Aver yem sha atineakaa

Aver yem sha mver u atineakaa

Kwaghôron u sha 5: Uma u Ican Hii

Kwaghôron u sha 5: Uma u Ican Hii

KEN won u sule u Eden la, Adam man Ifa ve lu a mbamzeiyol kpishi. Yange gba u vea er tom taveraa sha u vea zua a kwaghyan ve yô. Sha ityough ki ikon i umen atam a doonashe yô, ve nenge a toho man ihila kpishi mende ape ve lu la. Ka kwagh u a er shighe u Adam man Ifa ve hemba Aôndo ato nahan ve kera lu ahuraior a Na ga je la.

Adam ngu eren tom vea wan na kpoghuloo

Kpa u hemban vihin je yô, Adam man Ifa ve hii u kpen. Umbur, Aôndo yange ta ve icin je er vea kpe keng aluer ve ya ityamegh ki kon ugenegh la yô. Ka shami, sha iyange i ve ya la je man ve hii u kpen. Yange ve tese lanegh tsô sha er ve venda u ungwan Aôndo yô!

Ônov mba Adam man Ifa cii yange i mar ve shighe u Aôndo zenda mbamaren vev ken sule u Eden kera yô. Inja na yô ka u ônov mban kpaa á gba u vea bee iyol shi vea kpe.

Aluer Adam man Ifa yange vea hembe Yehova ato ga yô, uma ma á lu kwagh u saanyol sha ci ve kua ônov vev. Ve cii ma ve lu uma gbem sha won ken msaanyol shin tar. Or môm kpa ma i lu u nana bee iyol, nana gba angev shi nana kpe ga.

Aôndo soo er ior ve̱ lu uma gbem sha won ken msaanyol, man shi A tôndo zwa kpaa er ken hemen yô vea lu nahan. Ka u tar cii ua engem tseegh tsô ga, kpa ior cii vea lu gbang gbang. Man hanmaor shin tar nana lu huror u hanmaor man u Aôndo kpaa.

Ifa vea ônov nav

Kpa Ifa yange kera lu huror u Aôndo ga. Nahan maren ônov yô, lu un kwagh u ican kpishi. A zua a mnyoon. U hemban Yehova ato la mimi je yange va un a ijungwen kpishi, shin ú lumun a mi ga?

Adam man Ifa yange ve lu a ônov mbanomso man mbakasev kpishi. Er mba maren wannomso ve u hiihii la yô, ve ii un iti er Kain. Ve ii wannomso ve u sha uhar la iti er Abel. Kanyi yange i e̱r ve? Ú fa kpa?

Genese 3:16-23; 4:1, 2; Mpase 21:3, 4.



Mbampin

  • Adam man Ifa yange ve due ken sule u Eden la kera nahan, uma lu ve nena?
  • Kanyi yange i̱ hii u eren Adam man Ifa, man lu nyi i̱ na ve kwagh lu nahana?
  • Yange er nan ve hingir u ônov mba Adam man Ifa vea beeyol, vea kpe kpaa?
  • Luun er Adam man Ifa yange vea ongo imo i Yehova nahan, uma ve kua uma u ônov vev cii ma á lu nena?
  • Ihyembeato i Ifa la yange i̱ va un a mnyoon inja nena?
  • Ati a ônov mba nomso mba uhar mba Adam man Ifa hii maren la ér nyi?
  • Mbayev mbagenev mba ve lu ken foto heen ne ka mbayev mba ana?

Mbampin mbagenev

  • Ôr Genese 3:16-23 man 4:1, 2.

    Ifan i í wa tar la yange i̱ kôr Adam nena? (Gen. 3:17-19; Rom. 8:20, 22)

    Iti i Ifa, í í pase inja i í ér ka “U A Lu Uma La,” í kôr vough inja nena? (Gen. 3:20)

    Shighe u Adam man Ifa er isholibo kera la je kpa, Yehova wa ve ikyo her nena? (Gen. 3:7, 21)

  • Ôr Mpase 21:3, 4.

    Ka “akaa a tse” amba er nyi man nyi nahan ú lu veren ashe keghen wer i̱ va kar a mi kera?