Aver yem sha atineakaa

Aver yem sha mver u atineakaa

 IAVEN I SHA 5

Ka Nyi Aôndo a We Ishima u Eren sha ci u Tar Nee?

Ka Nyi Aôndo a We Ishima u Eren sha ci u Tar Nee?

1. Aôndo yange gba tar sha ci u nyi?

Yehova yange na nomso man kasev tar ér u̱ lu u̱ ve. Tar ka ya wase. Sha nahan yô, yange i gba Adam man Ifa, nomsoor man kwase u hiihii la ér ve mar ônov ve lu sha ga. Aôndo yange vande gban mbatyomov ér ve lu sha. (Yobu 38:4, 7) Kpa, Aôndo gema ver or u hiihii la ken paradiso u doonashe, i yilan ijiir la ér sule u Eden. (Genese 2:15-17) Yehova yange na or ne kua ônov mba una va mar la ian i lun uma gbem sha won sha tar.—Ôr Pasalmi 37:29; 115:16.

Sha hiihii la, lu sule u Eden la tseegh lu paradiso ye. Lu u nom man kwase u hiihii la vea mar ônov vea iv tar. Lu u ken hemen yô, ônov mba Adam mban vea gema tar cii ua lu sha ikyev ve, vea er u ua hingir paradiso. (Genese 1:28) A tim tar u se tem sha u ne kera mayange ga. Ua lu ya u uumace gbem sha won.—Ôr Pasalmi 104:5.

2. Er nan tar ne u lu paradiso hegen ga?

Adam man Ifa yange ve hemba Aôndo ato, nahan Yehova zenda ve ken sule la kera. Paradiso la maa saa ishe, hii shighe la je or môm ngu a kôrcio u hiden a mi her ga. Bibilo kaa ér: “I gema tar i na sha ikyev i mbaaferev.”—Yobu 9:24.—Ôr Genese 3:23, 24.

Hemba Yehova u eren kwagh u yange wa ishima u eren sha ci u uumace laa? Ei! Un ka u hemban agee. Una kure awashima na kpee a bunde ga. (Yesaia 45:18) Una sôr mlu u orumace, una hide a lu er yange wa ishima ér a lu sha hiihii la nahan.—Ôr Pasalmi 37:11, 34.

3. Aôndo una hide a Paradiso nena?

Tar ua hide a hingir paradiso shighe u Yesu, Tor u Aôndo a ver la, una lu hemen tar la. Yesu una hemen mbatyomov mba Aôndo ken ityav mbi i yer ér Armagedon la, vea tim mba ve lu  hendan a Aôndo la cica cii. Yesu maa una wuhe Satan a kuma anyom 1,000. Ior mba Aôndo vea war mtim ne, sha ci u Yesu una hemen ve shi una kura ve kpaa. Vea lu uma ken Paradiso shin tar gbem sha won.—Ôr Mpase 20:1-3; 21:3, 4.

4. Ka hanma shighe ican i yan ia bee?

Ka hanma shighe Aôndo una kar a ifer sha tar kera? Yesu yange pase kwagh u una lu “ikyav” i tesen ér shighe u mkur zurum yô. Mlu u tar u lu hegen ne na yô, kwagh tser uumace, shi kwagh ne tese ér se mba ken shighe u ‘mkurtar’ kpaa.—Ôr Mateu 24:3, 7-14, 21, 22.

Ken anyom 1,000 a Yesu una tema tor sha una lu hemen tar ne cica cii la, una bee a ican i yan sha tar cii. (Yesaia 9:6, 7; 11:9) Ka tom u Tor tseegh Yesu una er ga, una er tom u Zegepristi kpaa, nahan una ese asorabo a mba Aôndo a doo ve ishima la kera. Sha nahan yô, Aôndo una kar a angev man iyolbeen man ku kera sha ikyev i Yesu.—Ôr Yesaia 25:8; 33:24.

5. Ka unô vea lu ken Paradiso u a lu van laa?

U zua a ior mba Aôndo a doo ve ishima, mba ve lu henen u eren ishima na la, ken Iyou i Tartor

Ior mba ve ongo imo i Aôndo la vea lu ken Paradiso. (1 Yohane 2:17) Yesu yange tindi mbadondon un ér ve za ker mbaasemaleghlegh, ve tese ve u eren akaa a aa na ve, Aôndo una lumun ve yô. Nyian ne, Yehova ngu wan ior umiliôn imôngo mba sha tar cii ago iyol sha u ve va lu uma ken Paradiso shin tar yô. (Sefania 2:3) U za ken Ayou a Tartor a Mbashiada mba Yehova ve nyer mbamkombo her la yô, ior mba henen akaa a wasen ve u lun noov man uter, kua kasev man ungô mba dedoo. Mbayev man mbamaren cii mba civir Aôndo imôngo ken Ayou a Tartor ne, shi mba henen akaa a aa wase ve u zuan a iwasen ken loho u dedoo u Aôndo yô.—Ôr Mika 4:1-4.