Aver yem sha atineakaa

Aver yem sha mver u atineakaa

 VEGHER 95

Kwagh Môm Fatyô u Yangen Ve Ga

Kwagh Môm Fatyô u Yangen Ve Ga

Orgen u i mar un je zende ga yô, yange a tema hen hunda u vesen u nyôron ken tempel, a sônon ior kwagh. Sha iyange igen la, a nenge Peteru man Yohane ve lu nyôron ken tempel atetan. Maa a kaa a ve ér: ‘Nea lumun yô, nam nen kwagh.’ Peteru gema kaa a na ér: ‘Kwagh u m lu a mi u nan we ne hemba inyaregh. Mough sha zende, ken iti i Yesu!’ Peteru za kôr un mough a na sha, maa a hii u zenden! Yange ikpelaior i i lu her la ember je yô, mbagenev kpishi hingir mbananjighjigh.

Kpa upristi kua Mbasadushi yô, yange kwagh shon doo ve ga. Nahan ve kôr mbaapostoli mban, ve yem a ve hen Mkohol u Mbaajiriv (Atejir u Mbatesen Kwaghaôndo), ve za pine ve ér: ‘Ka an nan na ne tahav mbu been or ne angeva?’ Peteru kaa a ve ér: ‘Se zua a tahav mbun hen Yesu, u ne wua la.’ Mbatesen kwaghaôndo mbara maa nande a ve kaa ér: ‘De nen u ôron kwagh u Yesu!’ Kpa mbaapostoli kaa a ve ér: ‘Gba hange hange u se ôr kwagh u Yesu. Nahan ka u se de ga.’

Mba va pasen Peteru man Yohane yô, ve yem fese ve za ôr mbahenen mbagenev mbara kwagh u a ze hemen yô. Tsô ve cii ve er msen, ve sôn Yehova ér: ‘Wea lumun yô, na se ishima i taver sha er se za hemen u eren we tom yô.’ Yehova maa na ve icighan jijingi na, nahan ve za hemen u pasen kwagh shi been ior iangev. Kwagh ne na ior kpishi seer nan jighjigh. Maa Mbasadushi gba iyuhe je ve hii u kôron mbaapostoli za kenden ve ken purusu. Kpa tugh mbu ilen yô, Yehova tindi ortyom va bugh ihinda i purusu la, shi kaa a mbaapostoli mbara ér: ‘Hide yem nen ken tempel, za tese nen ker.’

Kper nan pepe maa i za kaa Atejir u Mbatesen Kwaghaôndo la ér: ‘I gesa ihinda i purusu cii, kpa ior mba ne ker ne wuhe ker la due yem! Mba ken tempel, mba tesen ior ker!’ Tsô shi i za kôr mbaapostoli i va a ve hen Atejir u Mbatesen Kwaghaôndo la. Pristi u tamen kaa a ve ér: ‘Se  ta ne icin ser de nen u ôron kwagh u Yesu!’ Kpa Peteru gema kaa ér: ‘Gba u se hemba ungwan imo i Aôndo u a lu tor u hemban la a imo i ior.’

Yange ishima vihi mbatesen kwaghaôndo mbara je ve soo u wuan mbaapostoli kera. Kpa Orfarishi ugen iti na ér Gamaliel, mough tile ken atejir la kaa ér: ‘Er nen teghelee! Adooga tsô Aôndo ngu a ior mban. Mimi je, ne soo u nôngon num a Aôndo?’ Yange ve ungwa kwaghwan na la. Nahan ve mase gbidyen mbaapostoli mbara sha mbaakpa, shi ve seer tan ve icin ér ve de u pasen kwagh, maa ve na ve ian ér ve yem. Kpa mbaapostoli mbara de ga. Ve za hemen u pasen loho u dedoo ken tempel man sha uya uya a ashe a cian shio.

‘Gba u se hemba ungwan imo i Aôndo u a lu tor u hemban la a imo i ior.’—Aerenakaa 5:29