Aver yem sha atineakaa

Aver yem sha mver u atineakaa

 ITYOUGH 48

Tar u He u Aôndo ú Bem La—Ú Fatyô u Lun Ken Ú

Tar u He u Aôndo ú Bem La—Ú Fatyô u Lun Ken Ú

AÔNDO yange ver Adam man Ifa ken sule u Eden. Er yange ve hemba ato, ve kpe nahan kpa, Aôndo er sha u mbayev vev ve̱ lu uma gbem sha won ken Paradiso yô, man kwagh ne wa se mba se lu uma nyian ne kpa ker. Bibilo er ityendezwa ér: ­“Mbaperapera vea ya dyako u tar, vea lu ken u gbem.”—Pasalmi 37:29.

Bibilo ôr kwagh u “Usha mba hev” man “tar u he.” (Yesaia 65:17; 2 Peteru 3:13) Ka ugomoti mba orumace mbara ve lu “Usha” mba ve lu hegen ne ye, kpa Yesu Kristu kua mba vea tema tor sha vea na imôngo la, ka ve vea kohol a hingir “Usha mba hev” mbara ye. Usha mba hev mban inja na yô ka gomoti u perapera u Aôndo u una va a bem je la, nahan zum u usha mba hev mban vea kar a hemen tar sha won cii yô, a doo je a gande ôron!

Kpa, “tar u he” la di gema kanyi?— Tar u he la a lu ior mba injaav mba Yehova a doo ve ishima yô. Gba u ú kav wer, shighe u Bibilo i er kwagh u “tar” yô, kwagen ka i lu ior mba ve lu sha tar la i̱ lu ôron ye, í gba lun tar iyol i ú nahan tsô ga. (Genese 11:1; Pasalmi 66:4; 96:1) Nahan ior mba vea kohol a hingir tar u he la vea lu uma shin tar heen jighilii.

Hen shighe la tar u aferaior a lu ken ú hegen ne ua kera lu ga. Umbur wer, Mngerem ma Deemee ma sha ayange a Noa la yange ma tim lu aferaior a sha tar. Shi, er se vande henen fan nahan, a va tim botar ne kpaa sha Armagedon. De se nenge ase er u lun uma ken tar u he shighe u Armagedon una kar kera la, á lu yô.

 Ú soo u lun uma gbem sha won ken Paradiso shin tar u he u Aôndo ú ua va a bem la kpa?— Ma ortwer môm kpa nana fatyô u eren kwagh ér, se̱ lu uma gbem sha won ga. Ma ishangeci i môm kpa ngi i̱ ia yange se u kpen ga. Gbenda u í lu ú tseegh se kar ve, se lu uma gbem sha won yô, ka u kporom hen Aôndo. Man Ortesen Uhemban tese se er se kporom ikyua hen Aôndo yô.

Se tôô ase Bibilo se bugh se ôr Yohane ityough 17, ivur i sha 3 la. Se zua a mkaanem ma Ortesen Uhemban yange ôr la heen, a kaa ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”

Nahan, kanyi kwagh Yesu yange kaa ér gba u se er ve, se lu uma gbem sha wono?— Hiihii yô, saa se zua a mfe u Yehova, Ter wase u sha la, man shi Wan na, u yange na uma na sha ci wase la kpaa. Inja na yô, gba u se hen Bibilo. Takerada ungun ne, ú i yer ér Hen Kwagh sha Ikyev i Ortesen Uhemban La ngu wasen se u eren kwagh ne.

Kpa, se hen kwagh u Yehova yô, ngula una wase se u lun uma gbem sha won nena?— Er ka i gba u se ya kwaghyan hanma sev nahan, kape i gbe u se henen kwagh u Yehova hanma sev je la. Bibilo kaa ér: “Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.”—Mateu 4:4.

Shi gba u se zua a mfe u Yesu Kristu kpaa, gadia Aôndo tindi Wan na ne ér a̱ va kar a isholibo yase kera. Bibilo kaa ér: “Myom ngu ken ma or ugen kpaa ga.” Shi Bibilo kaa kpaa ér: “U nan ne Wan jighjigh yô, nan ngu a uma u tsôron.” (Aerenakaa 4:12; Yohane 3:36) Nahan, u ‘nan Yesu jighjigh’ la, inja na ér nyi?— Inja na yô, se na jighjigh a Yesu sha mimi, shi se fa dedoo ser a na shio yô, se fatyô u lun uma gbem sha won ga. Ka jighjigh u se ne la kpa?— Aluer se na jighjigh nahan yô, se za hemen u henen kwagh sha ikyev i Ortesen Uhemban hanma sev, shi se eren kwagh u a kaa ér se̱ er la kpaa.

Gbenda u injaa u henen kwagh sha ikyev i Ortesen Uhemban yô,  ka u zeren ôron takerada ne kwa kimbir kimbir, shi kenger ufoto mba ve lu ken ú la cii, shi henen sha mi kpaa. Kar ase iyol nenge yôô, wea fatyô u nan mlumun sha mbampin mba i nger hen ufoto mbara yô. Shi, ôr takerada ne vea ngô ú shin ter ú. Aluer mbamaren ou mba vea we ga yô, ôr ú vea mbaganden mbagenev kua mbayev mbagenev kpaa. Aluer ú wase mbagenev, ve kpa ve hen kwagh sha ikyev i Ortesen Uhemban, ve fa kwagh u vea er ve, vea lu uma gbem sha won ken tar u he u Aôndo la nahan, a doo ú kpen kpen gaa?

Bibilo pase se ér: “Tar yô, ngu karen kera.” Kpa Bibilo shi za hemen pase er se er ve, se lu uma gbem sha won ken tar u he u Aôndo la yô. I̱ kaa ér: “U nan eren ishima i Aôndo yô, nan ngu lun gbem sha won.” (1 Yohane 2:17) Nahan, se er nan ve, se lu uma gbem sha won ken tar u he u Aôndo laa— Een, saa se zua a mfe u Yehova man u Yesu, Wan na u ishima ishima la. Kpa, saa shi se dondon kwagh u se lu henen la kpaa. Yô, takerada ungun u ú lu henen ne u̱ wase ú u eren akaa ne.