Aver yem sha atineakaa

Aver yem sha mver u atineakaa

Fa Orihyom Wou

Fa Orihyom Wou

“Se kera lan ayom a [Satan] ga.”—2 KOR. 2:11.

ATSAM: 150, 32

1. Ka nyi Yehova pase sha kwagh u orihyom wase ken sule u Eden?

ADAM yange fa dedoo er iyô ia fatyô u lamen ga yô. Nahan alaghga kure ikyaa ér ka ma jijingi, a nyôr ken iyô, a lam a Ifa ye. (Gen. 3:1-6) Adam man ifa cii yange ve fa kwagh môm sha kwagh u jijingi ne ga. Nahan kpa, Adam tsua kwagh u tese ér un gema ijime a Ter na u Sha u dooshima la yô. A dondo jijingi ne sha u hendan a Aôndo. (1 Tim. 2:14) Her ave ave je, Yehova hii u pasen kwagh u orihyom u ken jijingi u va tsugh Adam man Ifa ne, shi tôndo zwa ér una va tim un ken hemen. Heela tseegh ga, Yehova kaa ér, shighe a karen yô, jijingi u nyôr ken iyô lam a Ifa ne una lu a tahav mbu tan num sha ior mba Aôndo a doo ve ishima yô.—Gen. 3:15.

2, 3. Alaghga tsô lu nyi i na ve i ôr kwagh u Satan kpuaa tseegh, shighe u Mesiya lu a va ga laa?

2 Yehova yange er kwagh sha kwaghfan. A ôr se iti i ortyom u va hemba un ato ne ga. * Cuku tsô kpa ôr kwagh u iti igen i a fatyô u yilan orihyom ne sha mi ga zan zan anyom kar kuma 2,500 nahan. (Yobu 1:6) Bee kera yô, i ter iti i Satan i inja na i lu “Orhendankwagh” la ken ityakerada itiar tseegh ken Ruamabera u ken zwa Heberu la. Ka 1 Kroniku man Yobu kua  Sekaria. Er nan ve yange i ôr kwagh u orihyom wase ne kpuaa tseegh shighe u Mesiya lu a va ga laa?

3 Ikyav tese ér, Yehova yange ôr kwagh u Satan man ityom na ken Ruamabera u ken Zwa Heberu la kpishi ga sha ci u soo ér ior ve na ishima sha kwagh na ga. Awashima na u ngeren Ruamabera ne yô, lu u wasen ior nav u kaven Mesiya shi dondon un. (Luka 24:44; Gal. 3:24) Mesiya ve yô, awashima la kure. Nahan Yehova er tom a Yesu man mbahenen nav u seer pasen se akaa a se fe sha kwagh u Satan man mbatyomov mba ve dondo un la. * Kwagh la maa zua kpian, sha ci u ka Yesu kua mba i shigh ve mkurem mba vea za hemen vea a na la Yehova una er tom a ve u timin Satan man mba ve dondo un la cii ye.—Rom. 16:20; Mpa. 17:14; 20:10.

4. Doo u ishima a nyian se sha kwagh u Diabolo a za kar ikyaa inya ga sha ci u nyi?

4 Apostoli Peteru ôr kwagh u Satan Diabolo ér ka “begha u tan kume.” Yohane di yila un ér ka “tseyô” man “darakon.” (1 Pet. 5:8; Mpa. 12:9) Kpa ityôkyaa ngi i ishima a yem nyian se sha kwagh u Diabolo ga, tahav nav mbu a ikighir. (Ôr Yakobu 4:7.) Yehova man Yesu man mbatyomov mba kuran se. Sha iwasen ve yô, se fatyô u hemban orihyom wase ne. Nahan kpa, doo u se zua a mlumun sha mbampin mba utar mba vesen mban: Satan ngu a tahav kuma nena? Satan ka a nôngo ér una tsume a ior nena? Man ka nyi kwagh una fatyô u eren ga? De ase se na mlumun sha mbampin mban nahan se nenge kwagh u se fatyô u henen ker la.

SATAN NGU A TAHAV KUMA NENA?

5, 6. Ugomoti mba uumace vea fatyô u eren akaa a hange hange a kwagh a gbe uumace a mi la ga, sha ci u nyi?

5 Mbatyomov mbagen yange ve dondo Satan ken ihyembeato na la. Sha ayange a Noa la, Satan mee mbatyomov mban mbagen ve va er idya a kasev shin tar. Bibilo pase mimi u kwagh ne ér shighe u darakon gba la, a kombor tiôn môm ken atôôn atar a asan a sha Aôndo haa shin inya. (Gen. 6:1-4; Yuda 6; Mpa. 12:3, 4) Shighe u mbatyomov mbara undu tsombor u Aôndo la, ve gema ayol a ve ve wa sha ikyev i Satan. Heela tseegh ga, mbahembanato mban ka di ikpelaior i eren ayôôso tsô ga. Satan ver Tartor na er Tartor u Aôndo kpa u lu nahan, u a lu tor ker yô. A ver azôv sha ityom vough vough, a na ve tahav mbu hemen, ve hingir mbahemenev mba tar ne.—Ef. 6:12.

Satan ngu eren tom a nongo na ne sha u hemen ugomoti mba uumace sha won cii. Kwagh ne ka kwagh u ken myer ga. Satan yange tese Yesu “ityartor i sha won cii,” maa a kaa ér: “Me na U tahav mbun cii kua icivir i mbu kpaa gadia i nam mbu sha ikev; ka m na hanma or u i lum pe nan nan” cii. (Luka 4:5, 6) Er Satan a nzughul a ugomoti kpishi nahan kpa, ugomoti mbagenev ka ve er akaa a dedoo sha ci u ior vev. Shi alaghga mbahemenev mbagen vea lu a awashima u injaa ase je. Kpa or môm shin gomoti u uumace môm una fatyô u eren uumace akaa a a gbe ve la ga.—Ps. 146:3, 4; Mpa. 12:12.

7. Dugh ugomoti sha yô, Satan ngu eren tom a kwaghaôndo u aiegh man kpenga nena? (Nenge foto u a lu sha mhii u ngeren ne la.)

7 Dugh ugomoti sha yô, Satan man azôv na shi mba eren tom a kwaghaôndo u aiegh man kpenga u eren sha u tsumen a ior mba sha ‘tar cii.’ (Mpa. 12:9) Satan ka a er tom a kwaghaôndo u aiegh u samber a aie sha iyol i Yehova. Satan shi kange ishima ér una na ior ve hungur a iti i Aôndo. (Yer. 23:26, 27) Kwagh la na yô, i tsugh mbaasemaamimi mbagen ve hen ér mba civir Aôndo; kpa jighilii yô, ka azôv ve lu civir ye. (1 Kor. 10:20; 2 Kor. 11:13-15) Satan shi ngu samber a aie ken kpenga u eren. Ikyav i  tesen yô, ka i shi kaan a ior ér, saa vea ker inyaregh shi vea lu a akaa kpishi ve a saan ve iyol sha mimi ye. (Anz. 18:11) Mba ve ne jighjigh a aie ne yô, kwagh gba ve u civir Aôndo sha gbashima ga, ve na uma ve cii sha u eren “inyaregh” tom. (Mat. 6:24) Ken masejime yô, akaa a iyolough ka a doo ve ishima tsung, nahan Aôndo yange una doo ve ishima je kpa, dooshima u akaa a iyolough la a imbishi u Aôndo la.—Mat. 13:22; 1 Yoh. 2:15, 16.

8, 9. (a) Ka nyi se fatyô u henen ken kwagh u Adam man Ifa kua mbatyomov mba hemban ato laa? (b) Aluer se fa er Satan a lu a tahav i za kighir la yô, kwagh la una wase se nena?

8 Ikyav i Adam man Ifa kua mbatyomov mbahembanato la tese se akaa a injaa ahar. Hiihii yô, akaa nga ahar tseegh a i gbe u se tsua môm ker keng yô. Se tsua u tan ikyaa a Yehova, gayô lun ken vegher u Satan. (Mat. 7:13) Sha uhar yô, mba ve te ikyaa a Satan cii vea zua a mtsera kpuaa tseegh. Adam man Ifa yange ve zua a ian i tsuan kwagh u ve nenge ér ka u dedoo man u bo cii ayol a ve. Azôv di pande zua a ian i eren tahav sha ugomoti mba uumace. (Gen. 3:22) Nahan kpa, kwagh u ka a saa or zum u nan te ikyaa a Satan la ka a hemba nyityô mtsera u nan nenge ér nan ngu zuan a mi la cii.—Yobu 21:7-17; Gal. 6:7, 8.

9 Aluer se fa kwagh u tahav mbu Satan a lu a mi la yô, mfe la una wase se nena? Una wase se u fan er se eren kwagh a mbahemenev yô, shi una mgbegha se u eren tom wase u pasen kwagh la. Se fa wang je ser Yehova soo ér se naan mbahemenev mba gomoti icivir. (1 Pet. 2:17) Yehova shi soo ér, aluer atindi a gomoti hendan a atindi a na ga yô, se kuran a. (Rom. 13:1-4) Nahan kpa shi i wase se u kaven ér gba u se palegh u wan ave sha akaa a patii, mayange se hemba soon kwe patii ugen a ugen, shin ma orhemen ugen a ugen ga. (Yoh. 17:15, 16; 18:36) Er se nenge ser Satan ngu nôngon ér una vihi Aôndo iti shi una kighir iti na i Yehova la shin inya ior ve de fe i ga yô, ka se nôngo sha afatyô wase ser se tese mbagenev mimi sha kwagh u Aôndo wase. Ka yer se sha iti na man ka se kwagh u tan ihyagh a mi, shi se mba yer i gbar gbar. Se fa je ser, mtsera u ka se zua a mi sha u soon Un la, hemba mtsera u soon inyaregh shin akaa agen la ica je.—Yes. 43:10; 1 Tim. 6:6-10.

SATAN KA A NÔNGO ÉR UNA TSUME A IOR NENA?

10-12. (a) Alaghga tsô Satan yange hôn mbatyomov mbagenev nena ve kôr ve? (b) Ka nyi se fatyô u henen ken mbatyomov kpishi mba ve hembaato laa?

10 Satan ka a er tom a igbenda i una na ior ve er ishima na yô. Ikyav i tesen yô, ka a hôn ior sha kwagh u una mee ve a kôr, ve gema eren kwagh er un soo yô. Ashighe  agen di ka a nôngo ér una anger ve, ve er ishima na.

11 Nenge ase gbenda u Satan yange kar sha er una hôn ikpela i mbatyomov mbagenev la una kôr yô. A shi nan kpa, yange time sha kwagh ve shighe lihe cii ve mase meen ve ér ve ta ikyaa a na ye. Yange Satan kôr mbatyomov mban mbagenev sha hôn na la; nahan ve hingir u va eren ijimba a kasev, maren akôraior a yange nzughul a uumace yô. (Gen. 6:1-4) Alaghga Satan mee mbatyomov mba ve hemba ato mban a ian i vea zua a mi i va eren ijimba a kasev tsô ga, kpa alaghga shi tôndo zwa a ve ér, una va na ve tahav vea gema hemen uumace. Alaghga awashima na lu sha u van a anzughul sha ci u un u a lu ‘vor u kwase’ u i tôndo zwa ér ngu van la. (Gen. 3:15) Yange a lu nahan shin a lu ga kpa, Yehova va a Mngerem ma Deemee va bunde awashima u Satan la. Nahan iniôngon i Satan kua mbatyomov mba ve hemba ato la cii saa ishe sha shighe la.

Satan ngu a nôngo ér una mee se sha Ijimba i eren man Iyolmoron kua Kwagh u mbaimegh (Nenge ikyumhiange i sha 12, 13)

12 Ka nyi se fatyô u henen ken kwagh nee? Mayange doo u se hen ser se gande u Satan una mee se a nyôr a vese ken ijimba i eren shin iyolmoron ga. Mbatyomov mba yange ve kohol Satan ken ihyembeato la, yange ve er tom sha ishigh ki Aôndo anyom ngee gandeôron. Kpa hen imba ijiir i doon tsung ne je kpa, ve mbagenev ve de asaren a bo hingir u wan amishe ken asema ve. Se kpa alaghga se civir Yehova ken vegher u nongo na u shin tar ne shighe lihe; nahan kpa se kôr ityough ga yô, er se lu hen ijiir i wang i ken jijingi ne nahan kpa asaren a bo aa fatyô u wan amishe ken ishima yase. (1 Kor. 10:12) Nahan gba hange hange u se timen sha mlu u ishima yase, se palegh nyityô mhen u jimbagh cii shi se palegh ihyagh shin iyolmoron!—Gal. 5:26; ôr Mbakolose 3:5.

13. Ka hôn ugen u nyi Satan a lu eren tom a mi kpoghuloo, man se palegh hôn shon nena?

13 Kwagh ugen u Satan a hônon ior a mi yô, ka isharen i fan akaa a mbaimegh. Nyian ne, ka sha ikyev i kwaghaôndo u aiegh tseegh Satan a meen ior sha u ve lu a isharen i fan kwagh u azôv ga, ngu eren kwagh ne sha ikyev i ikyômpeni i eren akaa a nan ior msaanyol kpaa. Ufiim man ugyeem mba vidio kua akaa agen ka a na kwagh u ahir a eren a doo ior kpishi. Se er nan ve se palegh hôn nee? Mayange doo u se ver ishima ser nongo u Yehova u tindin se a ati a ufiim shin uvidio shin ambaakaa la nahan a a doo man a a doo ga ze. Gba u hanma wase nana tsaase imoshima i nan sha er ia zua sha atindiakaa a Aôndo yô. (Heb. 5:14) Nahan kpa, aluer se dondo kwaghwan u jijingi mgbegha apostoli Paulu wa ér, Aôndo a doo se ishima sha mimi, i de lu “sha imanger ga” la yô, se tsua akaa sha kwaghfan. (Rom. 12:9) Doo u se pine ayol a  ase ser: ‘Akaa a m tsua u eren sha u zuan a msaanyol la aa na a lu inja er m ngu or u wan imangere? Aluer ior mba m henen Bibilo a ve shin mba m sôron ve la nenge iemberyolough i m tsough ne nahan, vea nengem ér m eren sha kwagh u m pasen mbagen la kpa?’ Aluer ieren yase ngi zuan sha kwaghôron wase yô, a hemba taver u Satan a kôr se sha uhôn nav.—1 Yoh. 3:18.

Satan ngu a nôngo ér una anger se sha u tuur Gomoti ér a cir tom wase shi Mbayev mba se ze makeranta imôngo ve kighir se shi Ior mba hen tsombor ka ve hendan a vese (Nenge ikyumhiange i sha 14)

14. Alaghga Satan una nôngo ér una anger se nena, man se hendan a kwagh ne nena?

14 Ashighe agen Satan ka a kera hôn se ga; ka a nôngo ér una anger se sha er se de kera til sha mimi hen Yehova ga yô. Ikyav i tesen yô, una fatyô u tuur ugomoti ér ve cir tom wase u pasen kwagh la. Shin alaghga una tuur mba se eren tom shin se ze makeranta imôngo la ér ve naha se tar sha ci u sar se u dondon akaawan a Bibilo yum. (1 Pet. 4:4) Shi alaghga una tuur ior mba hen tsombor wase mba se ne ve icivir kpishi yô, vea kaa ér se de mbamkombo mba zan shin vea na ér iyol i kpe se. (Mat. 10:36) Zum u kwagh a lu nahan yô, se er nena? Hiihii yô, doo u se fa ken ishima ser gba u se tagher a ambaakaa ne; gadia Satan ngu num a vese. (Mpa. 2:10; 12:17) U dondon yô, doo u se fa kwagh u a ne ve Satan ngu a eren akaa ne la; sha ci u Satan kaa ér ka shighe u se tem kundu kundu tseegh se civir Yehova ye. A kaa ér aluer se tagher a ahendan yô, se gema ijime a Aôndo. (Yobu 1:9-11; 2:4, 5) U masen yô, doo u se suur sha Yehova ser a na se agee a wan ishima. Umbur wer mayange una kende se ga.—Heb. 13:5.

KA NYI SATAN UNA FATYÔ U EREN GA?

15. Satan una fatyô u kighir or ér nana er kwagh u nan soo u eren ga yôô? Ta iwanger.

15 Satan una fatyô u kighir or ér nana er kwagh u a lu sha ishima i nan ga ze. (Yak. 1:14) Mbagenev ka ve eren akaa aa zough sha awashima u Satan yô, kpa ve fa ga. Nahan kpa, ka vea va henen mimi kera yô, i gba u vea tsua or u vea civir yô. (Aer. 3:17; 17:30) Aluer se kange ishima ser se er ishima i Aôndo yô, Satan ngu a kwagh môm u eren se sha u vihin jighjigh wase ga.—Yobu 2:3; 27:5.

16, 17. (a) Ka nyi kwagh nahan Satan man azôv aa fatyô u eren ga? (b) Er nan i gbe u se cia u eren msen hen Yehova duen sha ga?

16 Satan man azôv vea fatyô u eren hanma kwagh cii ga. U tesen ikyav yô, ijiir i môm kpa Ruamabera tese ér vea fatyô u fan kwagh u or lu henen ken ishima ga. Ka Yehova man Yesu tseegh Bibilo i kaa ér mba a tahav mbu fan or kwagh ken ishima ye. (1 Sam. 16:7; Mar. 2:8) Nahan hide di sha kwagh u lamen shin eren msen duen sha la di ye? Gba u se cia Diabolo shin azôv sha ci u vea va ungwa mbamsen asev nahan vea wa uwegh sha mi? Mayange ga cii. Sha ci u nyi? Ityôkyaa yô, se mba cie u eren ityom i dedoo ken mcivir u Yehova sha ci u Diabolo una nenge yum ga. Sha nahan yô, gba u se cia u eren msen duen sha, sha ci u alaghga Satan una va ungwa yum ga. Jighilii je yô, Bibilo ôr akaa kpishi a a tese ér mbacivir Aôndo yange ve er msen due sha yô, man cuku tsô kpa ikyav tese ér yange ior mban cia ér alaghga Diabolo una ungwa ve yum ga. (1 Utor 8:22, 23; Yoh. 11:41, 42; Aer. 4:23, 24) Aluer se nôngo sha afatyô wase cii, kwaghôron wase kua ieren yase cii zua sha ishima i Aôndo yô, se fatyô u lun a vangertiôr ser Yehova una de ér Diabolo a er se kwagh u una uve a vese gbem sha won ga.—Ôr Pasalmi 34:7.

17 Doo u se fa orihyom wase, kpa gba u mayange se cia un ga. Er se yen nahan kpa Yehova ngu suen se, nahan se fatyô u hemban Satan. (1 Yoh. 2:14) Aluer se hendan a na yô, una yevese se. (Yak. 4:7; 1 Pet. 5:9) Ashighe agen ka agumaior je Satan ka a penda ve vanger yum ye. Nahan kpa, ka nyi jighilii agumaior aa er ve aa tile dông aa hendan a Diabolo? Ngeren u a dondo ne una na mlumun sha mpin la.

^ par. 2 Bibilo pase ati a mbatyomov mbagenev. (Mbaj. 13:18; Dan. 8:16; Luka 1:19; Mpa. 12:7) Er Yehova a ii hanma ishan iti yô (Ps. 147:4), se fatyô u kaan ser, ônov nav mba ve lu mbatyomov la cii mba a ati ve kpôô kpôô, kua u va hingir Satan la je kpaa.

^ par. 3 I ter iti i Satan la kwa 18 tseegh ken Ruamabera u ken Zwa Heberu, kpa Ruamabera u Mbakristu u ken Zwa Grika la yô, i ter i hemba kwa 30.