Aver yem sha atineakaa

Aver yem sha mver u atineakaa

De Atindiakaa a Aôndo kua Akaawan a Na A Tsaase Imoshima You

De Atindiakaa a Aôndo kua Akaawan a Na A Tsaase Imoshima You

“Atindiakaa a Ou, doom ishima zee! Kam kwagh u shin henen sha mi didi.”—PS. 119:97.

ATSAM: 127, 88

1. Ka nyi kwagh i ne se hembe annyameve?

KWAGH môm u a ne ve uumace ve hembe annyamev yô, uumace mba a imoshima. Hii shighe u i gba orumace sha tar hiihii la je kwagh lu nahan. Shighe u Adam man Ifa per tindi u Yehova la, ve za yer. Kwagh ne tese ér imoshima ve lu zan ve iyol.

2. Imoshima yase ia fatyô u lun er sitialin u kôôm kwaghhendan nahan nena? (Nenge foto u a lu sha mhii u ngeren ne la.)

2 A fatyô u tôôn mba ve lu a imoshima i i tsaase i tsembelee ga la karen sha tso u sitialin u kôôm un a doo ga yô. Aluer u tôô tso u sitialin na a doo ga u ngu yemen zende a mi yô, kwagh a fatyô u za tseren we. Ahumbe man yuhwa i mnger ia fatyô u daase a mi za tan ica. Kpa aluer sitialin ngu a zayol ga yô, ornahan tso nana fatyô u kôôm tso shon tsembelee. Se fatyô u tôôn imoshima yase ser ka sitialin wase. Imoshima ne ka mfe u se lu a mi u fan kwaghbo man kwagh u dedoo, u ngu a wase se u eren kwagh u vough yô. Nahan cii kpa, saa se tsaase imoshima yase ne ve, ia kôôm se tsembelee ye.

3. Shighe u or tsaase imoshima i nan sha inja ga yô, ka nyi ia fatyô u duen kere?

 3 Or ka nana tsaase imoshima i nan tsembelee ga yô, ngi te nan icin sha u yangen nan u za eren iferkwagh ga. (1 Tim. 4:1, 2) Imba imoshima ne nahan ia fatyô u bumen se ér “ifer [ka] kwagh u dedoo.” (Yes. 5:20) Yesu yange ta mbadondon un icin ér: “Shighe ngu van je u hanma or u nana wua ne yô, nana hen er nan ngu eren tom u civir Aôndo.” (Yoh. 16:2) Kape mba yange ve wua orhenen Sefanu kpa ve hen je la, shi kape anza a ior ne agen kpa a henen je la. (Aer. 6:8, 12; 7:54-60) Kpa gema nenge ase aferakaa a ve a vihin tsung, er u wuan ior nahan la. Kwagh ne tese ér ior mba ve eren ipila ken iti i kwaghaôndo la ka ve de ve peren atindi a Aôndo shon u ve senge ér mba civir la! (Eks. 20:13) Kwagh ne tese wang ér imoshima ve ngi kôôm ve sha gbenda u vough ga!

4. Se er a imoshima yase nena ve ia eren tom sha injaa?

4 Kpa se er a imoshima yase nena ve ia eren tom sha injaa? Atindi man akaawan a a lu ken Mkaanem ma Aôndo la nga “a inja sha ityesen man sha mkôôm man sha myange man sha myese u ken perapera kpaa.” (2 Tim. 3:16) Nahan, aluer se mba henen Bibilo zulee shi gbidyen kwar sha kwagh u i ôr la, shi se mba dondon kwagh shon ken uma wase yô, se fatyô u tsaase imoshima yase u kaven gbenda u Aôndo a henen kwagh la fese, shi ia fatyô u kôôm se sha inja kpaa. De se nenge ase er atindi a Yehova kua akaawan a na aa wase se u tsaase imoshima yase yô.

DE ATINDI A AÔNDO A TSAASE WE

5, 6. Ka se zua a mtsera sha u dondon atindi a Aôndo nena?

5 Cii ve se zua a mtsera ken atindi a Aôndo yô, gba u se er kwagh a hemba di u ôron a shin fan a tseegh la. Gba u aa za hemen u doon se ishima shi se naan a icivir. Mkaanem ma Aôndo kaa ér: “Kôr nen kwaghbo ihom man kwaghdedoo a̱ doo ne ishima.” (Amo. 5:15) Kpa se er kwagh ne nena? Kwagh u vesen yô ka u nengen akaa er Yehova kpa a nengen la. Ikyav i tesen yô, tôô wer u ngu fantyô u yaven tsembelee ga. Nahan ortwer kaa ér u gema yan kwaghyan u injaa shi u eren anumbe kpoghuloo shi u de u eren akaa agen. U za karen akaa ne yô, a wase u! Ka keng u wuese ortwer wou la kpishi er a wase u sha zayol wou, nahan i hemba kpen we iyol yô.

6 Se kpa Orgban se na se atindi a a fatyô u kuran se sha akaavihin a isholibo ka i va a mi la, sha er a kpe se iyol yô. Hen ase er ka sea dondo atindiakaa a Bibilo sha kwagh u aie u eren man mbamhen mba bov man iv kua ijimba i eren man ipila kua ahir a eren ve kwagh shon a wase se yô. (Ôr Anzaakaa 6:16-19; Mpa. 21:8) Ka sea eren kwagh u Yehova a soo la man sea nenge mbamtsera mba se lu zuan a mi yô, Yehova a seer doon se ishima kua atindi a na.

7. Aluer se mba ôron akaa a yange er ior mba i nger kwagh ve ken Bibilo la shi gbidyen kwar sha mi yô, kwagh la una wase se u eren nyi?

7 Kwagh er doo yô, saa se per atindi a Aôndo, kwagh a hingir u tseren se cii ve se hen kwaghfan ga. Se fatyô u henen kwagh ken akaa a yange er mbagenev mba i nger asorabo a ve ken Mkaanem ma Aôndo la. Anzaakaa 1:5 kaa ér: ‘Orfankwagh ka nan ungwa nan seer mhen.’ Sha mimi yô, Aôndo ngu nan se ityesen i hemban doon cii. Ka sea ôr kwagh u ior mba i nger kwagh ve ken Bibilo la shi sea gbidye kwar sha mi yô, se hen kwagh ker. Ikyav i tesen yô, hen ase sha kwagh u yange tser Tor Davidi zum u per tindi u Yehova, er idya a Batesheba la. (2 Sam. 12:7-14) Zum u se lu ôron kwagh u Davidi ne shi gbidyen kwar sha mi yô, se fatyô u pinen ayol a ase ser: ‘Tor Davidi yange ma palegh kwagh u va hingir u tseren un sha ci u idya i er a Batesheba la nena? Aluer m tagher a imeen ne nahan, me fatyô u lun a  agee a palegh i kpa? Me fatyô u yevese er Yosev nahan je kpa, shin me gba ker er Davidi nahana?’ (Gen. 39:11-15) Aluer se gbidye kwar sha akaavihin a isholibo ia na aa fatyô u tseren se la yô, se seer kangen ishima u ‘kôron kwaghbo ihyom.’

8, 9. (a) Imoshima yase ka i wase se u eren nyi? (b) Imoshima yase ngi eren tom imôngo vea akaawan a Yehova nena?

8 Alaghga ka se palegh akaa a Yehova a ker a ihyom la, se mba ze ikyua a mi ga. Nahan cii kpa, akaa agen nga a se eren ken uma wase a Bibilo i we tindi sha mi jighilii ga yô. Shighe u kwagh a lu nahan yô, se er nan ve se fa kwagh u a doo Aôndo shi a lumun a mi? Ka hen ishiva ne ka i gba u se er tom a imoshima yase i Bibilo i tsaase i la tsembelee ye.

9 Yehova na se akaawan sha dooshima a a eren tom vea imoshima yase i Bibilo i tsaase i la yô. Aôndo iyol na kaa ér: “Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la.” (Yes. 48:17, 18) Aluer se na ishima yase kua mhen wase cii sha u gbidyen kwar sha akaawan a Bibilo yô, aa kôôm shi aa hemen shi aa maa imoshima yase. Kwagh ne di una gema a wase se u tsuan akaa sha kwaghfan.

DE AKAAWAN A AÔNDO A HEMEN WE

10. Kwaghwan ka nyi, man Yesu yange a er tom a akaawan ken ityesen na sha inja nena?

10 Kwaghwan ka mimi u injaa shin ma tindi gayô adini u ka i er tom a mi u henen sha kwagh shin eren kwagh yô. Cii man se kav ma kwaghwan yô, gba u se kav mnenge u Orwan se atindi la kpaa kua atôakyaa a a ne ve a we atindi agen yô. Shighe u Yesu lu eren tom na la, yange tesen akaa a mimi a a wase mbahenen nav u kaven kwagh u una fatyô u duen ken anza shin aeren agen yô. U tesen ikyav yô, yange tese ér u wan kwagh ishima a or la una fatyô u mgbeghan or u eren ipila shi pase ér ieren i or tômon kwagh u a lu u nan ga la, ia fatyô u mgbeghan or za eren idya. (Mat. 5:21, 22, 27, 28) Aluer se de ser akaawan a Aôndo a hemen se yô, kwagh la una wase se u lun a imoshima i i tsaase i tsema tsema yô. Se er nahan yô, se va Aôndo a icivir.—1 Kor. 10:31.

Orkristu u nan vie ken jijingi yô, ka nan wa imoshima i mbagen ikyo (Nenge ikyumhiange i sha 11, 12)

11. Imoshima i or ia fatyô u kahan a i orgen nena?

11 Nahan kpa sha akaa agen di yô, Mbakristu uhar mba Bibilo i tsaase imoshima ve je kpa, vea kure ikyaa sha mi kposo kposo. Nenge ase ikyav sha kwagh u ikyôhô i man. Bibilo yange msôrom ma man akuma akuma ga. Nahan kpa, i gema i ta icin sha msôrom ma man za karen ikyaa inya kua ihyundugh ki msôrough. (Anz. 20:1; 1 Tim. 3:8) Nahan kwagh la tese ér, aluer Orkristu ngu man msôrom akuma akuma yô, kwagh ugen kera ngu u nana gbidye kwar sha mi sha kwagh u msôr gaa? Kwagh ngu. Er alaghga ishima ia na nan ibo ga nahan kpa, gba u nana wa imoshima i mbagen ikyo.

12. Mkaanem ma i er ken Mbaromanu 14:21 la, ma a mgbegha se u wan imoshima i mbagen ikyo nena?

12 Paulu yange nger kwagh u tesen er i gbe u Orkristu nana wa ikyo sha kwagh u imoshima i mbagen yô. A nger ér: “Doo u yan inyam ga, shin u man msôrom kpaa ga, shin u eren nyityô kwagh i nan anmgbian wou anzughul la kpaa ga.” (Rom. 14:21) Aluer imoshima you na u ian i eren ma kwagh, man ka kwagh u una na anmgbian ugen gbeev mbu nôngon sha ci u imoshima i nan kaha a i you nahan, u kegh iyol u den kwagh shon kpa? Akperan nga ga, u de. Cii man anmgbianev asev mbagen va fa mimi ne yô, yange ve lu mba hunden msôrom shin man msôrom karen ikyaa inya. Kpa hegen ne ve kange ishima ér vea palegh msôrom kuaa. Sha nahan yô, mô wase nana soo u nan imba anmgbian la ér nana hide a yem eren kwagh u una vihi mlu u nan ga cii! (1 Kor. 6:9, 10) Nahan aluer or lôhô anmgbian hen ya u nan man anmgbian shon venda u man msôrom  yô, doo u nana zer tuur nan ahumbe ityô ér nana ma msôrom ga.

13. Timoteu yange ver ikyav i dedoo sha er una wase mbagenev ve ungwa loho u Tartor nena?

13 Shighe u a shi nan kpa Timoteu lu gumor u hemba di anyom 20 kpuaa la; a tsôngo sha er una lu kwagh u nan Mbayuda gbeev mbu nôngon ga yô. Man icôngo i sha anyom ne yange ia nyoon tsung. Ieren na ne zua sha ieren i apostoli Paulu la. (Aer. 16:3; 1 Kor. 9:19-23) We u kegh iyol u den shin eren akaa agen sha ci u iwasen i mbagenev er Timoteu nahan kpa?

“ZA . . . HEMEN SHA MLU U VIAN LA”

14, 15. (a) U er nena ve u via ken Jijingi? (b) Mbakristu mba ve vie ken jijingi mba eren kwagh a mbagen nena?

14 Gba u Mbakristu cii vea soo u saan sha “kwaghôron u hiihii u sha kwagh u Kristu” la ga, kpa doo u vea “za . . . hemen sha mlu u vian la.” (Heb. 6:1) Aluer se tsa ken mimi anyom ngee tsô maa tese ér se hingir Mbakristu mba vian ken jijingi ga. Gba u se nôngo kwagh kpoghuloo. Gba u se seer mfe man mkav wase. Ka nahan ve ka i shi taver se ishima ér se ôron ivur Bibilo hanma iyange ye. (Ps. 1:1-3) We u sôr shighe u ver u eren nahan vee? Aluer u ngu eren nahan yô, u hemba fan atindi a Yehova kua akaawan a na shi u seer kaven Mkaanem ma Aôndo zan shimi.

15 Tindi u tamen u i we Mbakristu yô, ka tindi u dooshima. Yesu yange kaa a mbahenen nav ér: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yoh. 13:35) Yakobu u lu anngô u Yesu la yange kaa ér, dooshima ka “tindi u tartor.” (Yak. 2:8) Paulu di kaa ér: “Kwagh u atindi a kur sha mi vough yô, ka dooshima.” (Rom. 13:10) I ôr kwagh u dooshima var var nahan kpa kpiligh se iyol ga sha ci u Bibilo kaa a vese ér, “Aôndo ka dooshima je.” (1 Yoh. 4:8) Hen Aôndo yô, dooshima ka di mlu u ken ishima tsô ga. Yohane yange nger ér: “Ka sha kwagh ne man i pasen dooshima u se doo Aôndo ishima la ye, er Aôndo tindi Wan Na u môm môm shin tar, sha u se̱ lu uma sha a Na.” (1 Yoh. 4:9) Dooshima u Aôndo la yange mgbegha un u eren kwagh. Ka sea tese ser Yehova man Wan na doo se ishima shi anmgbianev asev mba ken Kristu kpa doo se ishima shi sea tese ser ior cii doo se ishima yô, kwagh la a tese wang ér se mba Mbakristu mba ve vie ken jijingi yô.—Mat. 22:37-39.

Ka sea gbidyen kwar sha akaawan a Aôndo yô, imoshima yase i hemba kôôm se sha inja (Nenge ikyumhiange i sha 16)

16. Ka sea hingir Mbakristu mba vian yô, er nan akaawan ka a hemba gban se kwagh ciili?

 16 Ka sea hingir Mbakristu mba vian ken jijingi yô, akaawan a hemban gban se kwagh cii. Kwagh ka a lu nahan sha ci u atindi yô, ka i wa a sha ci u ma ityôkyaa jighilii; kpa akaawan yô, ka i er tom a mi sha akaa kpishi. Ikyav i tesen yô, wanye u kiriki nana kav kwaghbo u una fatyô u tseren nan aluer nan ngu a azende a bo la ga, nahan ormaren u kaven kwagh nana wa atindi sha u kuran nan. (1 Kor. 15:33) Kpa er wanye shon nan lu vesen tsoghor la, kwaghfan u nan kpa una lu seer shi nana hen u gbidyen kwar sha akaawan a Bibilo kpaa. Sha nahan yô, nana hemba eren kwagh sha kwaghfan shighe u nan lu tsuan azende yô. (Ôr 1 Mbakorinte 13:11; 14:20.) Ka sea gbidyen kwar sha akaawan a Aôndo yô, imoshima yase i hemba kôôm se sha inja shi i wase se u fan kwagh u Aôndo una soo ér se er hen ma ian yô.

17. Er nan ve se fatyô u kaan ser se mba a kwagh u una wase se u tsuan akaa sha kwaghfana?

17 Se mba a hanma kwagh u una wase se u tsuan akaa a injaa a a na a saan Yehova iyol yôô? Een, se mba a mi. Aluer se mba eren tom a atindi man akaawan a ken Mkaanem ma Aôndo la tsema tsema yô, aa wase se, se “kuma [se] lu a agoyol sha ci u hanma tom u dedoo.” (2 Tim. 3:16, 17) Nahan yô, keren akaawan a ken Ruamabera sha er u ‘kav er ishima i Ter i lu yô.’ (Ef. 5:17) Eren tom a ikyav mbi tomough mbi se zough a mi sha ikyev i tiônnongo u Kristu la, er Takerada u Tôvon sha Kwagh ú Mbashiada mba Yehova man Watchtower Library man IJIIR I Watchtower a KOSON ITYAKERADA SHA INTANET YÔ man JW Library app nahan. I er akaa ne ér a wase se u henen kwagh sha tseeneke wase shin hen tsombor sha gbenda u kwaghhenen shon una hemba lun se a iwasen yô.

ALUER SE DE BIBILO TSAASE IMOSHIMA YASE YÔ, SE ZUA A AVEREN

18. Ka sea dondon atindi a Yehova kua akaawan a na yô, se zua a averen a nyi?

18 Ka sea kuran atindi a Yehova shi sea dondon akaawan a na yô se zua a averen er i pase ken Pasalmi 119:97-100 nahan. Bibilo kaa her ér: “Atindiakaa a Ou, doom ishima zee! Kam kwagh u shin henen sha mi didi. Atindi a Ou nam m hemba mbaihomov av kwaghfan, gadia a nga a mo gbem je. M hemba kaven kwagh a mbatesen av cii, gadia mbampase Ou mbam kwagh u henen sha mi. M hemba kaven kwagh a mbabeenyol, sha ci u m kor uiniezwa Ou yô.” Aluer se mba tôôn shighe “henen” sha atindi a Aôndo kua akaawan a na yô, se seer fan u eren kwagh sha inja kua sha kwaghfan man mkav kpaa. Aluer se de ser atindi a Aôndo man akaawan a na a tsaase imoshima yase yô, se ar sha ‘ikyaren i mluyol u m-iv u Kristu’ la.—Eph. 4:13.