Aver yem sha atineakaa

Aver yem sha mver u atineakaa

Kwaghôron u sha 87: Wanakiriki Yesu ken Tempel

Kwaghôron u sha 87: Wanakiriki Yesu ken Tempel

NENGE ase wanakiriki u á lu ôron kwagh a ior mbatamen mban ne. Ior mban ka mbatesen ken tempel u Aôndo ken Yerusalem. Man wanyenomso la di ka Yesu. A vese hegen kpeghee. Hegen ngu anyom 12.

Kpiligh mbatamen mban iyol er Yesu á fe akaa kpishi sha kwagh u Aôndo man akaa a i nger ken Bibilo yô. Kpa er nan Yosev man Maria ve lu heen ga? Mba hana? De se hen se fa.

Wanakiriki Yesu ngu ôron kwagh a ior mbatesen

Hanma inyom yô Yosev zaan aa tsombor na ken Yerusalem sha ci u iniongo i tseghan i i yer er Paseka la. Ka zende u caa kpishi mough ken Nasareti yem ken Yerusalem. Or môm nan lu a mato ga, man agirgi a dogo kpaa lu ga. Yange ve lu a mi sha ayange la ga. Ior kpishi ve zenden angahar, nahan i tôôn ve ayange atar nahan u za aren ken Yerusalem.

Hen shighe ne Yosev lu a zege tsombor. Nahan anngôôv mba Yesu mba kasev kua mba nomso mbakiriki mbagenev lu mba a nenge sha a ve yô. Ka shami, ken inyom ingin yô Yosev kua Maria ve mough sha u hiden yemen ken ya ken Nasareti. Ve hen er Yesu ngu vea mbagenev mba ve lu yemen nongo yô. Kpa mba tilen sha iyangebeen yô, ve nenge a Yesu ga. Ve ker un hen atô u anmgbianev vev kua ahuraior a ve, kpa lu vea ve ga! Nahan ve hide ve yem ken Yerusalem sha u za keren un ker.

Ken masejime yô ve zua a Yesu heen vea mbatesen. Ngu keghen ato hen ave shi pinen ve mbampin. Man kpiligh ior mbara cii iyol sha imba mfe u Yesu á lu a mi la. Kpa Maria kaa er: ‘Wana, er nan ú er a vese nahana? Teru man mo se lu keren we a ishima i nyian je.’

‘Er nan man ne keren mo?’ Yesu pine nahan. ‘Ne kera fa er i lu u me lu ken iyou i Terem gaa?’

Een, Yesu soo er una lu hen ape una lu henen kwagh u Aôndo yô. Kape i doo u se kpaa se henen la ga he? Hide ken ya na ken Nasareti kpaa, Yesu zaan mbamkombo mba sha mciviraôndo hanma sati. Sha er yange a kegh ato hanma shighe yô, a hen akaa kpishi ken Bibilo. De se lu nen e̱r Yesu nahan shi se dondo ikav na.

Luka 2:41-52; Mateu 13:53-56.



Mbampin

  • Er ú nenge a Yesu ken foto ne nahan, ú hen wer ngu anyom a me, man ka han á lu?
  • Yosev eren nyi vea tsombor na hanma inyomo?
  • Hii nan ve Yosev man Maria lu yemen ken ya, ve yem je kuma iyange i môm jimin kpa ve va cin ve hide ken Yerusaleme?
  • Yosev man Maria yange ve za zua a Yesu hana, man hii nan ve mfe u Yesu la kpiligh ior mba ve lu hen ijiir la iyol yumu?
  • Yesu yange kaa a ngô na Maria ér nyi?
  • Se lu kaven Yesu sha u henen kwagh u Aôndo nena?

Mbampin mbagenev

  • Ôr Luka 2:41-52.

    Shin er Tindi yange kaa ér i lu nomso tseegh ve zaan uiniongo mba i eren sha hanma inyom la nahan kpa, ka ikyav i dedoo i nyi Yosev man Maria ve ver mbamaren nyiana? (Luka 2:41; Dut. 16:16; 31:12; Anz. 22:6)

    Yesu ver mbayev mba kiriki nyian ikyav i dedoo ér ve ungwan imo i mbamaren vev nena? (Luka 2:51; Dut. 5:16; Anz. 23:22; Kol. 3:20)

  • Ôr Mateu 13:53-56.

    Ka anmgbianev mba Yesu unyiin mba sha ngô mba nyi i ter ati a ve ken Bibilo, man iorov uhar ken ve mba unyiin mban va er nyi tom ken tiônnongo u Kristu? (Mat. 13:55; Aer. 12:17; 15:6, 13; 21:18; Gal. 1:19; Yak. 1:1; Yuda 1)