Aver yem sha atineakaa

Aver yem sha mver u atineakaa

Kwaghôron u sha 89: Yesu Wanger Tempel

Kwaghôron u sha 89: Yesu Wanger Tempel

YESU ngu heen inja e̱r ishima vihi un kpishi yô, shin ngu nahan ga? Ú fa er i hii ve ishima i vihi un yum nahan kpa? Ka sha ci u ior mba ve lu ken tempel u Aôndo ken Yerusalem mban ne ve wa hua kpishi. Mba nôngon sha u vea e̱r inyaregh kpishi hen ior mba ve ve heen sha u va civir Aôndo ne.

Yesu ngu mgbeghan utebul mba inyar kera

Ú nenge agumabua kua iyôngo man mkungum mara kpa? Ka shami, ior mbara mba teen ilev mbin ken atô u tempel heen jim jim. Ú fa ityôkyaa i i ne kpa? Ka sha ci u gba u Mbaiserael vea na nagh hen Aôndo sha ilev man inyon.

Tindi u Aôndo kaa er shighe u Oriserael nan er isholibo yô, nana na nagh hen Aôndo. Man shi ashighe agenegh kpaa lu a yange i gba u Mbaiserael vea na nagh yô. Kpa ka hana man Oriserael nana zua a inyon man ilev sha u nan nagh-a?

Mbaiserael mbagenev yange ve lu a inyon man ilev vev. Nahan ve fatyô u nan nagh a min. Kpa Mbaiserael kpishi ve lu a ma inyon shin ilegh ga. Man shi mbagenev yange ve lu ica a Yerusalem gande u vea va a ilev vev ken tempel. Nahan ior ve va heen ve va yam ilev shin inyon i kwagh a gbe ve shami la. Kpa ior mban ve lu ngohol inyaregh hen ior lu ngeen ganden ikyaa inya. Yange ve lu mbien ior. Heela tseegh ga, doo u vea lu teen akaa ken atô u tempel u Aôndo ga.

Ka kwagh u a ne Yesu ishima vihin yum je ne. Nahan a mgbegha utebul mba ior mba inyaregh mbara man inyaregh vev haa kera. Shi, a tume akpa sha ikar man a zenda ilev mbira ken tempel kera. A kaa a mba ve lu teen mkungum mbara er: ‘Due nen a ma heen kera! De gem nen iyou i Terem i hingir ne ijiir i eren inyaregh kpishi ga.’

Mbadondon mba Yesu mbagenev mba vea na heen ken tempel ken Yerusalem. Kpiligh ve iyol sha kwagh u ve nenge Yesu lu eren ne. Tsô ve umbur ijiir ken Bibilo i i ôr kwagh u Wan u Aôndo er: ‘Ishima i veren sha iyou i Aôndo ia yegh ken a na er ka usu nahan’ la.

Er Yesu lu heen ken Yerusalem lu eren iniongo i Paseka ne, a e̱r uivande kpishi. Been kera yô, Yesu undu Yudia man a mough yemen ken Galilia. Kpa er a lu yemen sha gbenda la, a kar ken Samaria. De se nenge kwagh u a e̱r keera yô.

Yohane 2:13-25; 4:3, 4.



Mbampin

  • Er nan ve yange i teen ilev ken Tempele?
  • Hii nan ve yange ishima vihi Yesu yumu?
  • Kanyi kwagh ú nenge Yesu a lu eren ken foto heen nee, man á wa mba ve lu teen mkungum la tindi ér ve er nyi?
  • Mbadondon mba Yesu yange ve nenge kwagh u lu eren la nahan, kwagh la umbur ve nyi?
  • Yesu yange mough u yemen ken Galilia yô, á kaa haregh u hana?

Mpin ugen

  • Ôr Yohane 2:13-25.

    Er se tim sha er ishima yange i vihi Yesu a mbamusaninyaregh ken tempel nahan, ka mnenge u vough u nyi i doo u se lu a mi sha kwagh u eren kpenga ken Iyou i Tartor? (Yoh. 2:15, 16; 1 Kor. 10:24, 31-33)