Aver yem sha atineakaa

Aver yem sha mver u atineakaa

Kwaghôron u sha 91: Yesu Tese sha Uwo

Kwaghôron u sha 91: Yesu Tese sha Uwo

NENGE Yesu ngun a tem heen ne. Ngu tesen ior mban cii sha uwo ken Galilia. Mba ve hembe teman ikua a na mbara ka mbahenen nav. A tsua 12 ken a ve sha u ve̱ lu mbaapostoli. Mbaapostoli ka mbahenen mba Yesu mba ishima ishima. Ú fa ati a ve kpa?

Yesu ngu tesen

U môm ka Shimon Peteru man anngô na Anderia. Nahan mbagenev yô ka Yakobu kua Yohane, ve kpaa ka anngôôv. Apostoli ugen kpaa iti na er Yakobu, man shi ugen kpaa mba yer er Shimon. Mbaapostoli uhar ati ave er Yuda. U môm ka Yuda Isekarioti, man Yuda ugen la mba yer un sha iti i genegh er Tadeu. Shi mbagenev yô ka Filibu man Natanael (shi mba yer un kpaa er Bartolomeu), man Mateu man Toma.

Er mba hidi ken Samaria kera yô, Yesu maa hii u pasen kwagh kwa u hiihii: ‘Tartor u sha mgbôghom.’ Ú fa kwagh u tartor la ú lu kpa? Ka gomoti u Aôndo jim jim. Yesu ka tor u ú. Una hemen sha man una va a bem shin tar. Tar cii a gema ú ua hingir paradiso u doonashe sha ikev i tartor u Aôndo.

Heen ne Yesu ngu tesen ior kwagh u tartor shon la. ‘Kape eren nen msen je ne,’ ngu pasen ve nahan. ‘Ter wase u sha, i tsegha iti you. Tartor wou u̱ va. I̱ er ishima you shin tar, vough e̱r i eren sha nahan.’ Ior kpishi mba yer msen ne er ‘Msen u Ter.’ Mbagenev ka ve yila er ‘Ter Wase.’ Ú fatyô u ôron msen ne cica kpa?

Yesu shi ngu tesen ior sha er vea eren a mbagenev yô. ‘Eren nen a mbagenev vough e̱r ne soo ner ve̱ eren a ven nahan,’ a kaa nahan. Ka i doo shighe u mbagenev ka vea e̱r a we dedoo yô ga he? Nahan yô, Yesu ngu kaan er, se̱ eren kwagh a ior mbagenev kpaa dedoo. Á lu kwagh u doon kpishi je ken tar u paradiso la shighe u hanmaor nana lu eren kwagh ne nahan ga he?

Mateu ityouv 5 zan zan 7; 10:1-4.



Mbampin

  • Er ú nenge foto ne nahan, ka han Yesu a tem a lu tesen ior mbana, man ior mba ve hembe teman ikyua a na la ka unô?
  • Ati a mbaapostoli mba 12 mbara ér nyi?
  • Tartor u Yesu á lu pasen kwagh u ú la kanyi?
  • Yesu tese ior mbara ér ve eren msen ve sônon nyi?
  • Yesu yange tese ér ior ve eren a mbagenev nena?

Mbampin mbagenev

  • Ôr Mateu 5:1-12.

    Ka sha nyi igbenda nahan se tese ser se mba mbaibanave ken jijingi? (Mat. 5:3; Rom. 10:13-15; 1 Tim. 4:13, 15, 16)

  • Ôr Mateu 5:21-26

    Mateu 5:23, 24 pase var var ér mlu wase vea anmgbianev asev una bende a ikyaryan yase vea Yehova nena? (Mat. 6:14, 15; Ps. 133:1; Kol. 3:13; 1 Yoh. 4:20)

  • Ôr Mateu 6:1-8

    Ka aeren agen a or nengen iyol i nan ér nan ngu perapera a nyi i gbe u Mbakristu vea palegha? (Luka 18:11, 12; 1 Kor. 4:6, 7; 2 Kor. 9:7)

  • Ôr Mateu 6:25-34.

    Yesu tese se nyi sha kwagh u suur sha Yehova ser á kure ugbayol asev mba iyolough laa? (Eks. 16:4; Ps. 37:25; Fil. 4:6)

  • Ôr Mateu 7:1-11.

    Injakwagh i̱ í ôr ken Mateu 7:5 wang la tese se nyi? (Anz. 26:12; Rom. 2:1; 14:10; Yak. 4:11, 12)