Aver yem sha atineakaa

Aver yem sha mver u atineakaa

Civir Yehova, ka Satan Ga

Civir Yehova, ka Satan Ga

Hanmô wase nan ngu a agee a tsuwan kwagh u nan soo yô. Ka u civir Yehova, ga yô u civir Satan kua shi azôv a na la. Se faityô u eren akaa la cica ga. U civir Yehova la tese kwaghfan!

Yehova Doo

Er se vande nengen nahan, ka i doo azôv kpishi u eren ior kwaghbo shi tsughun ve kpaa. Yehova yô ngu inja nahan ga. Uumace doo un ishima vough er ter ka nan soo ônov mba nan nahan. Un ne “hanma nagh ku dedoo man hanma iwua i vough kpaa.” (Yakobu 1:17) A yer uumace kwagh u doon môm ga, shin ạ hingir u kwagh a saa un je kpaa.—Mbaefese 2:4-7.

Yesu, Wan u Aôndo, yange tese dooshima na hen ior sha u been mbamnyoon vev

Hen ase sha akaa a Yesu, Wan u Aôndo yange va er shin tar ne la. A bugh mbaakondoato ato shi bugh mbaapirashe ashe. A war mbaamandev man mbaawanev kpaa. Shi lu zendan azôv shi lu waren ior sha hanma inja i mkpeiyol ga cii. Sha tahav mbu Aôndo yô, mbakpenev je kpaa Yesu lu nderen ve.—Mateu 9:32-35; 15:30, 31; Luka 7:11-15.

U tsughun se sha akaaôron a aiegh la yô, Aôndo pasen se akaa a mimi sha hanma shighe cii. Gadia un tsughun maor ga.—Numeri 23:19.

 Nyagh Ahôngorakaa a Eren

Vough er kwarkpereketange ka u kôr ji nahan, kape ior umilien kpishi i tsur ve taveraa sha icugh man atesen atô kposu kposu je la. Mba cie mbakpenev. Mba cie azôv. Ka ze ve iyol sha afan a i we ve la, kua uivande mba pasen, akpagher, kua akombu a yangen cii. I kange ve ken jighjigh u nan man atesen a ior a i we a imaagh sha aie u Diabolo Satan yô. Mbatomov mba Aôndo yô vé tile ca a akaahônon ne.

Yehova hemba Satan tahav ca je. Aluer u ngu civir Yehova yô, una kura u sha ikyev i azôv. (Yakobu 4:7) Mbalamen ishor cii vea lu a tahav sha we ga. Ikyav i tesen yô, ken tar u Najeriya ne, ior itiar mba ve eren twer u ageegh sha ityesen i mbatsav yô ve ker u wuan Orshiada u Yehova u venda u duen hen gar u genegh yô sha utsa. Mba fe ityô ga yô, môm ken a ve gba cian, tsô a za ayem hen Orshiada la, gba zamber.

Ior i Efese yange ve nande iyakerada ve i ahir cica cii

Aluer azôv nga zan we iyol yô, u faityô u yilan sha iti i Yehova man un kpaa una kura u. (Anzaakaa 18:10) Kpa sha er u zua a mkor u Aôndo yô, saa u vande been a hanmakwagh u a zough ityô sha tom u mbaimev kua azôv a civir la cii. Ka pe ngise mbacivir Yehova ken Efese yange ve er vough je la. Yange ve kohol itiakerada ve i sha tomahir la cii ve nande sha usu. (Aerenakaa 19:19, 20) Nyian kpaa mbacivir Aôndo yô ka keng saa vea er nahan. Tsenda ikyav mbi ahiriv yough mbila kera, kua akpagher, kua “ubende” mba kangen mbera, man iyangenev, shi itiakerada i ahir la kpaa, man hanmakwagh u á gbe á zough sha aeren a mbaimev cii.

 Civir Sha Mimi

Aluer wea soo u eren ishima i Aôndo yô, u duen ken mciviraôndo u aiegh la shi haan akaabo kera la tseegh kuma ga. Saa u tese ieren i civir sha mimi keng. Bibilo i tese kwagh u a lu hange hange yô:

Zaan mbamkohol mba Mbakristu.—Mbaheberu 10:24, 25

Timen ken Bibilo.—Yohane 17:3

Pasen mbagenev kpaa.—Mateu 24:14

Eren msen hen Yehova.—Mbafilipi 4:6, 7

Shi i er u batisema.—Aerenakaa 2:41

 Kohol a Mbashiada Mba Yehova

Satan kua azôv mba a ior sha tar mba ve tesen shi ve eren aferakaa yô. Yehova kpa ngu a ior nav. Ka Mbashiada Mba Yehova je la. (Yesaia 43:10) Tar sha won cii, Mbashiada ngee hemba milien unyiin. Ve cii mba nôgun sha gbashima u eren akaa a dedoo shi tesen ior mim. Ken ityar kpishi, u faityô u kohol a ve imôngu ken You i Henen Kwagh u Tartor la, shi ve kpaa vea ngohol we saan saan.

Tom ve ka u wasen mbagenev kpaa sha er vea civir Aôndo yô. Ka hen ya wou jim je vea za hen Bibilo a we ye, vea wase u sha er u hen u civir Yehova sha gbenda u vough yô. U kimbi inyaregh shami ga. Á saan Mbashiada iyol u tesen mimi ne sha ci u ior ve doo vé ishima shi Yehova Aôndo kpaa á doo ve ishima yô.

Mbashiada Mba Yehova vea wase u u civir Aôndo