Aver yem sha atineakaa

Aver yem sha mver u atineakaa

1 Bibilo Ka i Wase Or u Palegh Mbamzeyol

1 Bibilo Ka i Wase Or u Palegh Mbamzeyol

Bibilo kaa ér ka icighan jijingi a ne i nger kwaghwan u i la ye. Nahan “Ngu a inja sha ityesen man sha mkôôm man sha myange man sha myese.” (2 Timoteu 3:16) Ka mimii? Nenge ase er kwaghfan u Bibilo la, a wase ior u palegh mbamzeyol mbagenev mba uma ne mba hemban taver cii la, sha er ve de we amise ken a ve ga yô.

IKYÔHÔ I MAN KAREN IKYAR INYA

Delphine u se vande teren kwagh na ken ngeren u karen la, yange nenge ér mbamzeyol nav mba mgbeghan un u man ikyôhô za karen ikyar inya. Bibilo yange or u man ikyôhô akuma akuma ga. Kpa i kaa ér: ‘De luun a mbamanmsôrom kpishi imôngo ga.’ (Anzaakaa 23:20) Kwagh u man ikyôhô za karen ikyar inya la, ngu a va or a iangev mbi vesen, shi ngu a vihi ikyar i or ye a orgen la, kua ikyu i ior umiliôn umiliôn ve lu kpen hanma inyom, sha shighe u ma ve kpe ga la. Luun er ior mba dondon kwaghwan u injaa u Bibilo la yô, ma ve fetyô u palegh mbamzeyol mban kpishi.

Delphine yange dondo kwaghwan u Bibilo la. Nahan a kaa hegen wener: “Yange m kav mer ikyôhô i man ngi sôron zayol wam ga. Maa m dondo kwaghwan u ken Mbafilipi 4:6, 7 u a kaa ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a” la. Hanma tugh mbu mea nenge mer ishima ngi zan mo iyol sha mbamzeyol av kpishi je m ngu memen ga yô, m zamber a Yehova ken msen. Yange m pase un er lum ken ishima la cii; ishima nyoon man ishimavihin man er m kera lu a ishimaverenkeghen ga la. Maa m zamber a na mer a wasem me zua a igbenda i ia wasem u hemban henen sha akaa a injaa yô. Sev mbu a aven yô, m er hanma kwagh u m fetyô la cii, sha er me za hemen u henen sha akaa a injaa, nahan a bo la a de hiden her ga yô. Ieren ne wasem, nahan lu inja er m ngu hemban henen sha kwagh u yange m lu a mi la, lu sha kwagh u m lu a mi ga la ga nahan. Maa m kaa mer mayange me kera ma  ikyôhô ga. Sha ci u yange m zua a bem u doon tsung, nahan m soo mer a saam ga.”

IDYA

Idya ka môm ken mbamzeyol mba vesen mba ka ve na or ishimavihin shi nan ure yô. Kpa akaawan a Bibilo aa fatyô u wasen se u palegh mbamzeyol mban, sha u timen sha akaa a vesen a ka a na or hingir u hian a or u nan vese nan ga la, gayô nan nengen ufoto mbaijimbagh yô. Gumor u i yer un ér Samuel yô, kaa ér, “Ka yange i lum ican ga u hian a kwase. Ashighe agen kwase yange nan doom ga, kpa mea nengen mer nan soo kwagh wam yô, maa kwagh ne a na i doom u hian a nan.” Samuel yange kav ér, ashighe kpishi mbagenev ve kaa ér un ngu hian a kwase kua sha shighe u una soo u eren nahan ga je kpaa. Kwagh ne na yô, a kure ikyaa ér, una za hemen a ieren ne shi una gema i i hingir ikye na. Kpa ieren ne na un ishimanyian. A kaa hegen wener: “Ieren ne yange i doo ga, sha ci u ka i na or hingir u lun a ieren i kuren asaren a nan a yolough la.”

Samuel yange ôr ngeren u i gber sha ci u agumaior, sha ijiir i sha Intanet i jw.org la. Shi hen sha kwagh u Anzaakaa 20:11 a ôr la, ér: “Wanye kpaa ka nan pase iyol i nan sha aeren a nan je, shin aeren a nan a lu wang man vough kpaa.” Kwagh ne wase un nena? Samuel yange kav er ieren na i hian a kasev la i lu wang ga shi i doo kpaa ga yô. A kaa hegen wener: “Shi m hen m fa er gumor u nan lu a ieren i hian a kasev la, ka nan lu a aeren a a na nana va lu ikyar u ken ivese u injaa ga yô. Maa m hii u henen er kwase wam u me va er la, una nenge mea hian vea kwase ugen ve i lu un ken ishima la. Kwagh ne wasem m kav mer ieren ne ka i bo. Er ka i lum ican ga u hian a kwase nahan kpa, kwagh ne tese ér ieren ne ka i bo ga ze.” Samuel gema inja. Er a palegh ieren na i hian a kasev la yô, kwagh ne wase un u palegh idya kpaa.

Antonio yange hemba tagher a imeen i vesen i ia na una ngôôr eren idya ga yô: Ieren i nengen ufoto mbaijimbagh la yange i ya tor ken a na. Shin er vôso kwase u doo un ishima tsung nahan kpa, lu ikye na u nengen ufoto mbaijimbagh. A kaa ér, yange un gbidye kwar sha mkaanem ma ken 1 Peteru 5:8 la, nahan kwagh ne wase un kpen kpen. Ivur la kaa ér: “Lu nen geng ge geng shi kuran nen kpaa, orihom wen diabolo ngu zenden er begha u tan kume nahan, keren or u una ya yô.” Antonio kaa ér: “Ufoto mbaijimbagh mba hanma ijiir cii shin tar ne, shi vea fatyô u nyôron teman or ken ishima. Ivur la yange i wasem u gbidyen kwar sha kwagh u or u nan ve a ameen ne la. Yange gba u me fa er ufoto mban ve dugh i lu hen ijiir i hôngorough yô. Hegen m fa er i lu Yehova tseegh una fatyô u wasen mo u ‘lun geng ge geng shi kuran,’ sha er me fatyô u nôngon num a akaa a a te num sha mhen wam man ishima yam man ivese yam la yô.” Yange i na Antonio iwasen i kwagh gba un a mi la, nahan ken masejime yô, de ieren na i bo ne. Kwagh ne wase un u palegh mbamzeyol mba vesen je kpaa.

Kwagh ne tese wang ér, Bibilo ngi a kwaghwan u injaa u una fatyô u wasen se u palegh mbamzeyol mba vesen yô. Kpa gema di mbamzeyol mba ve vande wan amise ken a vese shi ve soo u undun se ga la di ye? De se nenge nen er Mkaanem ma Aôndo ma a fatyô u wasen se u sôron mbamzeyol mba taver mban yô.

Bibilo ngi a kwaghwan u injaa u una fatyô u wasen se u palegh mbamzeyol mbagenev yô