Aver yem sha atineakaa

Aver yem sha mver u atineakaa

 ITINEKWAGH I TAMEN | WUESE IYUA I AÔNDO I HEMBAN CII LA!

Ú Wuese Iyua i Aôndo i Hemban Cii la Nena?

Ú Wuese Iyua i Aôndo i Hemban Cii la Nena?

“Dooshima u Kristu ngu mgbeghan se . . . A kpe ka sha ci u ior cii sha u mba ve lu uma yô, ve̱ de kera lu uma sha ci ve ayol a ve ga, kpa i̱ lu sha ci u Un u A kpe sha ci ve shi i nder Un kpaa la.”—2 Mbakorinte 5:14, 15.

ALUER se zua a ma iyua i i gbe je or nan lu a vande nan se ga yô, doo u se tese iwuese sha mi. Yesu yange ta iwanger sha kwagh ne zum u a bee ior mbagenev pue angev mbu vihin tsung, mbu mbu lu a icigh sha ayange la ga yô. Yange orgen ken a ve ‘cin hide, gba va wuese Aôndo sha imo i genger genger.’ Yesu gema kaa ér: “Ka ior pue je i wanger ve gaa? Man mba utaankarunyiin mba hana?” (Luka 17:12-17) Kwagh ne tese se nyi? A tese ér se fatyô u hungur a kwagh u dedoo u or nan er a vese la fese je a ngôôr ga!

Naagh ku ipaan kura ku kposo a hanma iyua igen cii. Ku hemba uiyua mbagenev cii yem zende zende. Sha nahan yô, se tese iwuese sha kwagh u Aôndo a er sha ci wase ne nena?

  • Fa or u nan ne iyua la. Er naagh ku ipaan kura ku lu sha ci u uumace cii nahan kpa, ku gbe nan or uma u tsôron ga. Zum u Yesu lu eren msen hen Aôndo yô, a kaa ér: “Uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yohane 17:3) Aluer or kaa a we ér orgen yange nan war uma wou shighe u u lu wanye la nahan, u soo u seer fan kwagh u or shon, kua ityôkyaa i i ne ve yange nan yima u la gaa? Yehova Aôndo u a ne se iyua i paan uuma asev la, soo ér we u fa or u un lu la tseegh ga, kpa shi we u ya ijende a na, ne lu kôôsôô.  Bibilo taver se ishima ér, “Kporom nen hen Aôndo, Un kpaa, Una kporom her a ven.”—Yakobu 4:8.

  • Na naagh ku ipaan kura jighjigh. Or “u nan ne Wan jighjigh yô, nan ngu a uma u tsôron.” (Yohane 3:36) Se na jighjigh nena? Se na jighjigh sha ieren; gba u se na naagh ku ipaan kura jighjigh sha ieren. (Yakobu 2:17) Ka ieren i nyi? Ka i gba u u za ave u ngohol iyua i or nan lu nan we la ve, ia hingir kwagh wou ye. Sha nahan yô, gba u u ngohol iyua i ipaan la. U er kwagh ne nena? Fa kwagh u Aôndo a soo ér we u er a uma wou la, nahan eren kwagh shon vough. * Er msen wer Aôndo a de u asorabo shi a wase u u lu a imo i wang ken ishima. Kporom hen Aôndo a vangertiôr wer ken hemen yô, naagh ku ipaan kura kua va mba ve ne ku jighjigh la cii a bem u been mayange ga, kua mkpeyol man akaa agen a kwagh a gbe se a mi la cii!—Mbaheberu 11:1.

  • Za Mkombo u Umbur Ku u Yesu. Yesu yange hii mkombo ugen shi wa tindi ér i eren un ken hanma inyom, sha u umbur naagh ku ipaan ku i ne sha ci wase la. Yange ôr kwagh u i eren mkombo ne, kaa ér: “Eren nen kwagh ne sha u umbur Mo.” (Luka 22:19) Sha nahan yô, Mbashiada mba Yehova vea lu umbur ku u Yesu sha iyange i Tomahar, Aipor 11, 2017, shighe u iyange ia mire yô. Mkombo ne una lihe a kuma er ihwa i môm nahan. A pase kwagh u ku u Yesu, er u lu a inja yô, man er u lu van a mbamtsera hegen, kua mba ua va a mi ken hemen la kpaa. Ken inyom i i kar la, iorov mba kuman er miliôn 20 nahan sha tar, za mkombo u Umbur ku u Yesu. Saan se iyol u lôhôn we ser va kohol a vese imôngo, se tese iwuese sha iyua i Aôndo i hemban cii ne.

^ par. 7 Gbenda u hemban doon u tôvon fan kwagh u Aôndo shi kporom ikyua a na yô, ka u timen ken Bibilo, i i lu Mkaanem nam la. Kwagh u una wase u u eren kwagh ne yô, pine Orshiada u Yehova, gayô za hen ijiir yase i sha Intanet i www.jw.org la.