Aver yem sha atineakaa

Aver yem sha mver u atineakaa

Kwaghôron u sha 55: Wanye u Kiriki Er Aôndo Tom

Kwaghôron u sha 55: Wanye u Kiriki Er Aôndo Tom

WANAKIRIKI ne ka u doonashe ga he? Iti na er Samuel. Man or u a pende uwegh nagh sha ityough ki Samuel ne ka Eli, pristi u tamen u Iserael. Mbagenev mbara ka ter u Samuel Elkana man ngô na Hana mba ve lu van a Samuel hen Eli yô.

Samuel va sha ishigh ki pristi u tamen Eli

Samuel ngu di anyom anyiin shin ataan tsô. Kpa ka u una lu heen ken tabernakel u Yehova vea Eli man upristi mbagenev mbara. Ka sha ci u nyi ve Elkana man Hana vea na or u nan lu iyev er Samuel nahan sha ci u eren Yehova tom ken tabernakele? De se nenge.

Anyom a karen kpeghee a kwagh lu a lu nahan ga la Hana lu a ishimavihin kpishi. Ityôkyaa yô yange fatyô u maren wan ga cii, man wan sar un, kpen kpen je. Nahan iyange igen yô er Hana lu zan ken tabernakel u Yehova yô, a er msen er: ‘Kpe ahii, Yehova, de hungur a mo ga! Aluer ú nam wannomso yô, m tôndozwa mer me na un sha u a er ú tom sha ayange a uma na cii yô.’

Yehova ungwa msen u Hana la, nahan iwer ngi karen kpeghee yô a ma̱r Samuel. Wanakiriki ne yange doo Hana ishima kpishi, nahan a hii u tesen un kwagh u Yehova er á lu iyev heregh la je. Yange kaa a nom na er: ‘Er Samuel una vesen una karen u a yese un a yese je tsô, me tôô un me za a na ken tabernakel sha u a̱ za er Yehova tom heregh yô.’

Ka kwagh u se nenge Hana man Elkana ve lu eren hen foto heen je ne. Man er mbamaren mba Samuel ve tese un vie vie yô, un kpaa saan un iyol u eren Yehova tom heen hen tenti u Yehova. Hanma inyom yô Hana kua Elkana ka ve va sha u va civir hen icighan tenti ne, man shi u va nengen a wanakiriki ve ne. Shi hanma inyom yô Hana ngu a va a gôgôriga u he u a kor sha ci u Samuel yô.

Er anyom lu karen ken hemen yô, Samuel za hemen u eren tom ken tabernakel u Yehova, man Yehova kua ior cii kpaa ve soo un. Kpa ônov mbanomso mba pristi u tamen Eli Hofeni man Pinehashi ve lu ior mba injaav ga. Ve eren aferakaa kpishi, shi ve na mbagenev kpaa u hemban Yehova ato. Doo u Eli ma a dugh ve sha tom u upristi kera, kpa a dugh ve ga.

Wanakiriki Samuel na ian er nyityô kwaghbo i̱ i lu zan hemen ken tabernakel yô i̱ na un u den u eren Yehova tom ga. Kpa sha ci u lu ior kpeghee tseegh Yehova doo ve ishima sha mimi yô, Yehova kera lam aa ma orumace ga shighe lihe. Er Samuel vesen seer kpeghee yô ka kwagh u e̱r je ne:

Samuel lu yaven ken atô u tabernakel shighe u imo nder un la. A lumun er: ‘Mo ne.’ Maa a mough a yevese a za̱ hen ape Eli lu la, a za kaa er: ‘M va ve, gadia u yilam.’

Kpa Eli kaa er: ‘M yila u ga; hide za yav.’ Nahan Samuel hide za̱ yav.

Tsô shi i yila un kwa u sha uhar: ‘Samuel!’ Nahan Samuel shi mough sha yevese za hen Eli. ‘M va ve, gadia u yilam,’ a kaa nahan. Kpa Eli kaa er: ‘M yila u ga, wan wam. Shi hide za yav.’ Nahan Samuel shi hide yem za yav.

‘Samuel!’ imo la shi yila kwa u sha utar. Nahan Samuel yevese za hen Eli. ‘M va ve, gadia u yilam kwa ne keng je,’ a kaa nahan. Eli fa hen shighe ne je e̱r i lu Yehova a lu yilan un yô. Nahan a kaa a Samuel er: ‘Hide za yav, man aluer shi una yila u yô, kaa wer: “Gba ôron kwagh tsô, Yehova, gadia wanakiriki wou ngu ungwan.” ’

Ka kwagh u Samuel ôr je ne shighe u Yehova shi yila un yô. Tsô Yehova kaa a Samuel er un ngu tsahan Eli kua ônov nav mbanomso mbara cii. Shighe karen yô Hofeni man Pinehashi ve kpe ken ityav imôngo a Mbafiliti, man er Eli ongo kwagh ne yô a gba, a sombo mon man un kpaa a kpe. Nahan kwaghôron u Yehova iv shami vough.

Samuel vese, man a hingir orjir u Iserael u masetyô. Shighe u a bee iyol kera yô, ior ve kaa a na er: ‘Na se tor u nana hemen se yô.’ Kpa Samuel soo u eren nahan ga, sha ci u sha jighilii yô Yehova ka tor ve. Kpa Yehova kaa a na er a̱ ungwa imo i ior nav.

1 Samuel 1:1-28; 2:11-36; 4:16-18; 8:4-9.



Mbampin

  • Iti i wanakiriki u a lu ken foto heen ne ér ana, man ka unô ve lu vea naa?
  • Hana er msen sha iyange igen i á za ken tabernakel u Yehova ér nyi, man Yehova ungwa msen na la nena?
  • Samuel lu anyom a me ve í tôô un í yem a na sha u a̱ za er tom ken tabernakel u Yehova, man ngô na eren un nyi hanma inyomo?
  • Ati a ônov mba Eli mba nomso mbara ka ana man ana, man ve lu unô ioro?
  • Yehova yila Samuel nena, man á kaa a na ér nyi?
  • Samuel vesen yô, á hingir nyi oro, man zum u á bee iyol yô lu nyi kwagh i ere?

Mbampin mbagenev

  • Ôr 1 Samuel 1:1-28.

    Ka ikyav i dedoo i nyi Elkana a ver mba ve lu ityough hen tsombor la sha u hemen tsombor ve ken mcivir u mimi? (1 Sam. 1:3, 21; Mat. 6:33; Fil. 1:10)

    Ishima i Hana taver zum u á tagher a mzeyol u taver tsung la tese se nyi kwagha? (1 Sam. 1:10, 11; Ps. 55:22; Rom. 12:12)

  • Ôr 1 Samuel 2:11-36.

    Eli hemba civir ônov nav a Yehova nena, man kwagh ne ka icintan hen a vese nena? (1 Sam. 2:22-24, 27, 29; Dut. 21:18-21; Mat. 10:36, 37)

  • Ôr 1 Samuel 4:16-18.

    Ka loho u bo u lun ker agbar a nyiin u nyi i va a mi ken utya, man loho la bende a Eli nena?

  • Ôr 1 Samuel 8:4-9.

    Mbaiserael yange ve vihi Yehova ishima nena, man se sue Tartor na sha jighjigh nyian nena? (1 Sam. 8:5, 7; Yoh. 17:16; Yak. 4:4)