Aver yem sha atineakaa

Ican i Yan ia Tsa a Bee Kpa?

Ican i Yan ia Tsa a Bee Kpa?

U kaa wer . . .

  • eenee?

  • eii?

  • alaghgaa?

 KWAGH U BIBILO I̱ KAA YÔ

“Aôndo . . . Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga”—Mpase 21:3, 4.

U NA MKAANEM MAN JIGHJIGH YÔ, KA MBAMTSERA MBA U ZUA A MI JE NE

U fa dedoo er i lu Aôndo a ne ve se lu yan ican ga yô.—Yakobu 1:13.

U zua a msurshima, gadia u fa er ka sea yaan ican ve ishima i vihi Aôndo ker yô.—Sekaria 2:8.

U lu a ishimaverenkeghen, sha ci u ican i yan cii ia va bee.—Pasalmi 37:9-11.

 SE FATYÔ U NAN KWAGH U BIBILO I̱ ER NE JIGHJIGH KPA?

Een, se fatyô sha ci u atôakyaa ahar a i ter heen ne, kua atôakyaa agen kpaa:

  • Aôndo soo ér ior ve ya ican ga, shi a kôr iferkwagh ihyom. Nenge er sha ashighe a tsuaa la yange mbagenev vea eren ior ican ve ishima i lu Yehova Aôndo ker yô. Bibilo kaa ér mhôônom yange ma kôr un a ve, sha ci u “mtoghol ve u ve toghol sha ikyev i mba eren ve ican la.”—Mbaajiriv 2:18.

    Ishima i vihin Aôndo ker a mba ve eren ior aferakaa la. U tesen ikyav yô, Bibilo kaa ér “ave a haan awambe a or u lun a ibo ga” inya la, ka kwagh u vihin Aôndo.—Anzaakaa 6:16, 17.

  • Hanma orumace yô, kwagh u nan gba Aôndo ishima. Er hanma or nan fe “mvihi u nan, man ican i nan” nahan, kape Yehova kpa a fe mlu u nan je la!2 Kroniku 6:29, 30.

Ica ia gba ga tsô, Yehova una bee a ican i hanma orumace cii, sha ikyev i Tartor na la. (Mateu 6:9, 10) Hegen er Tartor la u lu a va ga ne, ngu surun mba ve suur sha a na sha mimi mbara asema.—Aerenakaa 17:27; 2 Mbakorinte 1:3, 4.

 MPIN U HENEN SHA MI

Er nan ve Aôndo a de ér ican i er ioro?

Bibilo na mlumun sha mpin ne ken MBAROMANU 5:12 man 2 PETERU 3:9.