Aver yem sha atineakaa

Aver yem sha mver u atineakaa

Washika u Mbahemenev mba Shin Itine

Washika u Mbahemenev mba Shin Itine

Hen Mbapasenkwagh u Tartor a Vese Imôngo:

TÔÔ wer yange u lu or u ken tsombor u Betel u ken Brooklyn la. Nahan sha iyange i Tomataan pepe, Oktoba 2, inyom i 1914 la, u tema hen ijiir you, ape u vanden teman yan kwagh pepe la, u lu keghen shighe u Anmgbian C. T. Russell una va nyôr la. Ica i gbe ga yô, u nenge i bugh hunda u iyou i yan kwagh la, maa Anmgbian Russell nyôr. A wa tilen tamber kpuaa er vanden eren keke nahan, maa a kende a sugh tsombor u Betel saan saan ér, “Ne nder vee.” Kpa, er ma kar ma za tema inya ape vanden teman sha ikyônough ki sha ityough ki tebul la yô, a kure ave, maa a yôô saan saan nahan ér, “Shighe u Atôatyev kure ve; iyange i ator a ve bee kpaa!” Saan we iyol je gande; gadia u ndera veren ashe a shighe ne ica gba! We man mbagenev mba ve lu tsombor u Betel la cii, ne kure ave sha kwaghyôôn u sagher iyol ne kpen kpen je.

 Anmgbian Russell yange yôô kwagh u sagher iyol ne anyom kar hegen vese. Kpa ka nyi Tartor la u er hii sha shighe la zan zan hegene? U er kwagh vese! Yehova za hemen u sôron mlu u ior nav shi tesen ve sha ikyev i Tartor la. Ior nav mba yange ve lu udubu kpuaa tseegh ken inyom i 1914 la, hemba miliôn utaankaruhar man tiôn hegen. We u zua a mtsera sha ityesen i Tartor la u lu tesen ior mba Aôndo la nena?

Nyian ne, ashighe kpishi ka se ungwa anmgbianev asev ve kaa ér, “Ikyekyeutya i Yehova ngi yemen hemen hemen!” man ka mimi kpaa. Nahan kpa, jighilii yô, hii ken inyom i 1914 la je, ikyekyeutya, i i til sha ityough ki vegher u nongo u Yehova u se nengen a mi ga la, ngi yemen zaar sha gbenda u kpilighyol kpishi, er u lu ôron takerada ne zulee ve u nenge nahan. Er mbapasenkwagh u Tartor ve soo ér, vea pase kwagh i tser tar sha won cii yô, ve due a igbenda kposo kposo i vea pase kwagh yô; er u pasen kwagh ken pipambaabaver man u duen waaji man ufoto mba tesen man ukaade mba pasen kwagh a mi man geramafon man redio nahan, shi mba pasen kwagh sha Intanet je kpaa.

Er Yehova a lu veren tom ne yô, hegen se mba gberen ityakerada i pasen Bibilo i doon ashe ne ken ijô i hemban 670 nahan, shi se mba ne hanma or u nan soo u ôron i cii, a u wan nan ishe sha i shio. Mbagenev na ayol a ve u wasen ken tom u maan Ayou a Tartor man Ayou a Mkohol man iyaav mbi ubranci sha ityar kposo kposo, ken ityar i ior ve lu a kwagh ave man i ior ve lu a kwagh ave ga la cii. Shi aahe ka una er yô, anmgbianev asev mba nomso man mba kasev mba doon se ishima ve kar a kar sha er vea za wase mba aahe shon a vihi ve akaa la, nahan ve tese ér mimi je, mba anmgbianev mba i ‘mar ve sha ci u ayange a ican’ yô.—Anz. 17:17.

Ashighe agen mbahemenev mbaaduav kua mbaahendanev mbagenev ka ve soo u ‘eren ifer geman suur sha tindi,’ kpa ka kwagh u taver jighjigh wase kpishi u nengen er hanma kwa, ka vea hii se je, iyongo i ve ve a mi la i “gema [i] hingir mzehemen u Loho u Dedoo” yô.—Ps. 94:20; Fil. 1:12.

Ka se kwagh u civirigh kpishi er se lu eren Aôndo tom a ven, ne mba ne lu “ya” u Ter wase a vese imôngo la. Fa nen ner ne doo se ishima kpishi. Msen wase yô, ka u kwagh u i nger ken takerada ne la, a wase ne, seer lun nen a iwuese sha dyako wen u ken jijingi la cii.—Mat. 24:45.

Se mba tômon ser i kpe ne iyol, ka se

Anmgbianev enev,

Mbahemenev mba Shin Itine mba Mbashiada mba Yehova