Aver yem sha atineakaa

Aver yem sha mver u atineakaa

 Tese Ônov Ou

Yoshia Tsua u Eren Kwagh u Vough

Yoshia Tsua u Eren Kwagh u Vough

U HEN wer ka ican u eren kwagh u voughlo? *— Aluer u kaa wer een yô, fa wer ior mbagenev kpishi kpa hen nahan. Mbaganden je kpa, ka i taver ve u eren kwagh u vough. De se nenge er i hii ve yange taver Yoshia kpishi u tsuan kwagh u vough u una er yô. U fa injaor i Yoshia lu kpa?—

Yoshia lu wan u Amon, tor u Yuda. Shighe u i mar Yoshia la, Amon lu anyom 16 tseegh. Amon yange er akaabo kpishi, er ter na Tor Manase kpa er nahan. Sha kpôô yô, shighe u Manase lu hemen la, er aferakaa anyom imôngo. Kpa Mbaashiria va hemba un ityav, kôr un yem a na uikyangen ken Babilon. Shighe u Manase lu uikyangen la, zamber a Yehova ér a de un kwaghbo na, nahan Yehova de un.

Yange mba pasen Manase yô, a hide ken Yerusalem, a va za hemen a tom tor na. Fese je maa a de akaabo a yange eren la, a hide a gba wasen ior ér ve civir Yehova. A shi nan kpa, er wan na Amon dondo ikyav na i dedoo la ga yô, vihi un kpishi. Lu hen shighe ne i mar Yoshia ye. Bibilo ôr se acin a Manase yange teman imôngo vea Yoshia, wan u wan na la ga. Kpa u nenge wer Manase yange una nôngo u wasen un ér a civir Yehova ga he?—

Yoshia yange lu anyom ataratar tseegh tsô maa Manase kpe, nahan Amon, ter u Yoshia maa hingir tor. Amon tema tor anyom ahar tseegh maa mbatomov nav zua zwa wua un. Yoshia maa hingir tor u Yuda, lu anyom anigheni hen shighe ne. (2 Kroniku, ityough 33) U hen wer shighe u Yoshia tema tor la, lu nyi i eree? Yoshia dondo ikyav i bo i ter na Amon la shin yange dondo ikyav i dedoo i Manase, ter na u vesen ver zum u a gema ishima laa?—

Shin er Yoshia lu wanye nahan kpa, a tsua ér una civir Yehova. Nahan yange biishi a ior mba ve lu azende a ter na la ga, kpa gema ungwan kwaghwan u ior mba Yehova doo ve ishima la. Er Yoshia lu anyom anigheni tseegh  nahan kpa, gema fa ér ka kwagh u vough u keghen ato a ior mba Aôndo doo ve ishima la. (2 Kroniku 34:1, 2) U soo u fan kwagh u ior mba yange ve waan Yoshia kwagh shi ve tese un akaa a dedoo la kpa?

Profeti Sefania lu môm ken mba ve ver Yoshia ikyav i dedoo yô. Sefania lu or u hen tsombor u Yoshia, a shi nan kpa yange due hen tsombor u tor u dedoo, Hesekia, ter u Manase. Hen shighe u Yoshia hii u hemen la, Sefania nger takerada u Bibilo u i yer ér Sefania la. Sefania yange tsengaôron akaabo a aa er ior mba ve tsough u eren kwagh u vough ga la, nahan ikyav tese wang ér Yoshia ungwa kwaghwan la.

Orgen u yange nan ver Yoshia ikyav i dedoo yô lu Yeremia; alaghga u vande ungwan kwagh na. Yeremia man Yoshia lu agumaior, yange ve vese hen haregh môm. Yehova yange na Yeremia jijingi na, nahan a nger takerada u Bibilo u i yer ér Yeremia la. Yange mba woo Yoshia ken uitya yô, Yeremia dugh icam i zungwen ku na, mba yer icam shon ér ukwelegh. (2 Kroniku 35:25) Se na jighjigh ser, yange vea taver ayol a ve asema ér vea za hemen u civir Yehova sha mimi!

Sefania man Yeremia yange ve wase Yoshia u eren kwagh u vough nena?

U hen wer, aluer u time sha kwagh u Yoshia nahan, ka nyi iwasen u zua a mini?— Aluer we kpa u ngu a ter u nan civir Yehova ga yô, ma orgen ngu u nana tese u kwagh u Aôndo yôô? Alaghga or shon a lu mama wou gayô ma ormaren wou u vesen shin anmgbian wou ugen. Gayô a lu or u nan civir Yehova, u mama wou a lumun ér nana hen Bibilo a we yô.

A lu nan nan kpa, fa wer Yoshia lu wanye, nahan kpa yange fa ér doo u una kôr ijende a ior mba ve civir Yehova yô. We kpa kôr ijende a ior mba ve civir Yehova yô, ka nahan man u er kwagh u vough ye!

^ par. 3 Aluer u ngu ôron ngeren ne vea wan wou yô, anhwange u i kper heen tiônôô ne ka u umbur we ér gba u u mem sha er wan wou una na mlumun yô.