Aver yem sha atineakaa

Aver yem sha mver u atineakaa

 ITYOUGH 40

Kwagh u Se er Ve a Saan Aôndo Iyol Yô

Kwagh u Se er Ve a Saan Aôndo Iyol Yô

KANYI se er ve, a saan Aôndo iyoloo? Ma kwagh ngu u se na un yôô?— Yehova kaa ér: “Hanma inyam i toho ka i Yam je.” Shi a kaa ér: “Azurfa ka u Wam, zenaria kpaa ka u Wam je.” (Pasalmi 24:1; 50:10; Hagai 2:8) Nahan kpa, kwagh ngu u se na Aôndo yô. Kwagh shon kanyi?—

Yehova na se ian ér se̱ tsua aluer se soo u civir un shin se soo ga yô. Yehova kighir se ér se̱ er kwagh sha ishima na ga. De se time se fa er i hii ve Aôndo a er se ér se̱ tsuan kwagh u se soo u eren la iyol yase, sea soo u civir un shin sea soo ga kpa se̱ tsu ayol a ase yô.

Alaghga ú fa kwagh u Buter a yer ér rôbôt la. Í er mashin u i yer ér rôbôt la yô, ka kwagh u or u a er un la a so ér a̱ er la ka a er ye. Nahan rôbôt una fatyô u tsuan kwagh u á lu sha ishima na, eren ga. Yehova yange ma er se cii ma se lu er ka rôbôt nahan. Yange ma er se ér se̱ eren kwagh u un soo ér se̱ er la tseegh. Kpa Aôndo er se nahan ga. Ú fa ityôkyaa kpa?— Mbaanar mba numben a mi mbagen mbá inja er ka rôbôt u se er kwagh na heen ne nahan. Ka a̱ kighir uwegh ape í gbe u a kighir ve vea er tom la yô, ve er kwagh u yange i er ve ér ve̱ eren la cii. Í lu nahan ú nenge a imba anar u numben a mi u a eren  nahan vee?— Ashighe kpishi ior ka ve vôr u numben a anar u a eren di kwagh u i er un ér a̱ eren tseegh la. Aôndo soo ér se̱ ungwan imo na sha ci u se mba er rôbôt nahan ga, shin sha ci u í er se ér se̱ civir un yum ga. Yehova soo ér se̱ civir un sha ci u un doo se ishima, shi se soo u ungwan imo na.

Er nan ve Aôndo a er se ér se̱ lu er rôbôt ne nahan ga?

Ú hen wer ka sea ungwa imo i Ter wase u sha la sha ci u se soo ser se ungwa imo na nahan, ka i lu un ken ishima nena?— Ôrom ase yôô, ieren you i ne ka lu mbamaren ou ken ishima nena?— Bibilo kaa ér, wan u fan kwagh “ka nan na i saan ter u nan iyol,” kpa ibume­wan yô, “ka nan na ngô u nan ishima i zunguluu.” (Anzaakaa 10:1) Ú nenge er ka wea er kwagh u ter ú man ngô ú ve kaa ér u̱ er ve, ka i saan ve iyol kpishi kpa?— Kpa ka wea hemba ve ato yô, ka i lu ve ken ishima nena?—

Ú er nan ve ú na a saan Yehova kua mbamaren ou cii iyoloo?

Nahan de se kar kwagh ne sha Yehova, Ter wase u sha la. Á ôr se e̱r se er ve, se na a saan un iyol yô. Tôô ase Bibilo, bugh ken Anzaakaa 27:11 la. Aôndo ngu ôron kwagh a vese hen ijiir ne, ér: ‘Wan wam, lu orfankwagh, na i saan mo iyol, sha er me gema me kaa imo a or u a laham yô.’ Ú fa er ka i laha or kpa?— Or nana fatyô u lahan we sha u sen we shi kaan ér ú gba kera, ú fatyô u eren kwagh u ú kaa wer ú er la ga. Satan lahan Yehova nena?— De se nenge ase.

Umbur wer se hen ken Ityough ki sha 8 ken takerada ne ér, Satan soo ér ma un lu Or Uhembancii, shi hanma or ma nan ungwan imo  na. Satan kaa ér ityôkyaa i ior ve civir Yehova tseegh yô, ka sha ci u ve fa ér aluer ve civir Yehova yô, una na ve uma u tsôron. Satan yange ne Adam man Ifa mba hembe Yehova ato yô, maa naha Aôndo tar. Á kaa a Aôndo ér: ‘Ior mba civir we sha ci u mtsera u ve zough a mi hen a we la tseegh. Nam ian tsô ú nenge, me gema hanma or nana de u civir we.’

Adam man Ifa yange mba eren isholibo cii yô, Satan naha Yehova tar nena?

Ka mimi i nger mkaanem man ken Bibilo nahan jighilii ga. Kpa aluer se ôr kwagh u or u í yer ér Yobu la yô, se nenge wang ser Satan yange ôr imba kwagh la a Aôndo. Sha kpôô yô, Satan man Yehova cii yange kwagh gba ve sha jighjigh u nan u Yobu na Aôndo la, una tile sha mi her dông, shin una pase a̱ tuhwa yô. De se bugh ase Bibilo se ôr Yobu ityough 1 man 2 se nenge kwagh u yange za hemen la.

Ver ishima sha kwagh u i ôr ken Yobu ityough 1 la, í kaa ér zum u mbatyomov va u va nengen a Yehova la, Satan kpa lu her shaala. Nahan Yehova pine Satan ér: “U due hana?” Satan gema kaa ér un gbe zenden shin tar wue wue tsô. Nahan Yehova pine  un ér: ‘Ú nenge a Yobu, er a civir mo, a eren kwaghbo ga, kpa?—Yobu 1:6-8.

Her la je Satan hii u keren ishô. A kaa ér, ‘Yobu civir we sha ci u ngu a ma mzeyol ga. Aluer ú de u kuran un, shin haan un iveren yô, una venda ú sha ishigh yough je.’ Nahan Yehova maa gema kaa ér: ‘Ka sha mi, Satan, yô er un ase kwagh u ú soo cii, kpa Yobu iyol na yô, de benden un ave ga.’— Yobu 1:9-12.

Nahan Satan er nyi?— Á na ior ve va ii Yobu ibua man ujaki, shi ve wua ior mba ve kuran uzendenya mbara kpaa cii. Inyiar shi va wua iyôngo kua mbakuran í cii. Ica gbe ga yô, ior va ii urakumi shi wua mbakuran mbara kpaa. Ken masejime yô, Satan er zegehiar va ta sha iyou i ônov mba Yobu mba puev lu kimi la, i̱ yôhôr i̱ kighir ve, ve cii ve kpe. Er akaa ne er nahan cii kpa, Yobu lu di civir Yehova her tsô.—Yobu 1:13-22.

Yehova shi va nengen a Satan yô, á tese uwegh sha Yobu, a kaa a Satan ér Yobu ngu a̱ gbihi jighjigh u nan na ga. Satan shi ker ishô kaa ér: ‘Aluer ú nam ian wer m̱ er un kwagh iyol tsô, una venda ú sha ishigh yough je.’ Nahan Yehova na Satan ian ér a̱ tambe Yobu, kpa a̱ de woo un ga.

Yobu yange wa ishima a nyi kwagha, man er nan ve kwagh ne yange na saan Aôndo iyolo?

Satan man haa Yobu avav a nyoon  iyol ci ca cii. Avav ne huma vihi je gande, hanma or lu palegh un. Kwase u Yobu iyol na je kpa kaa a na ér: “Venda Aôndo, yô, kpe kera.” Ior mba ve senge ér ve mba akar a Yobu la kpa ve va vihi a vihi Yobu ishima, ve kaa a na ér a̱ shi nan kpa a er zege kwaghbo ve, a lu yan imba ican i cieryol ne ye. Nahan kpa, atsan man mnyoon u Satan va Yobu a mi cii, Yobu za hemen u civir Yehova a jighjigh u nan her.—Yobu 2:1-13; 7:5; 19:13-20.

Ú hen wer jighjigh u nan u Yobu la na ishima lu Yehova ker nena?— Kwagh la na saan Yehova iyol, gadia lu u Yehova una fatyô u kaan a Satan ér: ‘Nenge Yobu! Á civir mo sha ci u a soo u civir mo.’ We ú lu er Yobu nahan kpa, Yehova una fatyô u tôôn we tesen ikyav ér Satan ka oraie kpa?— Sha kpôô yô, ka kwagh u civirigh kpishi u nan ikyar sha ishenge i Satan a senge ér una gema hanma or nana de u civir Yehova la. Man kape Yesu kpa yange nenge ér kwagh ne ka ian i civirigh je la.

Mayange Ortesen Uhemban yange na Satan ian ér a̱ mee Un una er ma kwagh u bo ga. Hen ase sha mi tsô ú nenge er ikyav i yange tese la i na saan Ter na iyol yô! Nahan lu u Yehova una fatyô u hônon uwegh sha Yesu, kaan a Satan ér: ‘Nenge ka Wan wam je la! Á nam jighjigh a tenger ga, sha ci u m doo un ishima!’ Shi nenge er Yesu kpa á doo un sha ci u un er kwagh u doon Ter na ishima yô. Iember la na yô, Yesu wa ishima sha kon u i mande un la zan zan ar ken ku.—Mbaheberu 12:2.

Ú soo wer ú lu er Ortesen Uhemban nahan, we kpa ú na i̱ saan Yehova iyol kpa?— Aluer ka nahan yô, za hemen u henen kwagh u Yehova á soo ér u̱ eren la, shi na i̱ saan un iyol sha u eren kwagh shon!

Ôr kwagh u Yesu yange er ér i saan Aôndo iyol la, man kwagh u i gbe u se kpa se er la ken Anzaakaa 23:22-25; Yohane 5:30; 6:38; 8:28; man 2 Yohane 4.