Aver yem sha atineakaa

Aver yem sha mver u atineakaa

Kwaghôron u sha 46: Girgar U Yeriko

Kwaghôron u sha 46: Girgar U Yeriko

KANYI i ne girgar u Yeriko ne a lu yôhôlô? Ka inja er i ta zege bom sha mi yô. Kpa sha ayange la ubom lu ga; ugbughka tsô kpaa i lu a mi ga. Ka ivande igen i Yehova! De se hen se fa e̱r yange kwagh ne e̱r yô.

Girgar u Yeriko ngu yôhôr

Kegh ase ato ungwa kwagh u Yehova a ôr a Yosua la: ‘We man mbautyaav ough cii ka u ne ningir gar la. Ningir nen un kwa môm hanma iyange zan zan ayange ataratar. Tôô nen areki u ikuryan ningir nen a min. Upristi utaankaruhar ve̱ yemen ken hemen na man shi ve̱ tôngon ikoriyôngo ve.

‘Sha iyange i sha utaankaruhar la yô ningir nen gar kwa taankaruhar. Tsô tôngo nen ikor tuee, man hanmaor nana̱ gbidye vaautya taver taver. Nahan girgar la una yôhôr una haa inya!’

Yosua kua ior cii ve e̱r kwagh u Yehova kaa la. Er ve lu ningir la, hanmaor cii nan lu viing. Or môm tsô kpaa nan lam ga. Kwagh u i lu ungwan tseegh yô ka ayôôso a ikor ve i tôngon la kua acin a shin angahar a ve. Mbaihomov mba ior mba Aôndo mba ken Yeriko vea lu a mciem tsô. Ú nenge a kor u mou u nyian ú ú sen sha ihula i iyou heela la kpa? Ka ihula i iyou i̱ ana? Een, Rahabi er kwagh u yange mbamkerev mba uhar mbara kaa un er a̱ er la. Tsombor na cii mba ken atô mba kenger kwagh u á lu zan hemen la vea na imôngo.

Yosua

Ken masejime, sha iyange i sha utaankaruhar la yô, er mba ningir gar la kwa taankaruhar yô, ikor gba imo, mbautyaav gbidye ivaa, man girgar la yôhôr. Tsô Yosua kaa er: ‘Wua nen hanmaor u nan lu ken gar la cii shi nande nen un. Nande nen hanmakwagh cii. Tsegha nen azurfa, zenaria, togula kua iyôugh ki iligh, sha u za haan mbi ken akwati u inyar u ken tenti u Yehova.’

Hen mbamkerev mba uhar mbara yô, Yosua kaa er: ‘Nyôr nen ken iyou i Rahabi, man due nen a na kua tsombor na cii ken won.’ Nahan Rahabi aa tsombor na cii ve war, vough e̱r mbamkerev mbara ve bum a na nahan.

Yosua 6:1-25.



Mbampin

  • Yehova yange kaa a mbautyaav man upristi ér ve er nyi ayange ataratara?
  • Lu u ior mban vea er nyi sha iyange i sha utaankaruhar laa?
  • Er ú nenge ken foto ne nahan, girgar u Yeriko ngu eren nena?
  • Er nan ve tsar u nyian la a lu sha windou heelaa?
  • Yosua yange kaa a mbautyaav mbara ér ve er nyi a ior mba ken gar laa, kpa azurfa man zenaria man togula kua iyôugh ki iligh yô, a̱ kaa ér ve er nyi a mini?
  • I kaa a mbamkerev mba uhar mbara ér ve er nyi?

Mbampin mbagenev

  • Ôr Yosua 6:1-25.

    Mningir u Mbaiserael ningir Yeriko kwa taankaruhar la ngu kwagh môm a tom u pasen kwagh u Mbashiada mba Yehova ve lu eren sha ayange a masejime ne nena? (Yos. 6:15, 16; Yes. 60:22; Mat. 24:14; 1 Kor. 9:16)

    Yange i ôr kwaghôron u profeti u a lu ken Yosua 6:26 la anyom kar 500 man va kure vough nena, man kwagh la tese se nyi sha kwagh u mkaanem ma Yehova? (Yos. 6:26; 1 Utor 16:34; Yes. 55:11)