Ú FA ior mba Yakob a lu lamen a ve ne kpa? Er lu sha gbenda ayange kpishi yô, Yakob va zua a ve hen kpejôr. Ve lu nengen sha iyôngo ve. Yakob pine ve er: ‘Ne due hana?’

Ve kaa er: ‘Ka ken Haran.’

Yakob pine ve er: ‘Ne fa Laban kpa?’

Ve rumun er: ‘Een. Nenge, wan na u kwase Rahel ngura van a ilev la.’ Ú nenge a Rahel er á lu van ken ca la kpa?

Yakob nengen Rahel a iyôngo i anngô u ngô na Laban yô, a kporom a za menger iwen sha zwa u ijôr kera sha er iyôngo ia ma yô. Tsô Yakob suse Rahel zwa shi ôr un or u un lu yô. Saan un iyol kpishi, nahan a za ayem a za kaa ter na Laban.

Saan Laban iyol sha mve u Yakob va sha u una tsa vea na la. Man er Yakob pin er una vôso Rahel yô, doo Laban kpishi. Nahan cii kpaa, a kaa a Yakob er a̱ shile un tom ken sule anyom ataankarahar sha ci u Rahel. Er Rahel doo un ishima yum yô Yakob er kwagh ne. Kpa shighe va kom u ivesegh yô, ú fa kwagh u yange er kpa?

Laban na Yakob wan na u kwase u vesen Lea a u ma na un Rahel la. Er Yakob lumun er shi una seer shilen Laban tom anyom ataankarahar yô, Laban shi na un Rahel sha u a̱ lu kwase na yô. Sha ayange la yô Aôndo na ian sha u ior ve̱ er kasev i hemba môm yô. Kpa hegen yô, er Bibilo i tese nahan, ka u or nana lu a kwase môm tseegh.

Genese 29:1-30.