Aver yem sha atineakaa

Aver yem sha mver u atineakaa

Yange i Gba Se Ér Se Lu Uma Gbem Shawon

Yange i Gba Se Ér Se Lu Uma Gbem Shawon

UUMACE cii soo u lun uma gbem shawon, saan saan. Gbidye kwar nenge er se lu uma gbem shawon saan saan shi se gbaan angev ga ve a doo se tsung yô! Se lu a shighe kpishi u lun vea mba se soo ve la shi se zende sha tar cii shi se hen ityomavee i he shi se seer kwaghfan shi se hen se fa u eren akaa kpishi a se soo la cii.

Isharen ne ka i sha gbaaôndo gaa? Ka i sha gbaaôndo yum! Ruamabera kaa a vese ér Aôndo ver mtsôr ken asema a ase. (Orpasenkwagh 3:11) Bibilo shi kaa ér “Aôndo ka dooshima.” (1 Yohane 4:8) Aluer Aôndo u dooshima, gba se a isharen i lun uma gbem shawon, man a gema a na ka u se fatyô u lun uma gbem shawon ga nahan, a lu sha mi je kpa?

Kwagh ne tese wang ér or môm je kpa nan soo u kpen ga. Jighilii yô, Bibilo pase ér ku ka “orihyom” u se soo kwagh na ga yô. (1 Mbakorinte 15:26) Mbagenev yô, ka ve kpe yev yev, mbagenev di yô, ka ve beeyol cii man ve kpe ye. Kpa hanmaor yô, nana va kpe. Mbakpishiv yô, u henen sha kwagh u kuugh la ka i wase ve ga, shi ka i cier ve iyol je kpaa. A fatyô u va been a orihyom ne sha je kpa? Mimi je, kwagh a fatyô lun nahanaa?

IKYAV TESE ÉR ISHIMAVERENKEGHEN NGI

Aluer u fa wer mayange lu awashima u Aôndo u uumace ve kpeen ga nahan, a kpiligh we iyolo? Bibilo tese ken takerada u Genese la wang ér, yange lu awashima u Aôndo u uumace ve lu uma sha tar gbem shawon. Aôndo yange gba tar a hanma kwagh u i gbe u uumace vea lu a mi ve vea lu uma shi a saan ve iyol yô. Maa gba Adam or u hiihii la, ver un ken paradiso, ka sule u Eden je la. Been kera yô, “Aôndo gema nenge hanma kwagh u Un er yô, lu u doon tsung.”—Genese 1:26, 31.

Yange i gba Adam lu vough, sha ibeen i Aôndo. (Duteronomi 32:4) Ifa, kwase u Adam, kpa lu a mshi ijiir i môm ga, ken ityou man sha iyol kpaa cii. Yehova kaa a ve ér: “Mar nen kpishi, seer nen ngeen, iv nen tar, gema nen u, u̱ lu sha ikyev yen; ishu i shin zegemnger man inyon i purugh sha kwavaôndo man  hanma kwagh u uma u a zenden sha tar cii, ve̱ lu sha ikyev yen.”—Genese 1:28.

Yange lu u shighe a kar cii ve, Adam man Ifa vea fatyô u maren ivin tar ye. Lu u Ifa una mar ônov, man ônov mbara kpa vea gema a mar ônov zan zan a kar ivin tar, er Aôndo washima nahan. (Yesaia 45:18) Kpa ka sha inja u henen ér Yehova una na Adam man Ifa ian i maren ivin tar, kpa vea gema a lu uma a nenge a ônov vev man alaghga je yô ônov mba ônov vev tseegh, shi mayange vea fa kwagh u una due ker la gaa?

Shi hen ase sha tom u yange i na Adam ér, inyam cii i lu sha ikyev na la. Yange i kaa a Adam ér a ii annyamev ati, man lu u kwagh ne una tôô un shighe. (Genese 2:19) U Adam a gema inyam ne i hingir sha ikyev na yô, lu u una hen kwagh u inyam ne, shi una hen a fa u nengen sha i. Lu u kwagh ne ma tôô un shighe ma hemba u yange tôô ii inyam ati la.

Sha nahan yô, kwagh u Aôndo kaa ér ve mar i iv tar man u annyamev ve lu sha ikyev ve la, tese ér yange i gba nom man kwase u hiihii la ér ve lu uma gbem. Jighilii yô, Adam yange tsa sha won shighe gôgônan.

YANGE VE LU UMA SHIGHE GÔGÔNAN

Adam tsa sha won anyom 930

Metusela tsa sha won anyom 969

Noa tsa sha won anyom 950

Nyian ka se tsa anyom 70-80

Bibilo tese ér sha ayange tsuaa tsuaa la uumace ve tsa shighe gôgônan, i hemba er se tse nyian ne. I̱ kaa ér: “Ayange a Adam sha won cii yô, lu anyom deri utaankarunyiin man ikyundugber.” Maa i̱ za hemen i̱ yila ati a nomsombaiorov ateratar mba yange ve tsa hemba anyom 900 yô! Ve yô, lu Setu man Enoshi man Kenan man Yaredi man Metusela man Noa. Ve cii yange ve lu uma cii man Mngerem ma Deemee ma sha ayange a Noa la ye, Noa di tsa sha won anyom 600 cii man Mngerem ma Deemee va sha tar ye. (Genese 5:5-27; 7:6; 9:29) Ka nyi yange i na ve ior ve tsa sha won shighe gôgônan yum nahana?

Nomsombaiorov mban cii yange ve lu uma zum u Adam man Ifa er isholibo ica lu a gba kpishi ga la. Alaghga tsô, lu kwagh u vesen u yange na ve, ve tsa shighe gôgônan je la. Kpa mlu u vough la bende a kwagh u tsan shighe gôgônan la nena? Man a va fatyô u been a ku sha nena? Cii man se zua mlumun sha mbampin mban yô, a gba u se vande fan er i hii ve ka se beeyol shi se kpe la.

AWASHIMA U AÔNDO YÔ KA U UUMACE VE LU UMA KEN PARADISO SHIN TAR GBEM SHAWON