Aver yem sha atineakaa

Aver yem sha mver u atineakaa

Akaaôron a Profeti a A Kur sha Mi Yô

Akaaôron a Profeti a A Kur sha Mi Yô

Se vande ôron kwagh teren kwagh u gbenda u akombo a Delphi bume Croesus, nahan tor u Pershia va hemba un ityav yô. Kpa Bibilo yô, ngi a kwaghôron u profeti sha kwagh u tor u Pershia u yange va kure sha mi vough sha hanma gbenda cii yô.

Profeti u ken Mbaheberu Yesaia yange ôr kwagh ter Shirushi sha iti shi pase er una va hemba gar u vesen u Babilon ityav yô, anyom kar er 200 nahan cii ve i mar tor Shirushi ye.

Yesaia 44:24, 27, 28: ‘TER, ngu kaan nahan er: M kaa a aivmnger, Mer: Uma kera; Me uma uifi ou; M kaa sha Shirushi, Mer: Ka orkuranilev Wam je, una er kwagh u a doom ken ishima u eren cii ye; je, una kaa a Yerusalem ér: I̱ maa u her, tempel kpaa i̱ tim imagh nagh.’

Sha kwagh u or u timen sha akaa a mbayiase u ken Grika Herodotus, a kaa yô, akumautya a Shirushi yange goom a mngerem ma Ifi u Uferati u kuan karen hen atô u gar u Babilon la. Ayom a Shirushi er ne wase ushoja nav u hungwan shin ifi la peren nyôron ken gar shon. Shirushi yange ngohol gar la yô, a sagh Mbayuda mba ve lu uikyangen ken Babilon la kera shi kaa a ve ér ve hide ve za maa Yerusalem, u i tim un kera kuma anyom 70 la.

Yesaia 45:1: “TER ngu kaan a or Na u i shigh un mkurem, ka Shirushi je la, u M ker un sha uwegh ku yanegh, sha u Me ta akuraior inya sha ishigh nagh, man Me sagh utor ikyange shin iwenge kera, shi Me bugh ihinda sha ishigh nagh, á kera wuhe ihindagar kpaa ga.”

Mbapershia yange ve nyôr ken gar la sha zege hunda gar u lun ker avegher ahar la, sha ci u Mbababilon kera wa ikyo ga, ve undu ihinda shon ivegher. Kpa luun er yange Mbababilon fa ér Shirushi ngu wan iyol u van ityav sha ve yô, yange ma ve senda ihindagar i i lu shin kpe mnger la cii. Kpa yange kwagh lu nahan ga.

Kwaghôron u profeti u vesen ne ka môm ken akaaôron a profeti kpishi a ken Bibilo a a kur sha mi vough a mshi shio yô. * Kwagh ne kaha kposo a akaa a tsenganpasen a ior ve er, a ashighe kpishi ka ve kaa ér ka mbaaôndo vev mbaaiev mbara ve er ve la. Akaaôron a profeti a Bibilo la due hen Aôndo, Un u a kaa ér: “M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la.”—Yesaia 46:10.

Ka Aôndo u mimi, u iti na i lu Yehova la tseegh una fatyô u ôron imbakwagh ne ye. Ikyav tese ér inja i iti la ér “Gem Ne Kwagh Lu.” Inja i iti na la tese ér  ngu a tahav mbu fan shi geman mlu u ken hemen sha er una zua sha awashima na yô. Kwagh ne na se vangertiôr ér una fatyô u kuren uityendezwa nav cii.

AKAAÔRON A PROFETI A A LU KUREN SHA MI NYIAN LA

U soo u fan kwagh u akaaôron a profeti a ken Bibilo la a er sha kwagh u ayange ase ne yôô? Bibilo tsengapasen ér “ashighe a ican” a va “ken ayange a masejime,”anyom kar er 2,000 nahan hegen. Ashighe a ican a nyi? Ka ashighe a ican a tar ne shin a uumace ga, kpa ka a iyongo i keren man mkighir man ican i yan man kwaghtseren u uumace ve tagher a mi i kom anyom udubu imôngo hegen ne. De se time nen sha akaaôron a profeti kpuaa a a tese ér se mba “ken ayange a masejime” yô.

2 Timoteu 3:1-5: “Ken ayange a masejime yô . . . , ior vea hingir mbawan ayol a ve ikyo tseegh man mba inyaregh ki doo ve ishima man mbahagher sha akaa man mbagengese iyol man mbaôron kwagh dang dang, man mbahemban mbamaren ve ato man mbalun a ishughun ga man mbalun wang ga, man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve iko ga man mbamoron ayol a ve man mba iember i iyolough i hembe doon ve a Aôndo la. Sha ashe yô mba a mlu u civir Aôndo la kpa mba geman mba nyiman agee la.”

U venda wer ior mba lun a aeren ne mba seer a seer nyian gaa? U fa er ior mba ayol a ve a doo ve ishima man mba inyaregh ki doo ve ishima man mba ihyagh i doo ve ishima ve kase se ve we atô yôô? U fa er ior ve lu seer u keren ér mbagenev ve eren kwagh sha ishima ve, kpa ve ayol a ve yô, ve soo u keghen ato a mbagenev ga yôô? Ka u henen a hen ga, u nenge er mbayev ve hembe mbamaren ve ato tar sha won wuee yô, shi ior kpishi iemberyolough hemba doon ve ishima a Aôndo. Man er akaa a lu vihin gban a gba kera hanma iyange yô.

Mateu 24:6, 7: “Man shi né ungwa kwagh u utya man igwa i utya kpaa. . . . Ikurior igen ia mough ityav a ikurior igen; tartor ugen kpaa ua mough ityav a tartor ugen.”

Akaa a tôvon agen kaa ér iyenge i ior mba ve kpe ken uitya hii ken 1914 zan zan hegen hemba miliôn 100, man iyenge ne hemba iyenge i ityar igen kpishi. Gbidye ase kwar nenge mliam man ijungwen man ican i ior ve ye sha ci u ikpelaior i i kpe ne yô. Akuraior hen kwagh ken kwagh ne, nahan de ityav mbi nôngon kpa?

Mateu 24:7: “Ijen ia gba.”

Mzough u Nengen sha Kwaghyan Tar sha Won Cii kaa ér: “Shin tar u se kahan kwaghyan kpishi sha er hanmaor nana zua a kwaghyan ne, ior umiliôn 815 ka ve tsa ijen, inja na yô, môm ken iorov utaankarunyiin ka nan tsa ijen hanma tugh. Kwagh ugen yô, aluer iorov mba utar yô, môm ken ve nan zough a kwaghyan u yan tsembelee ga.” Kwaghtôvon ugen kaa ér, hanma inyom yô, mbayev mba kuman miliôn utar ka ve kpe ijen.

Luka 21:11: “Ityartenger i vesen ia lu.”

Semberee ne, hanma inyom yô, ityar ka i tenger kposo kposo i kuma er 50,000 nahan, sha gbenda u vesen, nahan kwagh ne ka a bende a uumace. Ityartenger i kuman 100 nahan ka i vihi ayou caver caver shi hanma inyom yô, tartenger u vesen, ka u tenger u vihi akaa je i cieryol. Sha kwagh u kwaghtôvon ugen a kaa yô, hii ken 1975 zan zan inyom i 2000 la, ityartenger wua ior kuma 471,000 nahan.

Mateu 24:14: “Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”

Mbashiada mba Yehova mba hemban miliôn anigheni nahan, mba pasen kwagh shi eren shiada i loho u dedoo u Tartor u Aôndo la, tar sha won cii, ken ityar i kuman er 240 nahan. Ka ve yôôn loho u dedoo sha ugeri mba vesen man ken agar man ken akô kua sha iwo kpaa cii. Kwaghôron u profeti la tsengapasen ér, a eren tom ne sha ishima i Aôndo vough yô: “Ka zum la man mkur una kuma ye.” Inja i kwagh ne ér nyi? Inja na ér, hemen u uumace ua bee, nahan a hii hemen ugen, sha ikyev i Tartor u Aôndo. Ka uityendezwa mba nyi vea kure sha mi, sha ikyev i hemen u Tartor u Aôndo laa? Ôr za hemen tsô u fa.