Aver yem sha atineakaa

Aver yem sha mver u atineakaa

 VEGHER 54

Yehova Yange Wa Ishima a Yona

Yehova Yange Wa Ishima a Yona

Nineve lu geri u vesen ken tar u Ashiria. Ior mba hen geri la gema wa afer kpishi. Nahan Yehova kaa a profeti na Yona ér a za ken Nineve, a za ta ior mbara icin ve de afer a ve lu eren la. Kpa Yona yevese yem vegher ugen. A za nyôr tso u zan Tarshishi, tso la maa mough gba yemen ken zegemnger.

Tsô zegemnger za hii u kpianger sha agee, nahan cier mbanahan tso mbara iyol kpishi. Maa ve er msen hen mbaaôndo vev, ve pine ér: ‘Ka nyi jim i ne ve kwagh a tser se nahana?’ Ken masejime yô, Yona kaa a ve ér: ‘Ka ibo yam. M ngu yevese mer me palegh kwagh u Yehova a kaa ér mo m er yô. Kendem nen shin zegemnger, tsô una de u kpianger.’ Mbanahan tso mbara yange ve soo u dughun Yona shin tso kenden un shin zegemnger la ga, kpa Yona zer kaan a ve ér ve kende un shimi. Mba kenden Yona shin zegemnger yô, zegemnger maa de u kpianger.

Yona yange hen ér un kpe a kpe je. Er lu miren yemen shin atô u zegemnger la, a er msen hen Yehova. Yehova maa tindi ishu i vesen za mena un, kpa a kpe ga. Nahan a er msen ken iyav mbu ishu la, a zamber a Yehova ér: ‘M ngu tôndon zwa a we mer me ungwan imo you hanma shighe cii.’ Yehova yange kura Yona ken iyav mbu ishu la zan zan ayange atar, maa na ian ishu la za suwa un sha kpetar.

Er Yehova war Yona yô, kwagh bee a bee jee? Yange kera gba u una  za Nineve gaa? Yange gba u una za. Yehova shi kaa a Yona ér a za ken Nineve. Kwa ne yô, Yona lumun u zan. Yange za ôr ior mba wan afer mbara ér: ‘Shi ayange 40 tseegh tsô a tim Nineve.’ Tsô kwagh er, u Yona hen ér una er ga yô. Ior mba ken Nineve ungwa loho la maa ve de u eren afer. Tor u Nineve yange kaa a ior nav ér: ‘Zamber nen a Aôndo, shi gema nen asema. Tsô alaghga una kera tim se ga.’ Yehova nengen ér ior i Nineve gema ishima yô, a kera tim ve ga.

Tsô ishima vihi Yona ér i tim geri la ga yum. Gema nenge ase: Yehova yange wa ishima a Yona shi zungwe un mhôônom, kpa Yona yô, kunya kôr un a ior mba ken Nineve mbara ga. Yange due ken geri la va tema hen mure u ankon ugen lu yuen tsun tsun. Iti i ankon la ér ishilajôngo. Kpa fese je maa ankon shon kpe, nahan Yona nyoon ishima. Tsô Yehova kaa a na ér: ‘U hemba wan ishilajôngo ne ikyo a ior i Nineve. M zungwe ve mhôônom, nahan ve war.’ Yehova lu kaan ér nyi? Lu kaan ér ior i Nineve hemba gban un kwagh a hanma inja kon cii.

‘Yehova ngu wan ishima a ven, mayange sar Un u mbagenev ve̱ tim ga, kpa ior cii ve̱ gema asema.’​—⁠2 Peteru 3:9