Aver yem sha atineakaa

Aver yem sha mver u atineakaa

Mbatamen Man Udiakon—Hen Nen Kwagh ken Ikyav i Timoteu La

Mbatamen Man Udiakon—Hen Nen Kwagh ken Ikyav i Timoteu La

KEN inyom i i kar la, i ver nomso udubu imôngo ken Mbashiada mba Yehova sha tar, ér ve lu mbatamen man udiakon. Aluer we kpa u ngu môm ken anmgbianev mba doon se ishima mban yô, yange a saan we iyol sha ian tom you i he ne kpishi je.

Nahan cii kpa, alaghga shi yange ishima wa nyian we kpaa. Gumor ugen u a lu ortamen, i yer iti na ér Jason yô, kaa ér, “Shighe u i nam ortamen ikyagh la, lum er m ngee a ityom je i gandem vanger nahan.” Mose man Yeremia kpa, shighe u Yehova na ve ityom la, ve nenge ér ve kuma ga. (Eks. 4:10; Yer. 1:6) Aluer we kpa kape i lu u la yô, u er nan ve u hemba ishimanyian la shi u lu zan hemene? Nenge ase ikyav i orhenen ugen u i yilan un ér Timoteu la.—Aer. 16:1-3.

DONDO IKYAV I TIMOTEU LA

Alaghga Timoteu zurum anyom 20 shin hemba nahan kpuaa tseegh shighe u apostoli Paulu lôhô un ér a hingir ikyartom na la. Sha hiihii la er Timoteu lu wanye yô, alaghga cian ashe shi nengen ér un kuma sha iantom la ga; nahan adooga lu taver un u eren akaa agen. (1 Tim. 4:11, 12; 2 Tim. 1:1, 2, 7) Nahan kpa, anyom nga kar er pue nahan yô, Paulu ôr a tiônnongo u ken Filipi vangertiôr ér: “M ngu veren ishima ken Ter mer, me tindi Timoteu her a ven fefa . . . Gadia m kera ngu a orgen u nan lu ishima i môm a ven . . . nahan ga.”—Fil. 2:19, 20.

Kanyi yange i na ve Timoteu lu ortamen u injaa yumu? Nenge ase akaa ataratar a se fatyô u henen ken ikyav na la.

1. Yange kwagh u ior gba un ishima sha mimi. Paulu yange kaa a anmgbianev mba ken Filipi ér: “[Timoteu una] ver ishima sha kwagh wen sha mimi.” (Fil. 2:20) Sha mimi yô, Timoteu yange a wa ior ikyo. Yange a soo ér ior ve lu kôôsôô a Yehova, shi a kegh a kegh iyol u eren tom a shighe man agee a na u wasen ve.

De luun er deraba u i torough un iyol u za nyôron ape i gbe u una tôô ior a za ver je yô, a kera we ikyo u tôôn ve ga la ga; gadia una za nyôr a mato gbilin yô, shi a wasee? Anmgbian William u a lu ortamen i hembe anyom 20 shi i ne un icivir kpishi yô, wa mba i sember veren ve mbatamen shin udiakon kwagh ér: “Anmgbianev ve doo ne ishima. Hemba veren nen ishima sha mbamgbe vev, i de lu ityom igen i ne lu a mi i eren la ga.”

2. Yange ver tom u pasen kwagh hiihii. Shighe u Paulu lu ôron kwagh u mkposo u Timoteu a mbagenev yô, a kaa ér: “Mbagenev cii mba keren akaa a ve ayol a ve, kera ka kwagh u Kristu Yesu ga.” (Fil. 2:21) Paulu nger mkaanem mara shighe u lu ken Roma la. A nenge yô, anmgbianev mba ken Roma, gema ishima ve cii ver sha akaa a ve. Je yô, ve kera lu eren tom u Yehova sha gbashima ga. Kpa Timoteu yô kwagh na kaha! Yange ian a due i una seer pasen kwagh yô, a er kwagh er Yesaia nahan ér: “Mo ne, tindim.”—Yes. 6:8.

U er nan ve u eren akaa ou kua a ken mcivir u Yehova cii sha inja sha injaa? Hiihii yô, fa akaa a a hembe lun a hange hange la. Paulu taver anmgbianev ishima ér ve “fa akaa a a hembe lun a inja” la. (Fil. 1:10) Akaa a a lu a hange hange sha ishigh  ki Aôndo la, we kpa a lu u akaa a vesen. Sha uhar yô, pande akaa. Pande akaa a vihin we shighe man agee. Paulu yange wa Timoteu kwagh ér: “Yevese asaren a sha inja i mbayevikaior la, gema dondo perapera ityô, man jighjigh u nan man dooshima man bem.”—2 Tim. 2:22.

3. Yange er icighantom u Ter sha gbashima. Paulu yange umbur Mbafilipi ér: ‘Ne fa inja i Timoteu, a er tom a mo imôngo sha Loho u Dedoo er wan vea ter nahan.’ (Fil. 2:22) Timoteu yange wa hwev ga. Yange er tom taveraa vea Paulu, nahan ve lu kangenaa.

Tom ngu ken nongo u Yehova nyian kpishi. Man tom ne ngu ne mkom shi ua na u hemba lun kôôsôô a anmgbianev mba nomso man mba kasev. Nahan kange ishima wer, u eren “tom u Ter ngegh” sha hanma shighe cii.—1 Kor. 15:58.

4. Yange eren sha kwagh u hen la. Paulu yange nger Timoteu ér: “U lu a mo mangeraa sha ityesen man ieren yam man ishimaveren yam man jighjigh u nan man ishima i wan man dooshima man ishima i taver.” (2 Tim. 3:10) Er Timoteu lu dondon kwagh u lu henen la yô, a kuma u eren ityom i vesen.—1 Kor. 4:17.

U ya ijende a anmgbian u nan kav ishigh shi nan vie ken jijingi, u u fatyô u henen kwagh ken nan yôô? Wea lu a mi ga yô, ker môm ya ijende a nan. Anmgbian ugen iti na ér Tom, a er tom u ortamen hegen anyom kpishi. A kaa wener: “Yange kwagh wam gba ortamen ugen ishima, nahan a tsaase mo tsembelee. Yange kwagh a taver mo je m pine un, nahan a wam kwagh; shi m er sha kwagh u a wem la. Kwagh ne nam m de u nengen mer m yina sha tom ne.”

5. Yange za hemen u tsaase iyol na. Paulu yange wa Timoteu kwagh ér: “Kar iyol you sha u ú taver sha u civir Aôndo yô.” (1 Tim. 4:7) Or u eren anumbe ka nan lu a kooci, kpa shi i gba u nana karen iyol sha tseeneke u nan kpaa. Paulu kaa a Timoteu ér: “Ver ishima u ôron ior Bibilo man u wan kwagh man shi u tesen . . . Nôngo sha akaa ne, penda ishima sha mi sha u ior cii vea nenge mzehemen wou yô.”—1 Tim. 4:13-15.

Gba u u za hemen u tsaase iyol you. Henen kwagh kpoghuloo, shi faan ape tiônnongo u Yehova a lu yemen yô. Fa igbenda i he i i lu duen a mi i eren kwagh la shi dondon i. De henen wer u ngu a mfe kpishi shi u er tom ne anyom ngee nahan zayol una lu kpa u kure un fese a u tôvon shami zulee shio ga. Dondo ikyav i Timoteu la, “ver ishima sha iyol you man ityesen you kpaa.”—1 Tim. 4:16.

6. Yange de ér Jijingi u Yehova a hemen un. Er Paulu gbidye kwar sha tom u Timoteu lu eren la yô, a umbur un ér: “Kura kwagh u dedoo u i we u sha ikev la sha agee a Icighan Jijingi u A tem ken vese la.” (2 Tim. 1:14) Cii ve Timoteu a kura kwagh u i wa un sha ikyev la yô, gba u una de ér jijingi u Aôndo a hemen un.

Orgen u a er tom u ortamen anyom a ngee yô, mba yer iti na ér Donald; a kaa ér: “Gba u mbatamen man udiakon vea wa ikyo sha kwagh u mlu ve a Yehova. Aluer ve er nahan yô, vea ‘seer taver a taver agee.’ Aluer mba eren msen sônon Aôndo ér a na ve icighan jijingi na shi ve ume ityamegh nagh yô, vea na a kpe anmgbianev iyol.”—Ps. 84:7; 1 Pet. 4:11.

IANTOM YOU I GBA U KWAGH

Doo se tsung u nengen er i sember veren anmgbianev kpishi mbatamen er we nahan, shi ve lu zan hemen ken tom u ve lu eren Yehova ne yô. Jason u se ter kwagh na ken mhii u ngeren ne la, kaa ér: “Ken anyom a m lu ortamen ne, m hen akaa kpishi shi m seer ngun a vangertiôr kpaa. Hegen yô, mimi je saan mo iyol a iantom yam ne shi m nenge mer ka kwagh u eren asenge a mi ga!”

U de wer Yehova a za hemen u eren tom a we kpa? Yô, kange ishima hen kwagh ken ikyav i Timoteu la, shi dondo i kpaa. U er nahan yô, u lu ior mba Yehova a inja kpen kpen.