Aver yem sha atineakaa

Aver yem sha mver u atineakaa

 ITYOUGH 11

Mbatyomov mba Aôndo mbá wasen? se

Mbatyomov mba Aôndo mbá wasen? se

OR mbagenev ka ve kaa ér saa vea nenge a kwagh ve, vea na un jighjigh ye. Kpa ngula ka lanegh je la. Akaa nga kpishi a í gbe je se lu a̱ nenge a á sha ashe ga, kpa á lu jim jim yô. Ú fatyô u teren kwagh môm ken akaa shon ne kpa?

Ahumbe a se ôôn la ye? Aa ta se nahan se fa kpa?— Kende ase a uwegh sha, fehe ase humbe sha ku. Ka ú nena?— Humbe ta ú sha uwe, kpa ú fatyô u nengen a ahumbe shon ga, shin ú nenge a á?

Se vande ôron kwagh ujijingi, se kaa ser se mba nengen a ve ga. Í pase se ér mbagen ken a ve ka mba dedoo, kpa mbagenev yô ka mba bov. Yila ase ujijingi mba dedoo mba se fatyô u nengen a ve ga yô.— Een, Yehova Aôndo man Yesu, shi mbatyomov mba dedoo kpaa shi mba. Mbatyomov mba bov kpa mbaa?— Een, Bibilo i kaa ér mba. Ôrom ase kwagh u ú hen ú fe sha kwagh u mbatyomov mba bov mban yô.

Kwagh u se fe yô, mbatyomov mba dedoo man mba bov mbara cii, mba a agee hemba se ca je. Ortesen Uhemban yange fa kwagh u mbatyomov vindi vindi. Er yange hii ve fa kwagh ve yum nahan yô, yange vande lun ortyom cii ve, va mase hingir wanikyundan, i mar un shin tar ye. Vande lun sha vea mbatyomov mbagenev. Á fa ve kpishi je. Mbatyomov mban cii mba a atii?

Se vande henen fan ser Aôndo yange ii asan ati. Nahan se fa tsô ser mbatyomov kpa mba a ati cica cii. Shi se fa kpaa ser vea ôron kwagh ker ayolave, sha ci u Bibilo ôr se kwagh u ‘ijô i mbatyomov mba Shaav.’ (1 Mbakorinte 13:1) Ú hen wer ka nyi akaa nahan mbatyomov vea ôrono? Vea ôron kwagh u se mba se lu shin tar ne shinii?

 Se fa er mbatyomov mba Satan mba í yer ve kpaa ér azôv la ve nôngon ér vea mee se se̱ hemba Yehova ato yô. Nahan a̱ shi nan kpa vea zaan idyu sha u henen er vea er kwagh ne yô. Ve soo ér se̱ lu er ve nahan, sha er kwagh wase una kera doo Yehova ishima ga yô. Kpa gema mbatyomov mba Aôndo mba jighjigh mbara di ye? Ú hen wer ve kpa mba ôron kwagh wasaa?— Een, mba ôron kwagh wase. Ve soo u wasen se. De m̱ ôr ú er mbatyomov mba Aôndo mbagenev yange ve wase ior mba Yehova a doo ve ishima, ve civir un kpaa yô.

U tesen ikyav yô, orgen lu í yilan iti na ér Daniel, lu ken tar u Babilon. Ior kpishi ken tar la soo kwagh u Yehova ga. Je yô, ve wa tindi ér anti or u nana er msen hen Yehova Aôndo cii yô, i̱ tsaha nan. Kpa, Daniel ti de u eren msen hen Yehova ga. Nahan ú fa kwagh u yange ve er a Daniel kpa?

Een, aferaior la na í kôr Daniel í gbihi shin ihungwa i ubegha. Daniel lu shin ihungwa un tswen vea ubegha mba ijen kôr ve tsung yô.  Ú fa kwagh u yange gema er kpa?— Daniel kaa ér, ‘Aôndo tindi ortyom Na, va cir ubegha ijô.’ Nahan kwagh môm tsô kpa er un ga! Mbatyomov vea fatyô u eren akaa a kpilighyol sha ci u mba ve civir Yehova yô.—Daniel 6:18-22.

Kanyi kwagh yange Aôndo er sha u waren Daniele?

Sha shighe ugen la Peteru lu ken gaadi. Aluer ú umbur yô, Peteru yange lu ijende i Yesu Kristu, Ortesen Uhemban la. Kpa Peteru una ôron ior mbagenev ér Yesu ka Wan u Aôndo je yô, i doo ve ga. Nahan ve wuhe Peteru ken gaadi. Ushoja lu kuran Peteru sha u a̱ de osough a̱ yevese ga yô. Ma or lu u nana wase un je kpa?

Yange i zer Peteru mshirim sha ave, lu yaven hen atô u iorov uhar  mbakuran gaadi. Kpa Bibilo kaa ér: ‘Tsô ortyom u Ter va tile hen a na, iwanger maa hii u wanger ken gaadi la, a kpoghor Peteru hen ihyan, a nder un, a kaa ér: ‘Mough sha fefa.’

Ortyom yange wase Peteru due a na ken gaadi kera nena?

Mshirim ma i zer Peteru a mi mara maa ma poso un sha ave kera, ma haa inya! Ortyom la maa kaa a na ér: ‘Haa akondo a ou iyol, wa akôv ou kpaa, dondo sha a mo.’ Mbakuran gaadi mbara fatyô u yangen ve ga, sha ci u lu ortyom lu wasen Peteru ye. Mba za aren sha hunda u iyôgh la yô, maa kwagh u kpilighyol er. Hunda la gba bughun iyol i ú tsô! Ortyom la yima Peteru sha er una za hemen u pasen kwagh yô.—Aerenakaa 12:3-11.

Se kpa mbatyomov mba Aôndo vea fatyô u wasen see?— Een, vea fatyô. Kwagh ne tese ér mayange je vea lumun ér se̱ vihi iyol ga kuaa shinii?— Ei, aluer se er abumeakaa á aa vihi se iyol yô, mbatyomov vea yange se iyol vihin ga. Kpa aluer se er abumeakaa ga je kpa, alaghga se vihi iyol. Í wa mbatyomov kwagh ér ve̱ yange se iyol vihin hanma shighe cii ga. Kpa Aôndo na ve tom u vesen ú vea er yô.

Bibilo ôr kwagh u ortyom ugen u á lu ôron ior hanma ijiir cii ér ve̱ civir Aôndo yô. (Mpase 14:6, 7) Ortyom la ngu ôron ior kwagh ne nena? Ka a ngor imo sha Aôndo shaala sha er hanma or nana ungwa a na yô shinii?— Ei, ka mbadondon Yesu mba ve lu shin tar ne ve lu ôron mbagenev kwagh u Aôndo ye, nahan mbatyomov di mba kuran ve ken tom ve ne. Mbatyomov ka ve na sha er ior mba i sar ve u fan kwagh u Aôndo sha mimi cii yô, ve̱ zua a ian i vea ungwa yô. Se kpa se fatyô u eren tom u pasen kwagh ne, nahan mbatyomov vea wase se.

Kpa aluer ior mba Aôndo á doo ve ishima ga mbara gema tôv se a ican ye? Aluer ve wa se ken gaadi ye? Mbatyomov vea dugh se ken gaadi keraa?— Vea fatyô u yiman se. Kpa mba fe eren nahan ga.

Ortyom la ngu ôron a Paulu ér nyi?

Paulu u lu ordondon Yesu la kpa shighe ugen la lu ken gaadi. Lu zan zenden shin tso, uraahumbe u vihin tsung gema lu karen. Kpa mbatyomov yima un hen shighe la ave ave ga. Ityôkyaa yô,  ior mbagenev lu her mba gba u vea ungwa kwagh u Aôndo yô. Ortyom kaa a na ér: “De cie ga, Paulu; tilen you sha ishigh ki Shisar kpee je.” Een, yange gba u a za a Paulu sha ishigh ki Shisar, u lu tor u tar cii hen shighe shon la, sha er una za pase un kwaghaôndo yô. Hanma shighe cii mbatyomov yange ve fa ape Paulu a lu yô, shi ve wase un kpaa. Aluer se kpaa se mba civir Aôndo sha mimi yô, vea wase se.—Aerenakaa 27:23-25.

Tom u vesen ugen kpa ngu u mbatyomov vea va er yô, man kera shi ica ga tsô vea er tom shon. Shighe u Aôndo una tim aferaior la ngu ikyua ikyua je. Á va tim ior mba ve civir Aôndo u mimi ga la cii. Mba ve kaan ér ve na jighjigh a mbatyomov ga sha ci u mba nengen a ve ga yum la cii, vea va kav er ve tsum yô.—2 Mbatesalonika 1:6-8.

Inja i kwagh la hen a vese yô a lu nyi?— Aluer se ta ikyaa a mbatyomov mba Aôndo yô, vea wase se. Nahan se mba tan ikyaa a ve kpa?— Aluer sea lu civir Yehova yô se mba tan ikyaa a ve. Shi aluer se mba civir Yehova yô, se lu ôron mbagenev kpaa ser ve kpa ve̱ civir un.

U seer fan er mbatyomov ve bende a uuma mba iorov yô, ôr Pasalmi 34:7; man Mateu 4:11; 18:10; Luka 22:43; man Aerenakaa 8:26-31.