Aver yem sha atineakaa

Aver yem sha mver u atineakaa

 ITYOUGH 2

Washika u Aôndo u Lun a Dooshima a Nger Se La

Washika u Aôndo u Lun a Dooshima a Nger Se La

KAAM ase yôô, ka hanma takerada ú hembe doon we ishima ciilii?— Mbayev mbagenev vea tsua takerada u í nger kwagh u annyamev ker yô. Mbagenev di vea tsua takerada u ú lu a ufoto ker kpishi yô. Ityakerada i ngira nahan ka i doo u ôron kpen kpen.

Kpa ityakerada i i hembe doon sha won cii yô, ka i i ôr se kwagh u Aôndo sha mimi la. Ken ityakerada ne cii, ugen ngu u ú hembe lun a inja cii yô. Ú fa takerada shon kpa? Ka Bibilo.

Er nan ve Bibilo i̱ lu a inja je i gande?— Ityôkyaa yô ka hen Aôndo i̱ dugh ye. I̱ ôr se kwagh u Aôndo man akaa a una va er sha ci wase la kpaa. Shi i̱ tese se kwagh u se er ve a doo un a vese yô. Ngi er ka washika u Aôndo a nger a tindi se a mi nahan.

Aôndo yange ma fatyô u ngeren Bibilo jimin cii shaala cii ve, ma mase nan orumace shin tar ye. Kpa e̱r nahan ga. Er akaa a i nger ken Bibilo la a dugh hen Aôndo nahan kpa, gema yar tom a mbatomov nav shin tar, lu ve ve nger Bibilo sha ave ve ye.

Aôndo yange er kwagh ne nena?— Sha er se fa er yange er kwagh ne yô, nenge ase ikyav ne. Ka sea ungwa ikyenge i or sha redio yô, ashighe agen ikyenge la ka i due hen or u nan lu ica a vese yô. Shi ka sea nengen televishen yô, se nenge a ufoto mba ior mba ken ityar igen, shi se ungwa akaa a ve lu ôron la kpaa.

Uumace ka ve nyôr igirgi ve za sha uwer je kpaa, shi ka vea za nyôr sha uwer kpa ve fatyô u tindin a ilyoho shin tar. Ú fa kwagh ne nahan kpa?— Aluer uumace vea fatyô u eren kwagh nahan yô, Aôndo una fatyô u lun sha, geman tindin se a ilyoho shin tar gaa?— Una  ­fatyô ga kanyi! Man yange hii u eren kwagh ne ica i gba cii ve ior va hii u lun a redio shin televishen ye.

Er nan ve se fe ser Aôndo una lu ca kpa una fatyô u ôron kwagh a vese?

Yange Aôndo ôr kwagh Mose ungwa sha ato na. Nengen yô, Mose nenge a Aôndo ga, kpa gema ungwa ikyenge i Aôndo tseegh. Yange ior lu hen ijiir la umiliôn imôngo shighe u kwagh ne lu zan hemen la. Sha kpôô yô, sha iyange la Aôndo er uwo cii tenger, kua idyuran man inyiar kpaa. Ior fa je ér Aôndo ôr kwagh ve, kpa gema cier ve iyol tsung. Nahan ve kaa a Mose ér: “I̱ de luun Aôndo A̱ ôron kwagh a vese ga, er sé kpe ga yô.” Ken masejime yô, Mose nger akaaôron a Aôndo ôr la. Akaa shon a Mose yange nger la kpa nga ken Bibilo.—Ekesodu 20:18-21.

 Mose yange nger ityakerada i Bibilo i hiihii i itian la. Kpa ka un tswen nger ityakerada i Bibilo ga. Aôndo nger ityakerada i Bibilo igen sha ikyev i iorov 40. Ior mban lu sha ayange a tsuaa tsuaa la je, shi tsa anyom kpishi cii ve, ve mase ngeren Bibilo been ye. Yange tsa je war kuman anyom 1,600! Kwagh u kpilighyol je yô, ior mban yange ve fa ayolave ga, kpa hanma kwagh u yange ve nger cii gba zwa môm, ugen hendan a ugen ga.

Mba yange ve nger Bibilo la ati ve ér nyi?

Ior mbagen mba Aôndo yange nger Bibilo sha ikyev ve la lu ior mba duenati. Er Mose lu orkuranilev nahan kpa, a va hingir orhemen u ikyurior i Iserael. Solomon lu tor, shi hemba kwaghfan sha won cii, shi inyaregh kpa hemba sha won cii. Kpa mbangeren Bibilo mbagenev yô, yange i fa ve yum nahan ga. Amoshi yange nengen sha ikyon shi eren sule u tur.

Heela tseegh ga, orngeren Bibilo ugen lu ortwer. Ú fa iti na kpa?— Iti na ér Luka. Ugenegh lu orngoholkpandegh. I yilan un ér Mateu. Shi ugen kpa lu, un di lu orfanatindi, fa atindi a kwaghaôndo u Mbayuda vindi vindi. Ka un yange hemba ngeren ityakerada i ken Bibilo ngeen a mbagenev cii ye. Ú fa iti na kpa?— Iti na ér Paulu. Shi Peteru man Yohane, mbahenen mba Yesu mba ve kpa ve lu mbangeren Bibilo la yô, ve vande lun mbakôronishu.

Mbangeren Bibilo mban kpishi yange ve nger akaa a Aôndo una va er ken hemen yô. Yange ve er nan ve, ve fa akaa ne cii man a va mase erenee?— Lu Aôndo ôr ve mkaanem mara ye. Lu un ôr ve kwagh u una va er la ye.

Shighe u Yesu, Ortesen u Hemban la, lu shin tar la nahan, í nger ityakerada i ken Bibilo kpishi i bee. Kpa umbur wer, Ortesen u Hemban yange vande lun sha. Nahan fa kwagh u Aôndo er yô. Yange na jighjigh ér ka hen Aôndo Bibilo i dugh kpa?— Een, yange na jighjigh nahan.

Yesu yange una ôron ior kwagh u ityom i Aôndo yô, a ôr ken ­Bibilo.  Ashighe agen yô yange a ôr ve kwagh u Bibilo i̱ ôr la ken ityou. Yesu shi yange va seer pasen se kwagh u Aôndo kpaa. Yesu kaa ér: “Ka akaa a M ongo her a Na je M er tar ye.” (Yohane 8:26) Yesu yange ungwa akaa her Aôndo kpishi, sha ci u vande lun vea Aôndo. Nahan ka han i nger akaa a Yesu yange ôr laa?— Ka ken Bibilo. Yange i nger akaa la jimin cii sha u se̱ ôr yô.

Ior mba Aôndo yange na ve mkaanem nam ve, ve nger la, lu ken ijô í ve lamen ayange ayange la ve nger á ye. Nahan Bibilo cii yange i hemba ngeren i̱ ken zwa Heberu, shi i pande í nger i̱ ken zwa u Aram, shi i nger avegher a i̱ kpishi ken zwa Grika kpaa. Kpa er ior kpishi nyian ve fe u ôron ijô la ga yô, i gema Bibilo ken ijô igen. Nyian ne a fatyô u ôron avegher a Bibilo agen ken ijô i hemban je er 2,260 nahan. Nenge sha wono! Bibilo ka washika u Aôndo a nger hen ior sha won cii yô. Shi, shin er i kimbir  ngeren i̱ kwa imôngo imôngo nahan je kpa, loho la ka her Aôndo tsô ú dugh ye.

Akaa a Bibilo i̱ ôr la nga a inja hen a vese. Í nger i̱ ca i gba kpen kpen. Nahan kpa i̱ ôr akaa a á lu zan hemen ainge yô. Shi i̱ ôr se kwagh u ica a gba ga tsô Aôndo una va er ken hemen yô. Kwagh u i̱ er la sagher iyol kpishi! Mkaanem ma i mara ma na se ishimaverenkeghen i kpilighyol.

Aluer ú ôr Bibilo yô ú hen nyi akaa?

Shi Bibilo ôr se e̱r Aôndo a soo ér uma wase a̱ lu yô. I̱ ôr se kwagh u a lu u vough man kwagh u a lu u vough ga yô. Gba u ú fa kwagh ne, mo kpa nahan. I̱ ôr se kwagh u ior mba yange ve er aferakaa man kwagh u yange tser ve la, sha e̱r se palegh kwaghbo u yange tser ve la yô. Shi i̱ ôr se kwagh u ior mba yange ve er akaa a dedoo man mbamtsera mba dedoo mba yange ve zua a mi la kpaa. Akaa ne cii i nger sha ci u iwasen yase.

Kpa, cii man se zua a mtsera u ikyoo ken Bibilo yô, gba u se zua a mlumun sha mpin ne. Mpin shon yô ka un je ne, ér: Ka an nan ne se Bibilo? Ú na mlumun wer nyi?— Een, Bibilo jimin cii ka Aôndo a ne se i̱ ye. Nahan se tese ser mimi je se fa kwagh nena?— Ka sha u keghen ato a Aôndo shi eren kwagh u a kaa la.

Nahan doo u se teman imôngo se ôron Bibilo. Or u nan doo se ishima tsung ka nana̱ nger se washika yô, ka se ôr washika la kwa imôngo je. Ka a lu se kwagh u injaa kpishi. Kape i gbe u Bibilo kpa ia lu se a inja je la, gadia ka washika u a dugh hen Un u se doo un ishima tsung yô. Ka washika u Aôndo u dooshima a nger se yô.

Tema ôr ase avur a ruamabera a á tese ér mimi je, Bibilo ka Mkaanem ma Aôndo ma i nger sha ci u ma lu se a inja ne: Mbaromanu 15:4; 2 Timoteu 3:16, 17; man 2 Peteru 1:20, 21.