Aver yem sha atineakaa

Aver yem sha mver u atineakaa

 ITYOUGH 3

Un Shon u Gbe akaa Cii La

Un Shon u Gbe akaa Cii La

Ka an nan gbe akaauma ciilii?

FA kwagh ugen u a kpilighyol yô. Ú soo u ungwan kwagh shon kpa?— Kenger uwegh ou. Hurugh ahôravee ou. Shir tôô ase kwagh. Uwegh ou kua fatyô u eren akaa kpishi, shi kua er á tsema tsema kpaa. Ú fa or u yange nan er ave ase kpa?

Ka Un shon môm u yange er zwa wase man ahenga ase man ashe ase kpaa la. Ka Aôndo, Ter u Ortesen Uhemban la. Er Aôndo a ne se ashe nahan, doo se gaa?— Er se lu a ashe yô se fatyô u nengen a akaa kpishi. Se fatyô u nengen a uimondon mba ikyon. Se fatyô u nengen a toho u ndor shi kenger sha kwavaôndo kpaa. Shi se fatyô u nengen a annyonov mba ijen i ker ve yô, di er mba ve lu ken foto ne nahan. Sha kpôô yô, ka kwagh u kpilighyol er se fetyô u nengen a akaa nahan yô, shin ka nahan ga?

Kpa ka an jim nan er akaa nee? Ka ma orumace nan er akaa ne shinii? Ei. Ior vea fatyô u maan iyou. Kpa or môm u nana fatyô u eren ér toho u̱ mende yô, nan ngu ga. Ior vea fatyô u eren anwannyon ga, shin imondon i kon kpaa ga, shin ma kwagh u uma ugen kpaa je ga. Ú fa nahan kpa?

Ka Aôndo a gbe akaa ne cii ye. Aôndo yange gba sha man tar. Shi gba ior kpaa. A gba nomsoor u hiihii man kwase u hiihii la. Ka kwagh u Yesu, Ortesen Uhemban la, yange tese je la.—Mateu 19:4-6.

 Yesu yange er nan ve fa ér Aôndo gba nomsoor man kwasa? Yange Aôndo lu eren kwagh ne Yesu nenge shinii?— Een, yange nenge. Yesu lu vea Aôndo shighe u Aôndo lu gban nomsoor man kwase la. Lu Yesu Aôndo vande gban hiihii ye. Yesu lu ortyom, shi lu sha vea Ter na.

Bibilo ôr se ér Aôndo yange kaa wener: “Sé er or.” (Genese 1:26) Ú fa or u Aôndo yange lu ôron kwagh a nan kpa?— Lu ôron kwagh a Wan na. Lu ôron kwagh a un shon u yange va mase van shin tar va hingir Yesu la.

Kwagh la ságher we iyol gaa? Hen ase yôô! Zum u se kegh ato a Yesu yô, ka un u yange lu vea Aôndo shighe u Aôndo gba tar kua akaa agenegh cica cii la je, se lu ngohol ityesen sha ikyev na ye. Yesu zua a kwaghfan kpishi sha u eren tom vea Ter na u sha la. Ka nahan ve Yesu a lu Ortesen u Hemban ye!

Ú hen wer Aôndo yange lu a̱ gba Wan na ga lu tswen la nahan,  huan un yum ve gba Wan na yee?— Ei, lu nahan ga. Kpa, aluer yange huan un ga yô, er nan ve yange shi gba akaauma agen kpaa?— Yange er kwagh ne nahan sha ci u un ka Aôndo u dooshima. Yange soo ér mbagenev kpa ve̱ lu uma shi ve̱ ember uma kpaa. Nahan se sugh Aôndo sha er a ne se uma yô.

Hanma kwagh u Aôndo a er cii tese dooshima na. Aôndo er iyange. Iyange i̱ ne se iwanger shi i̱ ne se mtsee kpaa. Luun er iyange ngi ga yô, hanma kwagh ma a ndôhôr shi uma kpa ma a lu shin tar ga. Er Aôndo a er iyange nahan doo ú gaa?

Shi Aôndo ka a na ura u nôô kpaa. Alaghga ashighe agen ú soo ura ga, sha ci u ka ua nôôn yô, ú yange ú u duen za numben ken won yum. Kpa ka ura ú ne ve akaa a te mende, a vesen kpaa ye. Nahan zum u se nenge a uimondon mba doon ashe yô, se sugh ana?— Ka Aôndo se sugh ye. Man aluer se ya atam a ikyon shin ikayue nyoho se tsung yô, se sugh ana?— Ka Aôndo se sugh ye, sha ci u ka iyange na man ura na la ú ne akaa a vesen ye.

Nahan aluer or pine ú ér, ‘Ka Aôndo yange er or man ishôso kpaa yee?’ Nahan ú kaa wer nyi?— Aluer ú kaa wer: “Een, ka Aôndo yange er or man ishôso kpaa” yô, nahan ú kaa vough. Kpa aluer or na jighjigh ér mimi je ka Aôndo a gbe uumace ga, ye? Aluer nan kaa ér or due ken inyamtoho ye? Ngula ka kwagh u Bibilo i̱ tese la ga. I̱ kaa ér ka Aôndo yange gba hanma kwagh u uma cii ye.—Genese 1:26-31.

Er i lu or nan maa iyou yô, ka an nan gbe uimondon man ikyon man ishôso?

Kpa alaghga orgen nana kaa a we ér nan na Aôndo jighjigh ga. Nahan ú kaa a nan wer nyi?— Gema hôn uwegh sha iyou. Nahan pine nan wer: “Ka an nan maa iyou laa?” Hanmaor fa ér saa or nana maa iyou keng ve, ia lu ye. Sha kpôô yô iyou ia fatyô u maan iyol i i̱ ga!—Mbaheberu 3:4.

Shi kar a or shon za a nan ken akôngo za tese nan imondon sha ahu a ikyon. Pine nan wer: “Ka an nan er kwagh nee?”  Ka ma orumace nan er ga. Kpa er iyou kpa i̱ maa iyol i i̱ ga nahan, kape imondon i sha ahu a ikyon ne kpa i̱ er iyol i i̱ ga je la. Ka Aôndo a er i̱ ye.

Ôr or la wer nana̱ kegh ato nana̱ ungwa imo i inyon. Nahan shi pine nan wer: “Ka an nan er inyon shi nan tese í u wan amo?” Ka Aôndo. Ka Aôndo a gbe sha man tar man akaauma cii ye! Ka Un a ne uma ye.

Nahan kpa, alaghga orgen nana kaa ér, kwagh u nan nenge a mi sha ashe a nan ga yô, nana lumun a mi ga. Shi alaghga nana kaa ér: ‘Aluer m nenge a kwagh ga yô, me lumun mer ngu ga.’ Nahan ior mbagenev kaa ér ve mba nengen a Aôndo ga nahan vea fatyô u nan un jighjigh ga.

Ka mimi se fatyô u nengen a Aôndo ga. Bibilo kaa ér: ‘Or á fatyô u nengen a Aôndo ga.’ Ma or shin kwase shin wanye môm u shin tar ne u nana nenge a Aôndo je kpa, nan ngu ga. Nahan or môm nana̱ de nôngon ér nana kpela foto shin nana er eev mbu Aôndo ga. Aôndo iyol na kpa kaa a vese ér se̱ de eren eev nav ga. Nahan aluer se mba a ambaakaa la ken iyou yase yô, a doo Aôndo ga.—Ekesodu 20:4, 5; 33:20; Yohane 1:18.

Kpa aluer ka u ú fatyô u nengen a Aôndo ga yô, a er nan ve ú fa wer mimi je Aôndo nguu? Hen ase sha kwagh ne yôô. Ú fatyô u nengen a ahumbe kpa?— Ei. Or môm nana fatyô u nengen a ahumbe ga. Kpa ú fatyô u nengen a kwagh u ahumbe ka aa kar ve, a er yô. Ú fatyô u nengen er ahumbe a lu tan, ahu a ikyon a lu tenger yô. Nahan ú fa je wer ahumbe nga.

Shi ú fatyô u nengen a akaa a Aôndo a gbe la kpaa. Aluer ú nenge a imondon i ahu a ndor shin inyon yô, ka kwagh u Aôndo a gbe je ú nenge a mi la. Nahan ú fa wer mimi je Aôndo ngu.

Alaghga or nana pine ú ér, ‘Ka an nan er iyange man tara?’ Bibilo  kaa ér: “Aôndo gba Sha man tar.” (Genese 1:1) Een, ka Aôndo a gbe akaa a kpilighyol ne cii ye! Ú nenge kwagh ne nena?—

Doo ú kpishi er ú lu uma nahan gaa? Se fatyô u ungwan amo a inyon ka í eren, i doo ungwan la. Se fatyô u nengen a uimondon mba ahu a ikyon man akaa agen a Aôndo a gbe la kpaa. Shi se fatyô u yan akaayan a Aôndo a ne se la kpaa.

Nahan se wuese Aôndo sha akaa ne cii. Kpa hemban cii yô, se wuese un sha uma u a ne se la. Aluer se mba a iwuese hen Aôndo sha mimi yô, kwagh ngu u se er kpee yô. Ka nyi kwagha?— Se kegh ato a Aôndo, shi se er kwagh u á ôr se ken Bibilo la kpaa. Aluer se mba eren nahan yô, se lu tesen ser Un u a gbe akaa cii la doo se ishima.

Doo u se tese ser se mba a iwuese hen Aôndo sha hanma kwagh u á er cii. Inja nena? Ôr kwagh u i nger ken Pasalmi 139:14; Yohane 4:23, 24; 1 Yohane 5:21; man Mpase 4:11 la.