Aver yem sha atineakaa

Aver yem sha mver u atineakaa

 NGEREN U TIMEN SHA MI 36

Armagedon ka Loho u Dedoo!

Armagedon ka Loho u Dedoo!

“Ve kohol ve imôngo hen ijiir i i yer . . . er Armagedon la.”—MPA. 16:16.

ICAM 150 Ker Aôndo A̱ Yima U

KWAGH U I TIM SHA MI KEN NGEREN NE YÔ *

1-2. (a) Er nan ve Armagedon a lu loho u dedoo sha ci u uumace? (b) Ka mbampin mba nyi se lu zuan a mlumun sha mi ken ngeren nee?

MBAGENEV na jighjigh ér ka ityav a va nôngo a ta ubom sha u timin tar ne ye, gayô a lu ma aahe nahan una tim tar ne ye. Nahan kpa, ka kwagh u Bibilo i tese la ga. Bibilo tese ér ica a gba ga tsô a nôngo ityav mbi gen mbi kwagh u dedoo una due ker yô. I yila ityav mbira ér Armagedon, man kwagh u Bibilo i er sha kwagh u ityav mbin la, ka kwagh u una fatyô u nan se msaanyol yô. (Mpa. 1:3) Ityav mbi Armagedon mbira mbia tim uumace kuaa ga, kpa mbia gema a yima a yima ve! Mbia yima ve nena?

2 Bibilo tese ér ityav mbi Armagedon mbia yima uumace sha u been a hemen u orumace kera. Ityav mbira mbia yima uumace sha u timin mbaaferev kpa geman yiman mbaperapera. Shi ityav mbira mbia yima uumace sha u kuran ikyasen i tar u se lu shimi ne sha er a vihi u ga yô. (Mpa. 11:18) Nahan de se time nen sha mbampin unyiin mba vea wase se u kaven akaa a anyiin ne tsembelee yô, ka ve je ne: Ka nyi i lu Armagedon? Ka akaa a nyi nahan aa er cii man Armagedon? Se er nan ve se lu ken ior mba a yima ve sha shighe u Armagedon laa? Se er nan ve se za hemen u tilen sha mimi ken shighe u Armagedon a zurum nee?

KA NYI I LU ARMAGEDON?

3. (a) Inja i ishember i “Armagedon” la ér nyi? (b) Er i pase ken Mpase 16:14, 16 nahan, se fatyô u kaan ser Armagedon ka ijiir i i lu mape kpôô kpôô ga sha ci u nyi?

3 Ôr Mpase 16:14, 16. Ken Bibilo cii, ka ijiir i môm tseegh i nger ishember i “Armagedon” la ye. I zua a ishember ne ken zwa Heberu, man inja i i ér “Uwo u Megido.” (Mpa. 16:16) Megido ngise lu gar ken Iserael u sha ayange a tsuaa la. (Yos. 17:11) Nahan  kpa Armagedon gema ka iti i ma ijiir i môm i môm i i lu mape kpôô kpôô sha tar ga. Armagedon ka shighe u “utor mba sha tar sha won cii” vea kohol imôngo sha u hendan a Yehova la. (Mpa. 16:14) Nahan cii kpa, ken ngeren ne yô, se lu teren ishember i “Armagedon” la sha u ôron kwagh u ityav mbi a nôngo zum u utor mba tar ne cii vea kohol ijiir i môm la. Kpa er nan se fe ser Armagedon ka ijiir i sha ikyava? Hiihii yô, uwo u Megido ngu mape kpôô kpôô ga. Sha uhar yô, ijiir i i yer ér Megido la i ndahar kpishi gande u “utor mba sha tar sha won cii” kua akumautya man ikyav mbi uityaav vev, a kohol a lu her. Sha utar yô, er se va hen ken ngeren ne nahan, ityav mbi Armagedon mbia hii shighe u “utor” mba tar ne vea ta num sha ior mba Aôndo mba ve lu sha ajiir kposo kposo sha tar cii la.

4. Er nan ve Yehova a yer ityav nav mbi vesen mbi masetyô la sha iti i ijiir i i yer ér Megido laa?

4 Er nan ve Yehova a yer ityav mbi vesen mbi masetyô la sha iti i ijiir i i yer ér Megido laa? Sha ayange a i ngeren Bibilo la, Megido man Pev u Yesereel lu ikpur i uitya. Yehova iyol na kpa yange a nôngo ityav sha ci u ior nav hen ijiir ne ashighe agen. Ikyav i tesen yô, Aôndo yange wase Baraki, Orjir u ken Iserael hemba ikyumutya i Mbakanaan i torutya Shisera hemen i la “hen mngerem ma Megido.” Baraki man Debora u lu profeti u kwase la wuese Yehova sha ivande i er, na ve mhembe la. Ve wa icam ve kaa ér: “Sha je kpaa, asan nôngo ityav . . . a Shisera. Ifi u Kishon kuwa ve kera.”—Mbaj. 5:19-21.

5. Ka kwagh u hemban doon u nyi a ne ve ityav mbi Armagedon mbira mbi kaha a mbi Baraki yange nôngo laa?

5 Baraki man Debora kure icam ve la ér: “Mbaihomov Ou cii, ve̱ saa ishe nahan TERE! kpa mba A doo ve ishima la yô, ve mba er iyange, zum u ka ia due sha agee a i nahan.” (Mbaj. 5:31) Shighe u Armagedon la mbaihyomov mba Aôndo cii vea tim, kpa mba Aôndo a doo ve ishima yô, a yima ve. Kpa mkposo u vesen gema ngu hen atô u ityav mbi yange i hemba Mbakanaan la a Armagedon. Sha shighe u ityav mbi Armagedon la, ior mba Aôndo vea nôngo ityav mbira ga. Vea lu a ikyav mbi uityaav kpaa ga! Ka “sha mtem u bem bem man jighjigh u nan” shin suur sha Yehova man akumautya na a sha la ‘agee a ve aa lu ye.’—Yes. 30:15; Mpa. 19:11-15.

6. Alaghga Yehova una tim mbaihyomov nav shighe u Armagedon la sha nyi gbenda?

6 Aôndo una hemba mbaihyomov nav sha shighe u Armagedon la nena? Alaghga una er kwagh ne sha igbenda kpishi. Ikyav i tesen yô, alaghga una er tar ua tenger shi una nôô awombo gayô a lu inyiar. (Yobu 38:22, 23; Esek. 38:19-22) Alaghga una er mbaihyomov nav vea hide a hii u timin ayol a ve. (2 Kron. 20:17, 22, 23) Shi alaghga a lu mbatyomov una er tom a ve u timin mbaaferev ye. (Yes. 37:36) Hanma gbenda u Aôndo a nôngo ityav mbin a mi cii kpa, una hemba gburu gburu. Mbaihyomov nav cii vea tim kera. Kpa mbaperapera yô vea war.—Anz. 3:25, 26.

(Nenge ikyumhiange i sha 7-15) *

KA NYI IA ER CII MAN ITYAV MBI ARMAGEDON MBIA PEVE?

7-8. (a) Er i pase ken 1 Mbatesalonika 5:1-6 nahan, ka kwaghyôôn u ior ve fe ungwan ga u nyi mbahemenev mba tar ne vea yôô? (b) Aie ne a lu u bo kpen kpen sha ci u nyi?

7 A yôô ér “bem, man mkpeyol” cii man “iyange i Ter” ia va ye. (Ôr 1 Mbatesalonika 5:1-6.) “Iyange i Ter” i i ter ken 1 Mbatesalonika 5:2 la ka “zegecan.” (Mpa. 7:14) Se fatyô u fan shighe u a kuma u zegecan una hii la nena? Bibilo kaa a vese ér a yôô kwagh ugen u i lu kwagh u ior ve fe ungwan ga yô. Kwaghyôôn la a lu ikyav i tesen ér kuma u zegecan una hii.

8 Kwaghyôôn la a lu “bem, man mkpeyol” u yange i tsengaôron ér a yôô la. Mbahemenev mba tar ne vea yôô kwagh nahan sha ci u nyi? Man mbahemenev mba kwaghaôndo kpa vea lu uwegh ken kwagh nee? Alaghga kwagh a lu  nahan. Nahan cii kpa, kwaghyôôn la kpa a lu di aie ugen u azôv aa lu samber a mi yô. Aie ne a lu u bo kpen kpen sha ci u una na ior vea hunde ishima ér mba ken mkor, man a lu u ica a kera gba ga je maa zegecan u i gbe je a lu a tser uumace ga la una haa angahar. Heen nahan maa “mtim una ande sha a ve ibuv er martoghor ka a kôr kwase uya nahan.” Kpa hide mbacivir Yehova mba mimi mbara di ka nyi ia er ve? Ve kpa er ve fe shighe u iyange ne ia hii jighilii ga yô, a kpiligh ve iyol er iyange i Yehova i hii kwa môm kpoo yô, kpa mayange kwagh ne una bur ve a bur ga cii.

9. Yehova una tim tar u Satan ne kera nena?

9 Yehova una tim tar u Satan ne cii kera kwa môm er yange er sha shighe u Noa la nahan ga. Una er kwagh ne acin ahar. Hiihii yô, una tim Zegebabilon u a lu tartor u kwaghaôndo u aiegh u sha tar cii la. Una been yô, una mase timin vegher u tar u Satan ugen la sha shighe u Armagedon la; ka mbapativ man ikwe shojaa kua mbakpengav je la. De ase se seer timen nen sha akaa a vesen ahar a a er ne.

10. Er Mpase 17:1, 6 man 18:24 a tese nahan, Yehova una tim Zegebabilon sha ci u nyi?

10 “Ijirôron i zegeidyakwase.” (Ôr Mpase 17:1, 6; 18:24.) Zegebabilon va a ilyahan sha iti i Aôndo je gande. A tese ior mbaaie kpishi sha kwagh u Aôndo. A er idya i ken jijingi a mbahemenev mba tar ne sha u yan ikyar a ve. Ka a kighir mba ve lu ken a na la shi a ngohol ve inyaregh kpaa. Heela tseegh ga, a haa awambe inya, kua a mbatomov mba Aôndo kpaa. (Mpa. 19:2) Yehova una tim Zegebabilon nena?

11. Ka nyi i lu “inyam i nyian bong” la, man Aôndo una mgbegha i u kuren awashima na sha kwagh u Zegebabilon nena?

11 Yehova una mgbegha “akor pue” a “inyam i nyian bong” la u timin “zegeidyakwase” la kera. Inyam i sha injakwagh la tile sha ityough ki Mzough u Ityar Cii. Akor pue la di gema tile sha ityough ki ugomoti mba ve suen mzough la yô. Shighe u Aôndo a ver la una kuman yô, ugomoti mbara vea ta num sha Zegebabilon la. “Vea ngohol un akaa, una hingir aveve una hungwa idyelegh.” Vea ngohol un inyaregh cica cii shi  vea pase er a we ifer kpishi yô. (Mpa. 17:3, 16) Mtim u Zegebabilon ne una tôô shighe ga; a lu inja er ka ken iyange i môm tseegh nahan. Kwagh ne una kpiligh mba ve suen un la iyol kpishi, sha ci u vande tan ave vanger ér: “M tema tor je, m ngu kwasecôghol ga, ijungwen kpaa me nenge a mi ashe ga.”—Mpa. 18:7, 8.

12. Ka nyi Yehova una de ér akuraior a er ga, man ka sha ci u nyi?

12 Aôndo una de ér akuraior a tim ior nav ga. Mba yer ior nav sha iti na, shi ve ungwa imo na sha kwagh u a kaa ér ve due ken Zegebabilon kera la kpaa. (Aer. 15:16, 17; Mpa. 18:4) Shi ve er tom kpoghuloo, ve wase mbagenev kpaa u duen ken a na kera. Nahan, mbacivir Yehova vea “ngohol atsan a tseren un la kpaa ga.” Nahan cii kpa a kar jighjigh ve u nan.

Hanma ijiir i ior mba Aôndo ve lu sha tar cii kpa, vea suur sha na shighe u a ta num sha ve la (Nenge ikyumhiange i sha 13) *

13. (a) Ka an nan lu Gogi? (b) Er i pase ken Esekiel 38:2, 8, 9 nahan, ka nyi ia va a Gogi hen ijiir i sha ikyav i i yer ér Armagedon laa?

13 Num u Gogi. (Ôr Esekiel 38:2, 8, 9.) A timin iniongo i kwaghaôndo u aiegh cica cii yô, ior mba Aôndo vea due tseng er kon u u war ijeverahumbe nahan. Kwagh ne una vihi Satan je ka u henen a hen ga. Una tese ishimavihin na la sha u mgbeghan “ujijingi mba hwangerev” u samber a mbaaie mba vea na mzough u akuraior una mough a ta num sha ior mba Yehova yô. (Mpa. 16:13, 14) I yila mzough u akuraior la ér “Gogi, u ken tar u Magogi.” Shighe u akuraior aa mough a ta num sha ior mba Yehova la, vea nyôr hen ijiir i sha ikyav i i yer ér Armagedon la.—Mpa. 16:16.

14. Ka nyi Gogi una va mase kavene?

14 Gogi una suur sha “agee a iyolough” a na, ka sha ushoja kua ikyav mbi uityaav nav je la. (2 Kron. 32:8) Se yô, se suur sha Yehova, Aôndo wase; kpa akuraior yô, aa nenge ieren yase ne ér ka ibumegh. Sha ci u nyi? Ityôkyaa yô, Zegebabilon yange lu a tahav, kpa mbaaôndo nav mbara fatyô u yiman un sha ikyev i “inyam” la kua “akor pue” a inyam shon la ga! (Mpa. 17:16) Sha nahan yô, Gogi una nenge ér una tôô ior mba Aôndo icôngo. Una va ta num sha ior mba Yehova “er ibeenegh ki ki cir tar nahan.” (Esek. 38:16) Kpa igyo a lu a kure hô ga je tsô, Gogi  una mase kaven er un gbe ken kper yô. Una kav hen shighe la er i lu Yehova un lu nôngon kwagh a na yô, vough er Farao kpa yange va mase kaven shin Zegemnger u Nyian nahan.—Eks. 14:1-4; Esek. 38:3, 4, 18, 21-23.

15. Ka sha nyi igbenda nahan Kristu una hemba gburu gburu?

15 Kristu man akumautya na a sha vea va nôngo kwagh sha ci u ior mba Aôndo, maa vea hyelegh Gogi vea akumautya na, vea njighe ve a njighe. (Mpa. 19:11, 14, 15) Kpa hide Satan, orihyom u Yehova u hemban, u mbaaie nav ve mgbegh akuraior a te num sha ior mba Yehova sha shighe u Armagedon la di, a er a na nena? Yesu una kende un kua azôv a na cii shin ihungwa i í ze kweng la, una wuhe ve shimi anyom dubu.—Mpa. 20:1-3.

U ER NENA VE A VA YIMA U SHA SHIGHE U ARMAGEDON LAA?

16. (a) Se tese ser se ‘fa Aôndo’ nena? (b) Ka nyi a er a ior mba ve fe Yehova la sha shighe u Armagedon?

16 Aluer se tsa ken mimi shighe lihe shin shighe lihe ga kpa, saa se tese ser se ‘fa Aôndo’ shi se ‘wa Loho u Dedoo u Ter wase Yesu ikyo’ ve a yima se sha shighe u Armagedon la ye. (2 Tes. 1:7-9) Ka se ‘fa Aôndo’ zum u se fe kwagh u a soo kua kwagh u a soo ga la shi se fe atindi a a we sha kwagh u aeren a wang la yô. Shi ka se tese ser se fa Aôndo zum u a doo se ishima shi se lu ungwan imo na shi civir un a uma wase cii yô. (1 Yoh. 2:3-5; 5:3) Ka sea tese ser se fa Aôndo yô, se zua a ian i icivirigh i lun mba ‘se kpaa Aôndo a fe’ se yô, man aluer Aôndo fa se yô, kwagh la una war uma wase sha shighe u Armagedon la! (1 Kor. 8:3) Se ôr nahan sha ci u nyi? Ka sha ci u aluer ‘Aôndo fa’ se yô, kwagh la tese je ér, a lumun se.

17. Inja i u ‘wan Loho u Dedoo u Ter wase Yesu ikyo’ la ér nyi?

17 “Loho u Dedoo u Ter wase Yesu” la wa mimi mba Yesu ngise tese shi ve lu ken Mkaanem ma Aôndo la. Ka se ungwa loho u dedoo ne shin se wa u ikyo sha u eren akaa a u kaa la ken uma wase. Man kwagh la wa u veren akaa a Tartor hiihii ken uma wase, shi dondon atindi a Aôndo a sha kwagh u aeren a wang la kua u pasen  kwagh u Tartor u Aôndo. (Mat. 6:33; 24:14) Kwagh la shi wa u suen anmgbianev mba Kristu mba i shigh ve mkurem la er ve lu eren tom u i ne ve la yô.—Mat. 25:31-40.

18. Anmgbianev mba Yesu mba i shigh ve mkurem la vea va na ior injar sha erdoo u ve tese ve la nena?

18 Ica a gba ga je mbatomov mba Aôndo mba i shigh ve mkurem la vea na mba ve lu “iyôngo igen” la injar sha erdoo u yange ve tese ve la. (Yoh. 10:16) Sha nena? Cii ve ityav mbi Armagedon mbi hii yô, mba 144,000 mbara cii a nder ve a iyol i ken jijingi i a kera fatyô u timin i ga la, vea yem sha. Nahan vea lu ken ikyumutya i sha i ia njighe Gogi shi ia kura “zegeikpelaior” i i lu er ka iyôngo la. (Mpa. 2:26, 27; 7:9, 10) Sha mimi yô, ka kwagh u icivirigh u zegeikpelaior wasen mbatomov mba Yehova mba i shigh ve mkurem la ken shighe u ve lu shin tar ne!

SE ER NAN VE SE ZA HEMEN U TILEN SHA MIMI ER MKUR A ZURUM NEE?

19-20. Aluer se tagher a mbamtaver kpa, se fatyô u zan hemen u tilen sha mimi er Armagedon a lu zurum ne nena?

19 Ken ayange a masejime a ican ne, ior mba Yehova kpishi mba tagher a mbamtaver. Nahan cii kpa, se fatyô u wan ishima a iember. (Yak. 1:2-4) Kwagh u vesen u una wase se yô, ka u eren msen sha gbashima. (Luka 21:36) Shi a gba u se seer kwagh sha msen wase la, se ôron Mkaanem ma Aôndo hanma iyange shi se gbidyen kwar sha mi kua akaaôron a profeti a a ôr kwagh u shighe wase ne. (Ps. 77:12) Aluer se er akaa ne shi se mba pasen kwagh nduuluu yô, kwagh la una taver jighjigh wase kua ishimaverenkeghen yase!

20 Gbidye kwar nenge er a saan we iyol shighe u Zegebabilon una kera lu ga shi ityav mbi Armagedon kpa mbia kar kera la! Kpa u hemban cii je yô, hen ase er hanmaor nana na iti i Aôndo icivir shi nana lumun ér ka un a kom u hemen ve a saan we iyol yô! (Esek. 38:23) Sha kpôô yô, Armagedon ka kwagh u dedoo sha ci u ior mba ve fe Aôndo shi ve ungwan imo i Wan na shi ve we ishima zan zan mkur la.—Mat. 24:13.

ICAM 143 Za Hemen U Kuran shi Keghen Iyange I Yehova

^ par. 5 Ior mba Yehova ndera keghen Armagedon ka kwagh u nyian a mi ga. Se lu timen sha kwagh u a lu Armagedon la ken ngeren ne, kua akaa a aa er cii man Armagedon la man er se tile sha mimi ken shighe u Armagedon a zurum ne yô.

^ par. 71 NGEREN U PASEN FOTO: Akaa a kpilighyol nga eren hen ikyasen yase. Se (1) za hemen u pasen kwagh sha afatyô wase cii, (2) za hemen u henen Bibilo, shi (3) za hemen u nan jighjigh ser Aôndo una kura se.

^ par. 85 NGEREN U PASEN FOTO: Dasenda mba wan iyol u nyôron hen ya u Mbakristu mbagen sha agee, kpa tsombor la na jighjigh ér Yesu kua mbatyomov fa kwagh u a lu zan hemen yô.