Aver yem sha atineakaa

Aver yem sha mver u atineakaa

 NGEREN U TIMEN SHA MI 50

Yehova Er Kwagh u Duen a We ken Kpan Kera

Yehova Er Kwagh u Duen a We ken Kpan Kera

“Yôô nen mpase u i pase i toho, ken tar la, hen mba ve tem ken u cii.”—LEV. 25:10.

ICAM 22 Tartor la Hemen—Yô U Va!

KWAGH U I TIM SHA MI KEN NGEREN NE YÔ *

1-2. (a) Ka nyi i lu jubili? (Nenge ngeren u kiriki u a lu a itinekwagh ér “Ka Nyi Yange i Lu Jubili?” la.) (b) Er i nger ken Luka 4:16-18 nahan, ka nyi Yesu yange ôr kwagh sha mi?

KEN ityar igen yô, ka i er iniongo i ember inyom i sha 50 i ma tor shin torkwase u nan lu hemen yô. Ka i yila inyom i sha 50 la ér ka inyom i jubili i or shon u nan lu hemen la. Ashie agen ka i er iniongo i jubili la iyange i môm shin kasua môm gayô i hemba nahala; kpa ken masejime yô, iniongo la i va bee shi ica i gba ga je i hungur a gurgur u iniongo shon.

2 Se lu timen sha kwagh u jubili igen i i hembe doon a jubili i ngise Mbaiserael ve er ken hanma inyom i sha 50 la yô. Yange i er iniongo ne i kuma inyom jimin. Yange a luun inyom i Jubili yô, Mbaiserael mba ve lu ken kpan cii, ve due ken kpan kera. Er nan i doo u se hen kwagh u inyom i Jubili shono? Ka sha ci u inyom i Jubili i Mbaiserael la umbur se kwagh ugen u Yehova a er sha ci wase yô. Kwagh u Yehova a er ne una na mayange se kera lu ikpan ga, man hegen je kpa se mba zuan a mtsera ken kwagh shon. Yesu kpa yange ôr kwagh u mlu u ken kpan ga ne.—Ôr Luka 4:16-18.

Inyom i Jubili la yange i lu shie u ember ken Iserael, sha ci u yange i pase ior mba ve lu ikpan yô ve hide ve za kohol icombor ve, shi i hide ve a inya ve (Nenge ikyumhiange i sha 3) *

3. Er i pase ken Levitiku 25:8-12 nahan, Mbaiserael yange ve zua a mtsera ken inyom i Jubili la nena?

3 Aluer se time sha kwagh u Jubili i ngise Yehova ver sha ci u Mbaiserael la yô, se seer kaven mkaanem ma Yesu ôr shie u lu ôron kwagh u dughun ior ken kpan shin ken uikyangen kera la. Yehova yange kaa a Mbaiserael ér: ‘Tsegha nen inyom i sha akunduahargber la, yôô nen mpase u i pase i toho, ken tar la, hen mba ve tem ken u cii, i̱ lu ne inyom i jubili; hanma or wen nana̱ hide hen kwagh u nan, hanma or wen kpaa nana̱ hide hen ior mba nan.’ (Ôr Levitiku 25:8-12.) Ken ngeren u karen la,  se time sha iwasen i Mbaiserael zuan a mi sha Iyange i Memen ken hanma kasua yô. Kpa ka mtsera u nyi yange ve zua a mi ken inyom u Jubili laa? Tôô ase wer Oriserael gba injô, nahan nan tee inya i nan sha er nana kimbi injô la yô. Yange a luun inyom i Jubili yô, i hide nan a inya i nan. Sha nahan yô, i lu u or la nana “hide hen kwagh u nan,” shi dyako u ônov mba nan kpa a saa ga. Sha vegher ugen di, yange or a gba injô ia kehe man a va gande yô, nan tee wan u nan ken kpan, shin nan tee iyol i nan je kpaa sha er nana kimbi injô la yô. Yange a kôron inyom i Jubili yô, i gba u kpan la nana “hide hen ior mba nan.” Nahan lu u or môm nana gba lun kpan gbem sha won ga! Kwagh ne tese ér Yehova yange wa ior nav ikyo sha mimi!

4-5. Er nan i doo u se hen kwagh u Jubili laa?

4 Ka mtsera ugen u nyi Mbaiserael shi zuan a mi ken inyom i Jubili laa? Yehova yange kaa ér: “Icanor nana̱ de lu hen we ga, gadia TER Una ver u dedoo ken tar u TER, Aôndo wou, Una na u dyako er ú ngohol u la.” (Dut. 15:4) Nenge imba er kwagh ne a kaha a kwagh u a lu zan hemen ken tar hegen ne sha wono! Ashie kpishi mba ve lu a inyaregh kpishi la ka ve seer a seer zuan a inyaregh, mbaatsanev di ve seer a seer kungun!

5 Er se lu Mbakristu yô, se mba kor Tindi u Mose la ga. Kwagh ne tese ér se mba kor tindi u Jubili u pasen ikpan shin den ior a anzô, gayô hiden ior a inya ve la ga. (Rom. 7:4; 10:4; Ef. 2:15) Nahan kpa doo u se hen kwagh u Jubili la. Sha ci u nyi? Sha ci u se kpa se fatyô u lun ken mlu u uikyangen ga u una umbur se kwagh u Yehova er sha ci u Mbaiserael la yô.

YESU YÔÔ ÉR A PASE IOR A TUHWA

6. Ka nyi i gbe u a pase uumace sha ikyev i i a tuhwa?

6 Se cii gba u a sagh se ken ikyangenev mbi kwagh ugen u vihin tsung u a kôr se ikpan yô. Se mba ikpan i isholibo. Er se lu mbaasorabo yô, ka se bee iyol shi se gba angev, shi se kpe kpaa. Ior kpishi ka ve nenge a kwagh ne wang zum u ve nenge ijingi shin ve ze iyouci yô. Shi ka sea er isholibo yô, i vihi se. Apostoli Paulu yange kaa ér ka yemen a na sha u una za ‘hingir kpan u tindi u isholibo, u a lu ken iyol na  la.’ Shi a kaa ér: “Aye, kwagh tserem! Ka an nana shi yimam sha ikyev i iyol i i lu yemen a mo ken imba ku ne sha wono?”—Rom. 7:23, 24.

7. Yesaia yange tsenga ôron ér nyi sha kwagh u pasen mba ve lu uikyangen laa?

7 Kwagh er doo yô, Aôndo due a gbenda u una yima se sha ikyev i isholibo yô. Ka Yesu una na ve kwagh a fatyô u lun nahan ye. Shie u shi anyom 700 cii ve Yesu una va shin tar la, profeti Yesaia tsenga ôron er a va pase ior ken uikyangen sha gbenda u vesen ken hemen yô. Kwagh ne una hemba kwagh u ngise i eren ken inyom i Jubili ken Iserael la. Yesaia nger ér: ‘Jijingi u Ter AÔNDO ngu sha a Mo, sha ci u TER shighem mkurem; A verem er M̱ sur mba asema a vihi ve la asema, M̱ yôô i̱ pase mbakwarev.’ (Yes. 61:1) Lu an i ôr kwaghôron u profeti ne sha nana?

8. Lu an Yesaia ôr kwaghôron u profeti u pasen ior ken uikyangen la sha a nana?

8 Kwaghôron u profeti u injaa u sha kwagh u pasen ior mba ve lu uikyangen ne yange hii u kuren sha mi shie u Yesu hii tom na u pasen kwagh la. Shie u za ken shinagoge u ken Nasareti, u lu ijiir na la, a ôr mkaanem ma Yesaia mara sha ato a ior mba ve kumba her la. A kaa ér ka un i er mkaanem mara sha a na ye, wener: “Jijingi u Yehova ngu sha a mo, sha ci u a tsegham ér m yôô loho u dedoo hen mbaatsanev. A tindim ér m yôô hen mba ve lu uikyangen la mer á pase ve vea kera lu uikyangen ga, shi hen mbaapirashe mer á bugh ve ashe, man hen mba i kighir ve la mer á due a ve ken ican kera, shi m pase mer shighe kuma u Yehova una tese ior nav erdoo.” (Luka 4:16-19) Yesu yange kure kwaghôron u profeti la nena?

IOR MBA I HII PASEN VE KEN UIKYANGEN LA

Yesu ngu yôôn ken shinagoge u ken Nasareti ér á pase mba ve lu uikyangen la (Nenge ikyumhiange i sha 8-9)

9. Ka ikyangenev mbi nyi ior kpishi sha ayange a Yesu la lu henen ér vea due ker kera?

9 Sha ayange a Yesu la, ior hii u duen ken kpan shin ikyangenev mbi Yesaia tsenga ôron shi Yesu kpa va ôr kwagh u mbi la. Se fatyô u nan jighjigh a kwagh ne sha ci u Yesu yange yôô ér: “Kwaghôron u ruamabera u ne ongo hegen ne kure nyian.” (Luka 4:21) Ior kpishi mba yange ve ungwa kwagh u Yesu ôr la lu henen ér ka u vea kera lu sha ikyev i Mbaroma ga. Alaghga lu ve ken ishima er iorov uhar mbagen mba yange ve kaa ér: “Se lu veren ishima ser ka or ne una yima Iserael ye” la nahan. (Luka 24:13, 21) Kpa er u fe nahan, mayange Yesu kaa a mbadondon un ér ve hendan a hemen u Mbaroma u u lu kighir ve la ga. Kpa a kaa a ve ér ve naan “Shisar akaa a a  lu a Shisar” yô. (Mat. 22:21) Nahan Yesu yange sagh ior ken uikyangen sha shie la nena?

10. Ka ikyangenev mbi nyi Yesu wase ior u duen ker kera?

10 Wan u Aôndo yange va sha u saghen ior ken uikyangen shin duen a ve ken kpan sha igbenda ihiar. Hiihii yô, Yesu wase ior due a ve ken atesen a aiegh a mbahemenev mba kwaghaôndo kange ve ker la. Mbayuda kpishi sha ayange la lu ikpan i aeren a ityôô kua atesen a aiegh a i kighir ve ér ve dondo la. (Mat. 5:31-37; 15:1-11) Mba yange ve senge ér mba tesen ior u civir Aôndo la gema lu civir Aôndo sha mimi ga, nahan ve lu er mbaapirashe nahan. Ior mban yange ve venda Mesiya, shi ve venda mimi u lu tesen ve la, nahan ve fatyô u fan Aôndo ga. Ve lu er mbaapirashe nahan, shi ve lu a asorabo a ve her. (Yoh. 9:1, 14-16, 35-41) Er Yesu lu tesen ior mimi shi veren ve ikyav i dedoo yô, yange wase mbaasemaamimi u kaven er vea fatyô u duen ken ikyangenev mbi atesen a aiegh la kera yô.—Mar. 1:22; 2:23–3:5.

11. Gbenda u sha uhar u Yesu due a ior ken uikyangen yô lu nyi?

11 Gbenda u sha uhar u Yesu yange due a ior ken uikyangen shin ken kpan kera yô, lu u saghen ve sha ikyev i isholibo kera. Er Yesu na uma na hingir ipaan yô, lu u Yehova una fatyô u den ior asorabo aluer ve na nagh kura jighjigh shi ve tese jighjigh shon sha ieren ve yô. (Heb. 10:12-18) Yesu yange kaa ér: “Sha nahan yô, aluer Wan pase ne, ne kera mba uikyangen ga yô, mimi je ne kera lu ikpan ga.” (Yoh. 8:36) Mlu u ken uikyangen ga ne hemba u yange or zua a mi ken inyom i Jubili i Mbaiserael la! U tesen ikyav yô, yange a pase or ken inyom i Jubili la kpa i lu u shi nana fatyô u hiden lun kpan, shi i lu u ken masejime yô, nana va kpe. Kpa aluer Yesu pase or yô, mayange nana kera hide a lu ken uikyangen ga.

12. Ka unô yange ve hii zuan a mtsera ken mlu u ken uikyangen ga u Yesu yôô laa?

12 Sha iyange i Pentekosti u ken inyom i 33 la, Yehova shighe mbaapostoli kua nomso man kasev mba jighjigh mkurem shin tsegha ve sha icighan jijingi. Yange yam ve, ve hingir ônov nav sha er ken hemen yô, una nder ve vea za hemen sha vea Yesu yô. (Rom. 8:2, 15-17) Ka ior mban yange ve lu mba hiihii mba zuan a mlu u ken uikyangen ga u Yesu yôô ken shinagoge u ken Nasareti la ye. Nomso man kasev mban kera lu ikpan i atesen a aiegh a mbahemenev mba kwaghaôndo u Mbayuda kua aeren a ve a ityôô a ruamabera venda la ga. Shi sha ishigh ki Aôndo yô, i sagh  ve sha ikyev i isholibo kera; man ka isholibo i ne se kpen ye. Jubili i Mbakristu la yange i hii ken inyom i 33, shie u i shighe mbadondon Kristu mkurem la, zan zan ia va bee zum u Hemen u Yesu u Anyom Dubu la ua kure la. Kpa ka akaa a dedoo a nyi nahan aa er hegen zan zan shie u mkur u hemen u Yesu la?

A SAGH IOR UMILIÔN IMÔNGO KEN UIKYANGEN KERA

13-14. Dugh Mbakristu mba i shigh ve mkurem la sha yô, shi ka unô vea zua a mlu u ken uikyangen ga u Yesu yôô laa?

13 Nyian ne mbaasemaamimi umiliôn imôngo mba ve dugh ken akuraior a sha won cii la, ka mba ken “iyôngo igen.” (Yoh. 10:16) Aôndo yila ve ér ve za hemen sha vea Yesu ga. Kpa mba a ishimaverenkeghen i va lun uma gbem sha won shin tar er Bibilo i tese nahan. Ka kwagh u we kpa u lu veren ashe keghen laa?

14 Hegen je kpa u ngu zuan a mbamtsera mbagen mba ior mba i shigh ve mkurem ve lu zuan a mi la. Aluer u na nagh ku Yesu kura jighjigh yô, u fatyô u sônon Aôndo wer a de u asorabo ou. Kwagh ne una na yô, Aôndo una lumun we shi u lu a imoshima i wang sha ishigh nagh. (Ef. 1:7; Mpa. 7:14, 15) Shi hen ase sha averen a u zough a mi er i sagh u ken ikyangenev mbi atesen a aiegh a yange u na jighjigh a mi shie lihe la. Yesu kaa ér: “Ne fa mimi, nahan mimi una pase ne, ne kera lu uikyangen ga.” (Yoh. 8:32) Doo se kpishi er se kera lu ken uikyangen ga yô!

15. Ka averen a nyi se fatyô u veren ishima u va zuan a mi ken hemene?

 15 U fatyô u veren ashe keghen shie u ú va hemba lun ken uikyangen ga cii yô. Ica a gba ga je, Yesu una tim kwaghaôndo u aiegh kua gomoti u uumace u a we ifer yum ne. Aôndo una kura “zegeikpelaior” i i lu civir un la, maa una na ve ian i zuan a averen ken paradiso shin tar. (Mpa. 7:9, 14) A nder ior kpishi shin ku shi vea lu a ian i a sagh ve ken ikyangenev mbi hanma kwagh u a tseren ve sha ci u isholibo i Adam i ve ye dyako u i la yô.—Aer. 24:15.

16. Ka mlu u ken uikyangen ga u hemban cii u nyi uumace vea va lu ker ken hemene?

16 Sha shie u Hemen u Kristu u Anyom Dubu la, Yesu kua ior mba vea lu hemen vea na imôngo la vea wase uumace vea hide a lu gbong gbong shi vea ya ikyar i dedoo vea Aôndo. Shie la una lu er inyom i Jubili i ken Iserael la nahan. Hen shie la, hanma or u nan civir Yehova sha mimi cii nana hingir vough a isholibo shio.

Ken tar u he la, a saan se iyol u eren tom u injaa kua u nan se mkom (Nenge ikyumhiange i sha 17)

17. Yesaia 65:21-23 tsenga ôron ér nyi sha kwagh u ior mba Aôndo? (Nenge foto u a lu sha igbende la.)

17 Yesaia 65:21-23 tsenga ôron er uma una va lu shin tar ken hemen yô. (Ôr.) Shie la kpa a lu kwagh u nderen teman a tema shin eren hwev ga. Bibilo tese ér ior mba Aôndo vea lu a ityom i injaa i nan ve msaanyol i vea lu eren hen shie la yô. Anyom dubu la aa been yô, se mba a vangertiôr ser ‘a pase akaa a i gbe a la, aa kera lu ikpan i iyol i i hôôn ne ga, kpa aa lu sha ian i icivirigh i ônov mba Aôndo mba i pase ve, ve kera lu uikyangen ga yô.’—Rom. 8:21.

18. Se mba a vangertiôr ser se va nyôr ken mlu u doon tsung ken hemen sha ci u nyi?

18 Er Yehova yange tese Mbaiserael er i doo u vea eren tom shi vea memen vough vough nahan, kape ior nav kpa una er a ve shie u Hemen u Kristu u Anyom Dubu la je la. Vea lu a shie u eren akaa a ken jijingi hange hange. Ka sea civir Aôndo nyian yô, i saan se iyol, nahan ken tar u he la kpa se za hemen u lun a shie u civir Aôndo. Sha mimi yô, a va saan uumace cii iyol sha shie u Hemen u Kristu u Anyom Dubu la, sha ci u se cii se lu eren tom u nan se msaanyol man mkom, shi se cii se lu civir Aôndo.

ICAM 142 Kôr Ave sha Ishimaverenkeghen Yase La

^ par. 5 Sha ayange a Mbaiserael la, Yehova er kwagh ugen sha er Oriserael nana lu ken kpan gbem sha won ga yô. I yilan kwagh ne ér Jubili. Mbakristu mba sha ikyev i Tindi u Mose la ga, nahan kpa doo u se time sha kwagh u Jubili la. Ken ngeren ne, se lu nengen er Jubili i sha ayange a Mbaiserael la i umbur se kwagh ugen u Yehova a er sha ci wase, kua er kwagh shon una wase se yô.

^ par. 61 NGEREN U PASEN FOTO: Yange a nyôron ken inyom i Jubili yô, i pase ior mba ve lu ikpan la, nahan ve hide ve za kohol icombor ve shi i hide ve a inya ve kpaa.