Aver yem sha atineakaa

Aver yem sha mver u atineakaa

 VEGHER 74

Yesu Hingir Mesiya

Yesu Hingir Mesiya

Cii man Yesu hingir Mesiya yô, Yohane lu vanden pasen kwagh kaan ér: ‘Orgen u hemban mo ngu van.’ Yesu va zurum anyom 30 yô, a mough ken Galilia a va hen Ifi u Yordan, ape Yohane eren ior batisema la. Yange soo ér Yohane a er un batisema, kpa Yohane kaa a na ér: ‘Mo m kuma u eren we batisema ga. Ka we u erem batisema ye.’ Yesu kaa a Yohane ér: ‘Yehova soo ér we u erem batisema.’ Tsô ve uhar cii ve hungwa shin Ifi u Yordan. Yohane maa mir Yesu shin mnger vindi vindi.

Yesu duen shin mnger kera yô, a gba eren msen. Maa i bugh sha, jijingi u Aôndo maa sen sha a na er ka ikyungugh nahan. Tsô imo i Yehova due sha, kaa ér: ‘We u ngu Wan wam u ishima ishima. Ka we m tsua ye.’

Yange jijingi u Yehova va teman sha Yesu yô, a hingir Kristu, shin Mesiya. Hen shighe ne, kuma u Yesu una hii tom u Yehova tindi un shin tar ér a va er la.

Yesu eren batisema kera yô, a kar fese a yem ken taaikyôngo, a za tsa ken toho ayange 40. Za hiden yô, a kar a za hen Yohane. Yesu za zurum a Yohane yô, Yohane kaa ér: ‘Ka Waniyôngo u Aôndo, u una va tôô isholibo i tar kera je ne.’ Yohane ôron kwagh ne yô, ior fa je ér Yesu ka Mesiya. U fa kwagh u yange er Yesu shighe u lu ken taaikyôngo la kpa? De se nenge.

‘Imo due Sha kaa ér: We, U ngu Wan Wam u ishima ishima, ka We ishima i doom a We yum ye.’​—⁠Marku 1:⁠11