Aver yem sha atineakaa

U Nenge Bibilo Nena?

U Nenge Bibilo Nena?

U nenge i̱ wer . . .

  • ka takerada u uumace ve gber sha kwaghfan ve yôô?

  • ka takerada u ukaaer man ukwaghhiri?

  • ka Mkaanem ma Aôndoo?

 KWAGH U BIBILO I̱ KAA YÔ

“Icighanruamabera cii ka Aôndo A ne i nger ye.”—2 Timoteu 3:16.

U NA MKAANEM MAN JIGHJIGH YÔ, KA MBAMTSERA MBA U ZUA A MI JE NE

U zua a mkav sha akaa a a tsume u ken uma la.—Anzaakaa 2:1-5.

U zua a kwaghwan u una wase u sha akaa a u eren ayange ayange la.—Pasalmi 119:105.

U lu a ishimaverenkeghen i mimi sha akaa a a lu van ken hemen la.—Mbaromanu 15:4.

 SE FATYÔ U NAN KWAGH U BIBILO I̱ ER NE JIGHJIGH KPA?

Een, se fatyô sha ci u atôakyaa atar a i ter heen ne, kua atôakyaa agen kpaa:

  • I̱ gba zwa môm je kpilighyol. Yange í hii u ngeren Bibilo anyom kar hemba 1,600 cii ve, i mase ngeren i̱ been ye. Lu iorov 40 nahan nger i̱ ye. Ve kpishi yange ve fa mbagenev ken a ve ga. Nahan kpa, Bibilo gba zwa môm kpian, ken mhii u i zan zan mkur. Ngi a itinekwagh i vesen i môm.

  • I̱ ôr akaa a mbayiase sha mimi. Mbatimen sha akaa a mbayiase mba fe ôron kwagh u igbekera i ior vev ga. Kpa mbangeren Bibilo yô, mbamshi vev kua mba ityô ve je kpa yange ve nger shin inya.—2 Kroniku 36:15, 16; Pasalmi 51:1-4.

  • Akaaôron a profeti a ken Bibilo nga gbe inya ga. Bibilo yange i tsengapasen mtim u gar u Babilon anyom kar er 200 nahan cii ve, i va tim gar la ye. (Yesaia 13:17-22) I̱ pase gbenda u a tim Babilon la, kua iti i tor u nana ta num sha Babilon nana hemba un la kpaa.—Yesaia 45:1-3.

Akaaôron a profeti agen kpishi ken Bibilo kure shami, zan zan je kua a kiriki kpaa. Ka akaaôron a profeti a ken Mkaanem ma Aôndo tseegh ma a fatyô u kuren shami nahan ye.—2 Peteru 1:21.

 MPIN U HENEN SHA MI

Mkaanem ma Aôndo ma a seer sôron uma wou nena?

Bibilo na mlumun sha mpin ne ken YESAIA 48:17, 18 man 2 TIMOTEU 3:16, 17.