Aver yem sha atineakaa

Aver yem sha mver u atineakaa

 VEGHER 2

Aôndo Gba Uumace mba Hiihii, Lu Nomsoor man Kwase

Aôndo Gba Uumace mba Hiihii, Lu Nomsoor man Kwase

Aôndo yange er sule hen ijiir igen, i yilan ijiir la ér Eden. Sule la lu a ikyon ker kpishi, kua ufaluwa man annyamev. Maa Aôndo er Adam, orumace u hiihii la sha vuulevu, shi fehe un humbe ken ahenga. U fa kwagh u yange er kpa? Or la maa hingir oruma! Yehova maa gema sule u yange er la wa Adam sha ikyev, shi Aôndo kaa a na ér a ii annyamev cii ati.

Yehova yange wa Adam tindi u vesen ugen. A kaa a na ér: ‘U fatyô u yan atam a ikyon i ken sule ne cii, ka kon môm tseegh de ye atam a u ga ye. Sha ci u aluer u ya a yô, u kpe.’

Shighe karen yô, Yehova kaa ér: ‘Me er or u wasen Adam.’ Tsô Yehova er Adam yav hungur mnyam kpum kpum. Maa a tsuwa hwan u Adam a gema a er kwase a mi, a na un. Iti i kwase shon ér Ifa. Ifa maa hingir  kwase u Adam. Adam yange nenge kwase na nena? Yange saan un iyol je kaa ér: ‘Kwagh u Yehova a er ne ka sha hwan wam je! M zua a or u lun er mo nahan ve!’

Yehova yange kaa a Adam man Ifa ér ve mar ônov ve iv tar. Yange soo ér ve eren tom imôngo, man tom shon lu u geman tar cii hingir paradiso, shin ijiir i doonashe er sule u Eden la nahan. Kpa va kera lu nahan ga. Ka nyi yange i ere? De se seer timen sha mi ken ityough ki ki dondo ne.

“Un u A er ve sha hiihii la je, A er ve nomsoor kua kwase.”⁠—⁠Mateu 19:4