea soo u seer timen sha kwagh ne yô, nenge takerada u Bibilo Tese Ér Nyi Jimi? la, peeji 195-197. Ka Mbashiada mba Yehova ve gber u ye.