Aver yem sha atineakaa

Aver yem sha mver u atineakaa

 VEGHER 47

Yehova Taver Eliya Ishima

Yehova Taver Eliya Ishima

Yesebel yange ungwan kwagh u er uprofeti mba Baal la yô, ishima vihi un tsung. Nahan a tindi loho hen Eliya, a kaa ér: ‘Kper a wua u, er uprofeti mba Baal mbara nahan.’ Yange cier Eliya iyol, maa a yevese a yem ken ikyôngo. A za er msen, a kaa ér: ‘Yehova, kumam hegen, de m gba kpen tsô.’ Er Eliya vôr kpishi yô, a gba mnyam hen itinekon.

Tsô ortyom ugen va nder Eliya, ôr a na teghelee ér: ‘Mough sha ya kwagh.’ Eliya moughon yô, a nenge a isheghmnger, shi i ver akpukpa sha awen a tseen. Tsô a ya shi a ma, a hide a gba yaven. Ortyom la shi va nder un, kaa a na ér: ‘Ya kwagh, sha er u zua a agee, u za hemen a zende wou yô.’ Tsô Eliya shi seer yan kwagh. Been yô, a mough a gba yemen. Lu zenden tetan man tugh, zan zan ayange 40. Tsô a za nyôr hen Uwo u Horebi. Maa a kar a za yav ken bar. Kpa Yehova ôr kwagh a na, a pine un ér: ‘Eliya, ka nyi u eren heene?’ Eliya kaa a na ér: ‘Mbaiserael venda u eren kwagh u yange ve tôndo zwa a we la. Ve vihi atse ou a nanden naagh sha mi, shi ve wua uprofeti ou kpaa. Mo kpa mba nôngon ér vea wuam.’

Yehova kaa a na ér: ‘Due tile sha uwo ne.’ Za ve va tilen sha zwa u bar la yô, a nenge zegeahumbe va kar hen bar la yem. Ahumbe la nga karen cii yô, tar tenger, maa usu za va. Akaa ne nga eren cii yô, Eliya ungwa imo i teghelee. Maa a gema ikyondo na a yisa ishigh a mi, a due ken bar la a tile ken won. Yehova maa pine un er i hii ve a lu yevese yô. Eliya kaa a na ér: ‘Ka mo tseegh m mase shin ye.’ Kpa Yehova kaa a na ér: ‘Ka we tseegh ga. Iorov 7,000 ken Iserael mba civir mo her. Za shighe Elisha mkurem a lu profeti sha ityough you.’ Fese je maa Eliya za er kwagh u Yehova kaa ér a er ne. U hen wer aluer we kpa u ngu eren kwagh u Yehova a soo nahan, una wase u ga he? Een una wase u. De se fa kwagh ugen u yange er shighe u ura kera nôô ken Iserael ga hemba anyom atar la yô.

“Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun.”​—⁠Mbafilipi 4:6