Aver yem sha atineakaa

Aver yem sha mver u atineakaa

Za Hemen u Gbidyen Kwar sha Akaa A ken Jijingi

Za Hemen u Gbidyen Kwar sha Akaa A ken Jijingi

“Nôngo sha akaa ne, penda ishima sha mi sha u ior cii vea nenge mzehemen wou yô.”—1 TIM. 4:15.

ATSAM A A GBER YÔ, KA: 57, 52

1, 2. Mhirinim ma uumace ma kposo a ma annyamev sha igbenda i vesen i nyi nahana?

ZWA u uumace ve lamen la ka u wase ve u ôron takerada shi ngeren kwagh shi lamen vea orgen shi kaven kwagh u orgen nan er yô, shi eren msen shi gberen atsam wuese Yehova. Akaa a zwa u se fe ka u wase se u eren ne la cii kpilighyol, shi mbatôvon sha kwagh u sainsi kpa fa er i hii ve mhirinim asem ma wasen se u eren kwagh ne tsembelee nahan ga. I er mhirinim asem ma kposo a ma annyamev, ka nahan ve ka se kôrcio u henen zwa ye. Profesôr ugen u a hen kwagh u zwaagh yô, kaa ér: “Mhen u mbayev ve lu a mi u henen zwa la, ka kwagh u vesen u a ne [uumace] ve lu kposo yô.”

2 Mhen u Aôndo a gbe uumace a mi, i lu u vea fatyô u henen zwa la ka iyua i kpilighyol. (Ps. 139:14; Mpa. 4:11) Mhirinim ma Aôndo a gbe se a mi la ma kposo a ma annyamev sha gbenda u vesen ugen kpaa. Yange i gba or sha “inja i mlu u Aôndo,” kpa annyamev yô, i gba ve nahan ga. Uumace mba a ian i eren kwagh sha ishima ve, shi vea fatyô u tsuan u eren tom a mfe u ve lu a mi u fan zwa la u civir Aôndo.—Gen. 1:27.

3. Ka iyua i doon tsung i nyi Yehova a ne se sha u se lu mbafankwagha?

3 Aôndo u a er zwa la na mba ve soo u civir un la cii iyua i doon tsung, ka Bibilo je la. I gber Bibilo jimin cii shin avegher a i ken ijô  i hemban er 2,800 nahan. Aluer u ngu gbidyen kwar sha mkaanem ma ma lu ken Bibilo la yô, u gema henen kwagh er Aôndo nahan. (Ps. 40:5; 92:5; 139:17) Kwagh ne una na yô, a doo u kpishi u gbidyen kwar sha akaa a a “fatyô u tesen we u zan ken myom” la.—Ôr 2 Timoteu 3:14-17.

4. Inja i u gbidyen kwar sha kwagh la ér nyi, man ka mbampin mba nyi se lu timen sha mini?

4 Inja i u gbidyen kwar sha kwagh la yô, ka u veren ishima yase cii sha kwagh, henen sha mi zutuu, aluer ka u dedoo shin u bo kpaa. (Ps. 77:12; Anz. 24:1, 2) Iorov uhar mba i hembe doon u se gbidyen kwar sha kwagh ve yô, ka Yehova Aôndo man Wan na, Yesu Kristu. (Yoh. 17:3) Nahan kpa, alaghga se pine ser, u ôron takerada shi gbidyen kwar sha mi la gba zua nena? Ka aan a nyi nahan se lu a mi, a se fatyô u tôôn shighe gbidyen kwara, man se er nan ve ieren i gbidyen kwar sha kwagh la ia doo se?

HENEN KWAGH SHA GBENDA U U ZUA A MTSERA KER YÔ

5, 6. Shighe u u lu ôron takerada yô, ka nyi ia wase u u hemba kaven kwagh u u ôron la shi umburu?

5 Mhirinim ou ma a fatyô u eren akaa a kpilighyol, ashighe agen je yô, a mfe wou shio. Ikyav i tesen yô, u ôôn shin u zenden shin u nahan ikyekye shi u gberen ikyekye nahan, ka akaa a u fatyô u eren, a u henen sha mi cuku kpaa ga yô. Kape kwagh u takerada u ôron kpa a lu vough je la. Sha nahan yô, gba hange hange u u ver ishima, u fa inja i kwagh u u lu ôron la. Aluer u ôr ikyumhiange u bee shin u soo u hiin u ôron ma gbaa u itinekwagh ken ma takerada yô, u fatyô u tamber, gbidyen kwar sha kwagh u u sember ôron la, sha er u fa wea kav un tsembelee yô. Kpa mimi yô, aluer u ver ishima ga yô, akaa agen a a fatyô u danen ishima you, ia yem henen akaa agen, maa u kera zua a mtsera ken kwagh u u lu ôron la ga. Nahan u palegh ieren ne nena?

6 Kwaghtôvon u mbasainsi ugen tese ér, or ka nana ôron takerada a duen sha yô, i hemba taver nan ga u umbur kwagh u nan lu ôron la. Aôndo u yange er mhirinim asem la fa kwagh ne. Ka nahan ve kaa a Yosua ér a “zer timen” shin a ôron Takerada Na u Tindi la, i duen sha, shi a gbidyen kwar sha mi ye. (Ôr Yosua 1:8.) Aluer u ngu ôron Bibilo kure kure, duen sha yô, a wase u u kôron kwagh u u lu ôron la. Shi kwagh ne una wase u u hemban veren ishima.

7. Ka hanma shighe nahan i hembe doon u gbidyen kwar sha Mkaanem ma Aôndo? (Nenge foto u a lu sha mhii u ngeren ne la.)

7 Er alaghga a lu u ican u ôron takerada ga nahan kpa, u gbidyen kwar sha mi la yô, a gba u u nôngo u ver ishima ve u fatyô u eren nahan ye. Ka nahan ve mhirinim asem, ma ma yen la, ma soon u eren kwagh u a hembe lun ican ga la ye. Sha nahan yô, hemba doon u gbidyen kwar sha kwagh shighe u u mem shi ishima i lu zan we iyol sha kwagh ga, shi u lu hen ijiir i akaa a danen we a lu kpishi ga yô. Orpasalmi yange kav ér, lu shighe u un lu per sha gambe tugh la, i doo un u gbidyen kwar sha kwagh ye. (Ps. 63:6) Yesu u yange mhirinim nam lu vough la, kav er u gbidyen kwar shi eren msen sha ajiir a huan ving la, wase un kpishi yô.—Luka 6:12.

AKAA A DEDOO A SE FATYÔ U GBIDYEN KWAR SHA MI YÔ

8. (a) Dugh u gbidyen kwar sha Mkaanem ma Aôndo sha yô, ka nyi igen kpa se fatyô u gbidyen kwar sha mini? (b) Yehova nengen shighe u ka se tôô u lamen vea mbagenev sha kwagh na la nena?

8 Gbenda môm u vesen u henen sha kwagh u u er ken Bibilo la yô, ka u gbidyen kwar sha mi, kpa ka cii la ga. Ikyav i tesen yô, aluer u nenge akaa a kpilighyol a Aôndo a gbe la yô, tamber, gbidye kwar sha mi. Kwagh ne una mgbegha u u wuese Yehova sha erdoo na la je ka u henen a hen ga, shi wea lu vea mbagenev yô, pase ve akaa shon. (Ps. 104:24; Aer. 14:17) Kpa ka wea gbidyen kwar sha kwagh u Yehova shi wea eren msen shi wea  ôron mbagenev kwagh na yô, i doo un a we kpishi. De se nenge kwagh u Mkaanem nam ma kaa yô. Bibilo ôr kwagh u ayange a masejime ne, kaa ér: ‘Tsô mbacian TER kpaa gema ôr kwagh ayol a ve; TER kpaa ver ato, ungwa, i nger ruamabera u umbur akaa sha ishigh Nagh, sha ci u mba ve cie TER, man mba ve civir iti Na [shin ve gbidi kwar sha kwagh na] yô.’—Mal. 3:16.

U gbidi kwar sha mbamlu man ugbayol mba ior mba u henen Bibilo a ve la kpa? (Nenge ikyumhiange i sha 9 la)

9. (a) Paulu yange wa Timoteu kwagh er a gbidyen kwar sha nyi? (b) Se dondo kwaghwan u Paulu shighe u se lu wan agoyol u duen kwaghpasen nena?

9 Apostoli Paulu yange kaa a Timoteu ér a “nôngo,” a gbidye kwar sha gbenda u iliam na man ieren na kua ityesen na i lu benden a mbagenev yô. (Ôr 1 Timoteu 4:12-16.) Se kpa se mba a akaa a ken jijingi kpishi a henen sha mi, er Timoteu nahan. Ikyav i tesen yô, gba u se tôô shighe se gbidye kwar shighe u se lu wan agoyol u za henen Bibilo a or yô. U fatyô u henen sha ma mpin shin injakwagh i u wase hanma or u henen Bibilo a nan, nana vese ken jijingi yô. Aluer se tôô shighe se er nahan yô, a hemba saan se iyol sha ci u ka sea gbidyen kwar sha akaa ne yô, jighjigh wase a taver shi kwagh ne a wase se se fa u henen Bibilo a ior tsema tsema shi eren nahan sha gbashima. Se fatyô u eren kwagh ne nahan shighe u se lu wan agoyol u duen kwaghpasen la kpaa. (Ôr Esera 7:10.) Aluer se ôr ma ityough ki Bibilo ken takerada u Aerenakaa yô, kwagh la una wase se u “seer nderen” gbashima u se lu a mi sha tom u kwaghpasen la. Aluer se mba gbidyen kwar sha avur a Bibilo a se soo u za pasen kwagh a mi sha iyange la, kua ityakerada i se we ishima u nan ior la yô, kwagh ne una wase se u eren tom wase u pasen kwagh la sha inja. (2 Tim. 1:6) Hen sha kwagh u ior mba hen haregh wou u pasen kwagh la, kua kwagh u una fatyô u kenden isharen ve la kpaa. Aluer se wa agoyol nahan yô, kwagh la una mgbegha se u pasen kwagh tsembelee a Mkaanem ma Aôndo.—1 Kor. 2:4.

10. Ka igbenda igen i nyi nahan se lu a mi u gbidyen kwar sha akaa a ken jijingi?

10 Ashighe agen ka a naan akaaôron sha  mbamkohol mba kiriki man mba vesen, shin a naan kwaghôron u ken igbar ken tiônnongo nahan, u ngeren akaa agen shin inyaa? Aluer kwagh ngu nahan yô, u fatyô u keren shighe gbidyen kwar sha akaa la shighe u u lu timen sha kwagh u u hen ken Mkaanem ma Aôndo man sha ikyev i nongo na la. Shi hanma mgber u Iyoukura man Awake! u i dugh a mi ken hanma uwer la, kua ityakerada i ka i due a mi sha mbamkohol mba vesen la cii, ka ve lu a akaa a he a se fatyô u ôron shi gbidyen kwar sha mi yô. Aluer u ngu tamber, hiden gbidyen kwar shighe u u er ma kwagh u yange er, i nger ken takerada u Yearbook la cii yemen sha ugen yô, a wase u kpishi. Kwagh la una na u ian i hiden henen sha kwagh u u lu ôron la, shi una hemba kôron we ken ishima. Shi u fatyô u kpelan hwange sha akaa a vesen a u er la, shin ngeren akaa kpuaa ken kpe takerada, a a wase u shighe u u lu wan agoyol sha kwaghôron u u soo u nan, shin u soo u hiden za sôron ior shin za taver ma anmgbian ishima ken Ruamabera yô. Kwagh u hemban lun a inja cii je yô, aluer u ngu tamber, hiden gbidyen kwar sha kwagh u u lu ôron ken ityakerada yase i pasen Bibilo la yô, u kav kwagh u u lu ôron la, shi u fatyô u sughun Yehova ken msen sha akaa a dedoo a u lu henen la.

GBIDYEN KWAR SHA MKAANEM MA AÔNDO AYANGE AYANGE

11. Ka nyi i lu kwagh u vesen u i doo u se gbidyen kwar sha mi, man ka sha ci u nyi? (Shi nenge ngeren u shin kpe la.)

11 Nahan cii kpa, ka Mkaanem ma Aôndo ma lu kwagh u vesen u i doo u se gbidyen kwar sha mi ye. Aluer u ngu hen ijiir i i we atabam sha Bibilo nahan, u er nena? * Wea lu hen imba ijiir la kpa, mayange or a fatyô u yangen we u gbidyen kwar sha akaa a u er ken Bibilo u ker ken ityou la ga, er avur a hemban doon we, shin asember a atsam a sha kwagh u Tartor la nahan. (Aer. 16:25) Shi jijingi u Aôndo u una fatyô u wasen we u umbur akaa a dedoo a u hen la.—Yoh. 14:26.

12. Ka sha gbenda u nyi nahan se ôr Bibilo ve a wase se?

12 U fatyô u tsuan ayange agen ken kasua, ôron shi gbidyen kwar sha Bibilo i̱ ôron ken hanma sati i ken Makeranta u Henen Tom u Hemen u Aôndo la. Sha ayange agen di yô, u fatyô u ôron takerada u Mateu man Marku man Luka kua Yohane la, nahan gbidyen kwar sha kwagh u Yesu yange ôr shi er la. (Rom. 10:17; Heb. 12:2; 1 Pet. 2:21) Shi i na ior mba Aôndo takerada ugen u u pase akaa a yange er Yesu shighe u lu shin tar la, sha adondo adondo yô. Takerada ne u a wase se se hemba zuan a iwasen shighe u se lu ôron takerada u Mateu man Marku man Luka kua Yohane la.—Yoh. 14:6.

GBA HANGE HANGE U SE GBIDYEN KWAR SHA CI U NYI?

13, 14. Ka a inja u se za hemen u gbidyen kwar sha akaa a ken jijingi sha ci u nyi, man kwagh ne una mgbegha se u eren nyi?

13 Orkristu ka nana gbidyen kwar sha akaa a ken jijingi yô, kwagh la a wase nan vese, nan via ken jijingi. (Heb. 5:14; 6:1) Or u nan henen sha kwagh u Yehova man Yesu shighe kpuaa tseegh yô, nana fatyô u zan hemen u taver jighjigh u nan ga. Imba or la nana fatyô u kuwan karen ihyongo, shin undun mimi. (Heb. 2:1; 3:12) Yesu yange ta icin ér aluer se ungwa shin se lumun Mkaanem ma Aôndo a “ishima i mimi i dedoo” ga yô, se fatyô u ‘kusun’ ma ga, gadia “anzughul a nyian ishima man inyaregh man ugurgurmbaakaav mba uma,” vea imbishi ma, nahan se “kera ume atam ga.”—Luka 8:14, 15.

14 Nahan yô, se za nen hemen u gbidyen kwar sha Mkaanem ma Aôndo. Kwagh ne una mgbegha se u mondon iengem i Yehova shi lun a aeren a na a i pase ken Bibilo la. (2 Kor. 3:18) Shi gba u se er nyi? Gba u se za hemen u seer mfe u se lu a mi sha kwagh u  Aôndo, shi mondon iengem na la. Kwagh ne ka kwagh u doon tsung u i gbe u se za hemen u eren gbem sha won, er se lu henen u kaven Ter wase u sha, u lun a dooshima la yô.—Orpa. 3:11.

15, 16. (a) Aluer se mba gbidyen kwar sha akaa a ken jijingi yô, ka mbamtsera mba nyi se zua a mini? (b) Ashighe agen ka i taver se u gbidyen kwar sha kwagh sha ci u nyi, kpa er nan ve i doo u se gba uwer ga?

15 Aluer se za hemen u gbidyen kwar sha akaa a ken jijingi yô, mimi una za hemen u doon se ishima. Se eren nahan yô, se fatyô u taver anmgbianev asev ishima kua mba i sar ve u fan mimi, mba ka se zua a ve shighe u se dugh kwaghpasen la. Aluer se mba gbidyen kwar tsung sha iyua i hemban cii, i Aôndo a ne Wan na sha u paan se la yô, kwagh ne una wase se u nengen ian i civirigh i se lu a mi i lun kôôsôô a Yehova, Ter wase u sha u a lu Icighan la ser, ka kwagh u hemban cii. (Rom. 3:24; Yak. 4:8) Ikyav i tesen yô, anmgbian Mark, u a lu marnya u tar u South Africa, u yange i wuhe un ken purusu anyom atar sha ci u jighjigh na u nan yô, kaa ér: “Se fatyô u karen kwargbidyen sha zende u zenden nengen ajiir kposo kposo la. Ka sea seer gbidyen kwar sha akaa a ken jijingi yô, se hemban kaven akaa a he sha kwagh u Yehova Aôndo. Ashighe agen iyol ka ia wa kpen mo shin ishima ia nyian mo sha kwagh u ken hemen yô, m ôr ma ivur Bibilo, shi m gbidye kwar sha mi. Kwagh ne ka a na i pever mo iyol”

16 Ka mimi, uma u ken tar ne ngee a akaa a danen se, je yô ashighe agen ka i lu se ican kpishi u zuan a shighe gbidyen kwar sha akaa a ken jijingi. Anmgbian ugen ken veghertar u Afrika u i yer un ér Patrick yô, kaa ér: “Ishima yam ngi er ijiir i i tindin mo a ilyoho kposo kposo sha Intanet la nahan. Hanma iyange yô, ka i gba u me fa ilyoho i i tindim a mi la, nahan me kough i bo la kera. Ka mea gbidyen kwar sha akaa a lum ken ishima la yô, ashighe kpishi ‘mbamhen ve ngeem ken ishima,’ nahan i gba u me er msen hen Yehova sha akaa shon cii ve me fatyô u gbidyen kwar a ishima i wang ye. Er kwagh ne ngu a wa tôôn mo shighe cii ve m hii u gbidyen kwar sha akaa a ken jijingi nahan kpa, ngu a wasem m hemba lun kangenaa a Yehova. Kwargbidyen ne ka u bughum ishima u seer kaven mimi.” (Ps. 94:19) Mimi yô, mba ve “timen ken icighanruamabera ayange ayange” la cii, ka ve zua a averen a doon tsung sha ci u mba gbidyen kwar sha kwagh u ve hen la.—Aer. 17:11.

U ER NAN VE U ZUA A SHIGHE U GBIDYEN KWARA?

17. U er nan ve u zua a shighe u gbidyen kwara?

17 Mbagenev ka ve nder pepe ve ôr takerada shi ve gbidye kwar, maa ve er msen. Mbagenev di yô, ka ve er kwagh ne shighe u ve ze ahumbe atetan yô. Shi u fatyô u eren kwagh ne aikighe shin cii man u nyôr u yaven ye. Mbagenev yô, ka i doo ve u ôron Bibilo pepe, shi va ôron aikighe, cii man yaven ye. Sha nahan yô, mba “timen kimi tugh man atetan” shin mba ôron i hanma shighe. (Yos. 1:8) Kwagh u vesen yô, gba u se waan ian yase ikyo, se panden shighe u se eren akaa a a lu hange hange ga la, se geman se gbidyen kwar sha Mkaanem ma Aôndo ayange ayange.—Ef. 5:15, 16.

18. Bibilo kaa ér mba ve gbidyen kwar sha Mkaanem ma Aôndo hanma iyange shi ve nôngon u dondon kwagh u i kaa la vea zua a averen a nyi?

18 Mkaanem ma Aôndo ôr kwa kimbir kimbir ér, mba ve gbidyen kwar sha Ruamabera shi ve nôngon u dondon kwagh u ve henen la cii yô, vea zua a averen kpishi. (Ôr Pasalmi 1:1-3.) Yesu yange kaa ér: “Saan mba ve ongo kwaghôron u Aôndo man ve eren sha mi kpaa la, iyol.” (Luka 11:28) Kwagh u hemban lun a inja cii je yô, aluer se mba gbidyen kwar sha akaa a ken jijingi hanma iyange yô, kwagh la una wase se se na Yehova u a gbe mhirinim asem la icivir, shi un kpa una na se msaanyol hegen kua uma u tsôron ken tar na u he u perapera u u lu van la.—Yak. 1:25; Mpa. 1:3.

^ par. 11 Nenge ngeren u a lu a itinekwagh ér “Our Fight to Stay Spiritually Strong” (Er Se Nôngo Se Za Hemen u Taver ken Jijingi Yô) ken Iyoukura i ken zwa Buter i Disemba 1, 2006.