Aver yem sha atineakaa

Aver yem sha mver u atineakaa

Kwaghôron u sha 2: Sule u Doonashe

Kwaghôron u sha 2: Sule u Doonashe

NENGE tar u u lu heen ne! Hanmakwagh engem doo tsô! Nenge toho man ikon, uimondon man hanma inyamtoho cii. Ú fatyô u tesen hen ape nor man ubegha ve lu kpa?

Inyamtoho i ken sule u Eden

Sule u doonashe ne yange ú va inja nena? Ka shami, de se nenge er Aôndo lu sôr tar ver vough sha ci wase yô.

Hiihii yô, Aôndo yange er toho er u̱ cir tareghnyaagh. Man shi á er imendenev mbi kiriki anza kposo kposo kua toho man ikon. Akaa a menden ne ka a wase u nan tar mdoom. Kpa ka a er kwagh i hemba nahan. Akaa ne kpishi ka a na se akaayan a nyohon tsung kpaa.

Ken hemen yô Aôndo shi gba ishu er i̱ zenden shin mnger man inyon er i̱ purugh sha kwavaôndo. A gba iwa man ukpatema man anyinya; ishôso i vesen man ishôso i kiriki. Ka ishôso i nyi i lu ikyua a ya wouwe? Doo u a saan se iyol er Aôndo a gbe akaa ne cii sha ci wase gaa?

U masen been yô, Aôndo er vegher môm shin tar hemba doon cii. A yila ijiir ne er sule u Eden. U lu vough. Hanmakwagh ken ú cii lu u doonashe. Man Aôndo yange soo er tar cii u hingir vough er sule u engem u a̱ gba la nahan.

Kpa shi hide kenger foto u sule ne yôô. Ú fa kwagh u yange Aôndo nenge er a ban kpa? De se nenge.

Genese 1:11-25; 2:8, 9.



Mbampin

  • Aôndo sôr tar nena ve, ú hingir ya wasa?
  • Yila ati a ishôso igen i Aôndo yange gba la. (Nenge foto ne.)
  • Er nan ve sule u Eden la yange ú hemba mdoom ciilii?
  • Aôndo yange soo ér tar cii u̱ hingir nyi?

Mbampin mbagenev

  • Ôr Genese 1:11-25.

    Sha iyange i sha utar la, Aôndo gba nyi? (Gen. 1:12)

    Lu nyi i̱ er sha iyange i̱ sha unyiin i igbetar laa? (Gen. 1:16)

    Ka atô anyam kposo kposo a nyi Aôndo gba sha iyange i igbetar i sha utaan man i sha ataratara? (Gen. 1:20, 21, 25)

  • Ôr Genese 2:8, 9.

    Ka ikyon ihiar i nyi Aôndo ver ken sule la í due kposo a ikyon igen ciili, man ikyon ne í tile sha nyi kwagha?