Aver yem sha atineakaa

Aver yem sha mver u atineakaa

Kwaghôron u sha 47: Ormbaiv ken Iserael

Kwaghôron u sha 47: Ormbaiv ken Iserael
Akan ngu yeren kwagh u a ii la

NENGE kwagh u or ne á lu yeren ken tenti na ne! Ka gôgôikondo i doonashe, man gbenger zenaria kua agbenger a azurfa. A tôô á ken gar u Yeriko. Kpa ka nyi kwagh i doo u ma á er a akaa a ken Yeriko ne? Ú umbur kpa?

Yange gba u a tim á, man zenaria kua azurfa la yô yange gba u á za a mi á za haa ken akwati u inyar u ken tabernakel u Yehova. Nahan ior mban ve hemba Aôndo ato. Ve ii kwagh u a lu sha ci u Aôndo yô. Iti i or shon er Akan, man mba ve lu vea na mban ka mba ken tsombor na. De se nenge kwagh u a ze hemen yô.

Er Akan yange iin akaa ne kera yô, Yosua tindi ior mbagenev er ve̱ za nôngo ityav a gar u Ai. Kpa i za hemba ve ityav. I wua mbagenev, man mba ve shi mbara ve yevese. Ishima vihi Yosua ker kpishi. A yav a cir ishigh inya nahan a er msen hen Yehova a kaa er: ‘Kanyi ú de wer imba kwagh ne i er se?’

Yehova kaa a na er: ‘Mough sha! Iserael e̱r isholibo. Ve tôô akaa a genegh a yange gba u vea tim yô kua a yange gba u vea za haa ken tabernakel u Yehova yô. Ve ii gôgôikondo i doonashe man ve koso ken myer. Me kera na ne iveren ga zan zan saa ne tim i̱, kua or u nan ii akaa la kpaa.’ Yehova kaa er una tese Yosua or u nan tee akaa la yô.

Nahan Yosua kohol ior cii ijiir i môm, man Yehova dugh or ifer Akan. Akan kaa er: ‘M er isholibo. Yange m nenge a gôgôikondo i doonashe, kua gbenger u zenaria man agbenger a azurfa la. A doom ishima kpishi nahan man m tôô á. Ú zua a min m time ihungwa m ii ken tenti wam.’

Er mba za dughun akaa ne mba ve a min hen Yosua yô, a kaa a Akan er: ‘Ka nyi ú er se ican nahana? Yehova una er u ican nyian ne!’ Nahan ior cii ve ta Akan awen kua tsombor na cii ve kpe. Kwagh ne tese er mayange akaa a alu a̱ ase ga yô se̱ de tôôn ga gaa?

Kwagh ne been kera yô Iserael shi za sha u za nôngon ityav a Ai. Kwa ne yô Yehova wase ior nav, nahan ve hemba ityav.

Yosua 7:1-26; 8:1-29.



Mbampin

  • Or u ú nenge a na ken foto heen a lu iin akaa a injaa a i tee ken Yeriko ne ka ana, man ka unô ve lu wasen un nee?
  • Hii nan ve kwagh u Akan vea tsombor na ve er la lu kwaghbo u vesene?
  • Yosua yange pine er i hii ve ior i Ai i̱ hembe Mbaiserael ityav yô, nahan Yehova kaa a na ér nyi?
  • Mba ve a Akan kua tsombor na cii hen Yosua yô, i er a ve nena?
  • Ijir i yange i ôr Akan la la tese se nyi kwagh?

Mbampin mbagenev

  • Ôr Yosua 7:1-26.

    Msen u Yosua er la tese nyi sha kwagh u ikyaryan na vea Orgbanakaa? (Yos. 7:7-9; Ps. 119:145; 1 Yoh. 5:14)

    Ikyav i Akan la tese nyi, man kwagh la ka icintan hen a vese nena? (Yos. 7:11, 14, 15; Anz. 15:3; 1 Tim. 5:24; Heb. 4:13)

  • Ôr Yosua 8:1-29.

    Kanyi i gbe u se ayol a ase se er sha ci u tiônnongo u Kristu nyiana? (Yos. 7:13; Lev. 5:1; Anz. 28:13)