Aver yem sha atineakaa

Aver yem sha mver u atineakaa

Kwaghôron u sha 31: Mose man Aron Ve Za Nenge a Farao

Kwaghôron u sha 31: Mose man Aron Ve Za Nenge a Farao

YANGE Mose hidi ken Igipiti yô, a ôr anngô na Aron kwagh u uivande mbara cica cii. Man shi er yange Mose kua Aron mba tesen Mbaiserael uivande mbara yô, ior cii ve na jighjigh er Yehova ngu a ve.

Tsô Mose man Aron ve za sha u za nengen a Farao. Ve za kaa a na er: ‘Yehova Aôndo u Iserael kaa er: “De ior av ve̱ yem ken taaikyôngo ve̱ za civir mo keregh ayange atar.” ’ Kpa Farao kaa er: ‘M na jighjigh ken Yehova ga. Man shi me de mer Iserael a yem ga.’

Yange ishima vihi Farao keregh, sha ci u yange ior soo sha u vea zua a shighe u vea mem tom u eren vea za civir Yehova yô. Nahan a kighir ve sha u ve̱ seer a seer u eren tom yô. Mbaiserael di ve gema ve wa̱r a Mose sha atsan a i seer u nan ve la, nahan vihi Mose kpishi. Kpa Yehova kaa a na er a̱ de we iko ga. ‘Me er sha er Farao una de ior av vea yem yô,’ Yehova kaa nahan.

Mose man Aron tile sha ishigh ki Farao

Mose man Aron shi ve za sha u za nengen a Farao. Kwa ne yô ve er ivande. Aron kende gbough nagh hen inya, man ku hingir zegeiyô. Kpa mbaerenahir mba Farao di kpaa ve kende igbough vev hen inya, man iyô due je. Kpa, nenge ase! Iyô i Aron i ngin yan iyô i mbaerenahir ne. Nahan cii kpaa Farao venda u nan Mbaiserael gbenda er ve̱ yem.

Nahan shighe va kuma u Yehova una tese Farao kwagh u vesen yô. Ú fa er yange er kwagh ne kpa? Lu sha u van a atsan 10, shin mbamzeiyol mbavesen, sha Igipiti.

Atsan ne kpishi nga eren nga karen kera yô, Farao tindi er i̱ za yila Mose a̱ va, man a kaa er: ‘Er sha u ican ne ia bee yô, man me de Iserael ve̱ yem.’ Kpa ican la ia been yô, Farao di a gema ishima na. A venda u den ior mbara er ve̱ yem. Kpa, ken masejime, sha m-bee u ican i sha 10 la yô, Farao na Mbaiserael gbenda er ve̱ due kera.

Ú fa hanmô atsan a 10 la kpa?

Ekesodu 4:27-31; 5:1-23; 6:1-13, 26-30; 7:1-13.



Mbampin

  • Ivande i Mose man Aron ve er la bende a Mbaiserael nena?
  • Mose man Aron ve za kaa a Farao ér nyi, man Farao gema kaa ér nyi?
  • Er ú nenge foto ne nahan, Aron yange kende gbough nagh hen inya maa nyi kwagh i ere?
  • Yehova yange tsaha Farao nena, man Farao gema er nyi?
  • Yange mba ve a ican i sha pue la yô, nyi kwagh i ere?

Mbampin mbagenev

  • Ôr Ekesodu. 4:27-31:23 man 5:1-23.

    Inja i kwagh u Farao yange ôr ér “M fa TER ga” la ér nyi? (Eks. 5:2; 1 Sam. 2:12; Rom. 1:21)

  • Ôr Ekesodu 6:1-13, 26-30.

    Ka sha nyi gbenda Yehova yange pase iyol na hen Aberaham man Isaka man Yakob ga? (Eks. 3:13, 14; 6:3; Gen. 12:8)

    Er se fe ser Mose yange nenge wener un kuma u zan ityom i̱ í tindi un la ga, kpa Yehova tindi un nahan, ka se ken ishima nena? (Eks. 6:12, 30; Luka 21:13-15)

  • Ôr Ekesodu 7:1-13.

    Mose vea Aron yange ve cighir ishima ve pase Farao ijirôron i Yehova nahan, ve ver mbacivir Yehova nyian ikyav i nyi? (Eks. 7:2, 3, 6; Aer. 4:29-31)

    Ka sha nyi gbenda Yehova yange tese ér un hemba mbaaôndo mba Igipiti? (Eks. 7:12; 1 Kron. 29:12)