Aver yem sha atineakaa

Aver yem sha mver u atineakaa

 VEGHER 25

Tabernakel, Ijiir i Civir Aôndo Her

Tabernakel, Ijiir i Civir Aôndo Her

Shighe u Mose lu sha Uwo u Senai la, Yehova kaa a na ér a er tenti, shin ityumbe i hange hange igen, ape Mbaiserael vea civir Yehova yô. I yilan tenti shon ér tabernakel. Lu u Mbaiserael vea zaan a tabernakel hanma ijiir i ve lu za haan afo cii.

Yehova kaa a Mose ér: ‘Ôr ior ve̱ na akaa a ve fetyô cii, i er tabernakel a mi.’ Mbaiserael na zenaria man azurfa man togula man awen a varen sha akaa kua awen a injaa agen. Shi ve na akondo a pupuu a kôngor man a sha aive a ivo, shi ve na akôv a inyam kua akaa agen kpishi. Yange ve na akaa ngee je gande Mose kaa a ve ér: ‘Kuma nahan! De nen u van a mi.’

Yange nomso man kasev kpishi mbafan tomaveegh wase tom u eren tabernakel la. Yehova yange na ve kwaghfan, nahan ve er tom shon tsembelee. Mbagenev lu tan mou, mbagenev lu tumen akondo, mbagen di lu eren hwe sha mi. Mbagenev lu mbaeren tom sha zenaria man mbakuan awen kua mbaeren hwe sha ikyon.

Yange ve er tabernakel la vough er Yehova tese ve nahan. Ve tume ikyondo i yisan i doonashe tsung, ve ta ken tabernakel la. Ikyondo la pav tabernakel ker avegher ahar. Vegher u môm la i yilan ér Icighanjiir, vegher ugen la di i yilan ér Icighanjiir u Hemban Cii. Areki u ikyuryan lu ken Icighanjiir u Hemban Cii la, i er un sha kon u saa man zenaria. Daarimenger man tebul man atse a nanden kwaghhumandoon gema lu ken Icighanjiir la. Tasa u togula man atse a nanden naagh sha mi, a vesen, di lu ken tembe u tabernakel u ken won. Areki u ikyuryan la lu umbur Mbaiserael kwagh u ve  tôndo zwa ér vea civir Yehova la. U fa kwagh u a lu ikyuryan kpa? Ka kwagh u hange hange u or nan tende zwa u eren a orgen yô.

Yehova yange tsua Aron vea ônov nav mba nomso ér ve lu upristi, ve eren tom ken tabernakel. Nahan lu u vea nengen sha tabernakel shi vea naan Yehova iniav her. Kpa lu Aron, u lu pristi u tamen la tseegh i na un ian i nyôron ken Icighanjiir u Hemban Cii la ye. Hanma inyom yange a nyôr ker kwa môm, a za na nagh sha ci u asorabo a na, man asorabo a tsombor na, kua asorabo a ikyurior i Iserael jimin cii.

Yange Mbaiserael due ken Igipiti tsa kuma inyom i môm man ve er tabernakel ye.Tabernakel shon maa lu ijiir ve i civir Yehova.

Yange iengem i Yehova iv ken tabernakel la sha u tesen ér a doo un, shi Yehova er ibeenegh ki lun er ityough nahan sen va tile sha ijime i tabernakel shon. Ape ibeenegh kira yange kia za tema sha tabernakel cii yô, Mbaiserael ve haa afo ve lu her zan zan, saa iyange i ki mough la. Yange kia moughon sha tabernakel sha yô, ve fa je ér shighe kuma u moughon ve. Nahan ve sagh tabernakel la, ve tôô un ve dondo sha ibeenegh kira, ve gba yemen ape ki lu zan la.

“Shi m ungwa zegeimo due ken ikyônough ki torough kira kaa er: Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve.”​—⁠Mpase 21:3