Aver yem sha atineakaa

Aver yem sha mver u atineakaa

 ITYOUGH 47

Er Se Er Ve, Se Fa Ser Armagedon Mgbôghom Yô

Er Se Er Ve, Se Fa Ser Armagedon Mgbôghom Yô

Ú FA kwagh u í yer ér ikyav yô, shin ú fa ga?— Se vande ôron kwagh u ikyav i Aôndo yange na sha u tesen ér, mayange una kera shi tim tar sha mngerem ma deemee ga la ken Ityough ki sha 46 ki takerada ne. Shi, yange mbaapostoli pine ér Yesu a̱ na ve ikyav i ia tese ve vea fa ér, shighe kuma u una hide a va, shi shighe u mkurtar, shin mkur u tar ungun ne kpa mgbôghom yô.—Mateu 24:3.

Er lu u Yesu una lu shaala, or a fatyô u nengen a na ga yô, gba u ikyav ia lu i ior vea nenge a i̱, ia tese ér a hii u hemen yô. Nahan Yesu ôr akaa a mbahenen nav vea ver ashe u nengen a mi shin tar yô. Lu u akaa ne aa nguren eren yô, kwagh la una tese ér un hide je ve, shi un tema Tor sha, un hii u hemen kpaa.

Sha er una wase mbahenen nav ve̱ kav er í lu hange hange u kuran yô, Yesu kaa a ve ér: ‘Nenge nen sha tur man ikon cii, zum u ka ia hômon  yô, ne nenge a mi, nahan ne fa ayol a en ner, wanger­nyom mgbôghom hegen ve.’ Ú fatyô u fan shighe u wangernyom ú mgbôghom yô. Shi ú fatyô u fan shighe u Armagedon a mgbôghom la kpaa, zum u ú nenge a akaa a Yesu yange ôr la aa lu eren yô.—Luka 21:29, 30.

Kanyi kwagh Yesu yange lu tesen shighe u a ôr kwagh u kon u tur laa?

Se nenge ufoto mba ve lu sha peeji ngun man ugen u a dondo la, nahan se time sha akaa agen a Yesu yange kaa ér á kpa aa lu ikyav i tesen ér Tartor u Aôndo mgbôghom yô. Akaa ne cii aa eren kera yô, Tartor u  Aôndo sha ikyev i Kristu Orhemen u ú la, ua hembe ugomoti mbagenev mbara cii avur avur, er se vande ôron ken Ityough ki sha 46 kira nahan.

Nahan kenger ase ufoto mba ve lu sha upeeji mba uhar ken ijime la doo doo, nahan se ôr kwagh sha ufoto mba shon. Ú fatyô u ôron kwagh u akaa a ú nenge a mi ken ufoto heen ne ken Mateu 24:6-14 man Luka 21:9-11. Shi, ver ishima sha namba u i nger sha hanma foto la. I shi i nger namba shon sha hanma ikyumhiange í í pase foto shon la. De se nenge ase aluer avegher a ikyav shon i Yesu yange na la nga kuren nyian yô.

(1) Yesu kaa ér: “Né ungwa kwagh u utya man igwa i utya kpaa; . . . Gadia ikurior igen ia mough ityav a ikurior igen; tartor ugen kpaa ua mough ityav a tartor ugen.” Í lu nahan ú ungwa abaver sha kwagh u utya vee?—Yange i nôngo ityav mbi tar cii mbi sha môm mbila hii ken inyom i 1914 la zan zan ar ken inyom 1918 la, maa shi Ityav mbi Tar cii Mbi sha II mbila shi mbi pev, hii ken inyom i 1939 la zan zan ar ken inyom i 1945 la. Er i gba tar je lu hiin je i nôngo ityav mbi tseren tar cii je la! Mba nôngon ityav hanma ijiir cii sha tar nyian. Ka inja er hanma sev yô, ka se zer ungwan abaver a utya sha televishen man sha redio, shi se ôron kwagh u á ken pipa i tôôn abaver kpaa.

(2) Yesu shi kaa ér: “Ijen ia gba . . . sha ajiir kposo kposo.” Er alaghga ú vande fan nahan, ka hanma or cii nan zough a kwagh u nana ya, una kuma nan ga. Hanma sev yô, ior ka ve kpe udubu udubu sha ci u ve zua a kwaghyan ga.

(3) Yesu shi seer wener: ‘Ubombauangev vea lu sha ajiir kposo kposo.’ Ú fa kwagh u a lu bouange kpa?— Ka angev mbu ka mbu kôr ior wuee, mbu ka mbu a̱ taver yum yô, mbu wua ior kpishi kpaa yô. Bouange ugen u vihin tsung u yange kôr ior yô, lu angev mbu haan ahenga mbu ken Ishpania la, ken inyom i môm tseegh yange mbu wua ior je kuma er iorov miliôn 20 nahan. Sha shighe wase ne kpa, ior kpe  angev mbu í yer kôvola ér AIDS la hemba nahan. Shi iangev mbigenev kpa mbi woo ior udubu imôngo hanma inyom, er kyansa man angev mbu shimav kua iangev mbigenev kpaa nahan.

(4) Yesu shi na vegher ugen u ikyav shon, kaa ér: “Ityartenger ia lu sha ajiir kposo kposo.” Ú fa kwagh u a lu tar-tenger kpa?— Tar-tenger ka u na inya cii i tenger. Ayou a gba, shi ashighe agen yô, ior kpa ve kpe. Hii ken inyom i 1914 la je, ityartenger ngi zan hemen hanma inyom cii. Ú vande ungwan kwagh u ityartenger kpa?—

(5) Yesu shi kaa ér vegher ugen u ikyav la yô, a lu mseer u “mvende u vendan atindi una seer a seer” la. Ka nahan ve iv mbu ngee je i gande, shi ipila kpa i̱ ngee yum nahan ye. Hanma ijiir cii, ior ka ve lu mcie ér or nana va hembe iyou ve nana nyôr iv. Er yange i gba tar je, ifer man ipila ngi a̱ dumbur hanma ijiir sha tar ér i̱ dumbur hegen nahan ga.

(6) Shi Yesu na vegher ugen u vesen u ikyav la, a kaa ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:14) Aluer ú na “Loho u Dedoo” ne jighjigh yô, we kpa ú lu ôron mbagenev ú. Aluer ú ngu eren nahan yô, ú lu eren kwagh wer vegher ngun u ikyav shon ne kpa a̱ kure.

Kpa alaghga ior mbagenev vea kaa ér, kera cii kpa akaa a Yesu yange tsengaôron la cii vanden eren. Kpa, er i gba je, ambaakaa la cica cii nga a̱ vande kohol a er sha ajiir kposo kposo sha tar icin i môm nahan ga. Nahan ú kav inja i ikyav la kpa?— Inja na yô, shighe u se nenge akaa ne a lu zan hemen yô, tese ér kera shi ica ga tsô, a kar a botar ne kera, a gema a ve tar u he u Aôndo la.

Shighe u Yesu na ikyav shon ne, shi ôr kwagh u shighe ugen ken inyom kpaa. A kaa ér: “Yô, er nen msen, ayem a en a̱ de lu sha shighe u fam ga.” (Mateu 24:20) Ú hen wer inja i kwagh u yange ôr heen ne  yô, ér nyi?

Aluer gba u or nana yevese ma aahe sha shighe u fam, u zende ka u er ican la nahan, ú hen wer kanyi ia fatyô u erene?— Aluer nan fatyô u yevese waren je kpa, a lu sha ican kpishi. Aluer uraahumbe wua or sha ci u nan timbir eren akaa agen, nan mough zende faa ga yum nahan, á lu kwagh u kunya gaa?

Yesu yange ôr kwagh u or nôngon ér nana yevese sha shighe u fam nahan, kanyi kwagh jim yange lu tesene?

Nahan ú kav kwagh u Yesu yange lu ôron ve, kaa ér or a̱ de keghen zan zan fam u̱ gbaan cii ve nana mough u yevese ga la ve ga?— Yange lu kaan a vese ér, er se fe ser Armagedon mgbôghom yô, gba u se kera timbir a timbir ga je, se er kwagh u una tese ér Aôndo doo se ishima yô, se civir un hegen je. Aluer se timbir yô, alaghga shighe a kar. Ga yô se hingir vough er ior mba sha ayange a Mngerem ma Deemee la nahan, yange ve ungwa kwagh u Noa lu ôron ve la, kpa ve nyôr tso la ga.

Se been heen yô, maa se ôr er ityav mbi Armagedon mbila mbi a kar kera ve, tar ua lu la. Se hen se fa kwagh u Aôndo a ver sha ci u se mba a doo se ishima, se lu civir un la cii yô.

Angan ka avur a ruamabera agen a a tese ér Armagedon mgbôghom je ne: 2 Timoteu 3:1-5 man 2 Peteru 3:3, 4.